Matiu 8:1-34
8 Nọ o nwrotọ no ugbehru na ze no, ogbotu obuobu a te lele iei.
2 Rri! Ọmoti jọ ọ tẹ nya bru rie ze ọ tẹ rọ uzou kpotọ kẹe, ta nọ: “Olori, o tẹ ruọ owhẹ, whọ sai ru omẹ fo.”
3 Ọ tẹ riẹ obọ, jẹ rọ obọ na tei, ọ tẹ ta nọ: “O ruọ omẹ! Jọ oma ra o fo.” Ẹsiẹvo na, oti na o te noi oma.
4 Jesu ọ tẹ ta kẹe nọ: “Ruẹ nọ whọ vuẹ ohwo ọvo ho, rekọ nyai dhesẹ oma ra kẹ ozerẹ na, re who dhe idhe wọhọ epanọ Uzi Mosis o ta, re o jọ isẹri kẹ ae.”
5 Nọ ọ ruọ Kapaniọm, oletu ogbaẹmo* jọ ọ tẹ nya bru rie ze be lẹe
6 be ta nọ: “Ọga, okie o kie odibo mẹ fihọ otọ evaọ obọ uwou, yọ o be lahiẹ iẹe gaga.”
7 Ọ tẹ ta kẹe nọ: “Me ti siwi ei nọ me te te obei.”
8 Oletu ogbaẹmo na ọ tẹ ta kẹe nọ: “Ọga, me te ohwo nọ whọ rẹ ruọ uwou riẹ hẹ, thakpe ta ẹme na ọvo, ẹyao odibo mẹ o ti kpo.
9 Keme mẹ yọ ohwo nọ ọ rrọ otọ ahwo, me te je wo isoja nọ e rrọ otọ mẹ, yọ mẹ rẹ sae ta kẹ ọjọ nọ, ‘Nya!’ ọ vẹ nyavrẹ, jẹ ta kẹ ọfa nọ, ‘Nyaze!’ ọ vẹ nyaze, jẹ ta kẹ odibo mẹ nọ, ‘Ru onana!’ o ve ru ei.”
10 Nọ Jesu o yo onana, u te gbei unu, ọ tẹ ta kẹ ahwo nọ a je lele iei nọ: “Uzẹme mẹ be ta kẹ owhai, mẹ re jọ evaọ Izrẹl ruẹ ohwo ọvo nọ o wo ẹrọwọ ologbo otiọna ha.
11 Mẹ be ta kẹ owhai nọ, ahwo buobu a ti no obọ ovatha-ọre gbe obọ ukiediwo-ọre ze ti lele Abraham gbe Aiziki gbe Jekọp keria re emu evaọ Uvie obọ odhiwu na;
12 rekọ a ve ti gbolo emọ Uvie na fihọ ebi obọ otafe. Etẹe a te jọ vioja jẹ reakọ.”
13 Jesu ọ tẹ ta kẹ oletu ogbaẹmo na nọ: “Nya kpo. Jọ o via kẹ owhẹ epaọ ẹrọwọ ra.” Ẹyao odibo na ọ tẹ nwani kpo evaọ auwa yena.
14 Nọ Jesu ọ nyaze uwou Pita, ọ tẹ ruẹ oni-aye Pita nọ o kiẹzẹ nọ ọ be mọ ifiva.
15 O te kru rie obọ, ifiva na i te kpo, ọ tẹ kpama, ọ tẹ be gbodibo kẹe.
16 Rekọ nọ owọwọ u te, ahwo a tẹ rehọ ahwo buobu nọ idhivẹri e rrọ oma bru ei ze; ọ tẹ rọ ẹmeunu ro le izi igbegbe na no ae oma, je siwi enọ e jẹ mọ kpobi,
17 re ẹme nọ a rehọ Aizaya ọruẹaro na ta ọ ruẹsi rugba: “Ọyomariẹ ọ rehọ eyao mai jẹ wọ edada mai vrẹ.”
18 Nọ Jesu ọ ruẹ ogbotu nọ a wariẹ e riẹ họ, ọ tẹ ta kẹ ilele riẹ nọ jọ a bi kpohọ abọdekọ.
19 Okere-obe jọ ọ tẹ nya bru ei ze ọ tẹ ta kẹe nọ: “Owuhrẹ, me ti lele owhẹ kpohọ oria kpobi nọ whọ be nya.”
20 Rekọ Jesu ọ tẹ ta kẹe nọ: “Iruakọ i wo ighogho, evra obọ ehru i wo iwou, rekọ Ọmọ ohwo o wo oria nọ ọ rẹ rehọ uzou riẹ kpahe he.”
21 Kẹsena ọzae ọfa jọ nọ o je lele iei ọ tẹ ta kẹe nọ: “Olori, kẹ omẹ uvẹ tao re mẹ nyai ki ọsẹ mẹ.”
22 Jesu ọ tẹ ta kẹe nọ: “Gbe lele omẹ, jọ enọ i whu no i ki enọ i whu no.”
23 Nọ ọ ruọ okọ, ilele riẹ a tẹ ruọ eva lele iei.
24 Ẹsiẹvo na ofou ọgaga o te muhọ efou evaọ abade na, te epanọ ẹkporo na o je ro kpo ame ruọ okọ na; rekọ ọyomariẹ ọ jọ owezẹ.
25 A tẹ nyaze te rọwo iẹe inọ: “Olori, siwi omai, keme ewhu ma rrọ na!”
26 Rekọ ọ tẹ ta kẹ ae nọ: “Fikieme ozọ u bi ro mu owhai ga tere, whai enọ i wo ẹrọwọ ọkakao?” Ọ tẹ kpama, ọ tẹ whọku ofou gbe abade na, oria kpobi o tẹ fọ rirẹ.
27 U te gbe ilele na unu, a tẹ ta nọ: “Nọ oghẹrẹ ohwo vẹ? Makọ ofou gbe abade dede a bi yoẹme kẹe.”
28 Nọ o te abọdekọ abade na no, evaọ ubrotọ ahwo Gadara, ezae ivẹ nọ idhivẹri e rrọ oma nọ i je no oria nọ a re ki ahwo fihọ ze a tẹ nya bru ei. A jẹ hai dhuaro gaga, fikiere ohwo ọvo ọ jẹ hae gbaudu nya edhere yena vrẹ hẹ.
29 A te bo nọ: “Eme ma wo kugbe owhẹ, Ọmọ Ọghẹnẹ? Kọ whọ nyaze te kẹ omai uye re oke nọ a fihọ na u te ti te?”
30 Whaọ, dina thabọ no etẹe, owa isi nọ o jọ buobu o jẹ re emu.
31 Fikiere idhivẹri na a te mu ei họ ẹlẹ nọ: “Who te bi le omai, le omai ruọ owa isi na.”
32 Ọ tẹ ta kẹ ae nọ: “Wha nya!” A te no oma ezae na a tẹ ruọ isi na, ẹsiẹvo na owa isi na soso o tẹ họrọ ruọ oria nọ o galivi, kie fihọ abade na, a tẹ da ame whu.
33 Rekọ enọ e jẹ rẹrote isi na a tẹ dhẹ, nọ a ruọ ẹwho na, a tẹ niyẹrẹ eware kpobi nọ e via, te oware nọ o via kẹ ezae nọ idhivẹri e jọ oma na.
34 Ahwo ẹwho na kpobi a tẹ wọ lahwe re a nya bru Jesu, nọ a ruẹ e riẹ, a tẹ lẹe nọ o no ubrotọ rai.
Eme-Obotọ
^ Koyehọ, “ọnọ o wuzou isoja udhusoi.”
