Matiu 18:1-35
18 Evaọ auwa yena ilele na a tẹ nya bru Jesu ze a tẹ nọe nọ: “Ono ọ ginẹ mae rro evaọ Uvie odhiwu?”
2 Nọ o se ọmaha jọ, ọ tẹ rehọ iẹe dikihẹ udevie rai
3 ọ tẹ ta nọ: “Uzẹme mẹ be ta kẹ owhai, ajokpanọ wha re nwene* re wha jọ wọhọ emaha, o gbẹ rrọ ere he, wha sae ruọ Uvie odhiwu vievie he.
4 Fikiere, ohwo kpobi nọ ọ rẹ romakpotọ wọhọ ọmaha nana họ ọnọ ọ mae rro evaọ Uvie odhiwu;
5 yọ ohwo kpobi nọ o dede ọmaha otiọna rehọ fiki odẹ mẹ o dede omẹ rehọ re.
6 Rekọ ohwo kpobi nọ o ru ọjọ evaọ usu esese nana nọ i fi ẹrọwọ họ omẹ na zoruẹ, o te mai woma kẹe otẹrọnọ a gba utho nọ a re ro wuhu eka fihọ iẹe ohọe a ve gbolo iei fihọ abade.
7 “Uye u te akpọ na fiki itho ezoruẹ nọ e vọ riẹ! Evaọ uzẹme, itho ezoruẹ e rẹ jariẹ hrọ, rekọ uye u te ohwo nọ ọ be wha utho ezoruẹ na ze!
8 Fikiere, otẹrọnọ obọ ra hayo owọ ra u bi ru owhẹ zoruẹ,* bru rie no re who gbolo iei kufiẹ. O mai woma kẹ owhẹ re whọ rọ owọ ovo hayo obọ ovo ruọ uzuazọ viukpenọ a re gbolo owhẹ avọ abọ ivẹ hayo awọ ivẹ fihọ erae ebẹdẹ bẹdẹ.
9 Ofariẹ, otẹrọnọ ubiẹro ra u bi ru owhẹ zoruẹ, vre rie no re who gbolo iei kufiẹ. O mai woma kẹ owhẹ re whọ rọ ubiẹro ovo ruọ uzuazọ viukpenọ a re gbolo owhẹ avọ ibiaro ivẹ fihọ Gehena* nọ erae e rrọ.
10 Wha yọroma re wha siọ ọjọ evaọ usu esese nana ba erivo, keme mẹ be ta kẹ owhai nọ ikọ-odhiwu rai a bi rri ovao Ọsẹ mẹ nọ ọ rrọ obọ odhiwu ẹsikpobi.
11 ——
12 “Ẹvẹ wha roro? Otẹrọnọ ọzae jọ o wo igodẹ udhusoi rekọ ọvo jọ o te vru, kọ ọ gbẹ te nyasiọ udhone gbe ikpegbizii na ba obọ igbehru, ọ vẹ nyae gwọlọ ọnọ o bi vru na?
13 Yọ ọ tẹ ruẹ e riẹ, uzẹme mẹ be ta kẹ owhai, ọ rẹ ghọghọ fiki riẹ vi udhone gbe ikpegbizii nọ i vru hu na.
14 Epọvo na re, o rẹ were Ọsẹ mẹ* nọ ọ rrọ obọ odhiwu hu re ọjọ evaọ usu esese nana o vru.
15 “Ofariẹ, otẹrọnọ oniọvo ra o ru owhẹ thọ, nya re whọ ta oware nọ o ru thọ na kẹe nọ whai imava ọvo wha tẹ rrọ oria. Ọ tẹ gaviezọ kẹ owhẹ, yọ who wo oniọvo ra tobọ no.
16 Rekọ ọ gbẹ gaviezọ kẹ owhẹ hẹ, rehọ omọvo hayo imava efa lele oma re a ruẹse jọ evaọ unu isẹri ivẹ hayo esa vuhu uzẹme ẹme kpobi.
17 Ọ gbẹ gaviezọ kẹ ae he, whọ vẹ ta kẹ ukoko na. Ọ gbẹ jẹ gaviezọ kẹ makọ ukoko na ha, whọ vẹ rehọ iẹe wọhọ ohwo erẹwho na gbe wọhọ ọnọ o re mi osa-uzou.
18 “Uzẹme mẹ be ta kẹ owhai, oware kpobi nọ wha te gba evaọ otọakpọ o te jọ onọ a gba no evaọ obọ odhiwu, yọ oware kpobi nọ wha te ra evaọ otọakpọ o te jọ onọ a ra no evaọ obọ odhiwu.
