Luk 22:1-71
-
Izerẹ na a gba ẹgwae re a kpe Jesu (1-6)
-
Omaruẹrẹ–kpahe kẹ Ehaa Ọnyavrẹ urere (7-13)
-
Ẹtohọ Emu Owọwọ Olori na (14-20)
-
“Ọnọ o bi ti vivie omẹ ọ rrọ kugbe omẹ evaọ emẹjẹ na” (21-23)
-
Ẹwhọ ọgaga kpahe ohwo nọ ọ mae rro (24-27)
-
Jesu ọ re ọvọ uvie (28-30)
-
Jesu ọ ta nọ Pita ọ te vro riẹ (31-34)
-
O gwọlọ omaruẹrẹ-kpahe; egbọdọ ivẹ (35-38)
-
Olẹ Jesu evaọ Ugbehru Olivi (39-46)
-
A mu Jesu (47-53)
-
Pita ọ vro Jesu (54-62)
-
A rọ Jesu jijehwẹ (63-65)
-
A rehọ e riẹ gu ẹdhọ evaọ Sanhẹdrin (66-71)
22 Whaọ, Ehaa Ebrẹdi nọ Ọ Kare Ẹvi na, nọ a re se Ehaa Ọnyavrẹ na, ọ be kẹle no.
2 Yọ ilori izerẹ na gbe otu ikere-obe na a jẹ gwọlọ edhere nọ o kiehọ nọ a re ro kpei, keme ozọ ahwo na u je mu ae.
3 Kẹsena Setan ọ tẹ ruọ eva Judas, ọnọ a re se Iskariọt, ọnọ ọ jọ omọvo Ikpegbivẹ na,
4 ọ tẹ nyai lele ilori izerẹ gbe iletu etẹmpol na ta kpahe epanọ o re ro vivie iei kẹ ae.
5 Eva e tẹ were ae a tẹ rọwo nọ a rẹ kẹe igho isiliva.
6 Ọ tẹ rọwo, ọ tẹ be gwọlọ oke nọ u kiehọ nọ o re ro vivie iei ababọ ogbotu nọ ọ rẹ jariẹ.
7 Ẹdẹ ọsosuọ Ehaa Ebrẹdi nọ Ọ Kare Ẹvi na o te te, ẹdẹ nọ a rẹ rehọ arao Ọnyavrẹ na ro dhe idhe hrọ;
8 fikiere Jesu o te vi Pita avọ Jọn uwou inọ: “Wha nyae ruẹrẹ eware Ehaa Ọnyavrẹ na họ kẹ omai nọ ma te re.”
9 A tẹ nọe nọ: “Diẹse whọ gwọlọ nọ ma jọ ruẹrẹ eware họ?”
10 Ọ tẹ ta kẹ ae nọ: “Rri! Nọ wha tẹ ruọ okpẹwho na, ọzae jọ nọ ọ wọ othẹ-ame ọ te nyaku owhai. Wha lele iei ruọ uwou nọ ọ te ro.
11 Wha vẹ ta kẹ ọnọ o wo uwou na nọ, ‘Owuhrẹ na ọ ta nọ ma nọ owhẹ nọ: “Diẹse họ ubruwou erara nọ mẹ avọ ilele mẹ ma sae jọ re emu Ọnyavrẹ na?”’
12 Ọzae yena o ve ti dhesẹ ubruwou ehru ulogbo jọ kẹ owhai, onọ a ruẹrẹ kpahe no. Wha ruẹrẹ eware họ etẹe.”
13 A tẹ nya a tẹ ruẹ eware wọhọ epanọ ọ ta kẹ ae na, a tẹ ruẹrẹ eware họ kẹ Ọnyavrẹ na.
14 Fikiere nọ auwa na o te, tei te ikọ na a tẹ keria wariẹ emẹjẹ họ.
15 Ọ tẹ ta kẹ ae nọ: “O rrọ omẹ oja gaga inọ mẹ rẹ re emu Ọnyavrẹ nana kugbe owhai taure mẹ tẹ ruẹ uye;
16 keme mẹ be ta kẹ owhai nọ, mẹ te gbẹ wariẹ re iẹe he bẹsenọ eware kpobi nọ i wobọ kugbei i re rugba no evaọ Uvie Ọghẹnẹ.”
