Luk 2:1-52
2 Whaọ, evaọ oke yena, Siza Ọgọstọs o te woro uzi inọ a kere edẹ ahwo nọ a rrọ otọakpọ na soso fihọ otọ.
2 (Odẹ-ukerefihotọ ọsosuọ nana o via okenọ Kwiriniọs ọ jọ ọba Siria.)
3 Ahwo na kpobi a tẹ nyai kere odẹ fihọ otọ evaọ ọvuọ ẹwho riẹ.
4 Josẹf omariẹ o no ẹwho Nazarẹt evaọ Galili, kpohọ ẹwho Devidi nọ a re se Bẹtlẹhẹm evaọ Judia, fikinọ ọ jọ ohwo unuwou Devidi.
5 Tei te Meri nọ a gbẹ ruọ orọo no, nọ o dihọ te eyẹ no a gbẹ nya re a kere odẹ fihọ otọ.
6 Nọ a jọ obei, oke u te te nọ o re ro yẹ.
7 O te yẹ ọmọzae, ọmọ ọsosuọ riẹ, ọ tẹ rehọ ewẹ-ohọ variẹ iẹe jẹ wọe kiẹzẹ etehe nọ a re fi emu họ kẹ erao keme a ruẹ uvumọ oria wohọ evaọ iwou nọ erara a re wohọ họ.
8 Evaọ ubrotọ ọvo yena re, ithuru-igodẹ e jẹ rria obọ ẹwọ nọ i je rou* ithuru rai evaọ aso.
9 Idudhe na ukọ-odhiwu Jihova* o te dikihẹ aro rai, oruaro Jihova* u te lo wariẹ ae họ, ozọ u te mu ae gaga.
10 Rekọ ukọ-odhiwu na ọ tẹ ta kẹ ae nọ: “Jọ ozọ u mu owhai hi, keme rri! mẹ be vuẹ owhai emamọ usi orọ oghọghọ ulogbo nọ ahwo kpobi a ti wo.
11 Keme nẹnẹ na a jọ ẹwho Devidi yẹ osiwi kẹ owhai, Kristi Olori na.
12 Onana họ oka nọ wha ti ro vuhu iei: Wha te ruẹ ọmọfofa nọ a rehọ ewẹ-ohọ variẹ nọ a ro kiẹzẹ etehe nọ a re fi emu họ kẹ erao.”
13 Idudhe na, ogbaẹmo ikọ-odhiwu buobu a te kuomagbe ukọ-odhiwu na, bi jiri Ọghẹnẹ inọ:
14 “Oruaro u te Ọghẹnẹ evaọ obọ odhiwu, gbe udhedhẹ kẹ ahwo nọ a wo emamọ eva* evaọ otọakpọ.”
15 Fikiere nọ ikọ-odhiwu na a nyase ae ba kpobọ odhiwu no, ithuru-igodẹ na a tẹ be ta kẹ ohwohwo nọ: “Wha joma nya ovavo kpobọ Bẹtlẹhẹm re ma ruẹ oware nọ o via na, nọ Jihova* o ru omai riẹ na.”
16 A tẹ nya vẹrẹ vẹrẹ a tẹ ruẹ Meri avọ Josẹf gbe ọmọfofa na nọ a ro kiẹzẹ etehe nọ a re fi emu họ kẹ erao.
17 Nọ a ruẹ onana, a te gbiku oware nọ a ta kẹ ae kpahe ọmọ nana.
18 Eme nọ ithuru-igodẹ na a ta i gbe ahwo kpobi nọ a yo rai unu,
19 rekọ Meri o te mu eme nana kpobi họ ẹyọrọ evaọ udu riẹ, be jọ udu riẹ roro otofa eware nana.
20 Kẹsena, ithuru-igodẹ na a te zihe kpo, be kẹ Ọghẹnẹ orro je bi jiri ei kẹ eware kpobi nọ a yo jẹ ruẹ na, enọ e jọ wọhọ epanọ a vuẹ rai.
21 Nọ o te edẹ eree no, oke nọ a rẹ rọ yawo iẹe, a te se odẹ riẹ Jesu, odẹ nọ ukọ-odhiwu na ọ ta nọ a re sei taure a te ti dieva riẹ họ.
22 Ofariẹ, nọ oke nọ a re ro ru ae oma fo u te wọhọ epanọ Uzi Mosis o ta, a tẹ rehọ ọmọ na ziọ obọ Jerusalẹm re a rehọ iẹe ziọ aro Jihova,*
23 wọhọ epanọ a kere fihọ Uzi Jihova* inọ: “A rẹ rọ ọmọzae ọsosuọ kpobi mudhe kẹ Jihova.”*
24 A te dhe idhe wọhọ epanọ o rrọ evaọ Uzi Jihova:* “irueruẹ ivẹ hayo ilekuku ivẹ.”
25 Whaọ, ọzae jọ ọ jọ Jerusalẹm nọ a re se Simiọn, ọzae nana o kiẹrẹe jẹ rrọ ọgba-egagọ, ọ jẹ hẹrẹ okenọ Ọghẹnẹ ọ te rọ kẹ Izrẹl omosasọ, yọ o wo ẹzi ọfuafo na.
26 Ofariẹ, Ọghẹnẹ ọ rehọ ẹkwoma ẹzi ọfuafo na dhesẹ kẹe inọ o ti whu hu bẹsenọ ọ rẹ ruẹ Kristi na no, ọnọ Jihova* o vi ze.
