Matiu 11:1-30
11 Nọ Jesu ọ kẹ ilele ikpegbivẹ riẹ ehrẹ no, ọ tẹ ruọ edhere re o kpobọ ewho rai nyai wuhrẹ jẹ ta usi uwoma.
2 Rekọ, nọ Jọn ọ jọ uwou-odi yo kpahe iruo nọ Kristi o bi ru, o te vi ilele riẹ
3 re a nyae nọe nọ: “Whẹ họ Ọnọ Ọ be Nyaze na, manikọ ma re rẹro ọfa?”
4 Jesu ọ tẹ kẹ ae uyo nọ: “Wha nyae vuẹ Jọn eware nọ wha bi yo jẹ be ruẹ na:
5 Enọ i tuaro i mu ude họ ẹruẹ no, enọ e ko e be nya, a bi siwi emoti, enọ i diezọ i bi yo ẹme, a be kpare enọ i whu no ze, yọ a be ta usi uwoma na kẹ iyogbere.
6 Eva e were ọnọ ọ jọ oma mẹ ruẹ oware ovo nọ o rẹ wha ezoruẹ ze he.”
7 Nọ ahwo na a ruọ edhere no, Jesu o te mu ogbotu na họ ẹta kẹ kpahe Jọn nọ: “Eme wha kpobọ udhude nyai rri? Ukpoko* nọ ofou o bi fou?
8 Kọ eme wha nyai rri? Ọzae nọ o ku iwu elọlọhọ* họ? Whaọ, enọ i ku iwu elọlọhọ họ e rrọ iwou ivie.
9 Kọ fikieme wha ginẹ rọ nya? Re wha ruẹ ọruẹaro? Ẹhẹ, mẹ be ta kẹ owhai nọ, o vi ọruẹaro gheghe.
10 Ọna a kere kpahe nọ: ‘Rri! Me bi vi ọnyukọ mẹ karo kẹ owhẹ, ọnọ ọ te ruẹrẹ edhere ra họ kẹ owhẹ.’
11 Uzẹme mẹ be ta kẹ owhai, evaọ usu ahwo nọ eyae i yẹ, ọnọ ọ rro vi Jọn Ọhọahwo-Ame na ọ riẹ hẹ, rekọ ọnọ ọ mae kawo evaọ Uvie obọ odhiwu ọ rro vi ei.
12 No anwọ oke Jọn Ọhọahwo-Ame na ze rite enẹna, Uvie odhiwu họ utee nọ ahwo a bi le, yọ enọ e be daoma rai kpobi a bi lei tobọ.
13 Keme rite oke Jọn, aikpobi, koyehọ Eruẹaro na gbe Uzi na e ta kpahe eware nọ e te via;
14 yọ o tẹ ruọ owhai nọ wha rẹ rọwo onana, ọye họ ‘Elaeja nọ ọ te nyaze na.’
15 Jọ ọnọ o wo ezọ o yo.
16 “Amono mẹ rẹ rehọ oge ọnana dhesẹ? O wọhọ emaha nọ e keria oria eki nọ e be ta kẹ emaha efa nọ,
17 ‘Ma kporo urete kẹ owhai, rekọ wha gbile he; ma viẹ, rekọ wha weri hi.’
18 Epọvo na re, Jọn ọ nyaze, ọ be re hayo da wọhọ ahwo edekọ họ, ghele na ahwo a be ta nọ, ‘Idhivẹri ọ riẹe oma.’
19 Ọmọ ohwo ọ nyaze, ọ be re jẹ da, ghele na ahwo a be ta nọ, ‘Rri! Ọgba-ore gbe ọgba-udi ọ rrọ, ogbẹnyusu enọ i re mi osa-uzou gbe erahaizi.’ Oghẹrẹ kpobi kẹhẹ, iruo* nọ areghẹ o ru a rẹ rọ riẹ nọ o kiẹrẹe.”
20 Kẹsena o te mu ewho nọ o jo ru iruo igbunu riẹ buobu họ ẹwhọku, keme a kurẹriẹ hẹ:
21 “Uye u te owhẹ, Korazin! Uye u te owhẹ, Bẹtsaida! keme o hae jọnọ evaọ Taya gbe Saedọn mẹ jọ ru iruo igbunu nọ mẹ jọ eva rai ru, a hai ku ehọ-ẹkporo họ jẹ keria enwo ro dhesẹ nọ a kurẹriẹ.
22 Rekọ mẹ be ta kẹ owhai nọ, o te mae lọhọ kẹ Taya gbe Saedọn vi owhai evaọ Ẹdẹ Ẹdhoguo.
23 Kọ whẹ Kapaniọm, a te kpare owhẹ kpehru? Obọ Uki* who ti kpohọ; keme o hae jọnọ evaọ Sọdọm mẹ jọ ru iruo igbunu nọ mẹ jọ eva ra ru, ọ hae gbẹ jariẹ rite inẹnẹ.
24 Rekọ mẹ be ta kẹ owhai nọ, o te mae lọhọ kẹ Sọdọm vi owhẹ evaọ Ẹdẹ Ẹdhoguo.”
25 Evaọ oke yena Jesu ọ tẹ ta nọ: “Mẹ be jọ iraro ahwo jiri owhẹ, Ọsẹ, Olori odhiwu gbe otọakpọ, keme whọ ko eware nana dhere no iwoareghẹ gbe enọ e riẹ ikpebe, who te rovie ae via kẹ emaha.
26 O Ọsẹ, keme onana họ oreva ra.
27 Ọsẹ mẹ ọ rehọ eware kpobi họ omẹ obọ no, yọ ohwo ọvo ọ riẹ Ọmọ na totọ họ ajokpaọ Ọsẹ na; yọ ohwo ọvo ọ riẹ Ọsẹ na totọ họ ajokpaọ Ọmọ na gbe ohwo kpobi nọ u je Ọmọ na inọ o re dhesẹ Ọsẹ na kẹ.
28 Wha nya bru omẹ ze, whai kpobi nọ e be ruẹ uye, nọ ewha egbẹgbẹdẹ e rrọ uzou, mẹ te sasa owhai oma.
29 Wha rehọ owhowha mẹ je wuhrẹ mi omẹ, keme mẹ rrọ wowolẹ je wo omaurokpotọ, wha re ti wo omosasọ.
30 Keme owhowha mẹ o rẹ nyaoma ha, yọ owha mẹ o rrọ vovori.”
Eme-Obotọ
^ Hayo “okiara.”
^ Hayo “iwu iwoma.”
^ Hayo “eware.”
^ Hayo “Hades,” koyehọ, uki nọ a be hai ki ahwo fihọ. Rri oria Otofa Eme.
