Luk 23:1-56
23 Fikiere ogbotu ahwo na kpobi a tẹ wọ, a te su ei bru Pailet.
2 A te mu eware họ egu fihọ iẹe uzou, inọ: “Ma ruẹ ọzae nana nọ ọ be raha orẹwho mai kuotọ, bi wuhrẹ nọ o thọ re a hwa osa-uzou kẹ Siza, be ta nọ ọye họ Kristi ovie.”
3 Pailet ọ tẹ nọe nọ: “Kọ whẹ họ Ovie ahwo Ju na?” Ọ tẹ kuyo nọ: “Whẹ ọvo whọ be tae na.”
4 Pailet ọ tẹ ta kẹ ilori izerẹ na gbe ogbotu na nọ: “Mẹ jọ oma ọzae nana ruẹ oruthọ ọvuọvo ho.”
5 Rekọ a te bi si ikẹ nọ: “Ọ be rọ iwuhrẹ riẹ wha ozighi họ ahwo oma evaọ Judia soso, muhọ no obọ Galili ze tubẹ ziọ obonẹ.”
6 Nọ Pailet o yo onana, ọ tẹ nọ sọ ọzae na yọ ohwo Galili.
7 Nọ ọ kiẹ via no inọ ẹkwotọ-esuo Herọd o no ze, o te vi ei bru Herọd, ọnọ ọ jọ Jerusalẹm re evaọ oke yena.
8 Nọ Herọd ọ ruẹ Jesu, ọ tẹ ghọghọ gaga. Keme u kri no nọ ọ be rọ gwọlọ ruẹ Jesu keme o yo eware buobu kpahe iẹe no, yọ o je rẹro nọ ọ te ruẹ oware oka jọ nọ o ti ru.
9 Fikiere o te mu ei enọ buobu họ ẹnọ, rekọ ọ kẹ riẹ uyo ho.
10 Oke nana kpobi na yọ ilori izerẹ gbe otu ikere-obe na a je dhe ẹkpẹkpama, bi gu eware fihọ iẹe uzou avọ edo.
11 Kẹsena Herọd avọ isoja riẹ a tẹ jẹ rehọ iẹe zaharo, ọ tẹ rehọ iẹe jijehwẹ ẹkwoma ewu owowoma nọ o kuhọ iẹe, o te vi ei zihe bru Pailet.
12 Herọd avọ Pailet a te zihe ruọ egbẹnyusu evaọ ẹdẹ yena, keme anwẹdẹ aimava a jẹ jẹ ohwohwo egrẹ.
13 Pailet o te se ilori izerẹ na, isu na gbe ahwo na koko
14 ọ tẹ ta kẹ ae nọ: “Wha rehọ ohwo nana bru omẹ ze wọhọ ọnọ ọ be bẹbẹ ahwo na họ kpareso egọmeti. Whaọ rri! mẹ kiẹ riẹ riwi evaọ iraro rai kpobi rekọ mẹ jọ oma ọzae nana ruẹ imuẹro eware nọ wha bi gu fihọ iẹe uzou na ha.
15 Yọ Herọd ọ jọ oma riẹ ruẹ oruthọ ọvuọvo gbe he, keme o vi rie zihe bru omai ze, yọ rri! o ru oware ovo thọ nọ o ro fo uwhu hu.
16 Fikiere mẹ te fae me ve siobọnoi.”
17 ——
18 Rekọ ogbotu na kpobi a te bo nọ: “Kpe ọzae nana no,* who ve siobọno Barabas kẹ omai!”
19 (A fi ọzae nana họ uwou-odi fikinọ o kuomagbe ahwo kpareso egọmeti evaọ ẹwho na gbe fiki ahwo nọ a kpe evaọ ọkparesuọ na.)
