Mak 10:1-52
10 O te no etẹe ọ tẹ ziọ obọ iwhru ẹkwotọ Judia evaọ abọdekọ Jọdan, ogbotu ahwo a tẹ wariẹ nya bru rie ze. Yọ wọhọ epaọ uruemu riẹ, ọ tẹ wariẹ mu ae họ ewuhrẹ.
2 Otu Farisi a tẹ nya bru rie ze re a dawo iẹe, a tẹ nọe sọ u fo re ọzae ọ siọ aye.
3 Ọ tẹ nọ ae nọ: “Didi uzi Mosis o jie kẹ owhai?”
4 A tẹ ta nọ: “Mosis ọ kuvẹ re a kere obe-udu orọo-ofa kẹ aye a vẹ se iẹe.”
5 Rekọ Jesu ọ tẹ ta kẹ ae nọ: “Fiki udu-ogaga rai ọ rọ kẹ owhai ujaje nana.
6 Rekọ, no emuhọ emama ze, ‘Ọzae avọ aye Ọghẹnẹ ọ ma rai.
7 Fiki onana ọzae ọ rẹ nyasiọ ọsẹ gbe oni riẹ ba,
8 aimava na a vẹ jọ uwo ovo,’ fikiere a gbẹ rrọ uwo ivẹ hẹ rekọ uwo ovo.
9 Fikiere, onọ Ọghẹnẹ o kugbe no, ajọ ohwo ọvo ọ hẹriẹ iẹe he.”
10 Nọ a wariẹ ruọ evaọ uwou na no, ilele na a te mu ei họ ẹnọ kpahe onana.
11 Ọ tẹ ta kẹ ae nọ: “Ohwo kpobi nọ ọ siọ aye riẹ ọ jẹ rehọ aye ọfa ọ thọ uzi ẹnwae-obro mukpahe aye na,
12 yọ aye ọ tẹ siọ ọzae riẹ ọ jẹ rehọ ọzae ọfa, yọ o bruẹnwae.”
13 Ahwo a te mu emaha họ ẹrehọ sei re ọ rọ obọ te ae, rekọ ilele na a te do ku ae.
14 Nọ Jesu ọ ruẹ onana eva e tẹ dhae, ọ tẹ ta kẹ ae nọ: “Wha vu emaha na wa re a nya bru omẹ ze; wha whaha ae he, keme Uvie Ọghẹnẹ o rrọ kẹ itieye na.
15 Uzẹme mẹ be ta kẹ owhai, ohwo kpobi nọ ọ jẹ Uvie Ọghẹnẹ rehọ wọhọ epaọ ọmaha ha, ọ sae ruọ Uvie na vievie he.”
16 Ọ tẹ wọ emọ na ọ tẹ be rọ obọ kpahe ae jẹ be lẹ ẹro eghale kẹ ae.
17 Epanọ ọ jẹ rọ nyavrẹ evaọ edhere na, ọzae jọ ọ tẹ dhẹ bru rie ze o te kigwẹ fihọ aro riẹ ọ tẹ nọe nọ: “Owuhrẹ owoma, eme me re ru hrọ re mẹ reuku uzuazọ ebẹdẹ bẹdẹ?”
18 Jesu ọ tẹ ta kẹe nọ: “Fikieme who ro se omẹ owoma? Ohwo ọvo o woma ha ajokpaọ omọvo, Ọghẹnẹ.
19 Whọ riẹ ijaje na: ‘Who kpe ohwo ho, who bruẹnwae he, who tho uji hi, who se isẹri ọrue he, who fru ohwo re he, rọ ọghọ kẹ ọsẹ ra avọ oni ra.’”
20 Ọzae na ọ tẹ ta kẹe nọ: “Owuhrẹ, me bi koko izi nana kpobi anwọ emaha mẹ ze.”
