Matiu 10:1-42
10 O te se ilele ikpegbivẹ riẹ, ọ tẹ kẹ ae ogaga nọ a re ro le izi igbegbe no, gbe ogaga nọ a re ro siwi oghoghẹrẹ eyao gbe emo kpobi.
2 Edẹ ikọ ikpegbivẹ na ena: Ọrọ ọsosuọ, Saemọn, ọnọ a re se Pita, avọ Andru, oniọvo riẹ; Jemis ọmọ Zẹbẹdi avọ Jọn, oniọvo riẹ;
3 Filip avọ Batolomio; Tọmọs avọ Matiu ọnọ o re mi osa-uzou na; Jemis ọmọ Alfiọs; Tadiọs;
4 Saemọn ohwo ajọwha na; gbe Judas Iskariọt, ọnọ o vivie Jesu uwhremu na.
5 Ikọ ikpegbivẹ nana Jesu o vi, yọ ọ kẹ rai ehrẹ nana: “Wha du nya ruọ edhere erẹwho egedhọ họ, yọ wha ruọ ẹwho ahwo Sameria ọvo ho;
6 ukpoye, wha nyae gwọlọ igodẹ orẹwho Izrẹl nọ i vru.
7 Nọ wha be nya na, wha whowho inọ: ‘Uvie odhiwu o kẹle no.’
8 Wha siwi enọ e be mọ, wha kpare enọ i whu no, wha siwi emoti, wha le idhivẹri no ahwo oma. Ọvọvẹ a kẹ owhai, wha kẹ ọvọvẹ.
9 Wha wha igoru hayo isiliva hayo ẹroo evaọ umueku-ugho rai hi,
10 hayo wha ẹkpa emuore kẹ erẹ na ha, hayo iwu ivẹ, hayo eviẹ ivẹ, hayo ibiọkpọ ivẹ hẹ, keme u fo nọ a rẹ kẹ oruiruo emu.
11 “Evaọ ẹwho hayo iwhre kpobi nọ wha te, wha jariẹ gwọlọ ọnọ o te, wha vẹ jọ etẹe bẹsenọ wha re kpo.
12 Nọ wha tẹ ruọ uwou, wha yere enọ e rrọ uwou na.
13 A te dede owhai rehọ, jọ udhedhẹ rai u te uwou na; rekọ a gbe dede owhai rehọ họ, jọ udhedhẹ rai u lele owhai zihe.
14 Evaọ oria kpobi nọ a jọ dede owhai rehọ họ hayo gaviezọ kẹ owhai hi, nọ wha te bi no uwou yena hayo ẹwho yena, wha nuhu ovu nọ ọ rrọ awọ rai no.
15 Uzẹme mẹ be ta kẹ owhai, o te mae lọhọ kẹ ẹwho Sọdọm avọ Gomora vi ẹwho yena evaọ Ẹdẹ Ẹdhoguo.
16 “Rri! Me bi vi owhai wọhọ igodẹ evaọ udevie ijera; fikiere, wha wo areghẹ wọhọ eraomuomu, ghele na wha jọ wowolẹ wọhọ irueruẹ.
17 Wha yọroma kẹ ahwo, keme a rẹ te rehọ owhai kpobọ ekọto rai jẹ te fa owhai eviaviẹ evaọ iwou-egagọ rai.
18 A rẹ te rehọ owhai kpohọ aro eba gbe ivie fiki mẹ. Wha vẹ te rọ uvẹ yena se isẹri kpahe omẹ kẹ ae gbe erẹwho na.
19 Rekọ nọ a tẹ rehọ owhai nya, wha du ruawa ẹme nọ wha rẹ ta gbe epanọ wha te rọ tae he, keme a te kẹ owhai ẹme nọ wha te ta evaọ auwa yena;
20 keme orọnikọ whai họ enọ e be ta ẹme na ha, rekọ ẹzi Ọsẹ rai ọ be rọ owhai ta ẹme na.
21 Ofariẹ, oniọvo o re ti vivie oniọvo riẹ re a kpei, ọsẹ o ti vivie ọmọ riẹ, emọ e te wọso esẹgbini rai, je vivie ai re a kpe ai.
22 Ahwo kpobi a ti mukpahe owhai fiki odẹ mẹ, rekọ ọnọ o thihakọ te urere a ti siwi ei.
23 A te kpokpo owhai evaọ ẹwho jọ, wha dhẹ kpohọ ọfa; keme uzẹme mẹ be ta kẹ owhai, wha te sae ta usi uwoma na nya ẹkwotọ Izrẹl soso re vievie he bẹsenọ Ọmọ ohwo ọ rẹ te nyaze.
