Luk 24:1-53
24 Rekọ evaọ ẹdẹ ọsosuọ oka na,* a tẹ riọ kpobọ uki* na, yọ a wha eware nọ i re gbo ore awere nọ a ruẹrẹhọ na lele oma.
2 Rekọ a tẹ ruẹ nọ a ghelie utho na no uki na no,
3 nọ a ruọ evaọ uki na, a ruẹ ori Jesu Olori na ha.
4 Nọ onana u bi gbe ai unu na, rri! ezae ivẹ nọ i ku iwu enwranwra họ i te dikihẹ kẹle ae.
5 Ozọ u te mu eyae na, a te gbovao họ otọ, fikiere ezae na e tẹ ta kẹ ae nọ: “Emejabọ wha be rọ gwọlọ ọnọ ọ rrọ uzuazọ evaọ udevie enọ i whu no?
6 Ọ rrọ etenẹ hẹ, a kpare riẹ no. Wha kareghẹhọ eme nọ ọ ta kẹ owhai okenọ ọ gbẹ jọ obọ Galili,
7 inọ a te rehọ Ọmọ ohwo kẹ erahaizi a vẹ te kare iẹe fihọ ure kpe, ọ vẹ te kparoma evaọ ẹdẹ avọ esa.”
8 Kẹsena a tẹ kareghẹhọ eme riẹ,
9 a te zihe no obọ uki* na ze, a te gbiku eware nana kpobi kẹ Ikpegbọvo na gbe ahwo edekọ kpobi.
10 Eyae nana họ Meri Magdalini, Joana, gbe Meri oni Jemis. Yọ eyae edekọ nọ e jọ kugbe ae a je gbiku eware nana kẹ ikọ na re.
11 Rekọ eme nana e wọhọ eme igheghẹ rọkẹ ae, a gbẹ rọwo eme eyae na ha.
12 Rekọ Pita ọ tẹ kpama ọ tẹ dhẹ kpobọ uki* na, nọ o ruwẹ rri eva riẹ, ọ tẹ ruẹ ehọ-elọlọhọ na ọvo. Fikiere ọ tẹ nyavrẹ, ọye ọvo o te bi roro oware nọ o via na.
13 Rekọ evaọ ẹdẹ ọvo yena, imava rai jọ a je kpohọ iwhre nọ a re se Emeọs, nọ o rehọ oware wọhọ emaele ihrẹ thabọ no Jerusalẹm,
14 yọ a jẹ ta ẹme kẹ ohwohwo kpahe eware nana kpobi nọ e via na.
15 Whaọ epanọ a jẹ rọ ta ẹme je bi gbiku eware nana, Jesu ọ tẹ romavia o te bi lele ae nya,
16 rekọ a vuhu ohwo nọ ọ rrọ họ.
17 Ọ tẹ nọ ae nọ: “Nọ didi eme whai imava wha be ta kpahe ga tere evaọ edhere?” A te dikihẹ, yọ a vọ avọ ọkora.
18 Ọnọ a re se Kleopas ọ tẹ ta kẹe nọ: “Kọ whẹ yọ ọrara nọ ọye ọvo ọ be rria oria evaọ Jerusalẹm nọ whọ gbẹ rọ riẹ* eware nọ e jariẹ via evaọ edẹ enana ha?”
19 Ọ tẹ nọ ae nọ: “Didi eware?” A tẹ ta kẹe nọ: “Eware kpahe Jesu ohwo Nazarẹt na, ọnọ ọ jọ ọruẹaro nọ iruo igbunu riẹ gbe eme riẹ e were Ọghẹnẹ gbe ahwo na kpobi;
20 gbe epanọ ilori izerẹ gbe isu mai a rọ rehọ iẹe kẹ ahwo re a bruoziẹ uwhu kpei, a tẹ tehe iẹe fihọ ure.
21 Rekọ ma je rẹro nọ ọzae nana họ ọnọ o bi ti siwi Izrẹl. Yọ u te no eware nana no, nẹnẹ na họ ẹdẹ avọ esa anwẹnọ eware nana e rọ via na.
22 U te no ere no, eyae jọ evaọ udevie mai a ta eware nọ i gbe omai unu, keme a riọ kpobọ uki na
23 rekọ nọ a ruẹ ori riẹ hẹ, a tẹ nyaze be ta nọ a ruẹ ikọ-odhiwu jọ nọ e ta kẹ ae nọ ọ rrọ uzuazọ.
24 Kẹsena ejọ evaọ usu mai a te kpobọ uki* na, a tẹ ruẹ nọ ere o ginẹ rrọ, wọhọ epanọ eyae na a ta na, rekọ a ruẹ e riẹ hẹ.”
25 Ọ tẹ ta kẹ ae nọ: “O whai igheghẹ nọ udu rai o be kake rọwo eware kpobi nọ eruẹaro na e ta ha!
26 Kọ u gbe fo re Kristi na ọ ruẹ uye eware nana re ọ sai wo oruaro riẹ?”
27 Nọ ọ rehọ eme Mosis muhọ jẹ ruọ eme Eruẹaro na kpobi, ọ tẹ fa otọ eware nọ a kere kpahe ọyomariẹ evaọ Ikereakere na kpobi kẹ ae.
