Matiu 26:1-75
-
Izerẹ na a gba ẹgwae re a kpe Jesu (1-5)
-
A ku udẹ nọ u re gbo ore awere họ Jesu (6-13)
-
Ehaa Ọnyavrẹ urere gbe epanọ a ro vivie iei (14-25)
-
Ẹtohọ Emu Owọwọ Olori na (26-30)
-
Ọ ta nọ Pita ọ te vro riẹ (31-35)
-
Jesu ọ lẹ evaọ Gẹtsemane (36-46)
-
A mu Jesu (47-56)
-
A rehọ e riẹ gu ẹdhọ evaọ Sanhẹdrin (57-68)
-
Pita ọ vro Jesu (69-75)
26 Nọ Jesu ọ ta eme nana kpobi no, ọ tẹ ta kẹ ilele riẹ nọ:
2 “Wha riẹ nọ edẹ ivẹ i kiọkọ re ehaa Ọnyavrẹ na o te ti te, yọ a te rehọ Ọmọ ohwo kẹ ewegrẹ re a kare iẹe fihọ ure kpe.”
3 Ilori izerẹ na gbe ekpako ahwo na a te kokohọ ighẹ ozerẹ okpehru nọ a re se Kayafas
4 a tẹ gba ẹgwae epanọ a rẹ rọ rehọ ẹghẹ kru* Jesu je kpei.
5 Rekọ a jẹ ta nọ: “Ma ru ei evaọ etoke ehaa na ha, re o siọ ozighi ba ẹwhaze evaọ udevie ahwo na.”
6 Nọ Jesu ọ jọ Bẹtani evaọ uwou Saemọn nọ ọ jọ ọmoti vẹre,
7 aye jọ ọ tẹ nya bru rie ze avọ ololo alabasta nọ udẹ nọ u re gbo ore awere nọ o ghare gaga o rrọ, o te bi ku ei họ Jesu uzou epanọ ọ jẹ rọ re emu na.
8 Nọ ilele na a ruẹ onana, eva e tẹ dha ae a tẹ ta nọ: “Fikieme ọ be rọ raha udẹ na kufiẹ enẹ?
9 Keme a hae sae zẹ udẹ nana igho buobu a vẹ rehọ igho na kẹ iyogbere.”
10 Nọ Jesu o yo onana, ọ tẹ ta kẹ ae nọ: “Fikieme wha be rọ gwọlọ aye na ẹme? Oware uwoma o ru kẹ omẹ na.
11 Iyogbere na a rrọ kugbe owhai ẹsikpobi, rekọ mẹ te jọ kugbe owhai ẹsikpobi hi.
12 Udẹ nana nọ o kuhọ omẹ uzou na, o ru ei be rọ ruẹrẹ omẹ kpahe kẹ ukio mẹ.
13 Uzẹme mẹ be ta kẹ owhai, oria kpobi nọ a te jọ ta usi uwoma na evaọ akpọ na soso, a te fodẹ oware nọ aye nana o ru na rọ kareghẹhọ iẹe.”
14 Kẹsena omọvo Ikpegbivẹ na, ọnọ a re se Judas Iskariọt, ọ tẹ nya bru ilori izerẹ na
15 ọ tẹ ta kẹ ae nọ: “Eme wha rẹ kẹ omẹ re me vivie iei kẹ owhai?” A tẹ rọwo nọ a rẹ kẹe ewẹ-isiliva ọgba.
16 Fikiere, no umuo oke yena vrẹ, ọ tẹ jẹ gwọlọ oke nọ u kiehọ nọ o re ro vivie iei.
17 Evaọ ẹdẹ ọsosuọ ọrọ ehaa ebrẹdi nọ ọ kare ẹvi na, ilele na a tẹ nya bru Jesu, a tẹ nọe nọ: “Diẹse whọ gwọlọ nọ ma rẹ ruẹrẹhọ nọ whọ te jọ re emu Ọnyavrẹ na?”
18 Ọ tẹ ta nọ: “Wha nya ruọ okpẹwho na, wha te ruẹ ọzae jọ, wha ta kẹe nọ, ‘Owuhrẹ na ọ ta nọ: “Oke nọ a fihọ kẹ omẹ o kẹle no; mẹ te jọ uwou ra ru ehaa Ọnyavrẹ na kugbe ilele mẹ.”’”
