Mak 1:1-45
1 Emuhọ usi uwoma kpahe Jesu Kristi, Ọmọ Ọghẹnẹ:
2 Wọhọ epanọ Aizaya ọruẹaro na o kere inọ: “(Rri! Me bi vi ọnyukọ mẹ karo kẹ owhẹ, ọnọ ọ te ruẹrẹ edhere ra họ.)*
3 Uvou ohwo jọ nọ o bi se evaọ obọ udhude: ‘Wha ruẹrẹ edhere Jihova* kpahe! Ru idhere riẹ liọ.’”
4 Jọn Ọhọahwo-Ame na ọ jọ obọ udhude o te bi whowho nọ jọ ahwo a họ-ame ro dhesẹ nọ a kurẹriẹ no jẹ gwọlọ erọvrẹ izieraha.
5 Ahwo ẹkwotọ Judia soso gbe ahwo kpobi nọ a be rria Jerusalẹm a je zurie bru ei ze, ọ tẹ jẹ họ ae ame evaọ Ethẹ Jọdan, yọ a be fa izieraha rai via.
6 Whaọ, Jọn o ku ewu eto ekamẹle họ avọ umueku oviẹ-arao nọ ọ rọ gba eku, yọ ọ jẹ re ebaka-ẹkpẹ avọ ọnyọ.
7 Yọ o je whowho nọ: “Ohwo jọ nọ ọ ga vi omẹ ọ rrọ emu mẹ tha, me te epanọ mẹ sai ro ruwẹ ra ifi eviẹ riẹ hẹ.
8 Ame mẹ rọ họ owhai ame, rekọ ẹzi ọfuafo ọ te rọ họ owhai ame.”
9 Evaọ oke yena, Jesu o te no obọ Nazarẹt ọrọ Galili ze, Jọn ọ tẹ họe ame evaọ Ethẹ Jọdan.
10 Nọ ọ nwane va no ame na ze no, ọ tẹ ruẹ odhiwu nọ o bi rovie, ọ tẹ ruẹ ẹzi Ọghẹnẹ nọ o bi bru rie tha wọhọ erueruẹ.
11 Urru jọ u te do no obọ odhiwu ze inọ: “Whẹ yọ Ọmọ mẹ, oyoyou mẹ na; mẹ jẹ owhẹ rehọ.”
12 Ababọ oke oraha, ẹzi na o te ru ei kpobọ udhude.
13 Ọ jọ udhude na edẹ udhuvẹ, Setan ọ tẹ jẹ dawo iẹe. Erao ẹwọ e jọ udhude na re, yọ ikọ-odhiwu a be gbodibo kẹe.
14 Whaọ, nọ a mu Jọn no, Jesu o te kpobọ Galili, bi whowho usi uwoma Ọghẹnẹ
15 be ta nọ: “Oke nọ a fihọ na u te no, yọ Uvie Ọghẹnẹ o kẹle no. Wha kurẹriẹ, je fi ẹrọwọ họ usi uwoma na.”
16 Nọ ọ jẹ nya akotọ Abade Galili,* ọ tẹ ruẹ Saemọn* avọ oniọvo Saemọn nọ a re se Andru, nọ a bi fi iriri rai họ evaọ abade na, keme ikuori a jọ.
17 Jesu ọ tẹ ta kẹ ae nọ: “Wha lele omẹ, me ti ru owhai ikuori ahwo.”
18 A tẹ nwane nyasiọ iriri rai ba, a te lele iei.
19 Nọ ọ nya họ aro omojọ, ọ tẹ ruẹ Jemis ọmọzae Zẹbẹdi avọ Jọn oniọvo riẹ, nọ a rrọ evaọ okọ be ruẹrẹ iriri rai,
20 ọ tẹ nwani se ai. A tẹ nyasiọ Zẹbẹdi ọsẹ rai avọ enọ a rehọ iruo ba okọ na, a te lele iei.
21 A te kpobọ Kapaniọm.
Nọ Ẹdijala na ọ nwani muhọ no, ọ tẹ ruọ evaọ uwou-egagọ na o te muhọ ewuhrẹ.
22 Oghẹrẹ nọ o je ro wuhrẹ gbe eware nọ o je wuhrẹ i gbe rai unu, keme o je wuhrẹ ae wọhọ ohwo nọ o wo udu, orọnikọ wọhọ otu ikere-obe rai hi.
