Mak 8:1-38
8 Evaọ oke yena, ogbotu obuobu a tẹ wariẹ jọ kugbei yọ a wo emu nọ a rẹ re he. Fikiere o te se ilele na ọ tẹ ta kẹ ae nọ:
2 “Ohrọ ogbotu na o be re omẹ keme anwọ edẹ esa na a rrọ kugbe omẹ na yọ a gbe wo emu nọ a rẹ re he.
3 Me te siobọno ai kpo eveva, ibiaro e sai bi ae evaọ edhere, yọ ugbothabọ ejọ rai a no ze.”
4 Rekọ ilele riẹ a tẹ nọe nọ: “Diẹse ohwo ọ sae jọ ruẹ ebrẹdi nọ i re te ahwo nana re evaọ oria nana nọ ahwo a rrọ họ na?”
5 Ọ tẹ nọ ae nọ: “Bro ebrẹdi wha wo?” A tẹ ta nọ: “Ihrẹ.”
6 Ọ tẹ ta kẹ ogbotu na nọ a keria otọ. Ọ tẹ rehọ ebrẹdi ihrẹ na, nọ ọ lẹ no, o te bru ae ibribro, ọ tẹ be rehọ ae kẹ ilele na re a ghale ae, a tẹ ghale ae kẹ ogbotu na.
7 A wo umutho imiyei esese jọ re, nọ ọ lẹ fihọ ae no, ọ tẹ ta kẹ ae nọ a ghale ae kẹ ahwo na.
8 A tẹ re eva vọ, a tẹ kwa ewẹ nọ i kiọkọ koko, e vọ ikete ilogbo ihrẹ.
9 Whaọ ezae nọ e jariẹ a bu te oware wọhọ idu ene (4,000). Kẹsena o te siobọno ae kpo.
10 Ọye avọ ilele riẹ a tẹ nwane ruọ okọ a tẹ ziọ ubrotọ Dalmanuta.
11 Otu Farisi a tẹ nya bru rie ziọ etẹe a te bi lele iei vravro, be ta kẹe nọ o dhesẹ oka jọ no ehru ze, be rọ ere dawo iẹe.
12 O te kuẹwẹ ọgaga ọ tẹ ta nọ: “Fikieme oge nana ọ be rọ gwọlọ oka? Uzẹme mẹ be ta na, a rẹ te kẹ oge nana uvumọ oka ha.”
13 Ọ tẹ nyase ae ba, ọ tẹ wariẹ ruọ okọ fa kpohọ abọdekọ.
14 Rekọ a kareghẹhọ wha ebrẹdi lele oma ha, yọ a jọ okọ na wo emu ọvuọvo ho ajokpaọ ukulu ebrẹdi ọvo.
15 Ọ tẹ vẹvẹ ai unu gaga, inọ: “Wha muẹrohọ otọ, jẹ yọroma kẹ ẹvi* otu Farisi gbe ẹvi ọrọ Herọd.”
16 Fikiere a te mu ohwohwo họ ẹfo fiki ebrẹdi nọ a wo ho.
17 Nọ o muẹrohọ onana, ọ tẹ ta kẹ ae nọ: “Emejabọ wha be rọ fo ohwohwo fiki ebrẹdi nọ wha wo ho? Kọ wha re ruẹ je wo otoriẹ ghele? Kọ wha gbẹ kare otoriẹ evaọ udu rai?
18 ‘Wha wo ibiaro, kọ wha be rehọ ae ruẹ ude; wha wo ezọ, kọ wha be rehọ ae yo ẹme?’ Kọ wha gbẹ kareghẹhọ
19 okenọ mẹ rọ ebrẹdi isoi rọ kuọ ezae idu isoi (5,000), unu ikete nọ wha kwa koko no ewẹ nọ i kiọkọ ze?” A tẹ kẹe uyo nọ: “Ikpegbivẹ.”
20 “Okenọ me bru ebrẹdi ihrẹ rọ kuọ ezae idu ene (4,000), bro ikete ilogbo wha kwa koko no ewẹ nọ i kiọkọ ze?” A tẹ kẹe uyo nọ: “Ihrẹ.”
21 Ọ tẹ ta kẹ ae nọ: “Kọ wha ri wo otoriẹ ẹme na ghele?”
