Matiu 22:1-46
22 Jesu ọ tẹ wariẹ rehọ etadhesẹ ta ẹme kẹ ae inọ:
2 “Uvie odhiwu o wọhọ ovie nọ o se ehaa orọo kẹ ọmọzae riẹ.
3 O te vi erigbo riẹ nyai se enọ a zizie kẹ ehaa orọo na, rekọ a rọwo nọ a rẹ nyaze he.
4 Ọ tẹ wariẹ vi erigbo efa nya, inọ, ‘Ta kẹ enọ a zizie na nọ: “Rri! Mẹ ruẹrẹ emu kpahe no, me kpe iruẹ gbe erao epoporiẹ mẹ, yọ a ruẹrẹ eware kpobi họ no. Wha nyaze ehaa orọo na.”’
5 Rekọ a daezọ họ, a te kpohọ ọvuọ oboriẹ, ọjọ o kpobọ udhu riẹ, ọfa o kpohọ okọ riẹ;
6 rekọ nọ enọ i kiọkọ a kru erigbo na, a te gboja kẹ ae a te kpe ai no.
7 “Ofu o te mu ovie na, o te vi egbaẹmo riẹ a te kpe enọ i kpe erigbo riẹ na jẹ mahe ẹwho rai.
8 Kẹsena ọ tẹ ta kẹ erigbo riẹ nọ, ‘Ma ruẹrẹ eware họ kẹ ehaa orọo na no, rekọ enọ a zizie na a fo* ahwo nọ a rẹ jọ ehaa orọo na ha.
9 Fikiere, wha kpobọ idhere nọ a re ro no ẹwho na, re wha zizie ohwo kpobi nọ wha ruẹ ziọ ehaa orọo na.’
10 Koyehọ erigbo na a tẹ nya kpohọ idhere na, a te se ahwo kpobi nọ a ruẹ ze, te iyoma te iwoma; uwou ehaa orọo na o tẹ vọ avọ ahwo nọ a be re jẹ da.*
11 “Nọ ovie na ọ ruọ eva te kiẹ ahwo na riwi, ọ tẹ ruẹ ọzae jọ nọ o ku ewu ehaa orọo họ họ.
12 Ọ tẹ nọe nọ, ‘Ọzae, ẹvẹ whọ rọ ziọ etenẹ yọ who ku ewu ehaa orọo họ họ?’ Ọ sae kpahe ẹme he.
13 Ovie na ọ tẹ ta kẹ idibo riẹ nọ, ‘Wha gbae abọ gbe awọ re wha gbolo iei fihọ ebi obọ otafe. Etẹe ọ te jọ vioja jẹ reakọ.’
14 “Keme ibuobu a zizie, rekọ umutho a salọ.”
15 Kẹsena otu Farisi a tẹ nyae gba ẹgwae epanọ a sae rọ rehọ ẹmeunu riẹ kru rie.
16 Fikiere a te vi ilele rai gbe ahwo utu Herọd bru rie, inọ: “Owuhrẹ, ma riẹ nọ whọ rẹ ta uzẹme je bi wuhrẹ edhere Ọghẹnẹ evaọ uzẹme, yọ who re ru eware rọ gwọlọ aruoriwo ohwo ọvo ho, keme who re rri oghẹrẹ nọ ahwo a rrọ evaọ okafe he.
17 Fikiere, ta kẹ omai, ẹvẹ who roro? Kọ u fo re a hwa osa-uzou kẹ Siza manikọ u fo ho?”
18 Rekọ fikinọ Jesu ọ riẹ iroro imuomu rai, ọ tẹ ta nọ: “Emejabọ wha be rọ dawo omẹ, eviẹwẹ na?
19 Wha dhesẹ ubiugho nọ a rẹ rọ hwa osa-uzou na kẹ omẹ.” A tẹ rehọ dinariọs* sei.
20 Ọ tẹ nọ ae nọ: “Nọ uwoho gbe odẹ ono?”
21 A tẹ ta nọ: “Erọ Siza.” Ọ tẹ ta kẹ ae nọ: “Fikiere, wha hwa eware Siza zihe kẹ Siza, rekọ eware Ọghẹnẹ kẹ Ọghẹnẹ.”
22 Nọ a yo onana u te gbe ai unu, a tẹ nyase iẹe ba.
23 Evaọ ẹdẹ yena, otu Sadusi, enọ e ta nọ ẹkparomatha ọ rrọ họ a tẹ nya ze, a tẹ nọe nọ:
24 “Owuhrẹ, Mosis ọ ta nọ: ‘Ọzae o te whu ababọ emọ nọ o yẹ, oniọvo riẹ ọ rẹ rehọ aye riẹ re ọ ruẹsi yẹ emọ kẹ oniọvo riẹ nọ o whu no na.’
