Matiu 9:1-38
9 Fikiere nọ ọ ruọ okọ, ọ tẹ fa kpohọ abọdekọ, o te kpohọ ẹwho riẹ.
2 Rri! A tẹ be wọ ọzae jọ nọ okie o kie nọ ọ rrọ ehwa sei. Nọ Jesu ọ ruẹ ẹrọwọ rai, ọ tẹ ta kẹ ọnọ okie o kie na nọ: “Kru udu ga, ọmọ mẹ! A rọ izieraha ra rọvrẹ owhẹ no.”
3 Otu ikere-obe jọ a tẹ be ta kẹ ohwohwo nọ: “Ohwo nana ọ be ta eme-aghọ.”
4 Fikinọ Jesu ọ riẹ oware nọ a bi roro, ọ tẹ ta nọ: “Fikieme wha be rọ jọ udu rai roro eware imuomu?
5 Wọhọ oriruo, ovẹ o mae lọhọ, re mẹ ta nọ, ‘A rọ izieraha ra rọvrẹ owhẹ no,’ hayo re mẹ ta nọ, ‘Kpama re whọ nya’?
6 Rekọ, re wha ruẹse riẹ nọ Ọmọ ohwo o wo udu nọ ọ rẹ rọ rehọ izieraha rọvrẹ ahwo evaọ otọakpọ na—” ọ tẹ ta kẹ ọnọ okie o kie na nọ: “Kpama, wọ ehwa ra, re who kpobọ uwou ra.”
7 Ọzae na ọ tẹ kpama o te kpobọ uwou riẹ.
8 Nọ ogbotu na a ruẹ onana, ozọ u te mu ai, a te jiri Ọghẹnẹ, ọnọ ọ rehọ ogaga utioye na kẹ ohwo-akpọ.
9 Ofariẹ, nọ Jesu o je no etẹe vrẹ, ọ tẹ ruẹ ọzae jọ nọ a re se Matiu nọ ọ keria uwou nọ a rẹ jọ mi osa-uzou, ọ tẹ ta kẹe nọ: “Jọ olele mẹ.” Ọ tẹ kpama o te lele iei.
10 Oke ofa riẹ, nọ ọ jẹ re emu evaọ uwou Matiu, rri! enọ i re mi osa-uzou gbe erahaizi buobu a tẹ nyaze a te kuomagbe Jesu avọ ilele riẹ jẹ re emu.
11 Rekọ nọ otu Farisi na a ruẹ onana, a tẹ ta kẹ ilele riẹ nọ: “Fikieme owuhrẹ rai o bi ro lele enọ i re mi osa-uzou gbe erahaizi re emu?”
12 Nọ Jesu o yo ẹme nọ a be ta, ọ tẹ ta nọ: “Ahwo nọ oma rai o ga a gwọlọ edọkita ha, rekọ enọ e be mọ e gwọlọ edọkita.
13 Fikiere, wha nya re wha wuhrẹ otofa ẹme nana: ‘Ohrọ-oriọ mẹ gwọlọ orọnikọ idheidhe he.’ Keme erahaizi mẹ nyaze ti se, orọnikọ ahwo ikiẹrẹe he.”
14 Kẹsena ilele Jọn a tẹ nya bru rie ze a tẹ nọe nọ: “Emejabọ nọ mai gbe otu Farisi na ma rẹ rọ siọ emuọriọ ba rekọ ilele ra a rẹ siọ emuọriọ ba ha?”
15 Jesu ọ tẹ ta kẹ ae nọ: “Egbẹnyusu ọva a wo oware ovo nọ o rẹ lẹliẹ ai weri hi nọ ọva na ọ rrọ kugbe ae na, manikọ ere he? Rekọ edẹ e be tha nọ a rẹ te rehọ ọva na siọ ae ba, kẹsena a vẹ te siọ emuọriọ ba.
16 Ohwo ọvo o re ko ẹwẹ-ohọ ọkpokpọ fihọ oria ewu anwae nọ ọ bẹre he, keme ẹwẹ-ohọ ọkpokpọ na ọ rẹ bẹre no ewu na, u ve ru ei bẹre vi epaọ ọsosuọ.
17 Yọ ahwo a re ku udi okpokpọ họ oviẹ-udi anwae he. A te ru ere, oviẹ-udi na o rẹ sa bẹre, udi na u ve hwẹ kufiẹ, yọ oviẹ-udi na o raha no. Ukpoye, ahwo a re ku udi okpokpọ họ oviẹ-udi okpokpọ, udi gbe oviẹ-udi na e vẹ jọ gbẹsinẹdẹ.”