19 Fikiere ilele na a te ru epanọ Jesu ọ ta kẹ ae na, a tẹ ruẹrẹ eware họ kẹ Ọnyavrẹ na.
20 Nọ owọwọ u te, tei te ilele ikpegbivẹ na a tẹ keria wariẹ emẹjẹ họ jẹ re emu.
21 Nọ a jẹ re emu na, ọ tẹ ta kẹ ae nọ: “Uzẹme mẹ be ta kẹ owhai, omọvo rai jọ o ti vivie omẹ.”
22 Fikinọ onana o kẹ rai uweri gaga, omomọvo ọ tẹ jẹ nọe nọ: “Olori, kọ omẹ?”
23 Ọ tẹ ta kẹ ae nọ: “Ọnọ o bi lele omẹ dhe obọ họ omodhe emu na họ ọnọ o ti vivie omẹ.
24 Uzẹme, Ọmọ ohwo o ti whu, wọhọ epanọ a kere kpahe iẹe, rekọ uye u te ohwo yena nọ o bi ti vivie Ọmọ ohwo na! O hae mai woma kẹ ohwo yena o hae jọnọ a yẹ riẹ hẹ.”
25 Judas, ọnọ o bi ti vivie iei na, ọ tẹ nọe nọ: “Owuhrẹ, kọ omẹ?” Jesu ọ tẹ kpahe kẹe nọ: “Whẹ ọvo whọ ta riẹ na.”
26 Nọ a gbẹ be re na, Jesu ọ tẹ rehọ ebrẹdi, nọ ọ lẹ yere Ọghẹnẹ no, o te bru rie, ọ tẹ rehọ iẹe kẹ ilele na, ọ tẹ ta nọ: “Wha mi, re wha re iẹe. Onana u dikihẹ kẹ ugboma mẹ.”
27 Ọ tẹ rehọ egho, ọ tẹ lẹ yere Ọghẹnẹ, ọ tẹ rehọ iẹe kẹ ae, ọ tẹ ta nọ: “Whai kpobi wha dae,
28 keme onana u dikihẹ kẹ azẹ mẹ, onọ o rrọ ‘azẹ ọvọ na,’ nọ o ti hwẹ fiki erọvrẹ izieraha ahwo buobu.
29 Rekọ mẹ be ta kẹ owhai nọ: Mẹ te gbẹ da udi nana nọ a rọ ubi-okakọ ru na vievie he bọo ẹdẹ yena nọ mẹ te rọ wariẹ lele owhai dae evaọ Uvie Ọsẹ mẹ.”
30 Ukuhọ riẹ, nọ a so ile ujiro* no, a te kpobọ Ugbehru Olivi.
31 Kẹsena Jesu ọ tẹ ta kẹ ae nọ: “Whai kpobi wha ti zoruẹ aso nana fiki oware nọ o te via kẹ omẹ, keme a kere nọ: ‘Me ti duwu othuru-igodẹ na, igodẹ na e vẹ te vahabọ.’
32 Rekọ nọ mẹ tẹ kparoma ze no, mẹ te jọ obọ Galili hẹrẹ owhai.”
33 Rekọ Pita ọ tẹ ta kẹe nọ: “Ahwo nọ a kiọkọ kpobi a tẹ maki zoruẹ fiki oware nọ o te via kẹ owhẹ, me ti zoruẹ vievie he!”
34 Jesu ọ tẹ ta kẹe nọ: “Uzẹme mẹ be ta kẹ owhẹ, evaọ aso nana, taure ọkpa o te ti bo, whọ te vro omẹ isiasa.”
35 Pita ọ tẹ ta kẹe nọ: “O tẹ make rọnọ me re lele owhẹ whu dede, mẹ te vro owhẹ vievie he.” Ilele edekọ na kpobi a tẹ ta epọvo na re.
36 Kẹsena Jesu avọ ilele na a tẹ ziọ oria nọ a re se Gẹtsemane, ọ tẹ ta kẹ ae nọ: “Wha keria etenẹ, me bi kpohọ obei nyae lẹ.”
