Matiu 3:1-17
3 Evaọ edẹ yena, Jọn Ọhọahwo-Ame na o te mu ovuẹ họ ewhowho evaọ udhude Judia,
2 inọ: “Wha kurẹriẹ, keme Uvie odhiwu o kẹle no.”
3 Ọnana họ ọnọ a rehọ Aizaya ọruẹaro na ta kpahe inọ: “Uvou ohwo jọ nọ o bi se evaọ obọ udhude: ‘Wha ruẹrẹ edhere Jihova* kpahe! Ru idhere riẹ liọ.’”
4 Whaọ, Jọn ọ jẹ hai ku ewu eto ekamẹle họ avọ umueku oviẹ-arao nọ ọ jẹ rọ gba eku. Emu nọ ọ jẹ re họ ebaka-ẹkpẹ avọ ọnyọ.
5 Kẹsena ahwo Jerusalẹm gbe Judia kpobi gbe ewho nọ e wariẹ Jọdan họ kpobi a te je zurie bru ei,
6 ọ tẹ jẹ họ ae ame evaọ Ethẹ Jọdan, yọ a be fa izieraha rai via.
7 Nọ ọ ruẹ otu Farisi gbe otu Sadusi buobu nọ e be nyaze te họ-ame, ọ tẹ ta kẹ ae nọ: “Whai emọ eriwhẹ, ono ọ vẹvẹ owhai unu nọ wha dhẹ no ofu nọ ọ be tha na?
8 Fikiere wha mọ ibi nọ i re dhesẹ ekurẹriẹ.
9 Wha jọ udu rai ta ha inọ, ‘Abraham họ ọsẹ mai.’ Keme mẹ be ta kẹ owhai nọ Ọghẹnẹ ọ rẹ sai zihe itho nana ruọ emọ kẹ Abraham.
10 Ma be ta ẹme na, ewhe ọ rrọ otọ ire na no. Fikiere, ure kpobi nọ o be mọ emamọ ubi hi, a re ti koi fihọ otọ a ve gbolo iei fihọ erae.
11 Mẹ be rehọ ame họ owhai ame fiki ekurẹriẹ rai, rekọ ọnọ ọ rrọ emu mẹ nyaze na ọ ga vi omẹ, me te epanọ mẹ sae rọ ba eviẹ noi awọ họ. Ọyena ọ te rehọ ẹzi ọfuafo gbe erae rọ họ owhai ame.
12 O kru eshọvẹle nọ ọ rẹ rọ frẹ erara no eka họ obọ riẹ, yọ o ti ru oria nọ ọ rẹ jọ kpare eka riẹ fuafo tẹtẹtẹ o ve koko eka na họ oria nọ ọ rẹ jọ rawo eware, rekọ ọ vẹ rehọ erae nọ a rẹ sai furie he rọ mahe ehọrọ na.”
13 Kẹsena Jesu o te no obọ Galili ziọ Jọdan re Jọn ọ ruẹse họe ame.
14 Rekọ Jọn ọ tẹ jẹ gwọlọ whaha iẹe, inọ: “Whẹ u fo nọ whọ rẹ họ omẹ ame, kọ whọ tẹ be nya bru omẹ ze?”
15 Jesu ọ tẹ ta kẹe nọ: “Jọ o jọ enẹ evaọ oke nana, keme ere oruo ma sai ro ru eware kpobi nọ e rrọ oreva Ọghẹnẹ gba.” Fikiere ọ gbẹ whaha iẹe he.
16 Nọ Jesu ọ họ-ame jẹ nwane va no ame ze no, rri! odhiwu o te rovie, ọ tẹ ruẹ ẹzi Ọghẹnẹ nọ o bi bru rie ze wọhọ erueruẹ.
17 Ofariẹ, urru jọ o tẹ ta ẹme no obọ odhiwu ze inọ: “Ọnana họ Ọmọ mẹ, oyoyou mẹ na, ọnọ mẹ jẹrehọ.”
Eme-Obotọ
^ Rri oria Otofa Eme.
