Matiu 21:1-46
21 Nọ a kẹle Jerusalẹm no, a tẹ daji Bẹtfaji evaọ Ugbehru Olivi, Jesu o te vi ilele ivẹ riẹ uwou,
2 inọ: “Wha kpohọ iwhre nọ wha be kparo ruẹ na, wha te nwane ruẹ eketekete avọ ọmọ riẹ nọ a thuru fihọ oria. Wha ra ufi no ae re wha rehọ ae se omẹ.
3 Otẹrọnọ ohwo jọ ọ tẹ ta ẹme jọ kẹ owhai, wha rẹ ta nọ, ‘Olori na ọ gwọlọ e rai.’ Ọ vẹ te nwane kẹ owhai uvẹ re wha rehọ ae ze.”
4 Onana o via re oware nọ a rehọ ọruẹaro na ta o ruẹsi rugba, inọ:
5 “Wha ta kẹ ọmọtẹ Zayọn nọ: ‘Rri! Ovie ra ọ be nya bru owhẹ ze, ọ rrọ wowolẹ yọ ọ keria ehru eketekete, ẹhẹ, ọmọ eketekete.’”
6 Fikiere ilele na a tẹ nya a te ru epanọ Jesu ọ ta kẹ ae na.
7 A tẹ rehọ eketekete na avọ ọmọ riẹ ze, a te fi iwu ehru rai họ ehru rai, Jesu ọ tẹ keria ehru iwu na.
8 Ibuobu evaọ ogbotu na a tẹ rehọ iwu ehru rai hwa edhere, yọ efa a be gbẹre eya-iriẹ jẹ be rehọ ae hwa edhere.
9 U te no ere no, ogbotu ahwo nọ a rrọ aro riẹ gbe enọ e rọ kpahe iẹe a je bo nọ: “Ma lẹ nọ, siwi Ọmọ Devidi! Oghale u te ọnọ ọ be rọ odẹ Jihova* nyaze! Ma lẹ nọ, siwi ei, O ọnọ ọ rrọ obọ odhiwu!”
10 Nọ ọ ruọ Jerusalẹm, okpẹwho na soso o te duwu ku, a tẹ be nọ inọ: “Kinọ ono?”
11 Ogbotu nọ a je lele iei na a tẹ be ta nọ: “Nọ Jesu ọruẹaro na, ọrọ Nazarẹt obọ Galili!”
12 Jesu ọ tẹ ruọ etẹmpol na o te le ahwo kpobi nọ a jẹ zẹ eware gbe enọ e jẹ dẹ evaọ etẹmpol na ruọ otafe, o te gele emẹjẹ inwene-igho na kie gbe ekpala enọ e jẹ zẹ irueruẹ.
13 Ọ tẹ ta kẹ ae nọ: “A kere nọ, ‘A re ti se uwou mẹ uwou olẹ,’ rekọ wha ru rie fihọ eghogho-utho iwhewheriwhe no.”
14 Ofariẹ, ahwo nọ i tuaro gbe enọ e ko a tẹ nya bru rie ze evaọ etẹmpol na, o te siwi ai.
15 Nọ ilori izerẹ gbe otu ikere-obe na a ruẹ eware igbunu nọ o ru, gbe emezae na nọ i bi bo evaọ etẹmpol na nọ, “Ma lẹ nọ, siwi Ọmọ Devidi!” eva e tẹ dha ae,
16 a tẹ ta kẹe nọ: “Kọ who bi yo ẹme nọ emọ nana a be ta na?” Jesu ọ tẹ ta kẹ ae nọ: “Ee. Kọ wha ri se onana inọ, ‘Who ru nọ emaha gbe emọboba a bi ro jiri owhẹ’?”
17 Ọ tẹ nyase ae ba, o te no ẹwho na, o te kpobọ Bẹtani, ọ tẹ wezẹ etẹe.
18 Nọ o je zihe kpobọ okpẹwho na evaọ irioke, ohọo u te je kpei.
19 Ọ tẹ ruẹ ure ifigi evaọ akotọ edhere na ọ tẹ nya te ure na, rekọ ọ jariẹ ruẹ ubi hi ajokpaọ ebe ọvo, ọ tẹ ta kẹe nọ: “Whọ te gbẹ mọ ubi vievie he.” Ure ifigi na o tẹ nwani lo no.
20 Nọ ilele na a ruẹ onana u te gbe ae unu, a tẹ ta nọ: “Ẹvẹ ure ifigi na o sae nwani ro lo no?”
21 Jesu ọ tẹ kẹ ae uyo nọ: “Uzẹme mẹ be ta kẹ owhai, otẹrọnọ wha te wo ẹrọwọ, nọ wha gbẹ vro ho, orọnikọ oware nọ me ru ure ifigi na ọvo wha te sai ru hu rekọ nọ wha tẹ tubẹ ta kẹ ugbehru nana nọ, ‘Kparoma re whọ nyai kie fihọ abade na,’ o te via ere.
22 Yọ eware kpobi nọ wha yare evaọ olẹ, wha te wo ẹrọwọ, wha ti wo ai.”
23 Nọ ọ ruọ etẹmpol na no, ilori izerẹ gbe ekpako na a tẹ nya bru rie ze okenọ o je wuhrẹ ahwo a tẹ nọe nọ: “Udu vẹ who bi ro ru eware nana? Yọ ono ọ kẹ owhẹ udu nana?”
