Ọnyano 4:1-31
4 Rekọ Mosis ọ tẹ ta nọ: “Kọ otẹrọnọ a gbẹ rọwo ẹme mẹ hẹ yọ a gaviezọ kẹ urru mẹ hẹ,+ keme a te ta nọ, ‘Jihova ọ romavia kẹ owhẹ hẹ.’”
2 Jihova ọ tẹ ta kẹe nọ: “Eme ọ rrọ obọ ra na?” O te yo nọ: “Ọkpọ.”
3 Ọ tẹ ta nọ: “Gbolo iei fihọ otọ.” Fikiere o te gbolo iei fihọ otọ, u te zihe ruọ araomuomu;+ Mosis ọ tẹ dhẹ no etẹe.
4 Jihova ọ tẹ ta kẹ Mosis nọ: “Rriẹ obọ ra re who kru uweli riẹ.” Ọ tẹ rriẹ obọ riẹ o te kru ei, u te zihe ruọ ọkpọ evaọ obọ riẹ.
5 Kẹsena Ọghẹnẹ ọ tẹ ta nọ: “Ẹjiroro onana họ re a ruẹse rọwo nọ Jihova, Ọghẹnẹ esẹ-esẹ rai, Ọghẹnẹ Abraham, Ọghẹnẹ Aiziki, gbe Ọghẹnẹ Jekọp,+ ọ romavia kẹ owhẹ.”+
6 Jihova ọ tẹ wariẹ ta kẹe nọ: “Ivie, thọrọ obọ ra họ igbama ewu ra.” Ọ tẹ thọrọ obọ riẹ họ igbama ewu riẹ. Nọ o yolo iei ze, rri, oti ọ ruọ obọ riẹ no, yọ o be fo wọhọ ekpalekpa-ame!+
7 Kẹsena ọ tẹ ta nọ: “Zihe obọ ra fihọ igbama ewu ra.” O te zihe obọ riẹ fihọ ewu riẹ. Nọ o yolo iei no ewu na ze, o ruẹrẹhọ no wọhọ abọ oma riẹ nọ o kiọkọ!
8 Ọ tẹ ta nọ: “A gbẹ rọwo ẹme ra ha hayo daezọ oka ọsosuọ na ha, a te daezọ oka avọ ivẹ na hrọ.+
9 Ghele na, a gbẹ make rọwo eka ivẹ nana ha yọ a rọwo gaviezọ kẹ urru ra ha, who ve vo ame jọ no Ethẹ Naele na ze who ve ku ei fihọ otọ oyaya, ame nọ who vo no Ethẹ Naele ze na o ve ti zihe ruọ azẹ evaọ otọ oyaya na.”+
10 Mosis ọ tẹ ta kẹ Jihova nọ: “Rọvrẹ omẹ, Jihova, rekọ mẹ yọ ohwo nọ ọ riẹ ẹme ẹta vievie he, makọ anwẹdẹ hayo anwọ ẹsiẹe nọ whọ be rọ ta ẹme kẹ odibo ra na, keme mẹ rẹ ta ẹme kpẹlẹ kpẹlẹ* yọ ẹrọo mẹ ọ rrọ gbẹgbẹdẹ.”+
11 Jihova ọ tẹ ta kẹe nọ: “Ono ọ ma unu kẹ ohwo, hayo ono o re ru ai dienu, diezọ, ruẹ ude ziezi, hayo tuaro? Kọ ogbẹrọnọ mẹ, Jihova?
12 Fikiere nya obọnana, mẹ te jọ kugbe owhẹ nọ whọ te ta ẹme,* yọ me ti wuhrẹ owhẹ oware nọ whọ rẹ ta.”+
13 Rekọ ọ tẹ ta nọ: “Rọvrẹ omẹ, Jihova, ivie vi ohwo ọfa kpobi nọ whọ gwọlọ vi.”
14 Ofu o te mu Jihova gaga kẹ Mosis, ọ tẹ ta nọ: “Kọ ẹvẹ kpahe Erọn+ oniọvo-ọmọzae ra ohwo Livae na? Mẹ riẹ nọ ọ rẹ sae ta ẹme ziezi. Yọ obọnana ọ rrọ edhere be nyabru owhẹ ze. Nọ ọ tẹ ruẹ owhẹ, udu riẹ o te ghọghọ.+
15 Fikiere whọ rẹ ta ẹme kẹe hrọ je fi eme na họ unu riẹ,+ yọ mẹ te jọ kugbe owhẹ gbe ọyomariẹ nọ wha te ta ẹme,+ yọ me ti wuhrẹ owhai oware nọ wha re ru.