17 Nọ o mi egho udi, ọ tẹ lẹ yere Ọghẹnẹ, ọ tẹ ta nọ: “Wha mi, wha wọe kẹ ohwohwo re omomọvo ọ jariẹ da,
18 keme mẹ be ta kẹ owhai nọ, no umuo enẹna vrẹ, mẹ te gbẹ da udi nọ a rọ ubi-okakọ ru ofa ha bẹsenọ Uvie Ọghẹnẹ o te nyaze.”
19 Ofariẹ, ọ tẹ rehọ ebrẹdi, ọ tẹ lẹ yere Ọghẹnẹ, o te bru rie, ọ tẹ rehọ iẹe kẹ ae, inọ: “Onana u dikihẹ kẹ ugboma mẹ, onọ me ti siobọno fiki rai. Wha hai ru onana rọ kareghẹhọ omẹ.”
20 Epọvo na o ru kpahe egho na re nọ a re emu na no, ọ ta nọ: “Egho nana o dikihẹ kẹ ọvọ ọkpokpọ na ẹkwoma azẹ mẹ, onọ o ti hwẹ fiki rai.
21 “Rekọ rri! ọnọ o bi ti vivie omẹ ọ rrọ kugbe omẹ evaọ emẹjẹ na.
22 Keme Ọmọ ohwo o ti whu wọhọ epanọ a ta kpahotọ no; o make rrọ ere na, uye u te ohwo yena nọ o bi ti vivie iei na!”
23 Fikiere a tẹ be nọ omoma rai ọnọ ọ be te jọ udevie rai gine ru onana.
24 Rekọ avro ọgaga ọ tẹ romavia re evaọ udevie rai kpahe ọnọ ọ mae rro evaọ udevie rai.
25 Rekọ ọ tẹ ta kẹ ae nọ: “Ivie erẹwho na a re ru omarai ilori kẹ enọ a bi su, yọ a re se ahwo ologbo rai Ilorogu.
26 Rekọ wha rẹ jọ ere he. Ukpoye, jọ ọnọ ọ mae rro evaọ udevie rai ọ jọ wọhọ ọnọ ọ mae maha, yọ ọnọ o wuzou ọ jọ wọhọ ọnọ ọ be gbodibo.
27 Kọ ono ọ mae rro, ọnọ ọ keria be re emu evaọ emẹjẹ manikọ ọnọ ọ be gbodibo?* Kọ ogbẹrọnọ ọnọ ọ keria be re emu evaọ emẹjẹ? Rekọ mẹ họ ọnọ ọ be gbodibo evaọ udevie rai.
28 “Rekọ whai họ enọ e talamu omẹ evaọ edawọ mẹ;
29 yọ mẹ be re ọvọ uvie kugbe owhai, wọhọ epanọ Ọsẹ mẹ ọ re ọvọ uvie kugbe omẹ na,
30 re wha te jọ emẹjẹ mẹ re jẹ da evaọ Uvie mẹ, jẹ keria egbara-uvie re wha bruoziẹ erua ikpegbivẹ Izrẹl.
31 “Saemọn, Saemọn, rri! Setan ọ yare nọ ọ rẹ rehọ owhai kpobi re o voro owhai wọhọ eka.
