Luk 21:1-38
21 Nọ o rri, ọ tẹ ruẹ edafe na nọ i bi fi igho họ itehe okẹ-unevaze na.
2 Kẹsena ọ tẹ ruẹ aye-uku oyogbere jọ nọ o fi ibiugho esese ivẹ* họ, enọ i wo emamọ aghare ọvo ho,
3 ọ tẹ ta nọ: “Uzẹme mẹ be ta kẹ owhai inọ aye-uku oyogbere nana o fi họ vi ai kpobi na.
4 Keme evaọ usu enọ e da rai obọ fia aikpobi a jọ rehọ ze kẹ okẹ, rekọ aye nana, avọ uvuhu nọ o riẹe oma, o fi onọ o wo kpobi evaọ uzuazọ riẹ họ.”
5 Oke ofa nọ ahwo jọ a jẹ ta kpahe etẹmpol na, epanọ a rọ rehọ emamọ itho gbe eware nọ a ro mudhe kẹ Ọghẹnẹ whẹ erru họ iẹe,
6 ọ tẹ ta nọ: “Rọ kpahe eware nana nọ wha be ruẹ obọnana, edẹ e be tha nọ a te nyasiọ utho ovo ba ehru utho ho, a ti kporo ai kpobi fihọ otọ.”
7 Kẹsena a tẹ nọe nọ: “Owuhrẹ, oke vẹ dẹẹ eware nana e te rọ via, kọ eme ọ te jọ oka ọrọ oke nọ eware nana e te rọ via?”
8 Ọ tẹ ta nọ: “Wha muẹrohọ otọ re a siọ owhai ba esuthọ, keme ibuobu e te rọ odẹ mẹ nyaze, ta nọ, ‘Mẹ họ ọye,’ gbe inọ, ‘Oke na o kẹle no.’ Wha lele ai hi.
9 Ofariẹ, nọ wha te yo kpahe emo gbe ozighi, jọ ozọ u mu owhai hi. Keme eware nana e rẹ via hrọ tao, rekọ ekuhọ na ọ te ze okioke yena ha.”
10 Kẹsena ọ tẹ ta kẹ ae nọ: “Orẹwho o rẹ te kpareso orẹwho, uvie o rẹ te kpareso uvie.
11 Etọ i re ti nuhu gaga, yọ no oria ruọ oria ohọo u re ti mu avọ ikpeyao nọ e te jọ; ahwo a te ruẹ eware idudu yọ eka ilogbo i ti no ehru ze.
12 “Rekọ taure eware nana kpobi e tẹ te via, ahwo a ti mu owhai je kpokpo owhai, a te rehọ owhai kpohọ iwou-egagọ ro gu ẹdhọ je fi owhai họ uwou-odi. A ti mu owhai kpohọ aro ivie gbe eba fiki odẹ mẹ.
13 U ti rovie uvẹ nọ wha re ro se isẹri.
14 Fikiere, wha gbaemu evaọ udu rai inọ wha rẹ ruẹrẹ oghẹrẹ nọ wha ti ro gu ẹkẹ-unu rai kpahotọ họ,
15 keme mẹ te kẹ owhai eme nọ wha te ta gbe areghẹ nọ enọ e be wọso owhai kpobi a te sae zadhe hayo vro ho.
16 Ofariẹ, makọ esẹgbini, inievo, imoni gbe egbẹnyusu a ti vivie owhai, yọ a ti kpe otu rai jọ,
17 yọ ahwo kpobi a ti mukpahe owhai fiki odẹ mẹ.
18 Rekọ ubioto ovo uzou rai dede u ti vru hu.
19 Wha te thihakọ, wha ti siwi uzuazọ rai.
20 “Rekọ, nọ wha tẹ ruẹ Jerusalẹm nọ egbaẹmo e wariẹ họ, wha riẹ nọ ọraha riẹ ọ kẹle no.