23 Evaọ oke yena, ọzae jọ ọ jọ uwou-egagọ rai na nọ ẹzi ogbegbe ọ jọ oma, o te bo nọ:
24 “Eme ma wo kugbe owhẹ, whẹ Jesu ohwo Nazarẹt? Kọ whọ nyaze te raha omai no? Mẹ riẹ ohwo nọ whọ rrọ dẹẹ, Ọrẹri Ọghẹnẹ!”
25 Rekọ Jesu ọ tẹ whọku ei, inọ: “Fibo, je noi oma ze!”
26 Ẹzi ogbegbe na o te ru ọzae na kie ewawa je bi bo gaga, o te noi oma.
27 U te gbe ahwo na kpobi unu gaga, a tẹ be ta kẹ ohwohwo nọ: “Kinọ ojọ? Ewuhrẹ ọkpokpọ! Ọ be tubẹ ta họ izi igbegbe obọ dede, yọ a bi yoẹme kẹe.”
28 Fikiere, usi riẹ u te do vẹrẹ vẹrẹ ruọ eria kpobi evaọ ubrotọ Galili soso.
29 A te no uwou-egagọ na a te kpobọ uwou Saemọn avọ Andru, yọ Jemis avọ Jọn a jọ usu rai.
30 Whaọ, oni-aye Saemọn o kiẹzẹ nọ ọ be mọ ifiva, a tẹ nwane vuẹ Jesu kpahe iẹe.
31 Nọ ọ nya tei oma o te kru rie obọ kpama. Ifiva na i te kpo, ọ tẹ be gbodibo kẹ ae.
32 Nọ owọwọ u te nọ ọre o kiediwi no, ahwo a tẹ be rehọ enọ e be mọ gbe enọ idhivẹri e rrọ oma kpobi ro sei,
33 ẹwho na soso o te kokohọ unuẹthẹ na.
34 O te siwi ahwo buobu nọ a jẹ mọ oghẹrẹ eyao sa-sa, je le idhivẹri no ahwo buobu oma, rekọ ọ jẹ kẹ idhivẹri na uvẹ ta ẹme he, keme a riẹ nọ ọye họ Kristi.
35 Evaọ irioke nọ otọ u ri vẹ hẹ, ọ tẹ ruọ otafe nya kpohọ oria nọ u siomano, o te muhọ ẹlẹ.
36 Rekọ Saemọn avọ enọ e jọ kugbei a tẹ nyae gwọlọ iẹe,
37 a tẹ ruẹ e riẹ a tẹ ta kẹe nọ: “Ahwo kpobi a be gwọlọ owhẹ.”
38 Rekọ ọ tẹ ta kẹ ae nọ: “Joma kpohọ oria ọfa, ewho nọ e kẹle onana, re mẹ jọ obei ta usi uwoma na re, keme fiki onana mẹ rọ nyaze.”
39 Ọ tẹ nya, be jọ iwou-egagọ rai ta usi uwoma evaọ ẹkwotọ Galili soso, yọ o bi le idhivẹri no ahwo oma.
40 Ọmoti jọ ọ nya bru rie ze re, o te kigwẹ be lẹe nọ: “O tẹ ruọ owhẹ, whọ sai ru omẹ fo.”
41 Ohrọ riẹ o tẹ riẹe, ọ tẹ riẹ obọ ro tei, ọ tẹ ta kẹe nọ: “O ruọ omẹ. Jọ oma ra o fo.”
42 Ẹsiẹvo na, oti na o te noi oma, ọ tẹ fo.
43 Kẹsena Jesu ọ tẹ ta kẹe nọ o kpo jẹ vẹvẹ iẹe unu gaga,
44 inọ: “Ruẹ nọ whọ vuẹ ohwo ọvo ho, rekọ nyai dhesẹ oma ra kẹ ozerẹ na, re who dhe idhe nọ a re ro ru owhẹ fo wọhọ epanọ Uzi Mosis o ta, re o jọ isẹri kẹ ae.”
45 Rekọ nọ ọzae na o no etẹe, o te mu onana họ ewhowho evaọ oria kpobi, fikiere Jesu ọ gbẹ jẹ sae ruọ ẹwho evaọ iraro ahwo ho, rekọ obọ otafe ẹwho ọ jẹ jọ evaọ eria nọ ahwo a rrọ họ. Ghele na ahwo a je no eria avọ eria bru rie ze.
Eme-Obotọ
^ Rri Malakae 3:1, oria nọ a rehọ eme nana nọ a si usi wariẹ họ na no ze.
^ Rri oria Otofa Eme.
^ Saemọn yọ odẹ ọfa Pita ukọ na.