24 Jesu ọ tẹ kpahe kẹ ae nọ: “Mẹ te nọ owhai onọ jọ re. Wha tẹ kẹ omẹ uyo riẹ, mẹ te vuẹ owhai udu nọ me bi ro ru eware nana re:
25 Bovẹ udu nọ Jọn ọ jẹ rọ họ ahwo ame u no ze? Obọ odhiwu manikọ obọ ahwo?” Rekọ a te mu omoma rai họ ẹta kẹ nọ: “Ma tẹ ta nọ, ‘Obọ odhiwu,’ ọ te ta kẹ omai nọ, ‘Emejabọ wha gbẹ rọwo iẹe he?’
26 Rekọ ma tẹ ta nọ, ‘Obọ ahwo,’ ma riẹ onọ ogbotu na a ti ru hu, keme aikpobi a rehọ Jọn fihọ ọruẹaro.”
27 Fikiere a tẹ kẹ Jesu uyo nọ: “Ma riẹ hẹ.” Ọyomariẹ ọ tẹ ta kẹ ae re nọ: “Mẹ be vuẹ owhai udu nọ me bi ro ru eware nana gbe he.
28 “Ẹvẹ wha roro? Ọzae jọ o wo emọ ivẹ. Nọ ọ nya bru ọrọ ọsosuọ, ọ tẹ ta kẹe nọ, ‘Ọmọ mẹ, nyai ru iruo nẹnẹ evaọ udhu mẹ.’
29 Ọ tẹ kuyo nọ, ‘Mẹ be nya ha,’ rekọ uwhremu na, o tẹ dae ọ tẹ nya kpobọ udhu na.
30 Nọ ọ nya bru ọmọ avọ ivẹ, ọ tẹ ta ẹme ọvona kẹe. Ọmọ nana ọ tẹ kpahe kẹe nọ, ‘Mẹ te nya, Baba,’ rekọ ọ nya ha.
31 Ọvẹ evaọ usu ivẹ na o ru oreva ọsẹ riẹ?” A tẹ ta nọ: “Ọrọ ọsosuọ na.” Jesu ọ tẹ ta nọ: “Uzẹme mẹ be ta kẹ owhai inọ enọ i re mi osa-uzou gbe igberẹ a bi mi owhai aro no nyae ruọ Uvie Ọghẹnẹ.
32 Keme Jọn ọ nya bru owhai ze evaọ edhere ẹrẹreokie, rekọ wha rọwo e riẹ hẹ. Rekọ enọ i re mi osa-uzou gbe igberẹ na a rọwo e riẹ, yọ dede nọ wha ruẹ onana o da owhai ghele he re wha rọwo iẹe.
33 “Wha gaviezọ kẹ ọtadhesẹ ọfa: Ọzae jọ ọ jariẹ nọ o wo otọ, ọnọ ọ kọ ọgbọ evaene je di ogba wariẹe họ, yọ ọ tọ ọgọdọ umi-udi họ iẹe, ọ tẹ jẹ bọ uwou ukpehru fihọ iẹe; ọ tẹ rehọ iẹe kẹ enọ e rẹ rẹrotei, o te kpohọ erẹ evaọ orẹwho ofa.
34 Nọ ezi nọ ibi na e rẹ rọ ware u te, o te vi erigbo riẹ bru enọ e be rẹrote ọgbọ na re a kọrọ ibi riẹ sei.
35 Rekọ enọ e be rẹrote ọgbọ na a te kru erigbo na, a tẹ fa ọjọ, a te kpe ọjọ whu, a tẹ rọ itho fi ọjọ.
36 Ọ tẹ wariẹ vi erigbo efa, bu vi erọ ọsosuọ na, rekọ a te ru ai epọvo na.
37 Ukuhọ riẹ, o te vi ọmọ riẹ bru ae, inọ ‘A te rọ adhẹẹ kẹ ọmọ mẹ.’
38 Nọ enọ e be rẹrote ọgbọ na a ruẹ ọmọ na, a tẹ ta kẹ ohwohwo nọ, ‘Ọnana họ ọreuku na. Wha nyaze ma kpei no re ma rehọ ukuoriọ riẹ!’
39 Fikiere a te kru rie, a te gele iei ruọ otafe ọgbọ na a te kpei no.
40 Nọ ohwo nọ o wo ọgbọ na ọ tẹ nyaze, eme o ti ru enọ e be rẹrote ọgbọ na?”
41 A tẹ ta kẹe nọ: “Fikinọ a rrọ muomu, o ti gboja kẹ ae o ve kpe ai no, ọ vẹ rehọ ọgbọ na kẹ amọfa, enọ e te kọrọ ibi na kẹe evaọ ezi rai.”
42 Jesu ọ tẹ ta kẹ ae nọ: “Kọ wha re jọ Ikereakere na se, inọ, ‘Utho nọ ebebabọ na a se, oye u zihe ruọ utho ubienẹ nọ o mai wuzou no na,’ gbe nọ ‘Obọ Jihova* onana u no ze, yọ u woma gaga evaọ aro mai’?
43 Oyejabọ nọ mẹ be rọ ta kẹ owhai nọ, a ti mi owhai Uvie Ọghẹnẹ no a vẹ rehọ iẹe kẹ orẹwho nọ o be mọ ibi riẹ.
44 Ofariẹ, ohwo nọ o kie fihọ ehru utho nana o ti bru ibribro. Yọ ohwo kpobi nọ utho na u kie fihọ, o te pẹhẹ iẹe no.”
45 Nọ ilori izerẹ gbe otu Farisi na a yo etadhesẹ riẹ, a riẹ nọ ae omarai ọ be ta kpahe.
46 Dede nọ a jẹ gwọlọ epanọ a re ro kru rie,* a dhozọ ogbotu na keme a riẹ nọ a rehọ e riẹ fihọ ọruẹaro.
