Matiu 24:1-51
24 Whaọ epanọ Jesu o je ro no etẹmpol na vrẹ na, ilele riẹ a tẹ nya bru rie ze, a te bi dhesẹ iwou etẹmpol na soso kẹe.
2 Ọ tẹ ta kẹ ae nọ: “Kọ wha be ruẹ eware nana kpobi na? Uzẹme mẹ be ta kẹ owhai, a te nyasiọ utho ovo ba ehru utho evaọ etenẹ na vievie he nọ a ti kporo fihọ otọ họ.”
3 Nọ ọ keria ehru Ugbehru Olivi, ilele na ọvo a tẹ nya bru rie, a tẹ ta nọ: “Ta kẹ omai, oke vẹ eware nana e te rọ via, kọ eme ọ te jọ oka ọzino* ra gbe orọ oke urere uyero-akpọ* na?”
4 Jesu ọ tẹ kẹ ae uyo nọ: “Wha muẹrohọ otọ re ohwo ọvo ọ siọ owhai ba esuthọ,
5 keme ibuobu e te rọ odẹ mẹ nyaze, ta nọ, ‘Mẹ họ Kristi na,’ a ve ti su ibuobu thọ.
6 Wha re ti yo edo emo gbe usi emo. Wha jọ ozọ u mu owhai hi, keme eware nana e rẹ via hrọ, rekọ ekuhọ na o ri te he.
7 “Keme orẹwho o rẹ te kpareso orẹwho, uvie o rẹ te kpareso uvie, yọ no oria ruọ oria ohọo u re ti mu, etọ i re ti nuhu.
8 Enana kpobi yọ emuhọ eware nọ e te wha edada ze.*
9 “Ahwo a re ti kpokpo owhai je ti kpe owhai, yọ erẹwho na kpobi a re ti mukpahe owhai fiki odẹ mẹ.
10 Ofariẹ, ibuobu i ti zoruẹ, a ve ti vivie ohwohwo je mukpahe ohwohwo.
11 Eruẹaro erue buobu e rẹ te romavia a ve ti su ibuobu thọ;
12 yọ fiki epanọ emuemu o ti vihọ, uyoyou ibuobu u re ti kiekpo.*
13 Rekọ ọnọ o thihakọ te urere a ti siwi ei.
14 Yọ a rẹ te ta usi uwoma Uvie na evaọ akpọ na soso re o jọ isẹri kẹ erẹwho na kpobi, kẹsena urere na o vẹ te ze.
15 “Fikiere, nọ wha tẹ ruẹ oware otọtọ na nọ o rẹ wha ọraha ze, onọ Daniẹl ọruẹaro na ọ ta kpahe na, nọ u dikihẹ oria ọrẹri (jọ ọnọ o bi se eme nana ọ rehọ orimuo wo otoriẹ rai),
16 jọ enọ e rrọ Judia a muhọ ẹdhẹ kpobọ igbehru.
17 Jọ ohwo nọ ọ rrọ ehru uwou* ọ ziọ otọ te kwa eware uwou riẹ hẹ,
18 jọ ohwo nọ ọ rrọ obọ ẹwọ o zihe ze te tọlọ ewu ehru riẹ hẹ.
19 U ti yoma gaga kẹ eyae nọ i dihọ gbe enọ i wo emọ unuevie evaọ edẹ yena!
20 Wha hae lẹ nọ oke ẹdhẹ rai u kie fihọ ezi ekpahe hayo ẹdẹ Ẹdijala ha;
21 keme uye ulogbo o rẹ te via utionọ o re jọ no emuhọ akpọ na ze he, ijo, utioye o gbẹ te via ofa ha.
22 Evaọ uzẹme, a gbe bru edẹ yena kpẹre he, ohwo ọvo ọ te zọ họ; rekọ fiki enọ a salọ na, a ti bru edẹ yena kpẹre.
23 “Fikiere, ohwo jọ ọ tẹ ta kẹ owhai nọ, ‘Rri! Kristi ọna,’ hayo, ‘Ọye ọ rrọ obei na!’ wha rọwo ho.
24 Keme Kristi erue gbe eruẹaro erue e rẹ te romavia a ve ti ru eware eka ilogbo gbe eware igbunu re a su ahwo thọ, otẹrọnọ o rẹ lọhọ, enọ a salọ na dede.
25 Rri! Mẹ vẹvẹ owhai unu no.
26 Fikiere, ahwo a tẹ be ta kẹ owhai nọ, ‘Rri! Ọ rrọ obọ udhude,’ wha nya ha; ‘Rri! Ọ rrọ obọ ukpẹ,’ wha rọwo ho.
27 Keme wọhọ epanọ elo egbrara nọ o lo evaọ obọ ovatha-ọre o re lo ruọ obọ ukiediwo-ọre na, ere ọzino* Ọmọ ohwo ọ rẹ te jọ.
28 Oria kpobi nọ ori ọ rrọ, etẹe igo* i re kokohọ.
29 “Nọ uye edẹ yena o tẹ nwane vrẹ no, ọre na o re ti muebi, ọvẹre na o ti lo ho, isi na i re ti kie no obọ ehru ze, egaga obọ ehru na i re ti nuhu.