22 A te bi kpahe Bẹtsaida. Ahwo a tẹ rọ ọzae jọ nọ o tuaro sei, a tẹ lẹe nọ ọ rọ obọ te ọzae na.
23 O te kru ọzae nọ o tuaro na obọ ọ tẹ rehọ iẹe kpohọ otafe iwhre na. O te je eya ku ibiaro riẹ, ọ tẹ rọ abọ kpahe iẹe jẹ nọe nọ: “Kọ whọ be ruẹ oware jọ?”
24 Ọzae na ọ tẹ kpare ovao ọ tẹ ta nọ: “Mẹ be ruẹ ahwo, rekọ a wọhọ ire nọ e be nya.”
25 Ọ tẹ wariẹ rọ abọ te ibiaro ọzae na, ọ tẹ ruẹ eware vevẹ. Ere o ro mu ude họ ẹruẹ, jẹ be sai vuhu eware kpobi.
26 Ọ tẹ vuẹe nọ o kpobọ uwou riẹ, jẹ ta nọ: “Whọ ruọ evaọ iwhre na ha.”
27 Kẹsena Jesu avọ ilele riẹ a te bi kpohọ iwhre nọ e rrọ Sisaria ọrọ Filipai, evaọ edhere o te mu ilele riẹ họ ẹnọ nọ: “Ono ahwo a be ta nọ mẹ rrọ?”
28 A tẹ ta kẹe nọ: “Jọn Ọhọahwo-Ame na, ejọ nọ Elaeja, efa kọ, omọvo eruẹaro na.”
29 Ọ tẹ nọ ae nọ: “Kọ owhai, ono wha roro nọ mẹ rrọ?” Pita ọ tẹ kẹe uyo nọ: “Whẹ họ Kristi na.”
30 Fikiere ọ tẹ vẹvẹ ai unu gaga inọ a ta kẹ ohwo ọvo kpahe iẹe he.
31 O te je mu ai họ ẹta kẹ inọ o gba Ọmọ ohwo họ nọ ọ rẹ ruẹ uye eware buobu, yọ ekpako na gbe ilori izerẹ na gbe otu ikere-obe na a te se iẹe, a ve ti kpei, ọ vẹ te kparoma ze evaọ ẹdẹ avọ esa.
32 Evaọ uzẹme, ọ jẹ ta ẹme na kẹ ae vevẹ. Rekọ Pita o te sei họ akotọ, ọ tẹ be whọku ei.
33 O te kuomarẹriẹ, o te rri ilele riẹ, ọ tẹ whọku Pita nọ: “Ruọ emu mẹ, Setan! keme iroro ahwo-akpọ who bi roro na orọnikọ erọ Ọghẹnẹ hẹ.”
34 O te se ogbotu na gbe ilele riẹ kẹle oma, ọ tẹ ta kẹ ae nọ: “Otẹrọnọ ohwo jọ ọ gwọlọ lele omẹ, jọ ọ vro omobọ riẹ jẹ wọ ure-oja* riẹ je lele omẹ ẹsikpobi.
35 Keme ohwo kpobi nọ ọ be gwọlọ siwi uzuazọ riẹ, uzuazọ riẹ u ti vru, rekọ ohwo kpobi nọ uzuazọ riẹ u vru fiki mẹ gbe fiki usi uwoma na ọ te wariẹ woi.
36 Evaọ uzẹme, didi ewoma o rẹ jọ kẹ ohwo otẹrọnọ o wo akpọ na soso rekọ uzuazọ riẹ u te vru?
37 Kọ eme ohwo ọ sai gine ro nwene uzuazọ riẹ?
38 Keme ohwo kpobi nọ oma o be vo fiki mẹ avọ eme mẹ evaọ oge ibruẹnwae* nana nọ o rrọ muomu na, oma riẹ o te vo Ọmọ ohwo re okenọ ọ te nyaze evaọ oruaro Ọsẹ riẹ avọ ikọ-odhiwu erẹri na nọ e rrọ kugbei.”
Eme-Obotọ
^ Koyehọ, iyisti nọ a re ro ru ebrẹdi nọ u re ru ei fu.
^ Rri oria Otofa Eme.
^ Hayo “ahwo nọ a rọ oma rai kpobi kẹ Ọghẹnẹ hẹ.”
