Matiu 6:1-34
6 “Wha yọroma re wha gbe dhesẹ ẹrẹreokie rai evaọ aro ahwo re a ruẹse ruẹ owhai hi; keme o tẹ rrọ ere, wha ti wo osohwa ovuọvo no obọ Ọsẹ rai nọ ọ rrọ obọ odhiwu ze he.
2 Fikiere, nọ whọ tẹ be kẹ ekẹ ohrọ,* who kporo ọgba ha, wọhọ epanọ eviẹwẹ na i re ru evaọ iwou-egagọ gbe evaọ iyẹrẹ re ahwo a ruẹsi jiri ae. Uzẹme mẹ be ta kẹ owhai, a wo osohwa rai no.
3 Rekọ nọ whọ tẹ be kẹ ekẹ ohrọ, who ru re ẹkpẹlobọ ra ọ riẹ oware nọ obọze ra u bi ru hu,
4 re ekẹ ohrọ ra e jọ onọ u dhere. Kẹsena Ọsẹ ra nọ ọ rẹ ruẹ eware nọ i dhere ọ vẹ te hwosa kẹ owhẹ.
5 “Ofariẹ, nọ wha tẹ be lẹ, wha ru wọhọ eviẹwẹ na ha, keme nọ a tẹ be lẹ a rẹ gwọlọ dikihẹ iwou-egagọ gbe akotọ idhere nọ i bi zurie re ahwo a ruẹse ruẹ e rai. Uzẹme mẹ be ta kẹ owhai, a wo osohwa rai no.
6 Rekọ nọ whọ tẹ gwọlọ lẹ, ruọ ukpẹ ra, nọ who je si ẹthẹ ra họ no, whọ vẹ lẹ se Ọsẹ ra nọ a rẹ ruẹ hẹ. Ọsẹ ra nọ ọ rẹ ruẹ eware nọ i dhere ọ vẹ te hwosa kẹ owhẹ.
7 Nọ whọ tẹ be lẹ, who dhe eme evona ẹwẹwariẹ hẹ wọhọ epanọ ahwo nọ a riẹ Ọghẹnẹ hẹ a re ru, keme a roro nọ epanọ a ta bu te oye Ọghẹnẹ o ti ro yo elẹ rai.
8 Fikiere wha ru wọhọ ahwo yena ha, keme Ọsẹ rai ọ riẹ eware nọ wha gwọlọ taure wha tẹ te yare iẹe dede.
9 “Fikiere, enẹ wha rẹ lẹ:
“‘Ọsẹ mai nọ ọ rrọ obọ odhiwu, jọ odẹ ra o jọ fuafo.
10 Jọ Uvie ra o ze. Jọ a jọ otọakpọ na ru oreva ra wọhọ epanọ o rrọ obọ odhiwu.
11 Rehọ emu* okpẹdoke inẹnẹ mai kẹ omai nẹnẹ;
12 jẹ rehọ izieraha* mai rọvrẹ omai, wọhọ epanọ ma rọvrẹ enọ i ru omai thọ* no na.
13 Who su omai ruọ odawọ họ,* rekọ siwi omai no obọ omuomu na.’
14 “Keme wha tẹ rọ iruthọ amọfa rọvrẹ rae, Ọsẹ obọ odhiwu rai ọ te rọvrẹ owhai re;
15 rekọ wha gbẹ rọ iruthọ amọfa rọvrẹ rae he, Ọsẹ rai ọ te rọ iruthọ rai rọvrẹ owhai hi.
16 “Nọ wha tẹ siọ emuọriọ ba, wha mu ovao họ wọhọ eviẹwẹ na ha, keme a re ru ovao rai fihọ whọhọ whọhọ* re ahwo a ruẹse riẹ nọ a siọ emuọriọ ba. Uzẹme mẹ be ta kẹ owhai, a wo osohwa rai no.
17 Rekọ nọ whọ tẹ siọ emuọriọ ba, wozẹ ovao ra jẹ rọ udẹ wholo eto ra,
18 re ahwo a gbẹ riẹ nọ whọ siọ emuọriọ ba ha, ajokpaọ Ọsẹ ra nọ a rẹ ruẹ hẹ na ọvo. Ọsẹ ra nọ ọ rẹ ruẹ eware nọ i dhere ọ vẹ te hwosa kẹ owhẹ.
