Matiu 27:1-66
27 Nọ ohiohiẹ o te, ilori izerẹ avọ ekpako ahwo na kpobi a tẹ gba ẹgwae kpahe Jesu re a ruẹsi kpei.
2 Nọ a gbae abọ no, a te su ei vrẹ, a tẹ rehọ iẹe kẹ Pailet, ọba na.
3 Kẹsena, nọ Judas ọnọ o vivie i rie na, ọ ruẹ nọ a bruoziẹ uwhu kpe Jesu no, o tẹ dae, ọ tẹ rehọ ewẹ-isiliva ọgba na zihe se ilori izerẹ gbe ekpako na,
4 inọ: “Mẹ thuzi nọ me ro vivie ohwo nọ o ru oware ovo thọ họ.” A tẹ ta kẹe nọ: “Ovẹ o jariẹ te omai? Yọ ẹme obọra!”
5 Fikiere o te gbolo ewẹ-isiliva na fihọ etẹmpol na ọ tẹ nyavrẹ. Kẹsena ọ tẹ nyai thuru whu.
6 Rekọ ilori izerẹ na a tẹ tọlọ ewẹ-isiliva na a tẹ ta nọ: “U fo ho re ma fi ai họ oria-igho etẹmpol na keme igho azẹ e rrọ.”
7 Nọ a jiroro kpahe onana no, a tẹ rehọ ugho na dẹ otọ* re a hai ki erara fihọ etẹe.
8 Fikiere, rite inẹnẹ na a bi se otọ yena Otọ Azẹ.
9 Ẹme nọ a rehọ Jerimaya ọruẹaro na ta o te rugba, inọ: “A tẹ rehọ ewẹ-isiliva ọgba na, unuigho nọ a fihọ inọ a rẹ rọ zẹ ọzae na, ọnọ emọ Izrẹl jọ a rọwo nọ a rẹ hwa ugho fihọ uzou,
10 a tẹ rehọ ae dẹ otọ ọmebẹ na, wọhọ epanọ Jihova* ọ ta kẹ omẹ.”
11 Nọ Jesu o dikihẹ aro ọba na, ọba na ọ tẹ nọe nọ: “Kọ whẹ họ Ovie ahwo Ju na?” Jesu ọ tẹ kẹe uyo nọ: “Whẹ ọvo whọ ta riẹ na.”
12 Rekọ nọ ilori izerẹ na avọ ekpako na a je gu eme fihọ iẹe uzou, ọ kpahe ẹme he.
13 Pailet ọ tẹ ta kẹe nọ: “Kọ who bi yo eware kpobi nọ a be ta kpahe owhẹ na?”
14 Rekọ ọ kpahe ẹme kẹe he, makọ ẹme ọvo dede, u te gbe ọba na unu gaga.
15 Whaọ evaọ oke ehaa Ọnyavrẹ kpobi, o jọ uruemu ọba na re o siobọno ohwo jọ nọ ọ rrọ uwou-odi kẹ ogbotu na, ohwo kpobi nọ a gwọlọ.
16 Whaọ, evaọ oke yena, ọzae jọ nọ a re se Barabas nọ o je thuethu gaga ọ jọ uwou-odi.
17 Fikiere, nọ ogbotu na a kokohọ, Pailet ọ tẹ nọ ae nọ: “Ono wha gwọlọ nọ me siobọno kẹ owhai, Barabas manikọ Jesu ọnọ a bi se Kristi na?”
18 Keme Pailet ọ riẹ nọ fiki ihri-eriọ a rọ rehọ Jesu sei.
19 Ofariẹ, epanọ ọ rọ keria akaba oziẹobro na, aye riẹ o te vi uwou sei, inọ: “Who dhomahọ ẹme ọzae okiẹrẹe yena ha, keme mẹ ruẹ uye gaga nẹnẹ evaọ ewezẹ fiki riẹ.”
20 Rekọ ilori izerẹ na avọ ekpako na a tẹ tuduhọ ogbotu na awọ inọ a ta nọ Barabas a gwọlọ, re a kpe Jesu.
21 Ọba na ọ tẹ wariẹ nọ ae nọ: “Ono evaọ usu aimava na wha gwọlọ nọ me siobọno kẹ owhai?” A tẹ ta nọ: “Barabas.”
22 Pailet ọba na ọ tẹ nọ ae nọ: “Kọ eme me re ru Jesu, ọnọ a bi se Kristi na?” Aikpobi a te kuenu nọ: “Kare iẹe fihọ ure!”*
23 Ọ tẹ nọ ae nọ: “Fikieme? Didi oware uyoma o ru?” Rekọ a te gbe bi bo ga viere inọ: “Kare iẹe fihọ ure!”
