Mak 14:1-72
-
Izerẹ na a gba ẹgwae re a kpe Jesu (1, 2)
-
A ku udẹ nọ u re gbo ore awere họ Jesu (3-9)
-
Judas o vivie Jesu (10, 11)
-
Ehaa Ọnyavrẹ urere (12-21)
-
Ẹtohọ Emu Owọwọ Olori na (22-26)
-
Ọ ta nọ Pita ọ te vro riẹ (27-31)
-
Jesu ọ lẹ evaọ Gẹtsemane (32-42)
-
A mu Jesu (43-52)
-
A rehọ e riẹ gu ẹdhọ evaọ Sanhẹdrin (53-65)
-
Pita ọ vro Jesu (66-72)
14 Whaọ, edẹ ivẹ i kiọkọ re Ehaa Ọnyavrẹ gbe Ehaa Ebrẹdi nọ Ọ Kare Ẹvi na i te. Yọ ilori izerẹ na gbe otu ikere-obe a jẹ gwọlọ edhere nọ a rẹ rọ rehọ ẹghẹ kru* rie re a kpei;
2 keme a jẹ ta nọ: “Ma ru ei evaọ etoke ehaa na ha; ahwo na a sai ru ozighi.”
3 Nọ ọ jọ Bẹtani jẹ re emu evaọ uwou Saemọn nọ ọ jọ ọmoti vẹre, aye jọ ọ tẹ nyaze avọ ololo alabasta nọ udẹ nọ u re gbo ore awere, uvi nard, nọ o ghare gaga o rrọ. O te rovie ololo alabasta na o te bi ku ei họ Jesu uzou.
4 Fikiere, ejọ e tẹ be rọ evedha ta kẹ omoma rai nọ: “Fikieme ọ be rọ raha udẹ na kufiẹ enẹ?
5 Keme a hae sae zẹ udẹ nana vrẹ dinariọs* egba esa a vẹ rehọ igho na kẹ iyogbere!” Eva aye na e tẹ jẹ dha ae gaga.*
6 Rekọ Jesu ọ tẹ ta nọ: “Wha vu ei wa. Fikieme wha be rọ gwọlọ aye na ẹme? Oware uwoma o ru kẹ omẹ na.
7 Keme iyogbere na e rrọ kugbe owhai ẹsikpobi, yọ wha sai ru ewoma kẹ ae oke kpobi nọ wha gwọlọ, rekọ mẹ te jọ kugbe owhai ẹsikpobi hi.
8 Onọ ọ rẹ sai ru o ru na; o ku udẹ nọ u re gbo ore awere họ oma mẹ be rọ ruẹrẹ omẹ kpahe kẹ ukio mẹ.
9 Uzẹme mẹ be ta kẹ owhai, oria kpobi nọ a te jọ ta usi uwoma na evaọ akpọ na soso, a te fodẹ oware nọ aye nana o ru na rọ kareghẹhọ iẹe.”
10 Judas Iskariọt omọvo Ikpegbivẹ na ọ tẹ nya bru ilori izerẹ na re ọ ruẹsi vivie Jesu kẹ ae.
11 Nọ a yo onana, eva e tẹ were ae a tẹ ya eyaa inọ a rẹ kẹe igho isiliva. Fikiere ọ tẹ jẹ gwọlọ uvẹ nọ o re ro vivie iei.
12 Evaọ ẹdẹ ọsosuọ ọrọ ehaa Ebrẹdi nọ Ọ Kare Ẹvi na, nọ a rẹ rọ rehọ arao Ọnyavrẹ na ro dhe idhe, ilele riẹ a tẹ nọe nọ: “Diẹse whọ gwọlọ nọ ma nyae ruẹrẹhọ nọ whọ te jọ re emu Ọnyavrẹ na?”
13 O te vi ilele ivẹ riẹ jọ jẹ ta kẹ ae nọ: “Wha nya ruọ okpẹwho na, ọzae jọ nọ ọ wọ othẹ-ame ọ te nyaku owhai. Wha lele iei,
14 yọ uwou kpobi nọ ọ ruọ eva, wha ta kẹ ọnọ o wo uwou na nọ, ‘Owuhrẹ na ọ ta nọ: “Diẹse họ ubruwou erara nọ mẹ avọ ilele mẹ ma sae jọ re emu Ọnyavrẹ na?”’