24 “Olele ọ rro vi owuhrẹ riẹ hẹ, yọ ọrigbo ọ rro vi olori riẹ hẹ.
25 Olele ọ tẹ rrọ wọhọ owuhrẹ riẹ u te, u te je te re ọrigbo ọ jọ wọhọ olori riẹ. Otẹrọnọ ahwo a se ọnọ o wo uwou na Beelzebọb,* ababọ avro, a ti se ahwo uwou riẹ epọvo na re.
26 Fikiere, wha dhozọ rai hi, keme oware ovo nọ a sino nọ o te bẹre via ha o rrọ họ, yọ oware ovo nọ u dhere nọ a te riẹ hẹ o rrọ họ.
27 Oware nọ mẹ ta kẹ owhai evaọ oria nọ u dhere, wha tae evaọ ẹgbede, yọ onọ me se họ owhai ozọ, wha whowho iei evaọ ehru uwou.
28 Wha dhozọ enọ i re kpe ugboma na ha, nọ e rẹ sae raha uzuazọ họ;* ukpoye wha dhozọ ọnọ ọ rẹ sae raha uzuazọ gbe ugboma evaọ Gehena.*
29 Ubiugho osese* a be hae zẹ imuedi ivẹ, o gbẹ rrọ ere? Ghele na, ọvuọvo rai o re kie fihọ otọ ababọ Ọsẹ rai nọ ọ rẹ riẹ hẹ.
30 Rekọ rọkẹ owhai, ọ riẹ unu ibieto kpobi nọ e rrọ uzou rai.
31 Fikiere, ozọ u mu owhai hi; wha ghare vi imuedi buobu.
32 “Ohwo kpobi nọ ọ rọwo omẹ evaọ aro ahwo, mẹ te rọwo iẹe re evaọ aro Ọsẹ mẹ nọ ọ rrọ obọ odhiwu.
33 Rekọ ohwo kpobi nọ ọ se omẹ evaọ aro ahwo, mẹ te se iẹe re evaọ aro Ọsẹ mẹ nọ ọ rrọ obọ odhiwu.
34 Wha du roro ho inọ mẹ nyaze ti fi udhedhẹ họ otọakpọ na; orọnikọ udhedhẹ hẹ, rekọ ọgbọdọ.
35 Mẹ nyaze ti fi ohẹriẹ họ udevie ọmọ avọ ọsẹ riẹ, udevie ọmọtẹ avọ oni riẹ, gbe udevie aye uwou-orọo avọ oniọrọo riẹ.
36 Evaọ uzẹme, ewegrẹ ohwo a te jọ ahwo uwou obọriẹ.
37 Ohwo kpobi nọ o you ọsẹ hayo oni riẹ vi omẹ o te ọnọ ọ rẹ jọ olele mẹ hẹ; yọ ohwo kpobi nọ o you ọmọzae hayo ọmọtẹ riẹ vi omẹ o te ọnọ ọ rẹ jọ olele mẹ hẹ.
38 Ohwo kpobi nọ ọ rọwo wọ ure-oja* riẹ je lele omẹ hẹ o te ọnọ ọ rẹ jọ olele mẹ hẹ.
39 Ohwo kpobi nọ ọ be gwọlọ siwi uzuazọ riẹ, uzuazọ riẹ u ti vru, rekọ ohwo kpobi nọ uzuazọ riẹ u vru fiki mẹ ọ te wariẹ woi.
40 “Ohwo kpobi nọ o dede owhai rehọ o dede omẹ rehọ re, yọ ohwo kpobi nọ o dede omẹ rehọ o dede Ọnọ o vi omẹ ze rehọ re.
41 Ohwo kpobi nọ o dede ọruẹaro rehọ fikinọ ọruẹaro ọ rrọ o ti wo osohwa ọruẹaro, yọ ohwo kpobi nọ o dede ohwo okiẹrẹe rehọ fikinọ ohwo okiẹrẹe ọ rrọ o ti wo osohwa ohwo okiẹrẹe.
42 Yọ ohwo kpobi nọ ọ kẹ ọjọ evaọ usu esese nana makọ egho ame odhedhẹ fikinọ olele mẹ ọ rrọ, uzẹme mẹ be ta kẹ owhai, o ti wo osohwa riẹ.”
Eme-Obotọ
^ Odẹ ọfa Setan, ọnọ ọ rrọ osu idhivẹri na.
^ Hayo “nọ e rẹ sae whaha owhẹ ewo uzuazọ obaro ho.”
^ Rri oria Otofa Eme.
^ Evaọ Griki, “assarion.”
^ Rri oria Otofa Eme.