24 Nọ ọ ruẹ nọ ọ be sai nwene iroro rai hi, ukpoye kọ ozighi o bi noi ze, Pailet ọ tẹ rehọ ame ọ tẹ wozẹ abọ riẹ evaọ iraro ogbotu na, be ta nọ: “Azẹ ọzae nana ọ rrọ uzou mẹ hẹ. Uzou rai ọ rrọ.”
25 Kẹsena ahwo na kpobi a te kuenu nọ: “Jọ azẹ riẹ ọ jọ uzou mai gbe uzou emọ mai.”
26 O te siobọno Barabas kẹ ae, rekọ ọ tẹ ta kẹ isoja na nọ a fa Jesu, nọ a fae no, ọ tẹ rehọ iẹe kẹ ae re a nyae kare iẹe fihọ ure kpe.
27 Kẹsena isoja ọba na a tẹ rehọ Jesu kpohọ ighẹ ọba na a te se ogbaẹmo na soso ze wariẹe họ.
28 Nọ a ba ewu noi oma no, a te fi ogbru ọwawae họ iẹe oma,
29 a tẹ nwa etu idhigbo a tẹ rehọ iẹe tu ei uzou jẹ rehọ ukpoko họ obọze riẹ nọ o kru. A te kigwẹ họ aro riẹ, a te bi sei ẹkoko nọ: “Do, whẹ Ovie ahwo Ju!”
30 A te nwo eya ku ei, a te mi ei ukpoko na be rehọ iẹe fae uzou.
31 Ukuhọ riẹ, nọ a sei ẹkoko bẹ no, a te si ogbru na noi oma a je ku iwu ehru riẹ fihọ iẹe, a te su ei vrẹ re a nyae tehe iẹe fihọ ure.
32 Nọ a jẹ nyavrẹ, a tẹ ruẹ Saemọn, ohwo Sairini. A tẹ gba ọzae nana họ re ọ wọ ure-oja* Jesu.
33 Nọ a te oria nọ a re se Golgota, koyehọ, Oria Ukolo-Uzou,
34 a tẹ kẹe udi nọ a rehọ ẹvẹvẹ gua re ọ da; rekọ nọ o dhei te unu ọ rọwo dae he.
35 Nọ a tehe iẹe fihọ ure no, a tẹ rehọ edhọ-ifio ghale iwu ehru riẹ kẹ omarai,
36 a tẹ keria etẹe bi rou* rie.
37 A te je kere uzi nọ a ta nọ ọ thọ fihọ ẹwẹ-akpala jẹ tehe iẹe họ ehru ure na, inọ: “Ọna họ Jesu, Ovie ahwo Ju.”
38 Kẹsena a tẹ kare igbulegbu ivẹ fihọ ire evaọ akotọ riẹ, ọjọ ofẹ obọze riẹ ọdekọ kọ ẹkpẹlobọ riẹ.
39 Ahwo nọ a be nyavrẹ a tẹ be rehọ iẹe jijehwẹ, bi nuhu uzou rai
40 be ta nọ: “O whẹ nọ ọ ta nọ o re kporo etẹmpol na fihọ otọ ọ vẹ bọe evaọ edẹ esa, siwi omara! Otẹrọnọ whẹ yọ ọmọ Ọghẹnẹ, nwrotọ no ure-oja* na ze!”
41 Epọvo na re, ilori izerẹ gbe otu ikere-obe gbe ekpako na a te bi sei ẹkoko, be ta nọ:
42 “O siwi amọfa; rekọ ọ be sai siwi omariẹ hẹ! Ọye họ Ovie Izrẹl; jọ o nwrotọ no ure-oja* na ze, ma ti fi ẹrọwọ họ iẹe.
43 Ọ rẹroso Ọghẹnẹ; jọ O siwi ei otẹrọnọ Ọ gwọlọ e riẹ, keme ọ ta nọ, ‘Mẹ yọ Ọmọ Ọghẹnẹ.’”
44 Ere ọvona, makọ igbulegbu nọ a kare fihọ ire evaọ akotọ riẹ na a je sei ẹkoko re.
45 No umuo auwa avọ ezeza* vrẹ, oria kpobi u te muebi rite auwa avọ izii.*
46 Evaọ oware wọhọ auwa avọ izii na, Jesu o te bo gaga nọ: “Eli, Eli, lama sabaktani?” koyehọ, “Ọghẹnẹ mẹ, Ọghẹnẹ mẹ, fikieme whọ rọ siọ omẹ ba?”