15 O ti dhesẹ ubruwou ehru ulogbo jọ kẹ owhai, onọ a ruẹrẹ kpahe no. Wha ruẹrẹ eware họ etẹe kẹ omai.”
16 Ilele na a tẹ nya, a tẹ ruọ okpẹwho na jẹ ruẹ eware wọhọ epanọ Jesu ọ ta kẹ ae, a tẹ ruẹrẹ eware họ kẹ ehaa Ọnyavrẹ na.
17 Nọ owọwọ u te, tei te Ikpegbivẹ na a tẹ nyaze.
18 Epanọ a rọ keria wariẹ emẹjẹ họ be re emu na, Jesu ọ tẹ ta nọ: “Uzẹme mẹ be ta kẹ owhai, omọvo rai jọ nọ o bi lele omẹ re emu na o ti vivie omẹ.”
19 Onana o tẹ wha uweri họ ae oma, omomọvo ọ tẹ be nọe nọ: “Kọ omẹ?”
20 Ọ tẹ ta kẹ ae nọ: “Omọvo Ikpegbivẹ na, ọnọ o bi lele omẹ dhe obọ họ omodhe emu na.
21 Keme Ọmọ ohwo o ti whu, wọhọ epanọ a kere kpahe iẹe, rekọ uye u te ohwo yena nọ o bi ti vivie Ọmọ ohwo na! O hae mai woma kẹ ohwo yena o hae jọnọ a yẹ riẹ hẹ.”
22 Nọ a gbẹ be re na, ọ tẹ rehọ ebrẹdi, ọ tẹ lẹ yere Ọghẹnẹ, o te bru rie, ọ tẹ rehọ iẹe kẹ ae, ọ tẹ ta nọ: “Wha mi; onana u dikihẹ kẹ ugboma mẹ.”
23 Ọ tẹ rehọ egho, ọ tẹ lẹ yere Ọghẹnẹ, ọ tẹ rehọ iẹe kẹ ae, aikpobi a tẹ da.
24 Ọ tẹ ta kẹ ae nọ: “Onana u dikihẹ kẹ azẹ mẹ, onọ o rrọ ‘azẹ ọvọ na,’ nọ o ti hwẹ fiki ahwo buobu.
25 Uzẹme mẹ be ta kẹ owhai nọ, mẹ te gbẹ da udi nọ a rọ ubi-okakọ ru na vievie he bọo ẹdẹ yena nọ mẹ te rọ wariẹ dae evaọ Uvie Ọghẹnẹ.”
26 Ukuhọ riẹ, nọ a so ile ujiro* no, a te kpobọ Ugbehru Olivi.
27 Jesu ọ tẹ ta kẹ ae nọ: “Whai kpobi wha ti zoruẹ, keme a kere nọ: ‘Me ti duwu othuru-igodẹ na, igodẹ na e vẹ te vahabọ.’
28 Rekọ nọ mẹ tẹ kparoma ze no, mẹ te jọ obọ Galili hẹrẹ owhai.”
29 Rekọ Pita ọ tẹ ta kẹe nọ: “Ahwo nọ a kiọkọ kpobi a tẹ maki zoruẹ, me ti zoruẹ hẹ.”
30 Fikiere, Jesu ọ tẹ ta kẹe nọ: “Uzẹme mẹ be ta kẹ owhẹ inọ nẹnẹ na, ẹhẹ, evaọ aso nana, taure ọkpa o te ti bo isiava, whọ te vro omẹ isiasa.”
31 Rekọ Pita ọ tẹ gbẹ be ta nọ: “Otẹrọnọ me re lele owhẹ whu dede, mẹ te vro owhẹ vievie he.” Ilele edekọ na kpobi a tẹ be ta epọvo na re.
32 A tẹ ziọ oria nọ a re se Gẹtsemane, ọ tẹ ta kẹ ilele riẹ nọ: “Wha keria etenẹ, mẹ be nyae lẹ.”
33 Ọ tẹ rehọ Pita, Jemis, gbe Jọn kugbe oma, o te mu awa họ ẹruọ jẹ be rova gaga.
