Luk 20:1-47
20 Evaọ ẹdẹ jọ nọ o je wuhrẹ ahwo evaọ etẹmpol na je bi whowho usi uwoma na, ilori izerẹ na gbe otu ikere-obe na avọ ekpako na a tẹ nyaze,
2 a tẹ ta kẹe nọ: “Ta kẹ omai, udu vẹ who bi ro ru eware nana? Hayo ono ọ kẹ owhẹ udu nana?”
3 Ọ tẹ kpahe kẹ ae nọ: “Mẹ te nọ owhai onọ jọ re, wha vẹ kẹ omẹ uyo riẹ:
4 Bovẹ udu nọ Jọn ọ jẹ rọ họ ahwo ame u no ze, obọ odhiwu manikọ obọ ahwo?”
5 A tẹ jẹ ta kẹ omoma rai nọ: “Ma tẹ ta nọ, ‘Obọ odhiwu,’ ọ te ta nọ, ‘Emejabọ wha gbẹ rọwo iẹe he?’
6 Rekọ ma tẹ ta nọ, ‘Obọ ahwo,’ ahwo na kpobi a te rọ itho fi omai kpe, keme u mu rai ẹro nọ Jọn yọ ọruẹaro.”
7 Fikiere a tẹ kuyo nọ a riẹ ohwo nọ ọ kẹ riẹ udu hu.
8 Jesu ọ tẹ ta kẹ ae nọ: “Mẹ be vuẹ owhai udu nọ me bi ro ru eware nana gbe he.”
9 Kẹsena o te mu ọtadhesẹ nana họ ẹta kẹ ahwo na, inọ: “Ọzae jọ ọ kọ ọgbọ evaene, ọ tẹ rehọ iẹe kẹ enọ e rẹ rẹrotei, o te kpohọ erẹ evaọ orẹwho ofa evaọ etoke krẹkri.
10 Nọ ezi nọ ibi na e rẹ rọ ware u te, o te vi ọrigbo jọ bru enọ e be rẹrote ọgbọ na re a kọrọ ibi ọgbọ na jọ kẹe. Rekọ enọ e be rẹrote ọgbọ na a tẹ rọ eware fae a te vi ei zihe ababọ.
11 Ọ tẹ wariẹ vi ọrigbo ọfa. A tẹ rọ eware fa ọyena re, ru ei oma vo, a te vi ei zihe ababọ.
12 Ọ tẹ wariẹ vi ọfa, ọrọ avọ esa; a tẹ jẹ nwa ọnana oma je gele iei fihọ otafe.
13 Fikiere ọnọ o wo ọgbọ na ọ tẹ ta nọ, ‘Kọ eme me re ru? Me ti vi ọmọ mẹ, oyoyou mẹ na. Ẹsejọhọ a te rọ adhẹẹ kẹ ọnana.’
14 Nọ enọ e be rẹrote ọgbọ na a kparo ruẹ e riẹ, a tẹ ta kẹ ohwohwo nọ, ‘Ọnana họ ọreuku na. Wha joma kpei no re ukuoriọ na u zihe ruọ omai.’
15 Fikiere a te gele iei no ọgbọ na a te kpei no. Kọ eme ohwo nọ o wo ọgbọ na o ti ru ae?
16 Ọ te nyaze o ve kpe enọ e be rẹrote ọgbọ na no, ọ vẹ rehọ ọgbọ na kẹ amọfa.”
Nọ a yo onana, a tẹ ta nọ: “Othohwowa!”
17 Rekọ o te rri rai ọ tẹ ta nọ: “Kọ eme họ otofa eme nana nọ a kere na, inọ: ‘Utho nọ ebebabọ na a se, oye u zihe ruọ utho ubienẹ nọ o mai wuzou no na’?
18 Ohwo kpobi nọ o kie fihọ ehru utho yena o ti bru ibribro. Yọ ohwo kpobi nọ utho na u kie fihọ, o te pẹhẹ iẹe no.”
19 Otu ikere-obe na gbe ilori izerẹ na a tẹ gwọlọ epanọ a re ro mu ei evaọ auwa yena, rekọ a dhozọ ahwo na, keme a vuhumu nọ ae omarai o wo họ iroro nọ ọ rọ rehọ ọtadhesẹ na ta ẹme na.
20 Nọ a fiẹrohọ iẹe ziezi no, a te vi ahwo jọ nọ a lẹlẹ rehọ igho kẹ re a nyai ru wọhọ ahwo nọ a kiẹrẹe, re a ruẹse rọ ẹmeunu riẹ kru rie, a vẹ rọ ere rehọ iẹe kẹ otu egọmeti gbe ọba na.
21 A tẹ ta kẹe nọ: “Owuhrẹ, ma riẹ nọ whọ be ta je bi wuhrẹ eware kpobi gbagba, yọ who re dhesẹ ọriẹwẹ hẹ, rekọ who re wuhrẹ edhere Ọghẹnẹ wọhọ epanọ uzẹme na o rrọ:
22 Kọ u fo re ma hwa osa-uzou kẹ Siza manikọ u fo ho?”
23 Rekọ o muẹrohọ nọ onọ ẹghẹ a be nọ, ọ tẹ ta kẹ ae nọ:
24 “Wha dhesẹ dinariọs* kẹ omẹ. Kọ uwoho gbe odẹ ono e riẹe?” A tẹ ta nọ: “Erọ Siza.”