47 Nọ ejọ evaọ usu ahwo nọ a dikihẹ etẹe a yo onana, a te muhọ ẹta nọ: “Ọzae nana o bi se Elaeja.”
48 Ẹsiẹvo na, omọvo rai jọ ọ tẹ dhẹ nyae tọlọ uzi o te duwu iei họ udi-ogho, ọ tẹ jẹe họ ukpoko ọ tẹ rehọ iẹe kẹe re ọ da.
49 Rekọ enọ i kiọkọ a tẹ ta nọ: “Vu ei wa. Joma ruẹ sọ Elaeja ọ te nyaze ti siwi ei.”
50 Jesu ọ tẹ wariẹ bo gaga o te se ẹwẹ họ.*
51 Kẹsena ekọtini aruẹri na ọ tẹ bẹre ewẹ ivẹ no ehru duwu otọ, otọ u te nuhu, itho e tẹ bẹre.
52 Iki i te rovie, igboma erezi buobu nọ e rrọ iki* e tẹ lahwe,
53 (ahwo nọ a jẹ nya no oria nọ a re ki ahwo fihọ na ze evaọ okenọ Jesu ọ kparoma no a tẹ ruọ okpẹwho ọfuafo na), yọ ahwo buobu a ruẹ e rai.
54 Rekọ nọ oletu ogbaẹmo na avọ enọ a gbe je rou Jesu a ruẹ otọ nọ u nuhu na gbe eware nọ e be via, ozọ u te mu ae gaga a tẹ ta nọ: “Ababọ avro, nọ Ọmọ Ọghẹnẹ.”
55 Eyae buobu nọ i lele Jesu no Galili ze te gbodibo kẹe a jọ ugbo bi rri;
56 ejọ evaọ usu rai họ, Meri Magdalini gbe Meri oni Jemis avọ Josis gbe oni emezae Zẹbẹdi.
57 Whaọ nọ owọwọ u te, ọzae jọ nọ o fe nọ ọ rrọ ohwo Arimatia ọ tẹ nyaze, ọnọ a re se Josẹf nọ o zihe ruọ olele Jesu no re.
58 Ọzae nana ọ tẹ nya bru Pailet ọ tẹ yare nọ a rehọ ori Jesu kẹe. Pailet ọ tẹ kẹ udu nọ a rehọ iẹe kẹe.
59 Josẹf ọ tẹ wọ ori Jesu, ọ tẹ rehọ emamọ ehọ-elọlọhọ rọ vare iẹe,
60 ọ tẹ wọe fihọ uki okpokpọ nọ ọ tọ fihọ utho. Nọ o ghelie utho ulogbo ro di unu uki na no, ọ tẹ nyavrẹ.
61 Rekọ Meri Magdalini avọ Meri ọdekọ a tẹ gbẹ jọ etẹe, a keria aro uki na.
62 Ẹdẹ yena ọ jọ ẹdẹ Omaruẹrẹ-Kpahe kẹ Ẹdijala. Okiokiọ riẹ, ilori izerẹ na gbe otu Farisi a te kokohọ bru Pailet,
63 inọ: “O Ọba, ma kareghẹhọ oware nọ ọviẹahwohọ na ọ ta nọ ọ jọ uzuazọ, inọ, ‘Edẹ esa e tẹ vrẹ no mẹ te kparoma ze.’
64 Fikiere, kẹ udu re ahwo a nyai rou uki na bọo ẹdẹ avọ esa na re ilele riẹ a gbẹ nyai tho ugboma na ha a vẹ te ta kẹ ahwo nọ, ‘A kpare riẹ no uwhu ze no!’ Eviẹhọ uwhremu nana u ve ti yoma vi orọ ọsosuọ.”
65 Pailet ọ tẹ ta kẹ ae nọ: “Wha sae rehọ isoja. Wha nyai rou uki na oghẹrẹ kpobi nọ wha riẹ nọ a sai rou oria ga te.”
66 Fikiere, a tẹ nya, a te wuhu utho nọ o rrọ unu uki na di, je fi isoja họ etẹe.
Eme-Obotọ
^ Evaọ Griki, “Otọ ọmebẹ.” Ẹsejọhọ o jọ otọ nọ emebẹ a jẹ jọ ru iruo rai.
^ Rri oria Otofa Eme.
^ Hayo “Kare iẹe fihọ ure kpe!”
^ Rri oria Otofa Eme.
^ Hayo “rroro.”
^ Rri oria Otofa Eme.
^ Rri oria Otofa Eme.
^ “Auwa avọ ezeza,” koyehọ, oware wọhọ ighọjọ ikpegbivẹ uvo.
^ “Auwa avọ izii,” koyehọ, oware wọhọ ighọjọ esa uvo.
^ Hayo “whu.”
^ Evaọ Griki, “kie ruọ owezẹ no.”