20 Pailet ọ tẹ wariẹ ta ẹme kẹ ae keme ọ gwọlọ siobọno Jesu.
21 A te muhọ ebo gaga inọ: “Kare iẹe fihọ ure! Kare iẹe fihọ ure!”*
22 Ọ tẹ ta kẹ ae orọ avọ esa nọ: “Fikieme? Didi oware uyoma ọzae nana o ru? Mẹ jọ oma riẹ ruẹ oruthọ ọvuọvo nọ o ro fo uwhu hu; fikiere mẹ te fae me ve siobọnoi.”
23 Fikiere a tẹ kpare irru rai bi bo gaga viere, be ta inọ a kpei no,* fiki ubo rai Pailet ọ tẹ kezọ kẹ ae.
24 Fikiere Pailet ọ tẹ kẹ udu inọ a ru onọ a be yare na kẹ ae.
25 O te siobọno ọzae nọ a jẹ yare na kẹ ae, ọnọ a fihọ uwou-odi fiki ọkparesuọ gbe ohwo-okpe, rekọ ọ tẹ kẹ udu re a nyai ru Jesu wọhọ epanọ a yare na.
26 Nọ a be rehọ iẹe vrẹ na, a te kru Saemọn, ohwo ẹwho Sairini, ọnọ o je no iwhre jọ ze, a tẹ wọ ure-oja* na họ iẹe re ọ wọe lele Jesu.
27 Ogbotu ahwo buobu a je lele iei, te eyae nọ e be rọ abọ tehe oma bi weri je bi kuenu oviẹ fiki riẹ.
28 Jesu ọ tẹ rẹriẹ ovao rri eyae na ọ tẹ ta nọ: “Emetẹ Jerusalẹm, wha gbẹ viẹ fiki mẹ hẹ. Ukpoye, wha viẹ kẹ omarai gbe emọ rai;
29 keme rri! edẹ e be tha nọ ahwo a rẹ te ta nọ, ‘Jọ eva e were eyae nọ e rrọ ega, enọ i dievahọ họ gbe enọ e kẹ emọ evie he!’
30 Kẹsena a ve ti mu igbehru na họ ẹta kẹ nọ, ‘Wha kie ruru omai!’ jẹ ta kẹ ikpehru na nọ, ‘Ruru omai!’
31 Otẹrọnọ a ru eware nana evaọ okenọ ure na o rọ rrọ bọbọbọ, kọ eme ọ te via okenọ u te whu no?”
32 A je su ezae ivẹ efa jọ nọ e rrọ igbulegbu nyai kpe re evaọ oria ovona.
33 Nọ a te oria nọ a re se Ukolo-Uzou, a tẹ jọ etẹe tehe iẹe fihọ ure na, yọ a kare igbulegbu na fihọ abotọ riẹ, ọjọ obọze riẹ ọdekọ kọ ẹkpẹlobọ riẹ.
34 Rekọ Jesu ọ jẹ ta nọ: “Ọsẹ, rọvrẹ rai, keme a riẹ oware nọ a bi ru hu.” Ofariẹ, a rehọ edhọ-ifio ghale iwu riẹ.
35 Yọ ahwo a dikihẹ bi rri. Rekọ isu na a te bi nye inwe họ iẹe, be ta nọ: “O siwi amọfa; jọ o siwi omariẹ, otẹrọnọ ọye họ Kristi na, Ọnọ Ọghẹnẹ Ọ Salọ na.”
36 Makọ isoja na dede a jẹ rehọ iẹe jijehwẹ, nọ a nya kẹle iẹe a tẹ kẹe udi-ogho
37 be ta nọ: “Otẹrọnọ whẹ họ Ovie ahwo Ju, siwi omara.”
38 Yọ a kere eme fihọ ẹwẹ-akpala jẹ tehe iẹe họ ehru ure na, inọ: “Ọna họ Ovie ahwo Ju.”
39 Kẹsena omọvo igbulegbu nọ a kare fihọ etẹe na o te mu eme iyoma họ ẹta kẹe, inọ: “Whẹ họ Kristi na, o gbẹ rrọ ere? Siwi omara gbe omai re!”