19 “Wha siọ efe ba ekokohọ kẹ omarai evaọ otọakpọ na, oria nọ emera gbe ekagba e sae jọ raha ae, yọ iji e sai tho ai.
20 Ukpoye, wha koko efe họ obọ odhiwu kẹ omarai, oria nọ emera gbe ekagba e sae jọ raha ae he, yọ iji e sai tho ai hi.
21 Keme oria nọ efe ra ọ rrọ, etẹe udu ra o rẹ jọ re.
22 “Ukpẹ oma na họ ubiẹro. Fikiere, ubiẹro ra o tẹ tọvi oware ovo,* oma ra soso u re lo.*
23 Rekọ ubiẹro ra o tẹ be re ihri,* oma ra soso u re muebi. Otẹrọnọ ubiẹro nọ o hae wha elo fihọ oma na o tẹ be wha ebi ze, ebi na ọ rẹ jọ ruaro!
24 “Ohwo ọvo ọ rẹ sae gbodibo kẹ ilori ivẹ hẹ; o re mukpahe ọjọ o ve you ọdekọ, hayo ọ rẹ talamu ọjọ ọ vẹ siọ ọdekọ. Wha sae gbodibo kẹ Ọghẹnẹ gbe efe he.
25 “Fiki onana mẹ be ta kẹ owhai nọ: Wha siọ awa ba ẹruọ kpahe uzuazọ rai fiki onọ wha rẹ re hayo onọ wha rẹ da hayo onọ wha re fihọ oma. Kọ uzuazọ u gbe vi emu, kọ ugboma na u gbe vi iwu?
26 Wha muẹrohọ evra obọ ehru na; a rẹ kọ ibi hayo vu hayo koko fihọ eru hu, ghele na, Ọsẹ obọ odhiwu rai ọ be kuọ ae. Kọ wha gbẹ ghare vi ae?
27 Ono evaọ usu rai ọ rẹ sae rọ fiki awaọruọ fi omoke* jọ ba uzuazọ riẹ?
28 Ofariẹ, fikieme wha jẹ be ruawa kpahe iwu nọ wha re kuhọ? Wha wuhrẹ mi idodo obọ ẹwọ, epanọ e be rọ rro; i re kporo udhu hu, hayo ko iwu hu;
29 rekọ mẹ be ta kẹ owhai nọ makọ epanọ Solomọn o fe te, ọ gẹgọ woma te idodo nana ọvuọvo ho.
30 Whaọ otẹrọnọ Ọghẹnẹ ọ be gọ ododo obọ ẹwọ ẹgọ te enẹ, onọ o rrọ nẹnẹ odẹnotha a ve gbolo iei fihọ erae, kọ ọ gbẹ sae gọ owhai ẹgọ viere, whai enọ i wo ẹrọwọ ọkakao?
31 Fikiere, wha ruawa ha inọ, ‘Eme ma te re?’ hayo, ‘Eme ma te da?’ hayo, ‘Eme ma ti kuhọ?’
32 Keme enana kpobi họ eware nọ ahwo nọ a riẹ Ọghẹnẹ hẹ a bi le kiti kiti. Ọsẹ obọ odhiwu rai ọ riẹ nọ eware nana kpobi e roja kẹ owhai.
33 “Nọ o rrọ ere na, wha hae kake gwọlọ Uvie na gbe ẹrẹreokie Ọghẹnẹ ẹsikpobi, a ve ti fi eware efa nana kpobi ba kẹ owhai.
34 Fikiere, wha ruawa odẹnotha vievie he, keme odẹnotha o ti wo ẹkẹ ebẹbẹ riẹ. Ebẹbẹ ẹdẹ kpobi i te kẹ ẹdẹ yena.
Eme-Obotọ
^ Hayo “kẹ oyogbere okẹ.”
^ Evaọ Griki, “ebrẹdi.”
^ Evaọ Griki, “osoriọ.”
^ Evaọ Griki, “enọ e riosa mai.”
^ Koyehọ, “whọ kẹ omai uvẹ kie kẹ odawọ họ.”
^ Hayo “gbabọkẹ oma rai.”
^ Hayo “ruẹ vevẹ.” Evaọ Griki, “lọhọ.”
^ Hayo “vọ avọ elo.”
^ Evaọ Griki, “u te yoma; rrọ muomu.”
^ Hayo “ikiubiti ọvo.” Rri “Ikiubiti” evaọ oria Otofa Eme.