25 Ọ tẹ ta kẹ ae nọ: “Fikiere, wha hwa eware Siza zihe kẹ Siza, rekọ eware Ọghẹnẹ kẹ Ọghẹnẹ.”
26 Whaọ a sae rọ ẹmeunu riẹ kru rie evaọ iraro ahwo na ha, rekọ uyo riẹ u gbe rai unu, a te fibo.
27 Rekọ otu Sadusi jọ, enọ e ta nọ ẹkparomatha ọ rrọ họ a tẹ nyaze a tẹ nọe nọ:
28 “Owuhrẹ, Mosis o kere kẹ omai nọ, ‘Otẹrọnọ ohwo o te whu siọ aye ba ababọ ọmọ nọ a yẹ, oniọvo riẹ ọ rẹ rehọ aye na re ọ ruẹsi yẹ ọmọ kẹ oniọvo riẹ nọ o whu no na.’
29 Whaọ, inievo ihrẹ jọ e jariẹ. Ọrọ ọsosuọ o wo aye rekọ o whu siọ aye na ba ababọ ọmọ nọ a yẹ.
30 Ọrọ avọ ivẹ ọ tẹ rehọ aye na o te je whu siọ aye na ba ababọ ọmọ,
31 ọrọ avọ esa ọ tẹ jẹ rehọ iẹe. Ere o via rite ọrọ avọ ihrẹ; aikpobi a whu siọ aye na ba ababọ ọmọ nọ a yẹ.
32 Ukuhọ riẹ, aye na o te whu re.
33 Fikiere, evaọ ẹkparomatha na, ọvẹ ọ te rehọ aye na? Keme ọ jọ aye kẹ inievo ihrẹ na.”
34 Jesu ọ tẹ ta kẹ ae nọ: “Emọ uyero-akpọ* nana a rẹ rọo, yọ a rẹ rehọ ae kpohọ orọo,
35 rekọ enọ a kuenu kẹ nọ a te ruọ uyero-akpọ nọ o be tha na je wo ẹkparomatha no uwhu ze a te rọo ho, hayo rehọ ae kpohọ orọo ho.
36 Evaọ uzẹme, a ti gbe whu hu, keme a te wọhọ ikọ-odhiwu, yọ a te jọ emọ Ọghẹnẹ fiki ẹkparomatha rai.
37 Rekọ Mosis dede o dhesẹ via inọ a te kpare enọ i whu no ze evaọ iku nọ o kere kpahe ure inwe nọ erae e jẹ jọ ware na, nọ o se Jihova* ‘Ọghẹnẹ Abraham gbe Ọghẹnẹ Aiziki gbe Ọghẹnẹ Jekọp.’
38 Ọ rrọ Ọghẹnẹ enọ i whu no ho, rekọ ọrọ enọ e rrọ uzuazọ, keme evaọ aro riẹ aikpobi a rrọ uzuazọ.”
39 Otu ikere-obe na jọ a tẹ ta nọ: “Owuhrẹ, whọ ta gba.”
40 Keme a gbẹ sae gbaudu nọe uvumọ onọ họ.
41 Fikiere ọ tẹ nọ ae nọ: “Ẹvẹ a rọ ta nọ Kristi yọ Ọmọ Devidi?
42 Kpakiyọ Devidi omariẹ ọ ta evaọ obe Ilezi nọ, ‘Jihova* ọ ta kẹ Olori mẹ nọ: “Keria obọze mẹ
43 bẹsenọ me re ru ewegrẹ ra họ oria nọ whọ rẹ rọ awọ ra kpahe.”’
44 Devidi o se rie Olori; kọ ẹvẹ ọ rọ rrọ ọmọ riẹ?”
45 Whaọ epanọ ahwo na kpobi a jẹ rọ gaviezọ na, ọ tẹ ta kẹ ilele riẹ nọ:
46 “Wha yọroma kẹ otu ikere-obe na nọ e rẹ gwọlọ ku iwu ithethei họ rọ nya wariẹ jẹ gwọlọ nọ ahwo a yere ai evaọ eria eki jẹ keria egbara obaro* evaọ iwou-egagọ gbe eria nọ e mai kpehru evaọ ehaa,
47 enọ e rẹ re uvuhu họ eyae-uku oma,* jẹ lẹ elẹ ithethei ro dhesẹ oma. Ahwo nana a ti wo obrukpe nọ ọ mae ga.”*
Eme-Obotọ
^ Rri oria Otofa Eme.
^ Rri oria Otofa Eme.
^ Rri oria Otofa Eme.
^ Rri oria Otofa Eme.
^ Hayo “nọ e mai woma.”
^ Evaọ Griki, “a rẹ re iwou eyae-uku ko.”
^ Hayo “nọ o mae gbẹdẹ.”