37 Nọ ọ rehọ Pita gbe emezae ivẹ Zẹbẹdi kugbe oma, o te muhọ eweri jẹ be rova gaga.
38 Ọ tẹ ta kẹ ae nọ: “Uweri o da omẹ oma fia, enwenọ uwhu. Wha jọ etenẹ re wha lele omẹ ruabọhọ erou.”*
39 Nọ ọ nya họ aro omojọ, o te kigwẹ vovao tuotọ, ọ tẹ be lẹ nọ: “Ọsẹ mẹ, otẹrọnọ o rẹ lọhọ, ru re egho nana ọ vrẹ omẹ. Ghele na, orọnikọ epaọ oreva mẹ hẹ, rekọ oreva ra.”
40 Nọ o zihe bru ilele na ze ọ tẹ ruẹ nọ a be wezẹ, ọ tẹ ta kẹ Pita nọ: “Kọ wha gbẹ sai lele omẹ ruabọhọ erou makọ auwa ọvo dede?
41 Wha ruabọhọ erou jẹ hae lẹ ẹsikpobi re wha siọ odawọ ba ekie kẹ. O ginẹ ruọ ẹzi na rekọ uwo na o ga ha.”
42 Ọ tẹ wariẹ nyavrẹ orọ avọ ivẹ nyae lẹ, inọ: “Ọsẹ mẹ, o gbẹ lọhọ nọ onana o rẹ vrẹ omẹ hẹ ajokpanọ mẹ rẹ dae, jọ oreva ra u rugba.”
43 Ọ tẹ wariẹ zihe ze je di ae họ owezẹ, keme owezẹ o vọ rai aro.
44 Fikiere ọ tẹ nyase ae ba, ọ tẹ wariẹ nyae lẹ orọ avọ esa, ọ tẹ be wariẹ ẹme ọvona.
45 Kẹsena o te zihe bru ilele na ze ọ tẹ ta kẹ ae nọ: “Evaọ oke utionana wha be wezẹ je serihọ! Rri! Oke nọ a re ro vivie Ọmọ ohwo họ abọ erahaizi o kẹle no.
46 Wha kpama ma nyavrẹ. Rri! Ọnọ o bi vivie omẹ ọ kẹle etenẹ no.”
47 Nọ ọ gbẹ be ta ẹme na, rri! Judas, omọvo Ikpegbivẹ na, ọ tẹ nyaze avọ ogbotu ahwo nọ a kru egbọdọ gbe ekpọ, enọ ilori izerẹ na gbe ekpako ahwo na a vi ze.
48 Whaọ ọnọ o bi ti vivie iei na ọ kẹ ahwo na oka, inọ: “Ohwo kpobi nọ mẹ te viọlọ, ọye họ ohwo na; wha mu ei.”
49 Nọ ọ nya ovavo bru Jesu, ọ tẹ ta nọ: “Do, Owuhrẹ!” ọ tẹ nabe viọlọ iẹe.
50 Rekọ Jesu ọ tẹ ta kẹe nọ: “Oko, ẹjiroro vẹ whọ rọ rrọ etenẹ?” Kẹsena ahwo na a tẹ nyaze, a te kru Jesu, a te mu ei.
51 Rekọ omọvo enọ e jọ kugbe Jesu o te wolo ọgbọdọ riẹ lahwe ọ tẹ nawo ozọ ọrigbo ozerẹ okpehru na no.
52 Jesu ọ tẹ ta kẹe nọ: “Zihe ọgbọdọ ra fihọ oria riẹ, keme enọ e tọlọ ọgbọdọ kpobi a ti whu uwhu ọgbọdọ.
53 Hayo kọ who roro nọ mẹ sae yare Ọsẹ mẹ re o vi ikọ-odhiwu idu buobu se omẹ obọnana ha?
54 Kọ me te ru ere, ẹvẹ Ikereakere na nọ e ta nọ enẹ o te via e sai ro rugba?”
55 Kẹsena Jesu ọ tẹ ta kẹ ogbotu na nọ: “Kọ wha rehọ egbọdọ gbe ekpọ ze ti mu omẹ wọhọ ẹsenọ wha be gwọlọ ogbulegbu mu? Kẹdẹ kẹdẹ mẹ jẹ hae keria etẹmpol na wuhrẹ ahwo, ghele na wha mu omẹ hẹ.
