Matiu 15:1-39
15 Kẹsena otu Farisi gbe otu ikere-obe a te no Jerusalẹm bru Jesu ze, be ta nọ:
2 “Fikieme ilele ra a be rọ la uruemu ahwo oke anwae vrẹ? Wọhọ oriruo, a rẹ wozẹ abọ họ* nọ a tẹ gwọlọ re emu.”
3 Ọ tẹ kpahe kẹ ae nọ: “Fikieme whai omarai wha be rọ la ujaje Ọghẹnẹ vrẹ fiki uruemu rai nọ u no anwae ze?
4 Wọhọ oriruo, Ọghẹnẹ ọ ta nọ, ‘Rọ ọghọ kẹ ọsẹ ra avọ oni ra,’ yọ ‘Ọnọ ọ ta ẹme oyoma kpahe ọsẹ hayo oni riẹ a re kpei no.’
5 Rekọ wha ta nọ, ‘Ohwo kpobi nọ ọ ta kẹ ọsẹ hayo oni riẹ nọ: “Oware kpobi nọ me wo nọ o hae kẹ owhẹ erere, mẹ rehọ e riẹ mudhe kẹ Ọghẹnẹ no,”
6 u du gwọlọ nọ ọ rẹ rọ ọghọ kẹ ọsẹ hayo oni riẹ vievie he.’ Fikiere, wha rehọ uruemu rai nọ u no anwae ze rọ raha ẹme Ọghẹnẹ no.
7 Whai eviẹwẹ, Aizaya ọ ta gba nọ ọ ruẹaro kpahe owhai nọ:
8 ‘Igbenu rai ahwo nana a be rọ kẹ omẹ ọghọ, rekọ udu rai u thabọ gaga no omẹ.
9 A be gọ omẹ kufiẹ gheghe, keme iwuhrẹ ahwo a bi ro wuhrẹ.’”
10 Kẹsena o te se ogbotu na kẹle oma, ọ tẹ ta kẹ ae nọ: “Wha gaviezọ re wha wo otoriẹ ẹme nọ mẹ be te ta na:
11 Orọnikọ oware nọ o ruọ unu ohwo oye u re zue ei oma ha, rekọ oware nọ u no unu riẹ ze oye u re zue ei oma.”
12 Ilele riẹ a tẹ nya bru rie ze a tẹ ta kẹe nọ: “Kọ whọ riẹ nọ ẹme nọ whọ ta na o lẹliẹ otu Farisi na zoruẹ?”
13 Ọ tẹ ta kẹ ae nọ: “Okakọ kpobi nọ Ọsẹ obọ odhiwu mẹ ọ kọ họ a re ti vi ei no.
14 Wha kpairoro vrẹ rai. Isu ituaro a rrọ. Nọ otuaro o te bi su otuaro, aimava a re kie ruọ ọgọdọ.”
15 Pita ọ tẹ ta kẹe nọ: “Ru ọtadhesẹ na vẹ kẹ omai.”
16 Jesu ọ tẹ ta nọ: “Kọ wha gbẹ kare otoriẹ re?
17 Kọ wha gbẹ riẹ nọ oware kpobi nọ o ruọ unu na u re kpobọ eva a ve nei kufiẹ?
18 Rekọ, eware kpobi nọ i bi no unu na ze, obọ udu na i bi no ze, yọ eye họ eware nọ i re zue ohwo oma.
19 Wọhọ oriruo, evaọ udu ohwo iroro imuomu i re no ze, te ohwo-okpe, ẹnwae-obro, ọfariẹ-ogbe,* uji-utho, isẹi ọrue, eme-aghọ.
20 Enana họ eware nọ i re zue ohwo oma; orọnikọ abọ nọ ohwo ọ wozẹ hẹ* taure ọ tẹ te re emu oye u re zue ei oma ha.”
21 Nọ Jesu o no etẹe no, ọ tẹ nya kpobọ ubrotọ Taya avọ Saedọn.
22 Rri! Aye jọ nọ ọ rrọ ohwo Fonisia* nọ o no ubrotọ yena ze ọ tẹ nya bru rie ze bi bo nọ: “Jọ ohrọ mẹ o re owhẹ, Olori, Ọmọ Devidi. Idhivẹri nọ e rrọ ọmọtẹ mẹ oma e be lahiẹ iẹe gaga.”