34 Ọ tẹ ta kẹ ae nọ: “Uweri o da omẹ oma fia, enwenọ uwhu. Wha jọ etenẹ re wha ruabọhọ erou.”*
35 Nọ ọ nya họ aro omojọ, o te kigwẹ totọ ọ tẹ be lẹ inọ otẹrọnọ o rẹ lọhọ, jọ auwa na ọ vrẹ riẹ.
36 Ọ tẹ ta nọ: “Abba,* Ọsẹ, whọ rẹ sai ru eware kpobi; si egho nana no omẹ uzou. Ghele na, orọnikọ epaọ oreva mẹ hẹ, rekọ oreva ra.”
37 O te zihe ze ọ tẹ ruẹ nọ a be wezẹ, ọ tẹ ta kẹ Pita nọ: “Saemọn, kọ whọ be wezẹ? Kọ who gbe wo ẹgba nọ whọ rẹ rọ ruabọhọ erou auwa ọvo?
38 Wha ruabọhọ erou jẹ hae lẹ ẹsikpobi, re wha siọ odawọ ba ekie kẹ. O ginẹ ruọ ẹzi na rekọ uwo na o ga ha.”
39 Ọ tẹ wariẹ nyavrẹ nyae lẹ, be ta ẹme ọvona.
40 Ọ tẹ wariẹ zihe ze je di ae họ owezẹ keme owezẹ o vọ rai aro, fikiere a gbẹ riẹ ẹme nọ a rẹ kpahe kẹe he.
41 O te zihe ze orọ avọ esa ọ tẹ ta kẹ ae nọ: “Evaọ oke utionana wha be wezẹ je serihọ! U te no! Auwa na o te no! Rri! A bi vivie Ọmọ ohwo họ obọ erahaizi.
42 Wha kpama, ma nyavrẹ. Rri! Ọnọ o bi vivie omẹ ọ kẹle etenẹ no.”
43 Ẹsiẹvo na, epanọ ọ gbẹ be rọ ta ẹme na, Judas, omọvo Ikpegbivẹ na, ọ tẹ nyaze avọ ogbotu ahwo nọ a kru egbọdọ gbe ekpọ, enọ ilori izerẹ na, otu ikere-obe na, gbe ekpako na a vi ze.
44 Whaọ ọnọ o bi ti vivie iei na ọ kẹ ahwo na oka, inọ: “Ohwo kpobi nọ mẹ te viọlọ, ọye họ ohwo na; wha mu ei, re wha su ei vrẹ avọ elakpa nọ i re rou rie.”
45 Ọ tẹ nya ovavo bru rie ọ tẹ ta nọ, “Owuhrẹ!” ọ tẹ nabe viọlọ iẹe.
46 Fikiere a te kru rie, a te mu ei.
47 Rekọ omọvo enọ i dikihẹ kugbei o te wolo ọgbọdọ riẹ lahwe ọ tẹ nawo ozọ ọrigbo ozerẹ okpehru na no.
48 Rekọ Jesu ọ tẹ ta kẹ ae nọ: “Kọ wha rehọ egbọdọ gbe ekpọ ze ti mu omẹ wọhọ ẹsenọ wha be gwọlọ ogbulegbu mu?
49 Kẹdẹ kẹdẹ mẹ jẹ jọ kugbe owhai evaọ etẹmpol na je wuhrẹ ahwo, ghele na wha mu omẹ hẹ. Rekọ, o rrọ enẹ re Ikereakere na i rugba.”
50 Ilele na kpobi a tẹ dhẹ se iẹe ba.
51 Rekọ ẹghele jọ nọ o ku emamọ ewu ohọ-olọlọhọ ọvo fihọ o te mu ei họ elele, a tẹ gwọlọ kru rie,
52 rekọ ọ tẹ dhẹ siọ ewu riẹ ba, dhẹ vrẹ ẹbẹba.*
53 A tẹ rehọ Jesu kpobọ ozerẹ okpehru na, koyehọ ilori izerẹ na gbe ekpako na gbe otu ikere-obe na kpobi a te kokohọ.
54 Rekọ Pita o lele i rie evaọ ugbo rite ighẹ ozerẹ okpehru na; ọ tẹ keria kugbe idibo uwou na evaọ akotọ erae nọ e be ware ziezi bi ru oma riẹ sasa.
55 Whaọ ilori izerẹ na gbe ogbẹgwae Sanhẹdrin na soso a jẹ gwọlọ oware nọ a re gu fihọ Jesu uzou re a ruẹsi kpei, rekọ a jẹ ruẹ oware ovo ho.
