Mak 3:1-35
3 Ọ tẹ wariẹ ruọ uwou-egagọ, yọ ọzae jọ nọ obọ riẹ o ko ọ jọ etẹe.
2 Ahwo na a te bi fiẹrohọ iẹe kiọkiọkiọ re a ruẹ sọ o ti siwi ọzae na evaọ Ẹdijala, re a sae ruẹ oware nọ a re gu fihọ iẹe uzou.
3 Ọ tẹ ta kẹ ọzae nọ obọ riẹ o ko na nọ: “Kpama re whọ nyaze udevie na.”
4 Kẹsena ọ tẹ nọ ae nọ: “Kọ u kiehọ re a jọ Ẹdijala ru oware uwoma manikọ re a ru oware enwoma, re a siwi uzuazọ manikọ re a kpe?” Rekọ a fibo.
5 Nọ Jesu o rri rai wariẹ avọ evedha, fikinọ eva egaga rai o kẹ riẹ uye gaga, ọ tẹ ta kẹ ọzae na nọ: “Riẹ obọ ra.” Ọ tẹ riẹ obọ na, obọ riẹ o tẹ ruẹrẹhọ.
6 Koyehọ otu Farisi na a ruọ otafe a tẹ nwane nyae gba ẹgwae kugbe ahwo utu Herọd fiki riẹ, re a ruẹsi kpei.
7 Rekọ Jesu avọ ilele riẹ a te no etẹe kpobọ abade na, yọ ogbotu obuobu nọ i no Galili gbe Judia ze a lele i rie.
8 Ogbotu ahwo buobu a tube no obọ Jerusalẹm gbe Idumia gbe abọdekọ Jọdan gbe Taya gbe Saedọn ze nọ a yo kpahe eware igbunu buobu nọ o bi ru.
9 Ọ tẹ ta kẹ ilele riẹ nọ jọ a ruẹrẹ okọ osese jọ fihọ kẹe nọ ọ rẹ sae ruọ eva re ogbotu na a se iẹe ba etunyẹ.
10 Fikinọ o siwi ahwo buobu, ahwo kpobi nọ a wo eyao egaga a te je su wariẹe họ re a rọ obọ tei.
11 Makọ izi igbegbe na dede, oke kpobi nọ a ruẹ e riẹ, a je kigwẹ fihọ aro riẹ a ve bo jẹ ta nọ: “Whẹ họ Ọmọ Ọghẹnẹ.”
12 Rekọ unuẹse buobu ọ vẹvẹ e rai unu gaga inọ a dhesẹ ohwo nọ ọ rrọ via ha.
13 Ọ tẹ gadiẹ kpobọ ugbehru o te se enọ ọ gwọlọ, a tẹ nya bru rie.
14 O te ru ezae ikpegbivẹ nọ o se na họ utu ovo, enọ o se ikọ, nọ i ti lele iei, nọ o ti vi nyae ta usi uwoma
15 jẹ te kẹ udu nọ a re ro le idhivẹri no.
16 Ikpegbivẹ nọ ọ salọ* na họ, Saemọn, ọnọ o mu odẹ kẹ nọ Pita,
17 Jemis ọmọ Zẹbẹdi gbe Jọn oniọvo riẹ (o te je mu odẹ kẹ aimava na nọ Boanejis, onọ otofa riẹ o rrọ “Emọ Egbrara”),
18 Andru, Filip, Batolomio, Matiu, Tọmọs, Jemis ọmọ Alfiọs, Tadiọs, Saemọn ohwo ajọwha na,
19 gbe Judas Iskariọt, ọnọ o vivie Jesu uwhremu na.
Kẹsena ọ tẹ ruọ evaọ uwou,
20 ogbotu na a tẹ wariẹ kokohọ, fikiere a gbe wo uvẹ nọ a rẹ rọ tubẹ re emu hu.
21 Rekọ nọ imoni riẹ a yo onana, a tẹ wọ ze re a mu ei vrẹ, keme a jẹ ta nọ: “Iroro riẹ e gbẹ gba ha.”
22 Yọ otu ikere-obe nọ i no obọ Jerusalẹm ze a be ta nọ: “O wo ẹzi Beelzebọb,* yọ ogaga osu idhivẹri na o bi ro le idhivẹri na no.”
23 Fikiere nọ o se ae kẹle oma, ọ tẹ rehọ etadhesẹ ta ẹme kẹ ae, inọ: “Ẹvẹ Setan ọ sai ro le Setan no?
24 Uvie nọ ahwo a be jọ họre omoma rai, o rẹ sai dikihẹ hẹ;
25 yọ uviuwou nọ a be jọ họre, o rẹ sai dikihẹ hẹ.
26 Ere re, otẹrọnọ Setan ọ be họre omobọ riẹ, ọ tẹ jẹ hẹriẹ no, ọ rẹ sai dikihẹ hẹ, rekọ yọ o muhọ ekie no.
27 Evaọ uzẹme, ohwo ọvo nọ ọ ruọ uwou ọgba nọ ọ rẹ sai tho eyero riẹ ọ rrọ họ ajokpanọ ọ rẹ kake gba ọgba na fihọ otọ, ẹsiẹe ọ sae rọ kwa eware uwou riẹ.
28 Uzẹme mẹ be ta kẹ owhai inọ a te rehọ oghẹrẹ eware kpobi rọvrẹ ahwo, makọ oghẹrẹ uzioraha kpobi gbe eme-aghọ kpobi nọ a ta.
29 Rekọ ohwo kpobi nọ ọ ta eme-aghọ mukpahe ẹzi ọfuafo na o wo erọvrẹ bẹdẹ bẹdẹ hẹ rekọ ọ reabe uzioraha ebẹdẹ bẹdẹ.”
30 Ọ ta eme nana keme a jẹ ta nọ: “O wo ẹzi ogbegbe.”
31 Oni riẹ avọ inievo riẹ a tẹ nyaze, nọ a dikihẹ obọ otafe, a te vi ohwo nyai sei.
32 Evaọ oke yena yọ ogbotu ahwo a keria wariẹe họ, fikiere a tẹ ta kẹe nọ: “Rri! Oni ra avọ inievo ra a rrọ obọ otafe, a gwọlọ ruẹ owhẹ.”
33 Rekọ ọ tẹ kpahe kẹ ae nọ: “Amono họ oni mẹ gbe inievo mẹ?”
34 Kẹsena o te rri enọ e keria wariẹe họ na, ọ tẹ ta nọ: “Rri, enana họ oni mẹ gbe inievo mẹ!
35 Ohwo kpobi nọ o bi ru oreva Ọghẹnẹ, ọye họ oniọvo-ọmọzae mẹ gbe oniọvo-ọmọtẹ mẹ gbe oni mẹ.”
