Matiu 13:1-58
-
ETADHESẸ KPAHE UVIE NA (1-52)
-
Ọkibi na (1-9)
-
Oware nọ Jesu ọ rọ rehọ etadhesẹ ta ẹme (10-17)
-
Otofa ọtadhesẹ ọkibi na (18-23)
-
Eka gbe ikpoko na (24-30)
-
Ubi mọstad gbe ẹvi na (31-33)
-
Etadhesẹ nọ ọ jẹ rọ ta ẹme u ru eruẹaruẹ gba (34, 35)
-
Otofa ọtadhesẹ eka gbe ikpoko na (36-43)
-
Okwakwa-aghae nọ a si no gbe emamọ uzuu na (44-46)
-
Osakrosa (47-50)
-
Ekwakwa-aghae ekpokpọ gbe erọ anwae (51, 52)
-
-
A siọ Jesu evaọ ẹwho riẹ (53-58)
13 Evaọ ẹdẹ yena Jesu o te no uwou na, ọ tẹ nyae keria akotọ abade.
2 Ogbotu obuobu a tẹ nya bru rie, fikiere ọ tẹ ruọ eva okọ ọ tẹ keria, yọ ogbotu na kpobi a dikihẹ okpa.
3 Ọ tẹ rehọ etadhesẹ ro wuhrẹ ae eware buobu, inọ: “Rri! Ọkibi jọ ọ nyae kọ ibi.
4 Epanọ ọ jẹ rọ kọ na, ibi jọ i te kie fihọ akotọ edhere, nọ evra e ra ze e tẹ soro ae lọ.
5 Efa i kie fihọ otọ itho, oria nọ u wo ẹkpẹ bu hu, e tẹ nwane dhẹ lahwe fikinọ ẹkpẹ na o diwi hi.
6 Rekọ nọ ọre ọ va ze, i te lo je whu no fikinọ i wo awọ họ.
7 Efa i kie fihọ udevie idhigbo, nọ idhigbo na e rro ze, e tẹ lẹliẹ ekakọ na ko no.
8 Rekọ efa i kie fihọ emamọ otọ, i te mu ibi họ ẹmọ, ọnana ẹko udhusoi, ọyena udhosa, ọdekọ ọgba.
9 Jọ ọnọ o wo ezọ o yo.”
10 Ilele na a tẹ nya bru rie ze a tẹ ta kẹe nọ: “Emejabọ whọ be rọ rehọ etadhesẹ ta ẹme kẹ ahwo na?”
11 Ọ tẹ kẹ ae uyo nọ: “Whai họ enọ Ọghẹnẹ ọ kuvẹ re wha wo otoriẹ eware ididi ọrẹri Uvie odhiwu na, rekọ a kẹ rai uvẹ na ha.
12 Keme ohwo kpobi nọ o wo a rẹ te kẹe efa kugbe; o ve ti wo buobu, rekọ ohwo nọ o wo ho, a ti mi ei makọ onọ o wo na dede.
13 Oyejabọ nọ mẹ be rọ rehọ etadhesẹ ta ẹme kẹ ae; keme a bi rri, rekọ a be ruẹ hẹ, a be gaviezọ, rekọ a bi yo ho, yọ a bi wo otoriẹ hẹ.
14 Eruẹaruẹ Aizaya e be jọ oma rai rugba. Onọ o ta nọ: ‘Wha ti gine yo, rekọ wha ti wo otoriẹ vievie he, yọ wha ti gine rri, rekọ wha te ruẹ vievie he.
15 Keme udu ahwo nana o rrọ gaga, yọ a be rọ ezọ rai yo rekọ a be daezọ họ, a tẹ jẹ fare ibiaro rai, re a gbẹ rehọ ibiaro rai ruẹ ude hayo rehọ ezọ rai yo hayo jọ udu rai wo otoriẹ ẹme na vievie he, o tẹ whae ze nọ a gbe bi zihe bru omẹ ze he re me siwi ai.’
16 “Rekọ, eva e were owhai keme ibiaro rai e be ruẹ ude, yọ ezọ rai i bi yo ẹme.
17 Uzẹme mẹ be ta kẹ owhai, eruẹaro gbe ahwo ikiẹrẹe buobu a jẹ gwọlọ nọ a rẹ ruẹ eware nọ wha be ruẹ na, rekọ a ruẹ e rai hi, a jẹ gwọlọ nọ a re yo eme nọ wha bi yo na, rekọ a yo rai hi.
18 “Whaọ, wha gaviezọ kẹ otofa ọtadhesẹ ọkibi na.
19 Ohwo o te yo ovuẹ Uvie na rekọ o wo otoriẹ ovuẹ na ha, omuomu na ọ rẹ nyaze ọ vẹ tọlọ ẹme nọ a kọ fihọ udu riẹ no; ọnana họ ọnọ o kie fihọ akotọ edhere na.