27 Ẹzi ọfuafo na ọ tẹ kpọe ziọ obọ etẹmpol na, nọ ọsẹgboni na a wọ Jesu ọmọfofa na ze ti ru wọhọ epanọ Uzi na o ta,
28 ọ tẹ wọ ọmọ na họ abọ riẹ o te jiri Ọghẹnẹ inọ:
29 “O, Olori Ehrugbakpọ, odibo ra ọ rẹ sai whu dhedhẹ enẹna wọhọ epanọ whọ ta,
30 keme ibiaro mẹ e ruẹ ọnọ whọ be rọ kẹ esiwo no
31 nọ whọ ruẹrẹhọ no evaọ iraro ahwo na kpobi,
32 elo nọ o ti si ebi no erẹwho na, ọ tẹ jẹ rrọ oruaro ọrọ ahwo ra Izrẹl.”
33 Eware nọ a be ta kpahe ọmọ na i te je gbe ọsẹ gbe oni riẹ unu.
34 Ofariẹ, Simiọn ọ tẹ lẹ olẹ eghale kẹ ae, ọ tẹ ta kẹ Meri oni ọmọ na nọ: “Rri! Ọmọ nana ọ te lẹliẹ ahwo buobu kie jẹ lẹliẹ ahwo buobu wariẹ kpama evaọ Izrẹl, ọ te jẹ jọ oka nọ a te ta ẹme mukpahe
35 (ẹhẹ, a ti duwu ọgbọdọ othethei họ owhẹ lafi) re iroro nọ e rrọ udu ahwo buobu e ruẹsi dhesẹ oma via.”
36 Whaọ, ọruẹaro-aye jọ ọ jariẹ nọ a re se Anna, ọnọ ọ rrọ ọmọ Fanuẹl ọrọ orua Asha. Aye nana ọ kpako no yọ ikpe ihrẹ ọvo ọ jọ kugbe ọzae riẹ nọ a rọo no,
37 ọ jọ aye-uku nọ ọ kpako te ikpe udhone gbe ene no. Ọ jẹ hai kpohọ etẹmpol na ẹsikpobi, be gọ Ọghẹnẹ taso tuvo, siọ emuọriọ ba, jẹ lẹ elẹ-ayare.
38 Evaọ auwa yena, ọ tẹ nya kẹle ae o te bi yere Ọghẹnẹ jẹ be ta ẹme kpahe ọmọ na kẹ ahwo kpobi nọ a be hẹrẹ esiwo Jerusalẹm.
39 Fikiere nọ a ru eware kpobi wọhọ epanọ Uzi Jihova* o ta no, a te zihe kpohọ ẹwho rai Nazarẹt, evaọ obọ Galili.
40 Ọmọ na ọ tẹ be rro, jẹ vọ avọ areghẹ, je wo ọjẹrehọ Ọghẹnẹ ẹsikpobi.
41 Whaọ, ọsẹgboni riẹ a jẹ hai kpohọ Jerusalẹm kukpe kukpe kẹ ehaa Ọnyavrẹ na.
42 Nọ ọ jọ ikpe ikpegbivẹ, a kpohọ ehaa na wọhọ epaọ uruemu rai.
43 Nọ ehaa na i kuhọ no nọ a je kpo, Jesu ọ tẹ daji Jerusalẹm, yọ ọsẹgboni riẹ a muẹrohọ họ.
44 Fikinọ a roro nọ ọ jọ udevie ahwo nọ a gbe je kpo na, a nya okpẹdoke soso kẹsena a te mu ei họ ẹgwọlọ evaọ udevie imoni gbe egbẹrioma rai.
45 Fikinọ a ruẹ e riẹ hẹ, a te zihe kpobọ Jerusalẹm a tẹ romatotọ gwọlọ iẹe.
46 Nọ edẹ esa e vrẹ no, a te duku ei evaọ etẹmpol na nọ ọ keria kugbe iwuhrẹ na be gaviezọ kẹ ae jẹ be nọ ae enọ.
47 Rekọ u te je gbe ahwo kpobi nọ a jẹ gaviezọ kẹe unu fiki epanọ o wo otoriẹ te gbe iyo nọ ọ jẹ kẹ.
48 Nọ ọsẹgboni riẹ a ruẹ e riẹ u te gbe ai unu, oni riẹ ọ tẹ ta kẹe nọ: “Ọmọ, fikieme who je ru omai enẹ? Mẹ avọ ọsẹ ra ma rrọ awawa anwọ ẹsiẹe be gwọlọ owhẹ.”
49 Rekọ ọ tẹ ta kẹ ae nọ: “Fikieme wha jẹ rọ gwọlọ omẹ? Kọ wha gbẹ riẹ nọ mẹ rẹ jọ uwou Ọsẹ mẹ?”
50 Rekọ, a wo otoriẹ ẹme nọ ọ jẹ ta kẹ ae na ha.
51 Kẹsena o te lele ai zihe kpobọ Nazarẹt, yọ ọ ruabọhọ jẹ romakpotọ* kẹ ae. Ofariẹ, oni riẹ ọ jẹ nabi fi eme nana kpobi họ udu.
52 Jesu ọ tẹ be rro, yọ areghẹ riẹ o bi vihọ, je bi wo ọjẹrehọ evaọ obọ Ọghẹnẹ gbe ahwo.
Eme-Obotọ
^ Hayo “rroro.”
^ Rri oria Otofa Eme.
^ Rri oria Otofa Eme.
^ Hayo “ahwo nọ ọ jẹrehọ.”
^ Rri oria Otofa Eme.
^ Rri oria Otofa Eme.
^ Rri oria Otofa Eme.
^ Rri oria Otofa Eme.
^ Rri oria Otofa Eme.
^ Rri oria Otofa Eme.
^ Rri oria Otofa Eme.
^ Hayo “je yoẹme.”
