Mak 6:1-56
6 O te no etẹe, ọ tẹ ziọ ẹwho riẹ yọ ilele riẹ a jọ kugbei.
2 Nọ Ẹdijala o te, o te muhọ ewuhrẹ evaọ uwou-egagọ na, u te gbe ibuobu nọ e jẹ gaviezọ kẹe unu, a tẹ ta nọ: “Diẹse ọzae nana o jo wuhrẹ eware nana? Kọ fikieme a rọ kẹe areghẹ nana, yọ ẹvẹ ọ be sai ro ru iruo igbunu enana?
3 Ekapenta na ọna, ọmọ Meri, oniọvo Jemis, Josẹf, Judas, gbe Saemọn, o gbẹ rrọ ere? Kọ ogbẹrọnọ inievo-emetẹ riẹ a rrọ kugbe omai na?” Fikiere a gbẹ jẹe rehọ họ.
4 Rekọ Jesu ọ tẹ ta kẹ ae nọ: “Ọruẹaro o re wo ọghọ evaọ oria kpobi ajokpaọ evaọ ẹwho riẹ gbe evaọ udevie imoni riẹ gbe uwou riẹ.”
5 Fikiere ọ gbẹ jọ etẹe ru iruo igbunu hu, ajokpaọ obọ nọ ọ rọ kpahe umutho ahwo jọ nọ a jẹ mọ o te siwi ae.
6 Evaọ uzẹme, u gbe rie unu inọ a wo ẹrọwọ họ. O te no etẹe, ọ tẹ nya iwhre nọ e rrọ oyena soso wariẹ, bi wuhrẹ ahwo.
7 Kẹsena o te se Ikpegbivẹ na, o te bi vi ae vrẹ imimava, jẹ kẹ ae ogaga nọ a re ro le izi igbegbe no.
8 Ọ tẹ jẹ ta kẹ ae nọ a du wha oware ovuọvo lele oma kpohọ erẹ na ha ajokpaọ ubiọkpọ—a rẹ wha ebrẹdi hi, wha ẹkpa emuore he, hayo wha ugho* evaọ umueku rai hi—
9 rekọ a re ku eviẹ họ, yọ a re ku iwu ivẹ họ họ.
10 Ọ tẹ jẹ ta kẹ ae nọ: “Evaọ oria kpobi nọ wha jọ ruọ uwou, wha jọ etẹe bẹsenọ wha re no oria yena.
11 Yọ evaọ oria kpobi nọ a jọ dede owhai rehọ họ hayo gaviezọ kẹ owhai hi, nọ wha te bi no etẹe, wha nuhu ovu nọ ọ rrọ awọ rai no re o jọ isẹri kẹ ae.”
12 A tẹ nyavrẹ, a te je whowho nọ ahwo a kurẹriẹ,
13 yọ a le idhivẹri no ahwo buobu oma jẹ rehọ ewhri wholo ahwo nọ e jẹ mọ, a te siwi ae.
14 Whaọ, Herọd ovie na o te yo kpahe onana keme odẹ Jesu o jẹ jọ oria kpobi do, yọ ahwo a jẹ ta nọ: “Jọn Ọhọahwo-Ame na ọ kparoma no uwhu ze, oyejabọ nọ ọ be sai ro ru iruo igbunu na.”
15 Rekọ amọfa a jẹ ta nọ: “Nọ Elaeja.” Yọ efa jọ e be ta nọ: “Nọ ọruẹaro wọhọ omọvo eruẹaro anwae na.”
16 Nọ Herọd o yo onana, ọ tẹ ta nọ: “Jọn nọ me bru uzou na, ọye ọ kparoma ze no na.”
17 Keme Herọd o vi ahwo nyai mu Jọn a tẹ rọ egbregba kare iẹe je fi ei họ uwou-odi fiki Herodias, aye Filip oniọvo riẹ, keme Herọd ọ rehọ aye na no.