56 Ibuobu a je gine se isẹri erue kpahe iẹe, rekọ isẹri rai e jẹ rọwokugbe he.
57 Ofariẹ, otujọ a jẹ nyaze je se isẹri erue kpahe iẹe, inọ:
58 “Ma yo nọ ọ ta nọ, ‘Me ti kporo etẹmpol nana nọ a rehọ abọ bọ na fihọ otọ, mẹ vẹ te rọ edẹ esa bọ ọfa onọ a rehọ abọ bọ họ.’”
59 Makọ evaọ eme nana, isẹri rai e rọwokugbe he.
60 Kẹsena ozerẹ okpehru na ọ tẹ kpama evaọ udevie rai ọ tẹ nọ Jesu nọ: “Kọ who wo ẹme ọvo nọ whọ rẹ kpahe? Who bi yo eme nọ ahwo nana a be ta kpahe owhẹ na?”
61 Rekọ o fibo, ọ kpahe uvumọ ẹme he. Ozerẹ okpehru na ọ tẹ wariẹ mu ei họ ẹnọ inọ: “Kọ whẹ họ Kristi na, Ọmọ Ọnọ Ọ Mai Kpehru na?”
62 Jesu ọ tẹ ta nọ: “Mẹ họ ọye; yọ wha te ruẹ Ọmọ ohwo nọ ọ keria obọze Ọnọ o wo ogaga* na nọ ọ be nyaze evaọ ẹgho odhiwu.”
63 Ozerẹ okpehru na ọ tẹ bẹre iwu riẹ, ọ tẹ ta nọ: “Eme ọfa ma gbẹ gwọlọ isisẹri kẹ?
64 Wha yo eme-aghọ nọ ọ ta na. Ẹvẹ wha roro?” Aikpobi a tẹ ta nọ o fo uwhu.
65 Ejọ i te bi nwo eya ku ei, be rọ abọ ruru ovao riẹ, a vẹ bọwo iẹe, a vẹ ta kẹe nọ: “Ruẹaro!” A tẹ tehe iẹe ovao, elakpa okọto na a tẹ rehọ iẹe vrẹ.
66 Whaọ, nọ Pita ọ jọ obotọ evaọ ighẹ na, odibo-ọmọtẹ ozerẹ okpehru na jọ ọ tẹ nyaze.
67 Nọ ọ ruẹ Pita nọ ọ be jọ akotọ erae ru oma riẹ sasa, o te rri rie ovao jẹ ta nọ: “Whọ jọ kugbe Jesu ohwo Nazarẹt na re.”
68 Rekọ ọ tẹ vro riẹ inọ: “Mẹ riẹ ohwo nana ha yọ mẹ riẹ oware nọ whọ be ta na ha,” ọ tẹ nya kpohọ ubrobọ unuighẹ na.
69 Nọ odibo-ọmọtẹ na ọ jọ etẹe ruẹ e riẹ, ọ tẹ wariẹ be ta kẹ enọ i dikihẹ oyena nọ: “Nọ omọvo rai jọ.”
70 Pita ọ tẹ wariẹ gbenu. Nọ omoke jọ o vrẹ no, ahwo nọ a dikihẹ oyena a tẹ be wariẹ ta kẹ Pita nọ: “Ababọ avro, whẹ yọ omọvo rai jọ re, keme ohwo Galili whọ rrọ.”
71 O te mu omariẹ iyei họ eduwu inọ: “Mẹ riẹ ọzae nana nọ wha be ta kpahe na ha!”
72 Ẹsiẹvo na ọkpa o te bo orọ avọ isiava, Pita ọ tẹ kareghẹhọ ẹme nọ Jesu ọ ta kẹe inọ: “Taure ọkpa o te ti bo isiava, whọ te vro omẹ isiasa.” Pita o te muhọ eweri, ọ tẹ viẹ gaga.
Eme-Obotọ
^ Hayo “mu ei.”
^ Rri oria Otofa Eme.
^ Hayo “a tẹ rọ evedha ta ẹme kẹ aye na; doku ei.”
^ Hayo “ilezi.”
^ Hayo “erroro.”
^ Ẹme ẹvẹrẹ ahwo Aremia nọ otofa riẹ o rrọ “O Ọsẹ.”
^ Hayo “avọ oware nọ o kuhọ otọ eku ọvo.”
^ Evaọ Griki, “obọze ọrọ ogaga.”