32 Rekọ mẹ lẹ kpahe owhẹ no re ẹrọwọ ra ọ seba ewhrehe; yọ who te no odawọ na ze no, bọ inievo ra ga.”
33 Kẹsena ọ tẹ ta kẹe nọ: “Olori, mẹ ruẹrẹ oma kpahe inọ me re lele owhẹ kpohọ uwou-odi je lele owhẹ whu.”
34 Rekọ ọ tẹ ta nọ: “Pita, mẹ be ta kẹ owhẹ nọ, ọkpa o ti bo nẹnẹ hẹ bẹsenọ whọ te vro omẹ isiasa no.”
35 Ọ tẹ jẹ ta kẹ ae nọ: “Okenọ me vi owhai vrẹ ababọ ẹmẹkpa-ugho gbe ẹkpa emuore gbe eviẹ, oware ovo o kare owhai hi, oware jọ o kare owhai?” A tẹ kuyo nọ: “Ijo!”
36 Ọ tẹ ta kẹ ae nọ: “Rekọ enẹna, jọ ọnọ o wo ẹmẹkpa-ugho ọ whae lele oma, ere ọvona re kpahe ẹkpa emuore, yọ ọnọ o wo ọgbọdọ họ jọ ọ zẹ ewu ehru riẹ re ọ dẹ ọvo jọ.
37 Keme mẹ be ta kẹ owhai nọ ẹme nọ a kere na o re rugba hrọ evaọ oma mẹ, inọ, ‘A kele i rie kugbe erahaizi.’ Keme onana u bi rugba evaọ oma mẹ.”
38 Kẹsena a tẹ ta nọ: “Olori, rri! ma wo egbọdọ ivẹ.” Ọ tẹ ta kẹ ae nọ: “I te.”
39 Nọ o no etẹe, o te kpobọ Ugbehru Olivi wọhọ epanọ o jọ uruemu riẹ, yọ ilele na a nya lele iei re.
40 Nọ a te etẹe, ọ tẹ ta kẹ ae nọ: “Wha hae lẹ re wha siọ odawọ ba ekie kẹ.”
41 Ọ tẹ nya họ aro siọ ae ba omojọ, o te kigwẹ, o te muhọ ẹlẹ,
42 inọ: “Ọsẹ, o tẹ ruọ owhẹ, si egho nana no omẹ uzou. Ghele na, jọ oreva ra u rugba orọnọ omẹ hẹ.”
43 Kẹsena ukọ-odhiwu jọ ọ tẹ romavia kẹe ọ tẹ bọe ga.
44 Rekọ ọ jẹ rova gaga, ọ tẹ ruabọhọ olẹ ga viere; ẹroyẹ riẹ ọ tẹ wọhọ egẹ azẹ nọ i bi kie fihọ otọ.
45 Nọ ọ lẹ no, ọ tẹ nya bru ilele na, ọ tẹ ruẹ nọ a rrọ owezẹ, oma o rrọ rai no fiki uweri.
46 Ọ tẹ ta kẹ ae nọ: “Fikieme wha be rọ wezẹ? Wha kpama re wha ruabọhọ olẹ, re wha siọ odawọ ba ekie kẹ.”
47 Epanọ ọ gbẹ be rọ ta ẹme na, rri! ogbotu ahwo a tẹ nyaze, yọ ọzae nọ a re se Judas, omọvo Ikpegbivẹ na ọye o su rai ze, ọ tẹ nya bru Jesu ọ tẹ viọlọ iẹe.
48 Rekọ Jesu ọ tẹ ta kẹe nọ: “Judas, kọ ẹviọlọ who bi ro vivie Ọmọ ohwo?”
49 Nọ enọ e jọ kugbei a ruẹ oware nọ o be te via, a tẹ ta nọ: “Olori, kọ ma rọ ọgbọdọ họre ae?”
50 Omọvo rai jọ ọ tubẹ nawo ozọ obọze ọrigbo ozerẹ okpehru na no.
51 Rekọ Jesu ọ tẹ ta nọ: “Oyena u te no.” Ọ tẹ rọ obọ te ozọ na, o te siwi ei.
52 Kẹsena Jesu ọ tẹ ta kẹ ilori izerẹ na gbe iletu etẹmpol gbe ekpako nọ e nyaze ti mu ei na nọ: “Kọ wha rehọ egbọdọ gbe ekpọ ze wọhọ ẹsenọ wha be gwọlọ ogbulegbu mu?
