Matiu 4:1-25
4 Oyena o vrẹ no, ẹzi Ọghẹnẹ ọ tẹ kpọ Jesu kpobọ udhude, etẹe Ẹdhọ ọ jọ dawo iẹe.
2 Nọ ọ siọ emuọriọ ba edẹ udhuvẹ gbe aso udhuvẹ no, ohọo u te je kpei.
3 Ọdawo-Ahwo na ọ tẹ nyaze, ọ tẹ ta kẹe nọ: “Otẹrọnọ whẹ ọmọ Ọghẹnẹ, ta kẹ itho nana re i zihe ruọ ebrẹdi.”
4 Rekọ ọ tẹ kuyo nọ: “A kere nọ: ‘Orọnikọ ẹkwoma ebrẹdi ọvo ohwo ọ rẹ rọ jọ uzuazọ họ, rekọ ẹkwoma ẹme kpobi nọ o bi no unu Jihova* ze.’”
5 Ofariẹ, Ẹdhọ ọ tẹ rehọ iẹe kpohọ okpẹwho ọrẹri na, ọ tẹ rehọ iẹe dikihẹ ehru ugbẹhẹ nọ o wariẹ ehru etẹmpol na họ,*
6 ọ tẹ ta kẹe nọ: “Otẹrọnọ whẹ ọmọ Ọghẹnẹ, la fihọ otọ, keme a kere nọ: ‘O re ti vi ikọ-odhiwu riẹ fiki ra,’ gbe nọ ‘A te rehọ abọ rai wọ owhẹ re whọ siọ owọ ra ba ekpehọ utho.’”
7 Jesu ọ tẹ ta kẹe nọ: “A te je kere nọ: ‘Whọ rẹ dawo Jihova* Ọghẹnẹ ra vievie he.’”
8 Ẹdhọ ọ tẹ jẹ rehọ iẹe kpohọ ugbehru nọ u kpehru thesiwa, o te dhesẹ ivie akpọ na kpobi gbe oruaro rai kẹe.
9 Ọ tẹ ta kẹe nọ: “Mẹ te kẹ owhẹ enana kpobi nọ who te kigwẹ gọ omẹ.”*
10 Jesu ọ tẹ ta kẹe nọ: “Nyavrẹ, Setan! Keme a kere nọ: ‘Jihova* Ọghẹnẹ ra whọ rẹ gọ, yọ ọye ọvo whọ rẹ rehọ egagọ kpobi kẹ.’”
11 Kẹsena Ẹdhọ ọ tẹ nyase iẹe ba, rri! ikọ-odhiwu e tẹ nyaze a tẹ be gbodibo kẹe.
12 Nọ o yo nọ a mu Jọn, o te kpobọ Galili.
13 Ofariẹ, nọ o no Nazarẹt no, ọ tẹ jẹ rria Kapaniọm nọ ọ kẹle abade evaọ ubrotọ Zebulọn gbe Naftalae,
14 re ẹme nọ a rehọ Aizaya ọruẹaro na ta ọ ruẹsi rugba, inọ:
15 “O ẹkwotọ Zebulọn avọ Naftalae nọ e rrọ edhere abade na, evaọ ofẹ ukiediwo-ọre Jọdan, Galili ọrọ ahwo erẹwho efa!
16 Ahwo nọ a rrọ ebi a ruẹ elo ologbo, yọ enọ e rrọ oria ebi imuozọ, elo o lo mu ae.”
17 No umuo oke yena vrẹ, Jesu o te muhọ ewhowho be ta nọ: “Wha kurẹriẹ, keme Uvie odhiwu o kẹle no.”
18 Nọ ọ jẹ nya akotọ Abade Galili,* ọ tẹ ruẹ inievo ivẹ jọ, Saemọn nọ a re se Pita, gbe Andru oniọvo riẹ nọ a bi fi ẹriri họ evaọ abade na, keme ikuori a jọ.
19 Ọ tẹ ta kẹ ae nọ: “Wha lele omẹ, me ti ru owhai ikuori ahwo.”
20 A tẹ nwane nyasiọ iriri rai ba, a te lele iei.
21 Nọ ọ nya no etẹe no, ọ tẹ ruẹ inievo ivẹ efa, Jemis ọmọzae Zẹbẹdi avọ Jọn oniọvo riẹ. A jọ okọ kugbe Zẹbẹdi ọsẹ rai be ruẹrẹ iriri rai, o te se ai.
22 A tẹ nwane nyasiọ okọ na gbe ọsẹ rai ba, a te lele iei.
23 Kẹsena ọ tẹ nya ẹkwotọ Galili soso duwu, bi wuhrẹ evaọ iwou-egagọ rai jẹ be ta usi uwoma Uvie na, je siwi oghẹrẹ eyao gbe oghẹrẹ emo kpobi evaọ udevie ahwo na.
24 Usi riẹ u te do ruọ Siria soso, a tẹ rehọ ahwo kpobi nọ oghẹrẹ eyao sa-sa e be lahiẹ bru rie ze, enọ idhivẹri e rrọ oma, enọ i re kie ewawa, enọ okie o kie, o te siwi ae.
25 Fikiere, ogbotu ahwo buobu nọ i no Galili gbe Dẹkapọlis* gbe Jerusalẹm gbe Judia gbe abọdekọ Jọdan ze a te lele iei.
Eme-Obotọ
^ Rri oria Otofa Eme.
^ Hayo “oria nọ o mai kpehru evaọ etẹmpol na.”
^ Rri oria Otofa Eme.
^ Hayo “gọ omẹ ẹsiẹvo.”
^ Rri oria Otofa Eme.
^ Oria nana yọ awa; a jọ Ebaibol na sei awa Gẹnesarẹt, Abade Kinẹrẹte gbe Abade Taibirias.
^ Hayo “Ubrotọ Ewho Ikpe.”