40 Ogbulegbu ọdekọ na ọ tẹ whọku ei inọ: “Kọ whọ be dhozọ Ọghẹnẹ vievie he, nọ orọnọ obrukpe ọvona o te owhẹ na?
41 Rọkẹ omai, uye eware iyoma nọ ma ru ma be ruẹ na; rekọ ọzae nana o ru oware ovo thọ họ.”
42 Kẹsena ọ tẹ ta nọ: “Jesu, kareghẹhọ omẹ nọ whọ tẹ ruọ Uvie ra no.”
43 Jesu ọ tẹ ta kẹe nọ: “Uzẹme mẹ be ta kẹ owhẹ nẹnẹ na, who ti lele omẹ jọ Aparadase.”
44 Whaọ oke o jọ oware wọhọ auwa avọ ezeza,* ghele na oria kpobi u te muebi ri bọo auwa avọ izii,*
45 keme ọre o fu; ekọtini aruẹri na ọ tẹ jọ udevie bẹre duwu otọ.
46 Jesu o te bo gaga nọ: “Ọsẹ, me mu uzuazọ* mẹ họ owhẹ obọ.” Nọ ọ ta onana no, o te whu.*
47 Nọ oletu ogbaẹmo na ọ ruẹ eware nọ e via na, o te mu Ọghẹnẹ họ ejiri inọ: “Ọzae nana ginọ ohwo okiẹrẹe.”
48 Nọ ogbotu ahwo kpobi nọ a kokohọ etẹe ti rri ughe a ruẹ eware nọ e via na, a te zihe kpo, yọ a be tehe igbama rai.
49 Yọ egbẹrioma riẹ kpobi a dikihẹ ugbo. Ofariẹ, eyae nọ i lele i rie no Galili ze a jọ etẹe yọ a ruẹ eware nana.
50 Yọ rri! ọzae jọ ọ jariẹ nọ a re se Josẹf, omọvo Ogbẹgwae na, ọnọ ọ jọ emamọ ohwo nọ o kiẹrẹe.
51 (Ọzae nana ọ rọwo fihọ ẹgwae oyoma rai gbe eware nọ a ru hu.) Ohwo ẹwho Arimatia, ẹwho ahwo Judia, yọ ọ jẹ hẹrẹ Uvie Ọghẹnẹ.
52 Ọzae nana ọ nya bru Pailet ọ tẹ yare nọ a rehọ ori Jesu kẹe.
53 Ọ tẹ wọ ori na, ọ tẹ rehọ emamọ ehọ-elọlọhọ vare iẹe, ọ tẹ wọe fihọ uki nọ ọ tọ fihọ utho, onọ a ri ki ohwo ọvo fihọ họ.
54 Whaọ o jọ ẹdẹ Omaruẹrẹ-Kpahe, yọ oke nọ Ẹdijala o re ro muhọ u bi te no.
55 Rekọ eyae nọ i lele i rie no Galili ze na a nya re, a te rri uki na a tẹ ruẹ epanọ a wọ riẹ họ uki na,
56 a te zihe kpo nyae ruẹrẹ idẹ gbe eware efa nọ i re gbo ore awere họ. Rekọ a serihọ evaọ Ẹdijala na wọhọ epanọ ujaje na o ta.
Eme-Obotọ
^ Evaọ Griki, “Rehọ ọnana vrẹ.”
^ Hayo “Kare iẹe fihọ ure kpe!”
^ Hayo “kare iẹe fihọ ure.”
^ Rri oria Otofa Eme.
^ Koyehọ, oware wọhọ ighọjọ ikpegbivẹ uvo.
^ Koyehọ, oware wọhọ ighọjọ esa uvo.
^ Hayo “ẹzi.”
^ Hayo “o te ku ẹwẹ urere riẹ.”