18 Yọ Jọn ọ jẹ hae ta kẹ Herọd nọ: “U fo ho re who mi oniọvo ra aye.”
19 Fiki onana, Herodias o wo ẹgo họ eva kpahe Jọn jẹ gwọlọ nọ o re kpei no, rekọ ọ jẹ sai kpei hi.
20 Keme ozọ Jọn u je mu Herọd fikinọ ọ riẹ nọ Jọn yọ ohwo okiẹrẹe nọ ọ be gọ Ọghẹnẹ ziezi, o te je ru re obọ o se iẹe ba ete. Nọ o te yo eme Jọn no, ọ rẹ gbẹ riẹ onọ o re ru hu, ghele na ọ gbẹ jẹ hae gaviezọ kẹe avọ evawere.
21 Rekọ uvẹ u te rovie fihọ kẹ Herodias evaọ ẹdẹ nọ Herọd o ro se ehaa ẹdẹ-eyẹ riẹ onọ o jo zizie ikpahwo esuo riẹ gbe enọ i wuzou egbaẹmo gbe ahwo nọ a mae riẹ odẹ evaọ Galili.
22 Ọmọtẹ Herodias ọ tẹ ruọ eva o te gbile nọ e were Herọd gbe ahwo nọ a jọ kugbei jẹ re jẹ da na. Herọd ovie na ọ tẹ ta kẹ ọmọtẹ na nọ: “Yare omẹ oware kpobi nọ whọ gwọlọ, mẹ te rehọ iẹe kẹ owhẹ.”
23 Ẹhẹ, o duwu iyei rọ ta kẹe nọ: “Oware kpobi nọ whọ yare mi omẹ, mẹ te rehọ iẹe kẹ owhẹ, makọ abọvo uvie mẹ dede.”
24 Ọmọtẹ na ọ tẹ nyae nọ oni riẹ nọ: “Eme mẹ rẹ yare?” Oni na ọ tẹ ta nọ: “Uzou Jọn Ọhọahwo-Ame na.”
25 Ọmọtẹ na ọ tẹ nwani siawọ bru ovie na ọ tẹ fodẹ oware nọ ọ gwọlọ inọ: “Mẹ gwọlọ nọ who fi uzou Jọn Ọhọahwo-Ame na họ omodhe ọkpakpala kẹ omẹ obọnana.”
26 Dede nọ onana o kẹ ovie na uye, ọ gwọlọ siọ ayare riẹ na ha fiki iyei nọ o duwu na gbe erara riẹ na.
27 Fikiere ovie na ọ tẹ nwani vi alakpa inọ ọ nyae rehọ uzou Jọn ze. Ọ tẹ nya o te bru uzou riẹ evaọ uwou-odi na
28 ọ tẹ rọ omodhe ọkpakpala wọ uzou riẹ ze. Ọ tẹ rehọ iẹe kẹ ọmọtẹ na, ọmọtẹ na ọ tẹ wọe se oni riẹ.
29 Nọ ilele Jọn a yo onana, a tẹ nyaze a tẹ wọ ori riẹ vrẹ, a tẹ nyai ki ei.
30 Ikọ na a te koko wariẹ Jesu họ, a tẹ niyẹrẹ eware kpobi nọ a ru je wuhrẹ kẹe.
31 Ọ tẹ ta kẹ ae nọ: “Wha nyaze re ma kpohọ oria nọ u siomano re wha serihọ omojọ.” Keme ahwo buobu a je zurie ze, ejọ i bi kpo yọ efa e be nyaze, a gbe wo uvumọ oke kẹ omarai hi makọ onọ a rẹ rọ re emu dede.
32 Fikiere a tẹ ruọ okọ re a kpohọ oria nọ u siomano nọ ae ọvo a rẹ jọ.
33 Rekọ ahwo a ruẹ e rai nọ a je bi vrẹ, ahwo buobu a tẹ te riẹ, a te zurie no ewho na kpobi ze, a tẹ rọ owotọ dhẹ kpohọ obonọ a ruọ okọ je kpohọ na jẹ kake rehọ ae te obei.
34 Nọ o no okọ na ze, ọ tẹ ruẹ ogbotu obuobu, ohrọ rai o tẹ re iẹe keme a wọhọ igodẹ nọ i wo othuru hu. O te mu ae eware buobu họ ewuhrẹ.
35 Nọ oke owọwọ u bi te no, ilele riẹ a tẹ nya bru rie ze a tẹ ta nọ: “Ahwo a be rria oria nana ha yọ oke owọwọ u bi te no.
