Mak 9:1-50
-
Jesu ọ rẹriẹ (1-13)
-
O siwi ọmọzae nọ ẹzi ogbegbe ọ jọ oma (14-29)
-
Eware kpobi e rẹ lọhọ kẹ ohwo nọ o wo ẹrọwọ (23)
-
-
Jesu ọ wariẹ ta kpahe uwhu riẹ (30-32)
-
Ilele na a vravro kpahe ohwo nọ ọ mae rro (33-37)
-
Ohwo kpobi nọ ọ be wọso omai hi ọ rrọ abọ mai (38-41)
-
Itho ezoruẹ (42-48)
-
“Wha wo uwhei evaọ omarai” (49, 50)
9 Ofariẹ, ọ tẹ ta kẹ ae nọ: “Uzẹme mẹ be ta kẹ owhai inọ ejọ e rrọ etenẹ na nọ i ti whu vievie he ajokpanọ a ruẹ Uvie Ọghẹnẹ nọ a ro mu no* tao.”
2 Nọ edẹ ezeza e vrẹ no, Jesu ọ tẹ rehọ Pita, Jemis, gbe Jọn kugbe oma, aimane na ọvo a te kpobọ ehru ugbehru ukpekpehru jọ. Ọ tẹ rẹriẹ evaọ iraro rai;
3 iwu riẹ i te je lo nwranwranwra, yọ e jọ fuafo papapa, ohwo ọvo nọ ọ rẹ fọrọ ehọ fo tere ọ rrọ otọakpọ na ha.
4 Ofariẹ, Elaeja avọ Mosis a tẹ romavia kẹ ae, bi lele Jesu ta ẹme.
5 Kẹsena Pita ọ tẹ ta kẹ Jesu nọ: “Owuhrẹ, u woma nọ ma rọ rrọ etenẹ. Fikiere joma bọ iwou-udhu esa fihọ etenẹ, ọjọ rọkẹ owhẹ, ọjọ rọkẹ Mosis, ọjọ rọkẹ Elaeja.”
6 Evaọ uzẹme, ọ riẹ ẹme nọ ọ rẹ ta ha, keme ozọ u je mu ai.
7 Ẹgho ọ tẹ romavia, o te ruru ae, urru jọ u te do no ẹgho na ze nọ o ta nọ: “Ọnana họ Ọmọ mẹ, oyoyou mẹ na. Wha gaviezọ kẹe.”
8 Idudhe na, a te rri wariẹ, a tẹ ruẹ nọ ohwo ọvo ọ gbẹ rrọ etẹe kugbe ai hi ajokpaọ Jesu ọvo.
9 Nọ a je no ugbehru na ruọ otọ, ọ tẹ vẹvẹ ae unu inọ a ta oware nọ a ruẹ na kẹ ohwo ọvo ho bẹsenọ Ọmọ ohwo ọ rẹ kparoma no uwhu ze no.
10 A diwi ẹme na họ eva,* rekọ a jẹ nọ ohwohwo oware nọ ẹkparomatha nana u dhesẹ.
11 A te mu ei họ ẹnọ inọ: “Fikieme otu ikere-obe na a rọ ta nọ Elaeja ọ te kake nyaze tao?”
12 Ọ tẹ ta kẹ ae nọ: “Elaeja ọ te ginẹ kake nyaze ọ vẹ ruẹrẹ eware kpobi họ; rekọ fikieme a ro kere kpahe Ọmọ ohwo inọ ọ te ruẹ uye eware buobu a vẹ jẹ se iẹe?
13 Rekọ mẹ be ta kẹ owhai nọ Elaeja ọ ginẹ nyaze no, yọ a ru rie epanọ u je rai, wọhọ epanọ a kere kpahe iẹe.”
14 Nọ a nya te ilele edekọ na oma, a tẹ ruẹ ogbotu obuobu nọ e wariẹ e rai họ gbe otu ikere-obe na nọ i bi lele ae vravro.
15 Rekọ nọ ogbotu na a nwane ruẹ e riẹ, u te gbe ai unu, a tẹ dhẹ bru rie re a yere iei.
16 Ọ tẹ nọ ae nọ: “Eme wha bi lele ae vravro kpahe?”