21 Kẹsena, jọ enọ e rrọ Judia a muhọ ẹdhẹ kpobọ igbehru, jọ enọ e rrọ eva riẹ a noi, yọ enọ e rrọ iwhre nọ e wariẹ e riẹ họ a ruọ eva riẹ hẹ,
22 keme edẹ nana yọ edẹ orukele re eware kpobi nọ a kere na e ruẹsi rugba.
23 U ti yoma gaga kẹ eyae nọ i dihọ gbe enọ i wo emọ unuevie evaọ edẹ yena! Keme uye ogaga u ti te otọ na yọ ahwo nana a te ruẹ uye.
24 A te rọ ọgbọdọ kpe ae je mu ae kpohọ igbo evaọ erẹwho efa;* yọ erẹwho* na a ti thihi Jerusalẹm họ otọ bẹsenọ oke nọ a fihọ kẹ erẹwho* na o rẹ gba no.
25 “Ofariẹ, eka e te jọ ọre, ọvẹre, gbe isi na, yọ erẹwho na e te vohẹ keme a riẹ onọ a re ru hu fiki ẹkporo abade na avọ ofu riẹ.
26 Ahwo a ti kie ewawa fiki ozọ gbe irẹro eware nọ e te via evaọ otọakpọ na, keme egaga obọ ehru na i re ti nuhu.
27 Kẹsena a vẹ te ruẹ Ọmọ ohwo nọ ọ be nyaze evaọ ẹgho avọ ogaga gbe oruaro ulogbo.
28 Rekọ nọ eware nana i te muhọ ẹvia no, wha dikihẹ kpomavi jẹ kpare uzou rai rri ehru keme esiwo rai ọ be kẹle no.”
29 Fikiere ọ tẹ rehọ ọtadhesẹ jọ ta ẹme kẹ ae, inọ: “Wha muẹrohọ ure ifigi gbe ire edekọ na kpobi.
30 Nọ e tẹ be whẹ ebe họ, wha rẹ ruẹ e riẹ kẹ omarai jẹ riẹ nọ ezi-uvo ọ kẹle no.
31 Epọvo na re, nọ wha tẹ ruẹ eware nana nọ e be via, wha riẹ nọ Uvie Ọghẹnẹ o kẹle no.
32 Uzẹme mẹ be ta kẹ owhai inọ oge ọnana ọ rẹ te vrẹ vievie he bẹsenọ eware kpobi e rẹ via no.
33 Odhiwu gbe otọakpọ e rẹ te vrẹ, rekọ eme mẹ e rẹ te vrẹ vievie he.
34 “Wha yọroma re udu rai o seba ewhrehe fiki emuọriọ obuobu gbe udi-oda ubuobu gbe awaọruọ uzuazọ, o gbẹ rrọ ere he, ẹdẹ yena o ve ti bru owhai ze idudhe
35 wọhọ epanọ agbefẹ o re mu oware idudhe na. Keme u ti kpomahọ ahwo kpobi nọ a be rria otọakpọ na.
36 Fikiere, wha jaja aro vi, wha hae lẹ olẹ-ayare ẹsikpobi re wha sae va eware nana kpobi nọ e te seba ẹvia ha na abọ, jẹ sai dikihẹ aro Ọmọ ohwo.”
37 Fikiere, evaọ oke uvo o re wuhrẹ evaọ etẹmpol na, rekọ aso o ve kpobọ ugbehru nọ a re se Ugbehru Olivi.
38 Ahwo na kpobi a vẹ nya bru rie ze obọ etẹmpol na evaọ irioke re a yo eme riẹ.
Eme-Obotọ
^ Evaọ Griki, “lẹpta ivẹ.” Rri “Lẹpta” evaọ oria Otofa Eme.
^ Evaọ Griki, “erẹwho na kpobi.”
^ Hayo “ahwo erẹwho Egedhọ.”
^ Hayo “ahwo erẹwho Egedhọ.”