53 Nọ mẹ jẹ jọ kugbe owhai evaọ etẹmpol na kẹdẹ kẹdẹ, wha mu omẹ hẹ. Rekọ oke rai ọna gbe ọrọ ọnọ o wo ogaga evaọ ebi.”
54 Kẹsena a te mu ei, a te su ei vrẹ, a tẹ rehọ iẹe ziọ uwou ozerẹ okpehru na; rekọ Pita o je lele ai evaọ ugbo.
55 Nọ a koko erae họ udevie etegu na jẹ keria kokohọ, Pita ọ keria kugbe ai.
56 Rekọ odibo-ọmọtẹ jọ ọ tẹ ruẹ e riẹ nọ ọ keria oria nọ elo erae na o bi jo lo mu ei, o te rri rie ziezi ọ tẹ ta nọ: “Ọzae nana ọ jọ kugbei re.”
57 Rekọ ọ tẹ vro riẹ, ta nọ: “Aye na, mẹ riẹ ohwo yena ha.”
58 Nọ omoke jọ o vrẹ no, omọfa jọ ọ tẹ ruẹ e riẹ ọ tẹ ta nọ: “Whẹ yọ omọvo rai jọ re.” Rekọ Pita ọ tẹ ta nọ: “Ọzae, mẹ yọ omọvo rai hi.”
59 Nọ oware wọhọ auwa ọvo ọ vrẹ no, ọzae ọfa jọ o te bi si ẹme na gaga inọ: “Ababọ avro, ọzae nana ọ jọ kugbei re, keme ohwo Galili ọ rrọ dẹẹ!”
60 Rekọ Pita ọ tẹ ta nọ: “Ọzae, mẹ riẹ oware nọ whọ be ta na ha.” Ẹsiẹvo na, nọ ọ gbẹ be ta ẹme na, ọkpa o te bo.
61 Olori na ọ tẹ jẹlẹ ovao o te rri Pita, Pita ọ tẹ kareghẹhọ ẹme nọ Olori na ọ ta kẹe inọ: “Taure ọkpa o te ti bo nẹnẹ na, whọ te vro omẹ isiasa.”
62 Ọ tẹ ruọ otafe ọ tẹ viẹ gaga.
63 Whaọ ezae nọ i je rou* rie a tẹ jẹ rehọ iẹe jijehwẹ, be bọwo iẹe;
64 nọ a ruru ovao riẹ, a tẹ be ta jẹ nọe nọ: “Ruẹaro! Ono ọ bọwo owhẹ na?”
65 A ta eme-aghọ efa buobu kẹe.
66 Nọ oke o ke no, ogbẹgwae ekpako ahwo na, te ilori izerẹ gbe otu ikere-obe na a te kokohọ, a te su ei ruọ ọgwa Sanhẹdrin rai, a tẹ ta nọ:
67 “Otẹrọnọ whẹ họ Kristi na, ta kẹ omai.” Rekọ ọ tẹ ta kẹ ae nọ: “Mẹ tẹ make ta kẹ owhai, wha te rọwo iẹe vievie he.
68 Yọ mẹ tẹ nọ owhai onọ, wha te kuyo ho.
69 Rekọ no umuo enẹna vrẹ Ọmọ ohwo ọ te keria obọze ogaga Ọghẹnẹ.”
70 Aikpobi a tẹ ta nọ: “Koyehọ whẹ họ Ọmọ Ọghẹnẹ?” Ọ tẹ ta kẹ ae nọ: “Whai ọvo wha ta riẹ na inọ mẹ họ ọye.”
71 A tẹ ta nọ: “Fikieme ma gbẹ rọ gwọlọ imuẹro efa? Keme mai ọvo ma jọ unu riẹ yoi no.”