36 Siobọno ae re a kpohọ ewho gbe iwhre nọ e kẹle onana nyae dẹ oware nọ a rẹ re.”
37 Ọ tẹ kpahe kẹ ae nọ: “Wha kẹ ae oware nọ a rẹ re.” A tẹ ta kẹe nọ: “Kiyọ ma rẹ dẹ ebrẹdi nọ i re te dinariọs* egba ivẹ rọ kuọ ahwo na. Yọ oware nọ ma rẹ sai ru?”
38 Ọ tẹ ta kẹ ae nọ: “Bro ikulu ebrẹdi wha wo? Wha nyai rri!” Nọ a rri no, a tẹ ta nọ: “Isoi, gbe imiyei ivẹ.”
39 Ọ tẹ ta kẹ ogbotu na nọ a keria ẹbe na ẹkuẹko.
40 A tẹ keria ẹkuẹko, ejọ udhusoi ejọ udhuvẹ-gbikpe.
41 Ọ tẹ rehọ ebrẹdi isoi gbe imiyei ivẹ na, o te rri ehru, ọ tẹ lẹ. Kẹsena o te bru ebrẹdi na ibribro ọ tẹ rehọ ae kẹ ilele na re a ghale ae kẹ ahwo na, ọ tẹ ghale imiyei ivẹ na kẹ ai kpobi.
42 Ahwo na kpobi a tẹ re eva vọ,
43 a tẹ kwa ikete ikpegbivẹ vọ avọ ewẹ ebrẹdi, yọ imiyei i kiọkọ re.
44 Ahwo nọ a re ebrẹdi na a jọ ezae idu isoi (5,000).
45 Kẹsena, ababọ oke oraha, ọ tẹ ta kẹ ilele riẹ nọ a ruọ okọ re a bi kpohọ abọdekọ evaọ ofẹ Bẹtsaida nyae hẹrẹ iẹe re ọyomariẹ ọ hẹrẹ bẹsenọ ogbotu na a rẹ nyavrẹ no.
46 Rekọ nọ o yere ogbotu na akodẹ no, o te kpobọ ugbehru nyae lẹ.
47 Nọ owọwọ u te no, okọ na o jọ udevie abade na, rekọ Jesu ọvo ọ jọ obọ okpa.
48 Fikiere nọ ọ ruẹ nọ udugaga ilele na a bi ro bi okọ na, fikinọ ofou na ọ rọ so ae, ọ tẹ nya bru rai ze evaọ irioke ilogbo,* be nya ehru abade na ze; rekọ ọ jẹ gwọlọ nya vrẹ rai.
49 Nọ a ruẹ e riẹ nọ ọ be nya evaọ ehru ame na, a tẹ be ta nọ: “Nọ ẹwoho!” A te bi bo.
50 Keme aikpobi a ruẹ e riẹ, ozọ u te mu ae. Rekọ ọ tẹ nwane ta kẹ ae nọ: “Jọ udu u te owhai otọ! Mẹ wha be ruẹ na; ozọ u mu owhai hi.”
51 Ọ tẹ ruọ evaọ okọ na kugbe ae, ofou na o te serihọ. U te gbe ae unu thesiwa,
52 keme a ri wuhrẹ no iruo igbunu orọ ebrẹdi na ze he, rekọ a gbẹ kare otoriẹ evaọ udu rai.
53 Nọ a fa te abọ obei, a tẹ kpahe Gẹnesarẹt, a te thuru okọ na si.
54 Rekọ nọ a nwani no okọ na ruọ okpa, ahwo a te vuhu iei.
55 A tẹ dhẹ ubrotọ yena soso duwu, a tẹ be rọ ehwa rọ wọ enọ e be mọ kpobi ziọ oria nọ a yo nọ ọ rrọ.
56 Yọ oria kpobi nọ ọ jọ ruọ iwhre hayo ẹwho, a rẹ wọ enọ e be mọ fihọ eria eki, a vẹ be lẹe nọ a rọ obọ te efọlefọ ewu riẹ ọvo dede. Yọ ahwo kpobi nọ a rọ obọ tei, ẹyao rai o kpo.
Eme-Obotọ
^ Evaọ Griki, “ẹroo.”
^ Rri oria Otofa Eme.
^ Koyehọ, oware wọhọ ighọjọ esa aso rite oware wọhọ ighọjọ ezeza ohiohiẹ.