28 Ukuhọ riẹ a tẹ nya kẹle iwhre nọ a je kpohọ, o te ru wọhọ ẹsenọ ọ gbẹ be nya họ aro.
29 Rekọ a tẹ lẹe re ọ daji, inọ: “Jọ kugbe omai keme owọwọ o joma te no, yọ oke u bi kpo no.” Fikiere, o te lele ae ruọ uwou re ọ jọ kugbe ae.
30 Epanọ o je ro lele ae re emu na, ọ tẹ tọlọ ebrẹdi na, lẹ fihọ iẹe, bru rie, ọ tẹ be rehọ iẹe kẹ ae.
31 A tẹ nwani vuhu iei; ẹsiẹvo na a gbẹ ruẹ e riẹ hẹ.
32 A tẹ be ta kẹ ohwohwo nọ: “Agbẹta nọ eme riẹ i ro duobọte omai udu gaga na nọ ọ jẹ ta ẹme kẹ omai evaọ edhere na, nọ ọ jẹ fa otọ Ikereakere na vevẹ kẹ omai!”
33 A tẹ kpama evaọ auwa yena, a te zihe kpobọ Jerusalẹm, a tẹ ruẹ Ikpegbọvo na gbe enọ i kokohọ kugbe ae,
34 nọ a ta nọ: “Ababọ avro, a kpare Olori na ze no, yọ ọ romavia kẹ Saemọn!”
35 Kẹsena a te gbiku eware nọ e jọ edhere via na gbe epanọ a ro vuhu iei ẹkwoma ebrẹdi nọ o bru na.
36 Epanọ a je ro gbiku eware nana, o te dikihẹ udevie rai ọ tẹ ta kẹ ae nọ: “Jọ udhedhẹ u te owhai.”
37 Rekọ fikinọ a guegue yọ ozọ u je mu ae gaga, a te roro nọ ẹzi a jẹ ruẹ na.
38 Fikiere ọ tẹ ta kẹ ae nọ: “Fikieme wha be rọ rova, kọ emejabọ avro ọ rọ rrọ udu rai?
39 Wha rri abọ gbe awọ mẹ, re wha riẹ nọ mẹ wha be ruẹ na; wha rọ obọ te omẹ re wha ruẹ, keme ẹzi o re wo uwo gbe igbenwa ha wọhọ epanọ wha be ruẹ nọ me wo na.”
40 Nọ ọ ta eme nana no, o te dhesẹ abọ gbe awọ riẹ kẹ ae.
41 Rekọ nọ a jẹ rọwo ghele he fiki oghọghọ ogaga gbe epanọ u gbe rai unu te, ọ tẹ ta kẹ ae nọ: “Kọ wha jọ etẹe wo oware jọ nọ a rẹ re?”
42 A tẹ rehọ emeri nọ a tọ rọ kẹe,
43 ọ tẹ rehọ iẹe, ọ tẹ re iẹe evaọ iraro rai.
44 Kẹsena ọ tẹ ta kẹ ae nọ: “Enana họ eme mẹ nọ mẹ ta kẹ owhai nọ mẹ gbẹ jọ kugbe owhai, inọ eware kpobi nọ a kere kpahe omẹ evaọ Uzi Mosis gbe evaọ eme Eruẹaro na gbe evaọ Ilezi na i re rugba hrọ.”
45 Kẹsena o te rovie iroro rai ziezi re a wo otoriẹ Ikereakere na,
46 ọ tẹ ta kẹ ae nọ, “Enẹ a kere: inọ Kristi na ọ te ruẹ uye, ọ vẹ te kparoma no uwhu ze evaọ ẹdẹ avọ esa,
47 yọ fiki odẹ riẹ, a ti whowho ovuẹ orọ ekurẹriẹ nọ o rẹ wha erọvrẹ izieraha ze evaọ erẹwho na kpobi—muhọ no Jerusalẹm vrẹ.
48 Wha re se isẹri eware nana.
49 Rri! Me ti vi oware nọ Ọsẹ mẹ ọ ya eyaa riẹ na se owhai. Rekọ, wha jọ okpẹwho na bẹsenọ wha re wo ogaga no obọ odhiwu ze no.”
50 Kẹsena o te su ae vrẹ rite obọ Bẹtani, ọ tẹ kpare abọ riẹ ọ tẹ lẹ olẹ eghale kẹ ae.
51 Epanọ ọ jẹ rọ lẹ olẹ eghale kẹ ae na, a tẹ rehọ iẹe siọ ae ba, a tẹ rehọ iẹe vrẹ kpobọ odhiwu.
52 A tẹ rọ uzou kpotọ kẹe, a te zihe kpohọ Jerusalẹm avọ oghọghọ ulogbo.
53 Yọ a jẹ jọ etẹmpol na ẹsikpobi bi jiri Ọghẹnẹ.
Eme-Obotọ
^ Ẹdẹ nana ma bi se Ẹdoka nẹnẹ na. Rọkẹ ahwo Ju, ẹdẹ yena ọ jọ ẹdẹ ọsosuọ oka na.
^ Hayo “uki ekareghẹhọ.”
^ Hayo “uki ekareghẹhọ.”
^ Hayo “uki ekareghẹhọ.”
^ Hayo o sae jọ nọ, “O wọhọ nọ whẹ ọvo họ ọrara nọ ọ rrọ Jerusalẹm nọ ọ riẹ . . .”
^ Hayo “uki ekareghẹhọ.