17 Ọzae jọ evaọ ogbotu na ọ tẹ kẹe uyo nọ: “Owuhrẹ, mẹ rọ ọmọzae mẹ bru owhẹ ze keme o wo ẹzi ogbegbe nọ u ru rie dienu.
18 Oria kpobi nọ ẹzi ogbegbe na o je kru rie ọ rẹ rehọ iẹe fa otọ, ivuhu i ve bi no unu riẹ ze ọ vẹ be reakọ, oma o vẹ lọhọ iẹe no. Mẹ vuẹ ilele ra nọ a le ẹzi ogbegbe na no, rekọ a sai ru ere he.”
19 Jesu ọ tẹ ta kẹ ae nọ: “O oge nọ ọ kare ẹrọwọ, ẹvẹ mẹ rẹ jọ kugbe owhai kri te? Ẹvẹ me re thihakọ kẹ owhai kri te? Rehọ ọmọ na se omẹ.”
20 A tẹ wọ ọmọ na sei, rekọ nọ ẹzi ogbegbe na ọ ruẹ Jesu, ọ tẹ nwani ru ọmọ na bi kie ewawa. Nọ o kie totọ no, o te bi ghelie evaọ otọ, yọ ivuhu i bi no unu riẹ ze.
21 Jesu ọ tẹ nọ ọsẹ ọmọ na nọ: “Anwọ oke vẹ onana u bi ro ru ei?” Ọ tẹ ta nọ: “No oke emaha ze,
22 yọ ẹsibuobu o re gele ọmọ na fihọ erae je gele iei fihọ ame re ọ ruẹsi kpei no. Rekọ otẹrọnọ whọ sai ru oware jọ, re ohrọ mai re who fiobọhọ kẹ omai.”
23 Jesu ọ tẹ ta kẹe nọ: “Kọ whọ be ta nọ, ‘Otẹrọnọ whọ sai’? Whaọ, eware kpobi e rẹ lọhọ kẹ ohwo nọ o wo ẹrọwọ.”
24 Ọsẹ ọmọ na ọ tẹ nwani bo nọ: “Me wo ẹrọwọ! Fiobọhọ kẹ omẹ evaọ abọ nọ mẹ jọ gwọlọ ẹrọwọ!”
25 Nọ Jesu ọ ruẹ nọ ogbotu a be dhẹ bru rai ze, ọ tẹ whọku ẹzi ogbegbe na inọ, “Whẹ ẹzi ogbegbe nọ o dienu je diezọ, mẹ be ta kẹ owhẹ nọ, no oma riẹ no, yọ whọ gbẹ ruẹe oma ofa ha!”
26 Nọ ẹzi ogbegbe na o bo je ru ọmọ na kie ewawa unuẹse buobu no, o te noi oma no, ọmọ na ọ tẹ wọhọ ẹsenọ o whu no, fikiere ibuobu ahwo na a tẹ be ta nọ: “O whu no!”
27 Rekọ Jesu o te kru rie obọ be kpare iẹe kpama, o te dikihẹ.
28 Nọ ọ ruọ evaọ uwou no, ilele riẹ a tẹ nọe okenọ ọye ọvo ọ jọ oria inọ: “Fikieme ma gbẹ sai ro le idhivẹri na no ho?”
29 Ọ tẹ ta kẹ ae nọ: “Oghẹrẹ ọnana ọ sai no ohwo oma ha ajokpaọ ẹkwoma olẹ.”
30 A te no etẹe a tẹ nya orọ Galili vrẹ, rekọ ọ gwọlọ nọ ohwo ọvo ọ riẹ kpahe iẹe he.
31 Keme o je wuhrẹ ilele riẹ jẹ be ta kẹ ae nọ: “A ti vivie Ọmọ ohwo họ obọ ahwo, a ve ti kpei, rekọ dede nọ a ti kpei, ọ te kparoma ze evaọ ẹdẹ avọ esa.”