18 Epanọ ọ jẹ rọ ta eme nana kẹ ae na, osu jọ ọ tẹ nya bru rie ze ọ tẹ rọ uzou kpotọ kẹe, be ta nọ: “Nọ ma be ta ẹme na, mẹ riẹ nọ ọmọtẹ mẹ o ti whu no, rekọ nyaze whọ rọ obọ kpahe iẹe, ọ te ziọ uzuazọ.”
19 Jesu ọ tẹ kpama, tei te ilele riẹ, a te lele iei.
20 Aye jọ nọ o bi hwẹ azẹ anwọ ikpe ikpegbivẹ ọ tẹ nyaze emu riẹ ọ tẹ rọ obọ te efọlefọ ewu ehru riẹ,
21 keme ọ jẹ ta kẹ omariẹ nọ: “Mẹ tẹ sae rọ obọ te ewu ehru riẹ ọvo dede, ẹyao mẹ o ti kpo.”
22 Jesu o te kuomarẹriẹ, nọ ọ ruẹ e riẹ ọ tẹ ta nọ: “Kru udu ga, ọmọtẹ! Ẹrọwọ ra o siwi owhẹ no.” No auwa yena vrẹ, ẹyao aye na o te kpo.
23 Whaọ nọ o te uwou osu na jẹ ruẹ ahwo nọ a bi kporo irete gbe ogbotu na nọ a bi ru edo,
24 Jesu ọ tẹ ta nọ: “Wha ruọ otafe, keme ọmọtẹ na o whu hu rekọ ọ be wezẹ.” Ahwo na a te mu ei họ ẹhwẹ avọ ẹkoko.
25 Nọ ogbotu na a nwane ruọ otafe no, ọ tẹ ruọ evaọ uwou na, o te kru obọ ọmọtẹ na, ọmọtẹ ọsese na ọ tẹ kpama.
26 Usi onana u te do ruọ ubrotọ yena soso.
27 Nọ Jesu o je no etẹe vrẹ, ezae ivẹ nọ i tuaro a te lele iei, bi bo nọ: “Jọ ohrọ mai o re owhẹ, Ọmọ Devidi.”
28 Nọ ọ ruọ evaọ uwou no, ezae nọ i tuaro na a tẹ nya bru rie ze, Jesu ọ tẹ nọ ae nọ: “Kọ wha wo ẹrọwọ nọ mẹ sai ru onana?” A tẹ kẹe uyo nọ: “Ee, Olori.”
29 Ọ tẹ rọ obọ te ibiaro rai, ọ tẹ ta nọ: “Jọ o via kẹ owhai epaọ ẹrọwọ rai.”
30 A te mu ude họ ẹruẹ. Jesu ọ tẹ vẹvẹ ae unu gaga nọ: “Wha ru re ohwo ọvo ọ riẹ hẹ.”
31 Rekọ nọ a ruọ otafe no, a te whowho usi riẹ ruọ ubrotọ yena soso.
32 Nọ a je no etẹe vrẹ, ahwo a tẹ rehọ ọzae jọ nọ o dienu nọ idhivẹri e rrọ oma ro sei;
33 nọ o le idhivẹri na noi oma no, ọzae nọ o dienu na o te mu ẹme họ ẹta. Onana u gbe ogbotu na unu a tẹ ta nọ: “A re ruẹ oware utiona evaọ Izrẹl vievie he.”
34 Rekọ otu Farisi na a jẹ ta nọ: “Ogaga osu idhivẹri na o bi ro le idhivẹri na no.”
35 Jesu ọ tẹ jẹ nya ewho gbe iwhre kpobi duwu, bi wuhrẹ evaọ iwou-egagọ rai je bi whowho usi uwoma Uvie na je siwi oghoghẹrẹ eyao gbe emo kpobi.
36 Nọ ọ ruẹ ogbotu na, ohrọ rai o tẹ re iẹe keme a rrọ oyoya jẹ vahabọ wọhọ igodẹ nọ i wo othuru hu.
37 Kẹsena ọ tẹ ta kẹ ilele riẹ nọ: “Uzẹme, ivuẹvu na e rrọ ruaro, rekọ iruiruo na e rrọ kakao.
38 Fikiere, wha lẹ Olori ivuẹvu na re o vi iruiruo ziọ ivuẹvu riẹ.”
