Matiu 14:1-36
14 Evaọ oke yena, Herọd osu ubrotọ na, o te yo usi kpahe Jesu,
2 ọ tẹ ta kẹ idibo riẹ nọ: “Ohwo nana yọ Jọn Ọhọahwo-Ame na. Ọ kparoma no uwhu ze, oyejabọ nọ ọ be sai ro ru iruo igbunu nana.”
3 Keme Herọd* o mu Jọn, a tẹ rọ egbregba kare iẹe je fi ei họ uwou-odi fiki Herodias, aye Filip oniọvo Herọd.
4 Keme Jọn ọ jẹ hae ta kẹe nọ: “U fo ho re whọ rehọ iẹe wọhọ aye ra.”
5 Yọ, dede nọ ọ gwọlọ nọ o re kpei, ọ jẹ dhozọ ahwo na keme a rehọ Jọn fihọ ọruẹaro.
6 Rekọ okenọ Herọd o je ru ehaa ẹdẹ-eyẹ riẹ, ọmọtẹ Herodias o te gbile evaọ ehaa na nọ o were Herọd gaga
7 te epanọ ọ rọ ya eyaa avọ iyei-iduwo inọ ọ rẹ kẹe oware kpobi nọ ọ yare.
8 Ọmọtẹ na ọ tẹ ta oware nọ oni riẹ ọ ta kẹe inọ: “Fi uzou Jọn Ọhọahwo-Ame na họ omodhe ọkpakpala kẹ omẹ.”
9 Onana o kẹ ovie na uye, rekọ fiki iyei nọ o duwu na gbe ahwo nọ a jọ kugbei jẹ re jẹ da na, ọ tẹ ta nọ a rehọ iẹe kẹe.
10 Fikiere o te vi ahwo, a te bru uzou Jọn evaọ uwou-odi na.
11 A tẹ wọ uzou na họ omodhe ọkpakpala ze rọkẹ ọmọtẹ na, ọ tẹ wọe se oni riẹ.
12 Kẹsena ilele riẹ a tẹ nyaze a tẹ wọ ori riẹ vrẹ, a te ki ei; a tẹ nyae vuẹ Jesu.
13 Nọ Jesu o yo onana, ọ tẹ ruọ okọ no etẹe kpohọ oria nọ u siomano re ọye ọvo ọ jọ. Rekọ nọ ahwo a yo, ogbotu ahwo a te no ewho sa-sa ze rọ owotọ kpohọ obonọ ọ ruọ okọ je kpohọ na.
14 Nọ ọ ruọ okpa, ọ tẹ ruẹ ogbotu obuobu, ohrọ rai o tẹ re iẹe, o te siwi enọ e jẹ mọ.
15 Rekọ nọ oke owọwọ u bi te no, ilele riẹ a tẹ nya bru rie ze a tẹ ta kẹe nọ: “Ahwo a be rria oria nana ha yọ oke owọwọ u bi te no; siobọno ogbotu na re a kpohọ iwhre nọ e kẹle onana nyae dẹ emu nọ a rẹ re.”
16 Rekọ Jesu ọ tẹ ta kẹ ae nọ: “U du gwọlọ nọ a rẹ nyavrẹ hẹ; wha kẹ ae oware nọ a rẹ re.”
17 A tẹ ta kẹe nọ: “Ma wo oware ovo evaọ etenẹ hẹ ajokpaọ ikulu ebrẹdi isoi gbe imiyei ivẹ.”
18 Ọ tẹ ta nọ: “Wha rehọ ai se omẹ.”
19 Kẹsena ọ tẹ ta kẹ ogbotu na nọ a keria ẹbe na. Ọ tẹ rehọ ebrẹdi isoi gbe imiyei ivẹ na, nọ o rri ehru, ọ tẹ lẹ, nọ o bru ebrẹdi na ibribro no, ọ tẹ rehọ ae kẹ ilele na, ilele na a tẹ ghale ae kẹ ogbotu na.