32 Rekọ a wo otoriẹ ẹme riẹ na ha, yọ a jẹ sae nọe he fiki ozọ.
33 A tẹ ziọ Kapaniọm. Nọ ọ jọ evaọ uwou, ọ tẹ nọ ae nọ: “Eme wha jẹ vravro kpahe eva edhere?”
34 A kpahe ẹme he, keme evaọ edhere a jẹ vravro kpahe ohwo nọ ọ mae rro.
35 Ọ tẹ keria o te se Ikpegbivẹ na ọ tẹ ta kẹ ae nọ: “Ohwo jọ ọ tẹ gwọlọ jọ ohwo ọsosuọ, ọ rẹ jọ ohwo urere kpobi gbe ọgbodibo kẹ ahwo na kpobi.”
36 Ọ tẹ rehọ ọmaha jọ, ọ tẹ rehọ iẹe dikihẹ udevie rai; o te fi obọ họ iẹe ẹkoko, ọ tẹ ta kẹ ae nọ:
37 “Ohwo kpobi nọ o dede ọmaha otiọna jọ rehọ fiki odẹ mẹ o dede omẹ rehọ re; yọ ohwo kpobi nọ o dede omẹ rehọ, orọnikọ mẹ ọvo o dede rehọ họ rekọ te Ọnọ o vi omẹ ze.”
38 Jọn ọ tẹ ta kẹe nọ: “Owuhrẹ, ma ruẹ ohwo jọ nọ ọ jẹ rọ odẹ ra le idhivẹri no, yọ ma daoma re ma whaha iẹe keme ọ jọ usu mai hi.”
39 Rekọ Jesu ọ tẹ ta nọ: “Wha whaha iẹe he, keme ohwo nọ ọ be rọ odẹ mẹ ru iruo igbunu ọ te nwane ta ẹme oyoma kpahe omẹ vẹrẹ vẹrẹ hẹ.
40 Keme ohwo kpobi nọ ọ be wọso omai hi yọ ọ rrọ abọ mai.
41 Yọ ohwo kpobi nọ ọ kẹ owhai egho ame fikinọ whai yọ erọ Kristi, uzẹme mẹ be ta kẹ owhai, o ti wo osohwa riẹ hrọ.
42 Rekọ ohwo kpobi nọ o ru ọjọ evaọ usu esese nana nọ i wo ẹrọwọ na zoruẹ, o te mai woma kẹe otẹrọnọ a gba utho nọ a re ro wuhu eka fihọ iẹe ohọe a ve gbolo iei fihọ abade.
43 “Otẹrọnọ obọ ra u bi ru owhẹ zoruẹ,* bru rie no. O mai woma kẹ owhẹ re whọ rọ obọ ovo ruọ uzuazọ viukpenọ a re gbolo owhẹ avọ abọ ivẹ fihọ Gehena,* erae nọ a rẹ sai furie he.
44 ——
45 Yọ otẹrọnọ owọ ra u bi ru owhẹ zoruẹ, bru rie no. O mai woma kẹ owhẹ re whọ rọ owọ ovo ruọ uzuazọ viukpenọ a re gbolo owhẹ avọ awọ ivẹ fihọ Gehena.*
46 ——
47 Yọ otẹrọnọ ubiẹro ra u bi ru owhẹ zoruẹ, vre rie kufiẹ. O mai woma kẹ owhẹ re whọ rọ ubiẹro ovo ruọ Uvie Ọghẹnẹ viukpenọ a re gbolo owhẹ avọ ibiaro ivẹ fihọ Gehena,*
48 oria nọ ihoi riẹ i re whu hu yọ erae na i re fu hu.
49 “A te kpare erae ku oghẹrẹ ahwo otiọye na wọhọ epanọ a rẹ vravra uwhei fihọ emu.
50 Uwhei u woma, rekọ uwhei u te ku awere riẹ fiẹ, kọ ẹvẹ a sae rọ wariẹ ru ei were? Wha wo uwhei evaọ omarai, re wha lele ohwohwo rria dhedhẹ.”
Eme-Obotọ
^ Hayo “nọ o nyaze no avọ ogaga.”
^ Hayo “a ta ẹme na kẹ amọfa ha.”
^ Hayo “ru owhẹ raha uzi.”
^ Rri oria Otofa Eme.
^ Rri oria Otofa Eme.
^ Rri oria Otofa Eme.