21 Jesu o te rri rie avọ uyoyou ọ tẹ ta nọ, “Oware jọ u gbe kiọkọ kẹ owhẹ: Nya, re whọ zẹ eware nọ who wo, whọ vẹ rọ igho na kẹ iyogbere, who ti wo efe evaọ obọ odhiwu; whọ vẹ nyaze te jọ olele mẹ.”
22 Rekọ eva e gbẹ were iẹe he fiki uyo na, ọ tẹ nyavrẹ avọ uweri, keme o wo eyero buobu.
23 Nọ Jesu o rri wariẹ, ọ tẹ ta kẹ ilele riẹ nọ: “O te jọ bẹbẹ gaga kẹ enọ i wo igho re a ruọ Uvie Ọghẹnẹ!”
24 Rekọ eme riẹ na i gbe ilele na unu. Kẹsena Jesu ọ tẹ ta kẹ ae nọ: “Whai emaha, o rrọ bẹbẹ re a ruọ Uvie Ọghẹnẹ!
25 O rẹ mae lọhọ re ekamẹle ọ nya eghogho ẹguede lafi viọ ọdafe nọ ọ rẹ ruọ Uvie Ọghẹnẹ.”
26 U te gbe ai unu viere dede, a tẹ ta kẹe* nọ: “Kọ ono a te sai gine siwi?”
27 Nọ Jesu o rri rai ovao, ọ tẹ ta nọ: “Rọkẹ ahwo, onana yọ oware nọ a rẹ sai ru hu, rekọ o rrọ ere kẹ Ọghẹnẹ hẹ, keme Ọghẹnẹ ọ rẹ sai ru eware kpobi.”
28 Pita o te mu ei họ ẹta kẹ nọ: “Rri! Ma nyasiọ eware kpobi ba ma te lele owhẹ.”
29 Jesu ọ tẹ ta nọ: “Uzẹme mẹ be ta kẹ owhai, ohwo ọvo nọ ọ nyasiọ iwou hayo inievo-emezae hayo inievo-emetẹ hayo oni hayo ọsẹ hayo emọ hayo etọ ba fiki mẹ gbe fiki usi uwoma na
30 nọ o ti wo ẹko udhusoi evaọ oke nana ha ọ rrọ họ—iwou, inievo-emezae, inievo-emetẹ, ini, emọ, gbe etọ, avọ ikpokpoma—yọ evaọ uyero-akpọ* nọ o be tha na, uzuazọ ebẹdẹ bẹdẹ.
31 Rekọ ibuobu nọ e rrọ erọ ọsosuọ e te jọ erọ urere, erọ urere e vẹ te jọ erọ ọsosuọ.”
32 Whaọ, a jọ edhere je kpobọ Jerusalẹm, yọ Jesu ọ karo kẹ ae, u te gbe ilele na unu, rekọ ozọ u te je mu enọ i je lele ai. Ọ tẹ wariẹ se Ikpegbivẹ na họ akotọ ọ tẹ be vuẹ ae eware nana nọ e te via kẹe na:
33 “Rri! Obọ Jerusalẹm ma be nya na, yọ a te rehọ Ọmọ ohwo kẹ ilori izerẹ gbe otu ikere-obe na. A ti bruoziẹ uwhu kpei a vẹ te rehọ iẹe kẹ ahwo erẹwho na,
34 ahwo nana a te rehọ iẹe jijehwẹ je nwo eya ku ei, a te fae, a ve kpei, rekọ edẹ esa e tẹ vrẹ no ọ vẹ te kparoma ze.”
35 Jemis avọ Jọn, emezae Zẹbẹdi a tẹ nya bru rie a tẹ ta kẹe nọ: “Owuhrẹ, ma gwọlọ nọ who ru oware kpobi nọ ma be te yare mi owhẹ kẹ omai.”
36 Ọ tẹ ta kẹ ae nọ: “Eme wha gwọlọ nọ me ru kẹ owhai?”