16 Ọ te ta ẹme kẹ ahwo na kẹ owhẹ, ọ te jọ ọtota ra, yọ whọ te jọ wọhọ Ọghẹnẹ kẹe.*+
17 Whọ rẹ rehọ ọkpọ nana fihọ obọ ra jẹ rehọ iẹe ru eware eka na.”+
18 Fikiere Mosis o te zihe bru Jẹtro ọgọ riẹ,+ ọ tẹ ta kẹe nọ: “Ivie, mẹ gwọlọ kpo, re me zihe bru inievo mẹ nọ e rrọ obọ Ijipti re mẹ ruẹ sọ a gbẹ rrọ uzuazọ.” Jẹtro ọ tẹ ta kẹ Mosis nọ: “Nya tou.”
19 Kẹsena Jihova ọ tẹ ta kẹ Mosis evaọ Midian nọ: “Nya, zihe kpobọ Ijipti, keme ezae kpobi nọ e jẹ gwọlọ kpe owhẹ* a whu no.”+
20 Mosis ọ tẹ rehọ aye riẹ gbe emezae riẹ ọ tẹ wọ ae họ eketekete, ọ tẹ ruọ edhere bi zihe kpobọ ẹkwotọ Ijipti. Yọ Mosis ọ tọlọ ọkpọ Ọghẹnẹ uzẹme na fihọ obọ.
21 Kẹsena Jihova ọ tẹ ta kẹ Mosis nọ: “Nọ who te zihe te obọ Ijipti no, ruẹ nọ whọ jọ aro Fẹro ru iruo igbunu kpobi nọ mẹ kẹ owhẹ ogaga nọ who ru na.+ Rekọ mẹ te kuvẹ re udu riẹ o jọ gaga,+ yọ o ti siobọno ahwo na vrẹ hẹ.+
22 Whọ rẹ ta kẹ Fẹro hrọ inọ, ‘Enẹ Jihova ọ ta: “Izrẹl yọ ọmọzae mẹ, ọmọ ọsosuọ mẹ.+
23 Mẹ be ta kẹ owhẹ nọ, Siobọno ọmọzae mẹ vrẹ re ọ ruẹse gọ omẹ. Rekọ whọ tẹ se nọ who re siobọnoi vrẹ hẹ, me ti kpe ọmọzae ra, ọmọ ọsosuọ ra.”’”+
24 Whaọ evaọ edhere, evaọ oria nọ a wohọ, Jihova+ o te zere iei ọ tẹ jẹ gwọlọ kpei no.+
25 Ukuhọ riẹ, Zipora+ ọ tẹ tọlọ utho odada,* ọ tẹ yawo ọmọzae riẹ je ru uwoliwo* riẹ te awọ riẹ* jẹ ta nọ: “Keme whẹ yọ ọva azẹ kẹ omẹ.”
26 Fikiere Ọ tẹ kẹe uvẹ. Evaọ oke yena, ọ* ta nọ, “ọva azẹ,” fiki oyawo na.
27 Kẹsena Jihova ọ tẹ ta kẹ Erọn nọ: “Nya kpobọ udhude na nyai zere Mosis.”+ Fikiere ọ tẹ nya, o te zere iei evaọ ugbehru Ọghẹnẹ uzẹme na+ o te yere iei avọ ẹviọlọ.
28 Mosis ọ tẹ vuẹ Erọn eme Jihova kpobi, ọnọ o vi rie na,+ gbe eware eka kpobi nọ o jie uzi kẹe nọ o ru.+
29 Kẹsena Mosis avọ Erọn a tẹ nya a te koko ekpako ahwo Izrẹl na kpobi họ.+
30 Erọn ọ tẹ vuẹ ae eme kpobi nọ Jihova ọ ta kẹ Mosis na, yọ o ru eware eka+ na evaọ aro ahwo na.
31 Fiki onana, ahwo na a rọwo.+ Nọ a yo nọ Jihova ọ rẹriẹ ovao riẹ rri ahwo Izrẹl no+ gbe nọ ọ ruẹ oja-oriọ rai+ no, a te guzou kpotọ je kiẹzẹ vovao tuotọ.
Eme-Obotọ
^ Evaọ Hibru, “me wo unu ogbẹgbẹdẹ.”
^ Evaọ Hibru, “jọ kugbe unu ra.”
^ Hayo “who ve ti dikihẹ ẹta Ọghẹnẹ kẹe.”
^ O sae jọ nọ awọ ukọ-odhiwu na.
^ Uwoliwo yọ ohọrọ nọ a re bru no oma ọmọzae nọ a tẹ be yawo iẹe.
^ Hayo “amagha utho.”
^ Koyehọ, Zipora.