25 Whaọ, inievo ihrẹ jọ e jariẹ. Ọrọ ọsosuọ o wo aye o te ti whu siọ aye na ba, yọ fikinọ o yẹ ọmọ họ, oniọvo riẹ ọ tẹ rehọ aye na.
26 Ọrọ avọ ivẹ na o te je whu siọ aye na ba ababọ emọ. Ere ọvona o via kẹ ọrọ avọ esa rite ọrọ avọ ihrẹ.
27 Ukuhọ riẹ, aye na o te whu.
28 Fikiere, evaọ ẹkparomatha na, ọvẹ evaọ usu inievo ihrẹ na ọ te rehọ aye na? Keme ọ jọ aye kẹ aikpobi na.”
29 Jesu ọ tẹ kẹ ae uyo nọ: “Wha bi roro thọ keme wha riẹ Ikereakere na hayo ogaga Ọghẹnẹ hẹ;
30 keme evaọ ẹkparomatha na, ezae i ti wo eyae he, yọ a te rọ eyae kpohọ orọo ho, rekọ a te jọ wọhọ ikọ-odhiwu.
31 Rọ kpahe ẹkparomatha enọ i whu no, kọ wha ri se ẹme nọ Ọghẹnẹ ọ ta kẹ owhai, inọ:
32 ‘Mẹ họ Ọghẹnẹ Abraham gbe Ọghẹnẹ Aiziki gbe Ọghẹnẹ Jekọp’? Ọ rrọ Ọghẹnẹ enọ i whu no ho, rekọ ọrọ enọ e rrọ uzuazọ.”
33 Nọ ogbotu na a yo onana, ewuhrẹ riẹ o te gbe ai unu.
34 Nọ otu Farisi a yo nọ Jesu ọ ta eme nọ i ru otu Sadusi na ruru unu, aikpobi a te kuomagbe nya bru rie ze.
35 Omọvo rai jọ nọ ọ riẹ Uzi na lafi ọ tẹ nọe onọ rọ dawo iẹe, inọ:
36 “Owuhrẹ, ujaje vẹ o mae rro evaọ Uzi na?”
37 Ọ tẹ ta kẹe nọ: “‘Whọ rẹ rehọ udu ra kpobi gbe uzuazọ ra kpobi gbe iroro ra kpobi ro you Jihova* Ọghẹnẹ ra hrọ.’
38 Onana họ ujaje nọ o mae rro gbe orọ ọsosuọ.
39 Orọ avọ ivẹ, nọ o wọhọ e riẹ ona: ‘Who re you ọrivẹ ra wọhọ omobọ ra hrọ.’
40 Ijaje ivẹ nana Uzi na soso gbe eme Eruẹaro na e roma hwa.”
41 Nọ otu Farisi na a kokohọ, Jesu ọ tẹ nọ ae nọ:
42 “Eme wha roro kpahe Kristi na? Ọmọ ono ọ rrọ?” A tẹ ta kẹe nọ: “Ọmọ Devidi.”
43 Ọ tẹ nọ ae nọ: “O tẹ rrọ ere, kọ ẹvẹ Devidi o ro sei Olori okenọ ọ ruẹaro kpahe iẹe, inọ,
44 ‘Jihova* ọ ta kẹ Olori mẹ nọ: “Keria obọze mẹ bẹsenọ me re fi ewegrẹ ra họ otọ awọ ra”’?
45 Otẹrọnọ Devidi o se rie Olori, kọ ẹvẹ ọ rọ rrọ ọmọ riẹ?”
46 Ohwo ọvo ọ sae kpahe ẹme kẹe he, yọ no umuo ẹdẹ yena vrẹ, ohwo ọvo ọ gbẹ daeriẹ nọe onọ ofa ha.
Eme-Obotọ
^ Hayo “te.”
^ Hayo “keria wariẹ emẹjẹ na họ.”
^ Rri oria Otofa Eme.
^ Rri oria Otofa Eme.
^ Rri oria Otofa Eme.