20 Kpahe ọnọ o kie fihọ otọ itho na, ọnana họ ọnọ o yo ẹme na ọ tẹ nwane rọ oghọghọ jẹe rehọ.
21 Rekọ ẹme na ọ dowọ mu otọ evaọ udu riẹ hẹ, ghele na ọ jọ evaọ omoke, nọ uye hayo ukpokpoma o ze fiki ẹme na, ọ tẹ nwani zoruẹ.
22 Kpahe ọnọ o kie fihọ udevie idhigbo na, ọnana họ ọnọ o yo ẹme na, rekọ awaọruọ uyero-akpọ* nana gbe ogaga eviẹhọ efe e tẹ lẹliẹ ẹme na ko, ọ gbẹ mọ ibi hi.
23 Kpahe enọ i kie fihọ emamọ otọ na, enana họ enọ i yo ẹme na je wo otoriẹ ẹme na, a tẹ mọ ibi, ọnana ẹko udhusoi, ọyena udhosa, ọdekọ ọgba.”
24 Ọ tẹ rehọ ọtadhesẹ ọfa ta ẹme kẹ ae, inọ: “Uvie odhiwu o wọhọ ọzae nọ ọ kọ emamọ ibi fihọ udhu riẹ.
25 Nọ ahwo a jẹ wezẹ, ọwegrẹ riẹ ọ tẹ nyae kọ ikpoko fihọ udevie eka na, o te kpo.
26 Nọ eka na e dhẹze jẹ mọ ibi, ikpoko na e dhẹze re.
27 Fikiere erigbo ọnọ o wo uwou na a tẹ nyaze a tẹ nọe nọ, ‘Ọga, kọ ogbẹrọnọ emamọ ibi whọ kọ fihọ udhu ra? Kọ ẹvẹ ikpoko e rọ rrọ udhu na?’
28 Ọ tẹ ta kẹ ae nọ, ‘Ọzae jọ nọ ọ rrọ ọwegrẹ mẹ o ru onana.’ Erigbo na a tẹ ta kẹe nọ, ‘Kọ whọ gwọlọ nọ ma nya re ma wolo ai no?’
29 Ọ tẹ ta nọ, ‘Ijo, keme nọ wha ti wolo ikpoko na wha sae rọ ethobọ wolo eka na kugbe.
30 Wha nyasiọ eka na avọ ikpoko na ba bọo oke ivuẹvu, evaọ oke ivuẹvu na, mẹ rẹ te ta kẹ enọ e be kọrọ na nọ: Wha kaki koko ikpoko na họ jẹ gbae ekru re a mahe ae; kẹsena wha ve koko eka na họ uwou nọ mẹ rẹ jọ rawo eware.’”
31 Ọ tẹ rehọ ọtadhesẹ ọfa ta ẹme kẹ ae, inọ: “Uvie odhiwu o wọhọ ubi mọstad, onọ ọzae jọ ọ rehọ ọ tẹ kọe fihọ udhu riẹ.
32 Evaọ uzẹme, oye họ ubi nọ o mae kawo kpobi, rekọ nọ o rro no, o tẹ rrọ okakọ nọ o mae rro evaọ usu ekakọ nọ a rẹ re je zihe ruọ ure, u te ru nọ evra ehru i bi ro kiemu iei jẹ be rria egha riẹ.”
33 Ọ tẹ rehọ ọtadhesẹ ọfa ta ẹme kẹ ae, inọ: “Uvie odhiwu o wọhọ ẹvi,* onọ aye ọ gwa kugbe eka nọ a wuhu nọ e rẹ vọ owawo-eka ilogbo esa bẹsenọ u ro ru ukulu eka na soso fu.”
34 Ẹkwoma etadhesẹ Jesu ọ rọ ta eme nana kpobi kẹ ogbotu na. Evaọ uzẹme, ababọ ọtadhesẹ ọ rẹ ta ẹme ọvo kẹ ae he,
35 re eme nọ a rehọ ọruẹaro na ta e ruẹsi rugba, inọ: “Me ti rovie unu mẹ, mẹ vẹ rehọ etadhesẹ ta ẹme; me ti whowho eware nọ a kodhere no emuhọ* ze via.”
36 Nọ ogbotu na a nyavrẹ no, ọ tẹ ruọ evaọ uwou. Ilele riẹ a tẹ nya bru rie ze a tẹ ta nọ: “Fa otọ ọtadhesẹ ikpoko nọ e rrọ udhu na kẹ omai.”