23 Rekọ ọ kpahe ẹme kẹ aye na ha. Fikiere, ilele riẹ a tẹ nya bru rie ze a tẹ be ta kẹe nọ: “Ta kẹe re ọ nyavrẹ keme o bi bo lele omai.”
24 Ọ tẹ kuyo nọ: “Fiki igodẹ orẹwho Izrẹl nọ i vru ọvo a ro vi omẹ ze, orọnọ fiki amọfa ha.”
25 Rekọ aye na ọ tẹ nya tei oma ọ tẹ rọ uzou kpotọ kẹe, be ta nọ: “Olori, fiobọhọ kẹ omẹ!”
26 Ọ tẹ kpahe kẹe nọ: “U kiehọ họ re a tọlọ ebrẹdi emaha na gbolo kẹ emọ erakọ na.”
27 Ọ tẹ ta nọ: “Ginọ ere, Olori, rekọ emọ erakọ na e rẹ re ehẹhẹ nọ i bi kie no emẹjẹ ilori rai ze.”
28 Jesu ọ tẹ kpahe kẹe nọ: “O aye, ẹrọwọ ra ọ rro kẹhẹ; jọ o via kẹ owhẹ epaọ ẹgwọlọ ra.” Idhivẹri na i te no ọmọtẹ riẹ oma evaọ auwa yena.
29 Nọ Jesu o no etẹe, ọ tẹ nya kẹle Abade Galili, nọ ọ nya kpobọ ehru ugbehru na ọ tẹ keria.
30 Ogbotu obuobu a tẹ nya bru rie ze avọ emo, enọ e ko, enọ i tuaro, enọ i dienu, gbe enọ i wo eyao efa sa-sa nọ a rehọ ze, a tẹ wọ ae fihọ aro riẹ, o te siwi ai.
31 Fikiere u te gbe ogbotu na unu nọ a ruẹ idienu nọ e be ta ẹme, enọ e ko nọ a bi siwi gbe emo nọ e be nya gbe ituaro nọ e be ruẹ ude, a te jiri Ọghẹnẹ Izrẹl.
32 Jesu o te se ilele riẹ ọ tẹ ta nọ: “Ohrọ ogbotu na o be re omẹ keme anwọ edẹ esa na a rrọ kugbe omẹ na yọ a gbe wo emu nọ a rẹ re he. Mẹ gwọlọ siobọno ai kpo eveva ha, keme ibiaro e sai bi ae evaọ edhere.”
33 Rekọ ilele na a tẹ ta kẹe nọ: “Diẹse ma sae jọ ruẹ ebrẹdi nọ i re te ogbotu nana soso re evaọ oria nana nọ ahwo a rrọ họ na?”
34 Jesu ọ tẹ ta kẹ ae nọ: “Bro ebrẹdi wha wo?” A tẹ ta nọ: “Ebrẹdi ihrẹ gbe umutho imiyei esese jọ.”
35 Fikiere nọ ọ ta kẹ ogbotu na nọ a keria otọ no,
36 ọ tẹ rehọ ebrẹdi ihrẹ na gbe imiyei na, nọ ọ lẹ no, o te bru ebrẹdi na ibribro jẹ rehọ ae kẹ ilele na, ilele na a tẹ ghale ae kẹ ogbotu na.
37 Ahwo na kpobi a tẹ re eva vọ, a tẹ kwa ewẹ nọ i kiọkọ koko, e vọ ikete ilogbo ihrẹ.
38 Whaọ enọ e re emu na a bu te ezae idu ene (4,000), te eyae te emaha na.
39 Ukuhọ riẹ, nọ o siobọno ogbotu na kpo no, ọ tẹ ruọ okọ, ọ tẹ ziọ ubrotọ Magadan.
Eme-Obotọ
^ Abọ ọwozẹ nana orọnikọ orọ abọ nọ i gine gbe he, rekọ uruemu ahwo Ju nọ a jẹ hai ro voro omarai.
^ Evaọ Griki, por·neiʹa. Rri oria Otofa Eme.
^ Abọ ọwozẹ nana orọnikọ orọ abọ nọ i gine gbe he, rekọ uruemu ahwo Ju nọ a jẹ hai ro voro omarai.
^ Hayo “Kenan.”
