Ọnyano 13:1-22
13 Jihova ọ tẹ gbẹ ta kẹ Mosis nọ:
2 “Rọ ọmọzae ọsosuọ kpobi* evaọ udevie ahwo Izrẹl mudhe* kẹ omẹ. Ọmọzae ọsosuọ nọ a yẹ, te ọrọ ohwo te ọrọ arao yọ ọmẹ.”+
3 Kẹsena Mosis ọ tẹ ta kẹ ahwo na nọ: “Wha kareghẹhọ ẹdẹ nana nọ wha rọ nya no Ijipti na,+ no oria nọ wha jẹ jọ igbo,* keme obọ ogaga Jihova ọ rọ rehọ owhai no etenẹ.+ Fikiere wha rẹ re oware ovo nọ u wo ẹvi* hi.
4 Ẹdẹ nana wha bi ro kpo evaọ amara Ebib* na.+
5 Nọ Jihova ọ tẹ rehọ owhẹ ziọ ẹkwotọ ahwo Kenan, ahwo Hit, ahwo Amọ, ahwo Hiv, gbe ahwo Jebus no,+ onọ o duwu iyei kẹ esẹ-esẹ ra nọ ọ te kẹ owhẹ,+ ẹkwotọ nọ ame-ivie gbe ọnyọ i bi jo su na,+ who re ru ekareghẹhọ nana hrọ evaọ amara nana.
6 Edẹ ihrẹ whọ rẹ re ebrẹdi nọ ọ kare ẹvi,+ yọ evaọ ẹdẹ avọ ihrẹ na who re ru ehaa kẹ Jihova.
7 Ebrẹdi nọ ọ kare ẹvi whọ rẹ re evaọ edẹ ihrẹ na;+ yọ oware ovo nọ u wo ẹvi o rẹ jọ obọ ra ha,+ ukulu nọ u wo ẹvi o rẹ jọ kugbe owhẹ hẹ evaọ ẹkwotọ* ra soso.
8 Yọ whọ rẹ ta kẹ ọmọzae ra hrọ evaọ ẹdẹ yena inọ, ‘Fiki oware nọ Jihova o ru kẹ omẹ nọ me je no Ijipti.’+
9 Yọ onana o rẹ te jọ kẹ owhẹ wọhọ oka evaọ obọ ra jẹ wọhọ ekareghẹhọ evaọ aruezo* ra,+ re uzi Jihova o ruẹse jọ evaọ unu ra, keme obọ ogaga Jihova ọ rọ rehọ owhẹ no Ijipti ze.
10 Who re koko uzi nana hrọ evaọ oke riẹ nọ a fihọ no ukpe te ukpe.+
11 “Nọ Jihova ọ tẹ rehọ owhẹ ziọ ẹkwotọ ahwo Kenan no, onọ o duwu iyei kẹ owhẹ gbe esẹ-esẹ ra inọ ọ te kẹ owhẹ na,+
12 whọ rẹ rehọ ọmọzae ọsosuọ* kpobi kẹ Jihova hrọ, jegbe ọmọ ọsosuọ arao kpobi nọ ọ rrọ ọrọ ọzae nọ who wo. Erọ ezae na yọ erọ Jihova.+
13 Whọ rẹ rehọ ogodẹ rọ dẹ ọmọ ọsosuọ eketekete kpobi zihe ze, rekọ otẹrọnọ whọ dẹ riẹ zihe ze he, who re wiri uriohọ riẹ hrọ. Yọ whọ rẹ dẹ ọmọzae ọsosuọ kpobi evaọ usu emezae ra zihe ze.+
14 “Otẹrọnọ ọmọzae ra ọ nọ owhẹ ẹdẹfa nọ, ‘Eme họ otofa onana?’ whọ vẹ ta kẹe nọ, ‘Obọ ogaga Jihova ọ rọ rehọ omai no Ijipti ze, oria nọ ma jẹ jọ igbo.+
15 Nọ Fẹro ọ se thahe thahe nọ o re siobọno omai vrẹ hẹ,+ Jihova o te kpe ọmọ ọsosuọ kpobi evaọ ẹkwotọ Ijipti, no ọmọ ọsosuọ ohwo rite ọmọ ọsosuọ arao.+ Oyejabọ nọ mẹ be rọ rehọ ọrọ ọzae ọsosuọ kpobi* dhe idhe kẹ Jihova na, yọ mẹ be dẹ ọmọzae ọsosuọ kpobi ọrọ emezae mẹ zihe ze.’
16 Onana o rẹ jọ wọhọ oka hrọ evaọ obọ ra jẹ wọhọ oware nọ a rọ gba uzou evaọ aruezo* ra,+ keme obọ ogaga Jihova ọ rọ rehọ omai no Ijipti ze.”
17 Whaọ nọ Fẹro o siobọno ahwo na vrẹ, Ọghẹnẹ o su rai nya edhere ẹkwotọ ahwo Filistia ha, dede nọ oye o kẹle. Keme Ọghẹnẹ ọ ta nọ: “Ahwo na a sai nwene iroro rai nọ a tẹ rẹriẹ ovao ku ẹmo a ve ti zihe kpobọ Ijipti.”
18 Fikiere Ọghẹnẹ o te ru ahwo na nya wariẹ evaọ edhere udhude orọ Abade Ọwawae na.+ Rekọ uhie ẹmo* ahwo Izrẹl a dhe họ nya no ẹkwotọ Ijipti.
19 Mosis ọ rehọ igbenwa Josẹf lele oma re, keme Josẹf o ru emezae Izrẹl duwu iyei egaga, inọ: “Ọghẹnẹ ọ te rẹriẹ ovao rri owhai hrọ, yọ wha rẹ rehọ igbenwa mẹ lele oma no etenẹ hrọ.”+
20 A te no Sọkọt a te wohọ Itham, evaọ akọ udhude na.
21 Jihova ọ jẹ karo kẹ ae evaọ oke uvo ẹkwoma* ukulu ẹgho* re o su ae evaọ edhere na,+ gbe ukulu erae* evaọ aso re ọ kẹ ae elo, re a sae nya evaọ uvo gbe aso.+
22 Ukulu ẹgho* na ọ rẹ nya no aro ahwo na ha evaọ oke uvo, ere ukulu erae* na re evaọ aso.+
Eme-Obotọ
^ Evaọ Hibru, “re ọ jọ ọrẹri.” Hayo “fihọ akotọ.”
^ Evaọ Hibru, “ọmọ ọsosuọ kpobi nọ o rovie edhede na.”
^ Evaọ Hibru, “uwou igbo.”
^ Koyehọ, iyisti nọ a re ro ru ebrẹdi nọ u re ru ei fu.
^ Rri Ẹme-Ofiba B15.
^ Evaọ Hibru, “iwhru.”
^ Evaọ Hibru, “udevie ibiaro ivẹ.”
^ Evaọ Hibru, “ọnọ o rovie edhede na.”
^ Evaọ Hibru, “oware kpobi nọ u rovie edhede na.”
^ Evaọ Hibru, “udevie ibiaro ivẹ.”
^ “Uhie ẹmo” na o sai dhesẹ nọ a ruẹrẹ e rai họ wọhọ egbaẹmo nọ a ruẹrẹ fihọ eko isoi, ejọ e karo, ejọ e rrọ emu, ejọ e rrọ udevie, efa e tẹ rrọ tabọ tabọ.
^ Hayo “evaọ.”
^ Evaọ Hibru, “ipila ẹgho.”
^ Evaọ Hibru, “ipila erae.”
^ Evaọ Hibru, “ipila ẹgho.”
^ Evaọ Hibru, “ipila erae.”