20 Ahwo na kpobi a tẹ re eva vọ, a tẹ kwa ewẹ nọ i kiọkọ koko, e vọ ikete ikpegbivẹ.
21 Whaọ, ahwo nọ a re emu na a bu te oware wọhọ ezae idu isoi (5,000), te eyae te emaha na.
22 Kẹsena, ababọ oke oraha, ọ tẹ ta kẹ ilele riẹ nọ a ruọ okọ re a bi kpohọ abọdekọ nyae hẹrẹ iẹe re ọyomariẹ o siobọno ogbotu na kpo.
23 Nọ o siobọno ogbotu na kpo no, ọye ọvo o te kpobọ ehru ugbehru na nyae lẹ. Nọ oke u kpo no, ọye ọvo ọ jọ etẹe.
24 Evaọ oke nana yọ okọ nọ ilele riẹ a jọ na u thabọ gaga no okpa no, yọ ẹkporo ọgaga o bi fi okọ na keme ofou na ọ rọ so ae.
25 Rekọ evaọ etoke iroi avọ ene,* ọ tẹ be nya ehru ame na bru rai.
26 Nọ a ruẹ e riẹ nọ ọ be nya evaọ ehru ame na, ozọ u te mu ilele na, a tẹ be ta nọ: “Nọ ẹwoho!” A te bi bo.
27 Rekọ Jesu ọ tẹ nwane ta kẹ ae nọ: “Jọ udu u te owhai otọ! Mẹ wha be ruẹ na; ozọ u mu owhai hi.”
28 Pita ọ tẹ kpahe kẹe nọ: “Olori, o tẹ ginọ rrọ nọ owhẹ, ta kẹ omẹ nọ mẹ nya ehru ame na bru owhẹ ze.”
29 Ọ tẹ ta nọ: “Nyaze!” Fikiere Pita o te no okọ na ọ tẹ be nya ehru ame na bru Jesu.
30 Rekọ nọ o rri ofou ọgaga na, ozọ u te mu ei. Nọ o muhọ ekiedi, o te bo nọ: “Olori, siwi omẹ!”
31 Jesu ọ tẹ nwane riẹ obọ, ọ tẹ jobọ kru rie jẹ ta nọ: “Whẹ nọ o wo ẹrọwọ ọkakao, fikieme who ro wo avro?”
32 Nọ a ruọ eva okọ na no, ofou na o te serihọ.
33 Otu nọ e rrọ okọ na a tẹ rọ uzou kpotọ kẹe, be ta nọ: “Whẹ ginọ Ọmọ Ọghẹnẹ.”
34 Kẹsena a tẹ te fa te abọ obei a tẹ kpahe Gẹnesarẹt.
35 Nọ ahwo ẹwho yena a vuhu nọ ọye, a tẹ vuẹ se ahwo ẹkwotọ yena soso, a tẹ rehọ ahwo kpobi nọ a jẹ mọ ro sei.
36 A tẹ lẹe nọ ọ kẹ ae uvẹ re a thakpe rọ obọ te efọlefọ ewu riẹ, ẹyao enọ e rọ obọ tei kpobi o te kpo riẹriẹriẹ.
Eme-Obotọ
^ Koyehọ, Herọd Antipas.
^ Evaọ etoke nọ a je ro kere Ebaibol, a ghale aso kpohọ abọ ene nọ a re ro roiro: Abọ ọsosuọ o re muhọ no ighọjọ ezeza owọwọ rite ighọjọ izii aso, abọ avọ ivẹ o ve muhọ no ighọjọ izii rite ighọjọ ikpegbivẹ, abọ avọ esa o ve muhọ no ighọjọ ikpegbivẹ rite ighọjọ esa, abọ avọ ene kọ ighọjọ esa rite ighọjọ ezeza ohiohiẹ.