37 Ọ tẹ ta kẹ ae nọ: “Ọnọ ọ kọ emamọ ubi na họ Ọmọ ohwo;
38 udhu na họ akpọ na. Kpahe emamọ ibi na, eye họ emọ Uvie na, rekọ ikpoko na họ emọ omuomu na,
39 yọ ọwegrẹ nọ ọ kọ rai na họ Ẹdhọ. Oke ivuẹvu na họ oke urere uyero-akpọ* na, yọ enọ e be kọrọ na họ ikọ-odhiwu.
40 Fikiere, wọhọ epanọ a kua ikpoko na koko a jẹ rọ erae mahe ae na, ere o te jọ evaọ oke urere uyero-akpọ na.
41 Ọmọ ohwo o ti vi ikọ-odhiwu riẹ, a ve ti koko eware kpobi nọ e be wha ezoruẹ ze no Uvie riẹ, gbe ahwo nọ a bi koko uzi hi,
42 a ve ti gbolo ae fihọ ebrerae. Etẹe a te jọ viẹ jẹ reakọ.
43 Evaọ oke yena ikiẹrẹe na a re ti lo nwranwranwra wọhọ ọre evaọ Uvie Ọsẹ rai. Jọ ọnọ o wo ezọ o yo.
44 “Uvie odhiwu o wọhọ okwakwa-aghae nọ a sino họ udhu, onọ ọzae jọ o duku o te si ei no; yọ fiki oghọghọ riẹ, ọ tẹ nyae zẹ eware kpobi nọ o wo ọ tẹ dẹ udhu na.
45 “Uvie odhiwu o tẹ jẹ wọhọ ọthueki nọ o re no oria ruọ oria be gwọlọ emamọ izuu.
46 Nọ ọ ruẹ uzuu jọ nọ u wo aghae gaga, o te zihe kpo, ọ tẹ zẹ eware kpobi nọ o wo vẹrẹ vẹrẹ ọ tẹ dẹe.
47 “Uvie odhiwu o tẹ jẹ wọhọ osakrosa nọ a fihọ abade nọ u bi si oghẹrẹ iyei kpobi kokohọ.
48 Nọ o vọ no, a te si rie ruọ okpa, a tẹ keria, a tẹ tọlọ emamọ iyei na fihọ idhe, rekọ a te gbolo ikpehre na kufiẹ.
49 Ere o te jọ evaọ oke urere uyero-akpọ na.* Ikọ-odhiwu a te nya via a vẹ hẹriẹ ahwo omuomu no udevie ikiẹrẹe
50 a ve gbolo ai fihọ ebrerae na. Etẹe a te jọ viẹ jẹ reakọ.
51 “Kọ wha wo otoriẹ eme nana kpobi?” A tẹ kẹe uyo nọ: “Ee.”
52 Ọ tẹ ta kẹ ae nọ: “Nọ o rrọ ere na, owuhrẹ kpobi nọ a wuhrẹ kpahe Uvie odhiwu ọ wọhọ ọzae nọ o wo uwou, nọ ọ rẹ rehọ eware ekpokpọ gbe erọ anwae no oria nọ ọ rẹ jọ rawo ekwakwa-aghae riẹ ze.”
53 Nọ Jesu ọ rehọ etadhesẹ nana ta ẹme no, o te no etẹe.
54 Nọ ọ nyaze ẹwho riẹ, o te mu ae họ ewuhrẹ evaọ uwou-egagọ rai, fikiere u te gbe ai unu a tẹ ta nọ: “Diẹse ọzae nana o jo wo areghẹ nana gbe ogaga nọ o bi ro ru iruo igbunu enana?
55 Kọ ogbẹrọnọ ọmọ ekapenta na ọna? Kọ oni riẹ a re se Meri, inievo riẹ kọ Jemis gbe Josẹf gbe Saemọn gbe Judas?
56 Yọ inievo-emetẹ riẹ, aikpobi a rrọ kugbe omai na? Kọ diẹse o jo wo areghẹ gbe ogaga nana kpobi?”
57 Fikiere a gbẹ jẹe rehọ họ. Rekọ Jesu ọ tẹ ta kẹ ae nọ: “Ọruẹaro o re wo ọghọ evaọ oria kpobi ajokpaọ evaọ ẹwho riẹ gbe uwou riẹ.”
58 Fikinọ a wo ẹrọwọ họ, ọ gbẹ jọ etẹe ru iruo igbunu buobu hu.
Eme-Obotọ
^ Rri oria Otofa Eme.
^ Koyehọ, iyisti nọ a re ro ru ebrẹdi nọ u re ru ei fu.
^ Hayo o sae jọ nọ, “emuhọ akpọ na,” koyehọ, okenọ Adamu avọ Ivi a ro mu emọ họ eyẹ.
^ Rri oria Otofa Eme.
^ Rri oria Otofa Eme.