37 A tẹ ta nọ: “Kẹ omai uvẹ nọ ma rẹ rọ keria kẹle owhẹ evaọ oruaro ra, ọjọ obọze ra, ọdekọ ẹkpẹlobọ ra.”
38 Rekọ Jesu ọ tẹ ta kẹ ae nọ: “Wha riẹ oware nọ wha be yare na ha. Kọ wha sae da egho nọ mẹ be da, hayo họ oghẹrẹ ame-ọhọ nọ a be rọ họ omẹ ame?”
39 A tẹ ta kẹe nọ: “Ma sai ru ei.” Fikiere, Jesu ọ tẹ ta kẹ ae nọ: “Wha te da egho nọ mẹ be da, yọ a te rehọ oghẹrẹ ame-ọhọ nọ a be rọ họ omẹ rọ họ owhai ame.
40 Rekọ, orọnikọ mẹ ọ rẹ salọ enọ e rẹ keria obọze hayo ẹkpẹlobọ mẹ hẹ, rekọ oria yena o rrọ rọkẹ enọ a ruẹrẹ e riẹ họ kẹ.”
41 Nọ ilele ikpe edekọ a yo onana, eva Jemis avọ Jọn e tẹ dha ae.
42 Rekọ Jesu o te se ae kẹle oma, ọ tẹ ta kẹ ae nọ: “Wha riẹ nọ enọ e rrọ isu erẹwho na a re ru omarai ilori kẹ enọ a bi su, yọ ahwo ologbo rai a rẹ rọ obọ ogaga su ae.
43 O rẹ jọ ere evaọ udevie rai vievie he; ukpoye, ohwo kpobi nọ ọ gwọlọ jọ ruaro evaọ udevie rai ọ rẹ jọ ọgbodibo rai,
44 yọ ohwo kpobi nọ ọ gwọlọ jọ ohwo ọsosuọ evaọ udevie rai ọ rẹ jọ ọrigbo kẹ ahwo na kpobi.
45 Keme makọ Ọmọ ohwo ọ nyaze, orọnikọ re a gbodibo kẹe he, rekọ re ọ gbodibo o ve je siobọno uzuazọ riẹ rọkẹ ẹtanigbo ahwo buobu.”
46 A tẹ nya te Jẹriko. Rekọ nọ tei te ilele riẹ gbe ogbotu ahwo buobu a je no Jẹriko vrẹ, Batimiọs (ọmọ Timiọs), ọyareware nọ o tuaro ọ keria akotọ edhere.
47 Nọ o yo nọ Jesu ohwo Nazarẹt na ọ be nyavrẹ na, o te muhọ ebo inọ: “Jesu, Ọmọ Devidi, jọ ohrọ mẹ o re owhẹ!”
48 Ahwo buobu a te bi do ku ei nọ o fibo; rekọ o te bo ga viere inọ: “Ọmọ Devidi, jọ ohrọ mẹ o re owhẹ!”
49 Fikiere Jesu o te dikihẹ ọ tẹ ta nọ: “Wha sei se omẹ.” A te se ọzae nọ o tuaro na, be ta kẹe nọ: “Kru udu ga! Kpama; o bi se owhẹ.”
50 Nọ ọ ba ewu ehru riẹ no gbolo kufiẹ, ọ tẹ sakpama ọ tẹ nya bru Jesu.
51 Jesu ọ tẹ nọe nọ: “Eme whọ gwọlọ nọ me ru kẹ owhẹ?” Ọzae nọ o tuaro na ọ tẹ ta kẹe nọ: “Owuhrẹ,* jọ mẹ wariẹ mu ude họ ẹruẹ.”
52 Jesu ọ tẹ ta kẹe nọ: “Nya kpo. Ẹrọwọ ra o siwi owhẹ no.” Ọ tẹ nwani mu ude họ ẹruẹ, o te mu ei họ elele evaọ edhere na.
