Mak 2:1-28
2 Rekọ nọ edẹ jọ e vrẹ no, ọ tẹ wariẹ ruọ Kapaniọm, u te do te ahwo oma inọ ọ rrọ uwou.
2 Ahwo buobu a te kokohọ uwou na te epanọ unuẹthẹ na dede u ro di no, o te mu ae ẹme Ọghẹnẹ họ ewuhrẹ.
3 A tẹ be rọ ọzae jọ nọ okie o kie bru rie ze, ọnọ ezae ene e wọ.
4 Rekọ a jẹ sae wọe te Jesu oma ha fiki ogbotu na, fikiere a tẹ jọ obọ ehru uwou na bru eghogho lafi oria nọ Jesu ọ jọ, a tẹ rọ ẹmẹrera siobọno ehwa nọ ọzae na ọ rrọ fihọ otọ.
5 Nọ Jesu ọ ruẹ ẹrọwọ rai, ọ tẹ ta kẹ ọnọ okie o kie na nọ: “Ọmọ, a rọ izieraha ra rọvrẹ owhẹ no.”
6 Whaọ, otu ikere-obe na jọ a keria etẹe, be jọ udu rai roro nọ:
7 “Fikieme ọzae nana ọ be rọ ta eme enẹ? Ọ be ta eme-aghọ. Ono ọ rẹ sae rọ izieraha rọvrẹ ohwo, u te no Ọghẹnẹ no?”
8 Rekọ Jesu ọ tẹ nwane jọ eva riẹ riẹ nọ ere a be jọ udu rai roro, ọ tẹ ta kẹ ae nọ: “Fikieme wha be rọ jọ udu rai roro eware nana?
9 Ovẹ o mae lọhọ, re mẹ ta kẹ ọnọ okie o kie na nọ, ‘A rọ izieraha ra rọvrẹ owhẹ no,’ hayo re mẹ ta nọ, ‘Kpama, wọ ehwa ra re whọ nya’?
10 Rekọ, re wha ruẹse riẹ nọ Ọmọ ohwo o wo udu nọ ọ rẹ rọ rehọ izieraha rọvrẹ ahwo evaọ otọakpọ na—” ọ tẹ ta kẹ ọnọ okie o kie na nọ:
11 “Mẹ be ta kẹ owhẹ nọ, Kpama, wọ ehwa ra, re who kpobọ uwou ra.”
12 Ọ tẹ ginẹ kpama ọ tẹ nwane wọ ehwa riẹ ọ tẹ nya ruọ otafe evaọ iraro rai kpobi. U te gbe aikpobi unu, a te jiri Ọghẹnẹ inọ: “Ma re ruẹ oware utiona ẹdẹvo ho.”
13 Ọ tẹ wariẹ nya kpobọ akotọ abade na, ogbotu na kpobi a tẹ be nya bru rie ze, o te mu ae họ ewuhrẹ.
14 Nọ ọ jẹ nyavrẹ, ọ tẹ ruẹ Livai* ọmọ Alfiọs nọ ọ keria uwou nọ a rẹ jọ mi osa-uzou, ọ tẹ ta kẹe nọ: “Jọ olele mẹ.” Ọ tẹ kpama o te lele iei.
15 Oke ofa riẹ, Jesu ọ tẹ jẹ re emu evaọ uwou Livai, yọ enọ i re mi osa-uzou gbe erahaizi buobu a kuomagbei avọ ilele riẹ jẹ re emu na, keme ibuobu rai a je lele iei.
16 Rekọ nọ ikere-obe nọ e rrọ utu Farisi na a ruẹ nọ o bi lele erahaizi gbe enọ i re mi osa-uzou re emu, a tẹ be ta kẹ ilele riẹ nọ: “Kọ o re lele enọ i re mi osa-uzou gbe erahaizi re emu?”
17 Nọ Jesu o yo onana, ọ tẹ ta kẹ ae nọ: “Ahwo nọ oma rai o ga a gwọlọ edọkita ha, rekọ enọ e be mọ e gwọlọ edọkita. Erahaizi mẹ nyaze ti se, orọnikọ ahwo ikiẹrẹe he.”
18 Whaọ, ilele Jọn gbe otu Farisi na a rẹ siọ emuọriọ ba. Fikiere a tẹ nya bru rie ze a tẹ nọe nọ: “Emejabọ nọ ilele Jọn gbe ilele otu Farisi a rẹ rọ siọ emuọriọ ba rekọ ilele ra a rẹ siọ emuọriọ ba ha?”
19 Jesu ọ tẹ kpahe kẹ ae nọ: “Nọ ọva ọ tẹ rrọ kugbe egbẹnyusu riẹ, a wo ẹjiroro ọvo nọ a rẹ rọ siọ emuọriọ ba ha, manikọ ere he? Nọ ọva na ọ rrọ kugbe ae na, a rẹ sae siọ emuọriọ ba ha.
20 Rekọ edẹ e be tha nọ a rẹ te rehọ ọva na siọ ae ba, kẹsena a vẹ te siọ emuọriọ ba evaọ ẹdẹ yena.
21 Ohwo ọvo o re ko ẹwẹ-ohọ ọkpokpọ fihọ oria ewu anwae nọ ọ bẹre he. O te ru ere, ẹwẹ-ohọ ọkpokpọ na ọ rẹ bẹre no ewu na, u ve ru ei bẹre vi epaọ ọsosuọ.
22 Ofariẹ, ohwo ọvo o re ku udi okpokpọ họ oviẹ-udi anwae he. O te ru ere, udi na u re ru oviẹ-udi na sa bẹre, udi na u ve hwẹ kufiẹ, oviẹ-udi na o vẹ raha no. Ukpoye, a re ku udi okpokpọ họ oviẹ-udi okpokpọ.”
23 Whaọ epanọ ọ jẹ nya idhu-eka vrẹ evaọ Ẹdijala, ilele riẹ a te mu eka họ ẹkọrọ nọ a be nya na.
24 Fikiere otu Farisi na a tẹ ta kẹe nọ: “Rri! Fikieme a bi ro ru oware nọ o wọso uzi Ẹdijala?”
25 Ọ tẹ ta kẹ ae nọ: “Kọ wha ri se oware nọ Devidi o ru okenọ emu rai o re no, nọ ohọo u je kpei avọ ahwo riẹ?
26 Evaọ iku kpahe Abayata olori izerẹ na, Devidi ọ ruọ evaọ uwou Ọghẹnẹ, ọ tẹ re ebrẹdi nọ a ro mudhe kẹ Ọghẹnẹ,* onọ u fo nọ ohwo ọvo ọ rẹ re he ajokpaọ izerẹ na ọvo, ọ tẹ jẹ rehọ ejọ kẹ ahwo nọ a jọ kugbei. Kọ wha gbe ri se iku nana?”
27 Kẹsena ọ tẹ ta kẹ ae nọ: “A fi ẹdẹ Ẹdijala họ fiki ohwo, orọnikọ a ma ohwo fiki Ẹdijala ha.
28 Fikiere Ọmọ ohwo yọ Olori Ẹdijala na re.”