30 Kẹsena oka Ọmọ ohwo o vẹ te romavia evaọ obọ ehru, erẹwho akpọ na kpobi e vẹ te vọ avọ uweri a vẹ te ruẹ Ọmọ ohwo nọ ọ be nyaze evaọ ẹgho avọ ogaga gbe oruaro ulogbo.
31 O ve ti vi ikọ-odhiwu riẹ avọ edo ọgba ologbo, a ve ti koko eriẹ nọ a salọ na họ no ibienẹ ene akpọ na ze, no oka jọ orọ idhiwu na rite oka ọdekọ.
32 “Wha wuhrẹ ọtadhesẹ nana no ure ifigi ze: Nọ egha eboba riẹ e tẹ nwane whẹ ebe họ no, yọ wha riẹ nọ ezi-uvo ọ kẹle no.
33 Ere owhai re, nọ wha tẹ ruẹ eware nana kpobi, wha riẹ nọ ọ kẹle unuẹthẹ no.
34 Uzẹme mẹ be ta kẹ owhai inọ oge ọnana ọ rẹ te vrẹ vievie he bẹsenọ eware nana kpobi e rẹ via no.
35 Odhiwu gbe otọakpọ e rẹ te vrẹ, rekọ eme mẹ e rẹ te vrẹ vievie he.
36 “Rọ kpahe ẹdẹ gbe auwa yena ohwo ọvo ọ riẹ hẹ, makọ ikọ-odhiwu hayo Ọmọ na dede rekọ Ọsẹ na ọvo.
37 Keme wọhọ epanọ o jọ evaọ edẹ Noa, ere ọzino* Ọmọ ohwo o rẹ te jọ.
38 Keme wọhọ epanọ o jọ evaọ oke yena taure Owhe na o te ti ku, a jẹ re a jẹ da, ezae e jẹ rọo, yọ a jẹ rọ eyae kpohọ orọo, bọo ẹdẹ nọ Noa ọ rọ ruọ okọ na,
39 a muẹrohọ họ bẹsenọ Owhe na ọ rọ ze, o te kpe ai kpobi no, ere ọzino* Ọmọ ohwo o rẹ te jọ.
40 Evaọ oke yena, ezae ivẹ e rẹ te jọ evaọ udhu; a rẹ te rehọ ọvo vrẹ a vẹ nyasiọ ọdekọ ba.
41 Eyae ivẹ e rẹ te jọ oria nọ a rẹ jọ wuhu eka bi wuhu eka; a rẹ te rehọ ọvo vrẹ a vẹ nyasiọ ọdekọ ba.
42 Fikiere, wha ruabọhọ erou,* keme wha riẹ ẹdẹ nọ Olori rai ọ te nyaze he.
43 “Rekọ wha riẹ onana: O hae jọnọ ọnọ o wo uwou na ọ riẹ oke nọ oji na ọ be rọ nyaze, ọ hai kpe aro fihọ, ọ hae kuvẹ hẹ re oji na o kporo uwou riẹ ruọ eva.
44 Fiki onana, whai omarai wha ruẹrẹ oma kpahe keme Ọmọ ohwo ọ te nyaze evaọ auwa nọ wha roro ho.
45 “Ginọ ono họ ọrigbo nọ a re fievahọ nọ o wo areghẹ na ọnọ olori riẹ o ro mu inọ ọ rẹrote erigbo uwou riẹ nọ i kiọkọ, re ọ rehọ emu kẹ ae evaọ ẹruoke?
46 Eva e were ọrigbo yena otẹrọnọ olori riẹ ọ nyaze di ei họ ere oruo!
47 Uzẹme mẹ be ta kẹ owhai, ọ te rehọ iẹe mu ọnọ ọ rẹ rẹrote eyero riẹ kpobi.
48 “Rekọ otẹrọnọ ọrigbo yena o zihe ruọ ọrigbo omuomu, ọ jẹ be jọ udu riẹ ta nọ, ‘Olori mẹ o lehie no,’
49 o je muọ ibe erigbo riẹ họ ekpe, bi lele egba-idi da jẹ re,
50 olori ọrigbo yena ọ te nyaze evaọ ẹdẹ nọ o rẹro riẹ hẹ gbe auwa nọ ọ riẹ hẹ,
51 ọ vẹ te kẹe uye nọ o mae ga je fi ei họ kugbe eviẹwẹ na. Etẹe ọ te jọ vioja jẹ reakọ.
Eme-Obotọ
^ Rri oria Otofa Eme.
^ Rri oria Otofa Eme.
^ Koyehọ, wọhọ edada eyẹ.
^ Hayo “dhẹ no.”
^ “A jẹ hae bọ ehru iwou buobu praprarapra, yọ a jẹ hae jarai ru eware sa-sa.”
^ Rri oria Otofa Eme.
^ Oghẹrẹ igo jọ e rẹ re erao nọ i whu no.
^ Rri oria Otofa Eme.
^ Rri oria Otofa Eme.
^ Hayo “erroro.”
