Matiu 19:1-30
19 Nọ Jesu ọ ta eware nana no, o te no Galili kpobọ iwhru ẹkwotọ Judia evaọ abọdekọ Jọdan.
2 Yọ ogbotu obuobu a lele i rie, ọ tẹ jọ etẹe siwi ai.
3 Otu Farisi a tẹ nya bru rie ze fikinọ a gwọlọ dawo iẹe, a tẹ nọe nọ: “Kọ u fo re ọzae ọ siọ aye riẹ fiki oghẹrẹ oware kpobi?”
4 Ọ tẹ kẹ ae uyo nọ: “Kọ wha ri se inọ ọnọ ọ ma rai no emuhọ ze ọ ma rai ọzae avọ aye
5 jẹ ta nọ: ‘Fiki onana ọzae ọ rẹ nyasiọ ọsẹ gbe oni riẹ ba ọ vẹ talamu aye riẹ, aimava na a vẹ jọ uwo ovo’?
6 A gbẹ rrọ uwo ivẹ hẹ rekọ uwo ovo. Fikiere, onọ Ọghẹnẹ o kugbe no, ajọ ohwo ọvo ọ hẹriẹ iẹe he.”
7 A tẹ nọe nọ: “O tẹ rrọ ere, kọ fikieme Mosis ọ rọ ta nọ a sae kẹ aye obe-udu orọo-ofa a vẹ se iẹe?”
8 Ọ tẹ ta kẹ ae nọ: “Fiki udu-ogaga rai Mosis ọ rọ kẹ owhai uvẹ nọ wha sae siọ eyae rai, orọnikọ ere o rrọ no emuhọ ze he.
9 Mẹ be ta kẹ owhai nọ ohwo kpobi nọ ọ siọ aye riẹ o gbẹ rrọ fiki ọfariẹ-ogbe* he, ọ jẹ rehọ ọfa o bruẹnwae.”
10 Ilele na a tẹ ta kẹe nọ: “Otẹrọnọ ere orọo o rrọ, kiyọ u fo ho re ohwo ọ rọo.”
11 Ọ tẹ ta kẹ ae nọ: “Orọnikọ ahwo kpobi a re ru epanọ wha ta na ha, ajokpaọ enọ i wo okẹ na ọvo.
12 Keme ejọ e riẹ nọ a yẹ ewharọ, yọ ejọ e riẹ nọ ahwo a ru ewharọ, yọ ejọ e riẹ nọ i ru omarai ewharọ fiki Uvie odhiwu. Jọ ọnọ ọ rẹ sai ru ere o ru ere.”
13 Kẹsena a tẹ rehọ emaha ro sei re ọ rọ obọ kpahe ae jẹ lẹ kẹ ae, rekọ ilele na a te do ku ae.
14 Rekọ Jesu ọ tẹ ta nọ: “Wha vu emaha na wa re a nya bru omẹ ze, wha whaha ae he, keme Uvie odhiwu o rrọ kẹ itieye na.”
15 Ọ tẹ rọ obọ kpahe ae, o te no etẹe.
16 Whaọ, rri! ohwo jọ ọ tẹ nya bru rie ze ọ tẹ nọe nọ: “Owuhrẹ, oware uwoma vẹ me re ru hrọ re me wo uzuazọ ebẹdẹ bẹdẹ?”
17 Ọ tẹ ta kẹe nọ: “Fikieme whọ rọ nọ omẹ kpahe oware uwoma? Omọvo jọ ọvo o woma. Rekọ whọ tẹ gwọlọ wo uzuazọ, hai koko ijaje na.”
18 Ọ tẹ nọe nọ: “Ijaje vẹ?” Jesu ọ tẹ ta nọ: “Who kpe ohwo vievie he, who bruẹnwae vievie he, who tho uji vievie he; who se isẹri ọrue vievie he,
19 rọ ọghọ kẹ ọsẹ ra avọ oni ra, yọ who re you ọrivẹ ra wọhọ omobọ ra hrọ.”
20 Ẹghele na ọ tẹ ta kẹe nọ: “Mẹ be hai koko ijaje nana kpobi; eme ọfa o kiọkọ kẹ omẹ?”
21 Jesu ọ tẹ ta kẹe nọ: “Whọ tẹ gwọlọ jọ gbagba, nyae zẹ eware nọ who wo, whọ vẹ rọ igho na kẹ iyogbere, who ti wo efe evaọ obọ odhiwu; whọ vẹ nyaze te jọ olele mẹ.”
22 Nọ ẹghele na o yo onana, ọ tẹ nyavrẹ avọ uweri, keme o wo eyero buobu.
23 Kẹsena Jesu ọ tẹ ta kẹ ilele riẹ nọ: “Uzẹme mẹ be ta kẹ owhai inọ o te jọ bẹbẹ kẹ ọdafe re ọ ruọ Uvie odhiwu.
24 Mẹ be jẹ ta kẹ owhai nọ, o rẹ mae lọhọ re ekamẹle ọ nya eghogho ẹguede lafi viọ ọdafe nọ ọ rẹ ruọ Uvie Ọghẹnẹ.”
25 Nọ ilele na a yo onana, u te gbe ai unu gaga, a tẹ be ta nọ: “Ono a te sai gine siwi?”
26 Nọ Jesu o rri rai kiọkiọkiọ, ọ tẹ ta kẹ ae nọ: “Rọkẹ ahwo, onana yọ oware nọ a rẹ sai ru hu, rekọ Ọghẹnẹ ọ rẹ sai ru eware kpobi.”
27 Kẹsena Pita ọ tẹ ta nọ: “Rri! Ma nyasiọ eware kpobi ba ma te lele owhẹ; kọ erere vẹ o ti te omai?”
28 Jesu ọ tẹ ta kẹ ae nọ: “Uzẹme mẹ be ta kẹ owhai, evaọ okenọ a ti ru eware kpobi kpokpọ na, nọ Ọmọ ohwo ọ te keria agbara-uvie oruaro riẹ, whai enọ i lele omẹ wha te keria egbara-uvie ikpegbivẹ, ti bruoziẹ erua ikpegbivẹ Izrẹl.
29 Yọ ohwo kpobi nọ ọ nyasiọ iwou hayo inievo-emezae hayo inievo-emetẹ hayo ọsẹ hayo oni hayo emọ hayo etọ ba fiki odẹ mẹ o ti wo ae ẹko udhusoi, ọ vẹ te jẹ reuku uzuazọ ebẹdẹ bẹdẹ.
30 “Rekọ ibuobu nọ e rrọ erọ ọsosuọ e te jọ erọ urere, erọ urere e vẹ te jọ erọ ọsosuọ.
Eme-Obotọ
^ Evaọ Griki, por·neiʹa. Rri oria Otofa Eme.