56 Rekọ eware nana kpobi e be via re eme nọ eruẹaro na a kere e ruẹsi rugba.” Ilele na kpobi a tẹ dhẹ se iẹe ba.
57 Enọ i mu Jesu na a tẹ rehọ iẹe kpobọ Kayafas ozerẹ okpehru na, oria nọ otu ikere-obe gbe ekpako na a kokohọ.
58 Rekọ Pita o te je lele iei evaọ ugbo rite ighẹ ozerẹ okpehru na, nọ ọ ruọ eva, ọ tẹ keria kugbe idibo uwou na re ọ ruẹ oware nọ o te via.
59 Whaọ, ilori izerẹ na gbe ogbẹgwae Sanhẹdrin na soso a jẹ gwọlọ oware nọ a re gu fihọ Jesu uzou re a ruẹsi kpei.
60 Rekọ a ruẹ oware ovo ho, dede nọ isisẹri erue buobu a nyaze. Uwhremu na, ivẹ jọ e tẹ nyaze
61 a tẹ ta nọ: “Ọzae nana ọ ta nọ, ‘Mẹ rẹ sai kporo etẹmpol Ọghẹnẹ na fihọ otọ mẹ vẹ bọe edẹ esa.’”
62 Fikiere ozerẹ okpehru na ọ tẹ kpama ọ tẹ ta kẹe nọ: “Kọ who wo ẹme ọvo nọ whọ rẹ kpahe? Who bi yo eme nọ ahwo nana a be ta kpahe owhẹ na?”
63 Rekọ Jesu o fibo. Fikiere ozerẹ okpehru na ọ tẹ ta kẹe nọ: “Mẹ be ta kẹ owhẹ nọ whọ rehọ odẹ Ọghẹnẹ nọ ọ rrọ uzuazọ na duwu iyei re whọ ta kẹ omai sọ whẹ họ Kristi na, Ọmọ Ọghẹnẹ!”
64 Jesu ọ tẹ ta kẹe nọ: “Whẹ ọvo whọ ta riẹ na. Rekọ mẹ be ta kẹ owhai nọ: No umuo enẹna vrẹ wha te ruẹ Ọmọ ohwo nọ ọ keria obọze Ọnọ o wo ogaga* na nọ ọ be nyaze evaọ ẹgho odhiwu.”
65 Ozerẹ okpehru na ọ tẹ bẹre iwu ehru riẹ, ta nọ: “Ọ ta ẹme-aghọ no! Eme ọfa ma gbẹ gwọlọ isisẹri kẹ? Rri! Wha yo ẹme-aghọ nọ ọ ta na.
66 Ẹvẹ wha roro?” A tẹ ta nọ: “O fo uwhu.”
67 A te nwo eya ku ei ovao jẹ bọwo iẹe. Efa e tẹ tehe iẹe ovao,
68 be ta nọ: “Ruẹaro kẹ omai, whẹ Kristi. Ono ọ tehe owhẹ na?”
69 Whaọ, Pita ọ keria obọ otafe evaọ ighẹ na, odibo-ọmọtẹ jọ ọ tẹ nya bru rie ze, ọ tẹ ta nọ: “Whọ jọ kugbe Jesu ohwo Galili na re!”
70 Rekọ ọ tẹ vro riẹ evaọ iraro rai kpobi, inọ: “Mẹ riẹ oware nọ whọ be ta na ha.”
71 Nọ ọ nya kpobọ unuighẹ na, ọmọtẹ ọfa jọ o te muẹrohọ iẹe jẹ ta kẹ enọ e rrọ etẹe nọ: “Ọzae nana ọ jọ kugbe Jesu ohwo Nazarẹt na.”
72 Ọ tẹ wariẹ vro riẹ avọ iyei-iduwo inọ: “Mẹ riẹ ọzae na ha!”
73 Omoke jọ o vrẹ no, enọ i dikihẹ etẹe na a tẹ nyaze a tẹ ta kẹ Pita nọ: “Ababọ avro, whẹ yọ omọvo rai jọ re, keme ẹrọunu ra o dhesẹ owhẹ fihọ ere.”
74 O te mu omariẹ iyei họ eduwu be ta nọ: “Mẹ riẹ ọzae na ha!” Ẹsiẹvo na, ọkpa o te bo.
75 Pita ọ tẹ kareghẹhọ ẹme nọ Jesu ọ ta, inọ: “Taure ọkpa o te ti bo, whọ te vro omẹ isiasa.” Ọ tẹ ruọ otafe ọ tẹ viẹ gaga.
