Matiu 28:1-20
28 Nọ Ẹdijala na ọ vrẹ no, nọ oke u je rie ze evaọ ẹdẹ ọsosuọ oka na,* Meri Magdalini avọ Meri ọdekọ na a tẹ nyaze ti rri uki na.
2 Whaọ, otọ u nuhu gaga, keme ukọ-odhiwu Jihova* o no odhiwu ze o te ghelie utho na no, ọ tẹ keria ehru riẹ.
3 O je lo nwranwranwra wọhọ elo egbrara, yọ iwu riẹ e jọ fuafo wọhọ ukpoiwo.
4 Ẹhẹ, fiki ozọ riẹ nọ u mu rai, isoja nọ i je rou* uki na a te je nuhu a tẹ wọhọ ahwo nọ a whu no.
5 Rekọ ukọ-odhiwu na ọ tẹ ta kẹ eyae na nọ: “Ozọ u mu owhai hi, keme mẹ riẹ nọ Jesu nọ a kare fihọ ure kpe na wha be gwọlọ.
6 Ọ rrọ etenẹ hẹ, keme a kpare riẹ no uwhu ze no, wọhọ epanọ ọ ta. Wha nyaze, wha rri oria nọ ọ jọ.
7 Wha nya ovovẹrẹ nyae ta kẹ ilele riẹ inọ a kpare riẹ no, yọ o bi kpobọ Galili nyae hẹrẹ owhai. Wha te jọ obei ruẹ e riẹ. Rri! Mẹ vuẹ owhai no.”
8 Fikiere, a te siawọ no oria uki na avọ ozọ, ghele na avọ oghọghọ ulogbo, a tẹ be dhẹ nyae vuẹ ilele riẹ.
9 Rri! Jesu o te zere ai jẹ ta nọ: “Wha do!” A tẹ nya tei oma, a te kru awọ riẹ be rọ uzou kpotọ kẹe.
10 Jesu ọ tẹ ta kẹ ae nọ: “Ozọ u mu owhai hi! Wha nyae vuẹ inievo mẹ re a kpobọ Galili, a te jọ obei ruẹ omẹ.”
11 Nọ eyae na a jọ edhere jẹ nyavrẹ, isoja na jọ a tẹ ruọ ẹwho na a tẹ ta eware kpobi nọ e via na kẹ ilori izerẹ na.
12 Nọ ilori izerẹ na avọ ekpako na a gba ẹgwae no, a tẹ rehọ ewẹ-isiliva buobu kẹ isoja na
13 a tẹ ta kẹ ae nọ: “Wha ta nọ, ‘Ilele riẹ a nyaze evaọ aso a te thoi vrẹ nọ ma jọ owezẹ.’
14 Yọ onana u te do te ọba na oma, ma ti lele iei ta ẹme,* fikiere wha ruawa ha.”
15 A te mi ewẹ-isiliva na a te ru epanọ a ta kẹ ae na, iku nana e tẹ vaha ruọ udevie ahwo Ju rite inẹnẹ.
16 Rekọ ilele ikpegbọvo na a te kpobọ Galili kpohọ ugbehru nọ Jesu ọ vuẹ rai no vẹre nọ a te jọ ruẹ oma.
17 Nọ a ruẹ e riẹ, a tẹ rọ uzou kpotọ kẹe, rekọ ejọ e vro.
18 Jesu ọ tẹ nya te ae oma, ọ tẹ ta kẹ ae nọ: “A rehọ udu kpobi kẹ omẹ no evaọ odhiwu gbe otọakpọ.
19 Fikiere, wha nyai wuhrẹ ahwo erẹwho kpobi re a zihe ruọ ilele, wha họ ae ame evaọ odẹ Ọsẹ na gbe Ọmọ na gbe ẹzi ọfuafo na,
20 wha wuhrẹ ae re a ru eware kpobi nọ me jie uzi rai kẹ owhai. Rri! Mẹ rrọ kugbe owhai edẹ na kpobi rite oke urere uyero-akpọ* na.”
Eme-Obotọ
^ Ẹdẹ nana ma bi se Ẹdoka nẹnẹ na. Rọkẹ ahwo Ju, ẹdẹ yena ọ jọ ẹdẹ ọsosuọ oka na.
^ Rri oria Otofa Eme.
^ Hayo “rroro.”
^ Evaọ Griki, “ma te tẹzẹ iẹe.”
^ Rri oria Otofa Eme.