19 Mẹ tẹ jẹ be ta kẹ owhai nọ, otẹrọnọ imava rai jọ a rọwo kugbe evaọ oware jọ nọ u wuzou nọ a be yare, Ọsẹ mẹ nọ ọ rrọ obọ odhiwu o ti ru ei kẹ ae.
20 Keme nọ imava hayo imasa a te kokohọ evaọ odẹ mẹ, mẹ rrọ udevie rai.”
21 Kẹsena Pita ọ tẹ nya bru rie ze ọ tẹ nọe nọ: “Olori, brẹse oniọvo mẹ o re ru omẹ thọ nọ mẹ jẹ rọvrẹ riẹ? Kọ u re te isiahrẹ?”
22 Jesu ọ tẹ ta kẹe nọ: “Mẹ be ta kẹ owhẹ nọ orọnikọ isiahrẹ hẹ, rekọ u re te isia udhosa gbe ikpegbihrẹ.
23 “Oyejabọ nọ Uvie odhiwu o rọ wọhọ ovie nọ o se erigbo riẹ re a hwa igho nọ a reosa riẹ.
24 Nọ a je ru onana, a tẹ rehọ ọzae jọ ze nọ ọ reosa riẹ etalẹnte* idu ikpe (10,000).*
25 Rekọ fikinọ ọzae na o wo oghẹrẹ ovo nọ ọ sae rọ hwa igho na zihe he, olori riẹ ọ tẹ ta nọ a zẹ ọzae na avọ aye riẹ gbe emọ riẹ gbe eware kpobi nọ o wo re a rọ hwa osa na.
26 Fikiere, ọrigbo na o te kie fihọ otọ ọ tẹ rọ uzou kpotọ kẹe be ta nọ, ‘Gbe thihakọ kẹ omẹ, mẹ te hwa igho na kpobi zihe kẹ owhẹ.’
27 Ohrọ ọrigbo na o tẹ re olori na, o te vu ei wa jẹ kpairoro vrẹ osa nọ ọ re na.
28 Rekọ nọ ọrigbo yena ọ ruọ otafe, ọ tẹ ruẹ ibe ọrigbo riẹ nọ ọ riosa riẹ dinariọs* udhusoi, ọ tẹ jabọ kru rie, o te si ewu mu ei uvou, be ta nọ, ‘Hwa igho kpobi nọ whọ reosa mẹ kẹ omẹ.’
29 Fikiere, ibe ọrigbo riẹ o te kie fihọ otọ, o te mu ei họ ẹlẹ nọ, ‘Gbe thihakọ kẹ omẹ, mẹ te hwa igho na zihe kẹ owhẹ.’
30 Rekọ ọ rọwo ho, ukpoye ọ tẹ nyavrẹ, o te ru epanọ a ro fi ei họ uwou-odi re ọ jọ etẹe bẹsenọ ọ rẹ hwa osa nọ ọ re na no.
31 Nọ ibe erigbo riẹ a ruẹ oware nọ o via na, o tẹ kẹ ae uye gaga, a tẹ nyae vuẹ olori rai eware kpobi nọ e via na.
32 Kẹsena olori riẹ o te sei ọ tẹ ta kẹe nọ: ‘Ọrigbo omuomu, mẹ kpairoro vrẹ igho buobu yena nọ whọ reosa mẹ nọ whọ lẹ omẹ.
33 Kọ whọ gbẹ hae re ohrọ ibe ọrigbo ra wọhọ epanọ mẹ re ohrọ ra na?’
34 Fiki onana, ofu o te mu olori riẹ gaga, ọ tẹ rehọ iẹe kẹ iriekarọ re ọ jọ uwou-odi bẹsenọ ọ rẹ hwa osa nọ ọ re kpobi no.
35 Ere Ọsẹ obọ odhiwu mẹ o ti ru owhai re nọ whai omomọvo ọ gbẹ rọvrẹ oniọvo riẹ no udu ze he.”
Eme-Obotọ
^ Hayo “kuomarẹriẹ.”
^ Hayo “ru owhẹ raha uzi.”
^ Rri oria Otofa Eme.
^ Hayo o sae jọ nọ, “Ọsẹ rai.”
^ Rri oria Otofa Eme.
^ Etalẹnte isiliva idu ikpe i re bu te dinariọs ima udhosa (60,000,000).
^ Rri oria Otofa Eme.
