Orọ Ọsosuọ Ro Se Ahwo Kọrint 14:1-40
14 Wha daoma wo uyoyou, ghele na wha gbẹ daoma wo* ekẹ ẹzi na, rekọ onọ o te mai woma họ re wha ruẹaro.+
2 Keme ohwo nọ ọ rẹ jẹ oghẹrẹ ẹrọunu jọ ọ be ta ẹme kẹ Ọghẹnẹ orọnikọ ahwo ho, keme ohwo ọvo ọ rẹ riẹ otọ ẹme na ha+ dede nọ ọ be rọ ẹkwoma ẹzi na ta eware ididi ọrẹri.+
3 Rekọ ohwo nọ ọ rẹ ruẹaro ọ rẹ rọ eme riẹ bọ ahwo ga jẹ tuduhọ ahwo awọ, jẹ sasa ahwo oma.
4 Ohwo nọ ọ rẹ jẹ oghẹrẹ ẹrọunu jọ ọ be bọ omariẹ ga, rekọ ohwo nọ ọ rẹ ruẹaro ọ be bọ ukoko ga.
5 Whaọ o were omẹ re whai kpobi wha jẹ erọunu sa-sa,+ rekọ onọ o mae were omẹ họ re wha ruẹaro.+ Evaọ uzẹme, ohwo nọ ọ rẹ ruẹaro ọ rro vi ohwo nọ ọ rẹ jẹ erọunu, ajokpanọ ọ be fa otọ eme riẹ na,* re o ruẹse bọ ukoko na ga.
6 Rekọ evaọ obọnana inievo, mẹ tẹ nyabru owhai ze be jẹ erọunu sa-sa, didi ewoma me bi ru kẹ owhai? Ajokpanọ mẹ rẹ ta eme nọ Ọghẹnẹ ọ fere via kẹ omẹ+ hayo rehọ eriariẹ+ hayo eruẹaruẹ hayo uwuhrẹ ta ẹme kẹ owhai.
7 Epọvo na o rrọ re kẹ eware nọ i wo uzuazọ họ nọ i re ru edo, wọhọ urete hayo akpata. Nọ edo riẹ o gbe bi nwene he, ẹvẹ a sai ro vuhu oware nọ a be rọ urete hayo akpata na kporo?
8 Keme otẹrọnọ a kporo ọgba rekọ ovuẹ na u vẹ hẹ, ono ọ rẹ wọ owọ ẹmo?
9 Epọvo na re, otẹrọnọ wha rehọ ẹrọo rai ta eme nọ a rẹ sai wo otoriẹ rai lọlọhọ họ, ẹvẹ ohwo ọ sae rọ riẹ oware nọ wha be ta? Evaọ uzẹme, yọ ofou wha be ta eme na fihọ.
10 O sae jọ nọ u wo oghẹrẹ sa-sa nọ ahwo a rẹ ta ẹme evaọ akpọ na, rekọ ọvuọvo ọ riẹ hẹ nọ o wo otofa ha.
11 Keme otẹrọnọ me bi wo otoriẹ ẹme nọ ohwo ọ be ta ha, mẹ rẹ jọ ọrara kẹ ọnọ ọ be ta ẹme na, yọ ọnọ ọ be ta ẹme na ọ rẹ jọ ọrara kẹ omẹ re.
12 Epọvo na o rrọ kẹ owhai re, nọ orọnọ o rrọ owhai oja nọ wha re wo ekẹ ẹzi na, wha daoma re ekẹ nọ e rẹ bọ ukoko na ga e da owhai oma fia.+
13 Fikiere jọ ọnọ ọ be jẹ ẹrọunu jọ ọ lẹ inọ ọ sae fa otọ riẹ.*+
14 Keme mẹ tẹ be rọ oghẹrẹ ẹrọunu jọ lẹ, okẹ ẹzi na nọ a kẹ omẹ oye o be lẹ na, rekọ mẹ be jọ iroro mẹ wo otoriẹ eme na ha.
15 Kọ eme u fo nọ me re ru? Mẹ rẹ rehọ okẹ ẹzi na lẹ, rekọ mẹ rẹ jẹ lẹ olẹ nọ mẹ rẹ jọ iroro mẹ wo otoriẹ riẹ. Mẹ rẹ rehọ okẹ ẹzi na so ole ujiro, rekọ mẹ rẹ jẹ so ole ujiro nọ mẹ rẹ jọ iroro mẹ wo otoriẹ riẹ.
16 O gbẹ rrọ ere he, nọ whọ tẹ be rehọ okẹ ẹzi jiri Ọghẹnẹ, ẹvẹ ohwo gheghe nọ ọ rrọ udevie rai ọ sae rọ ta nọ “Ami” rọkẹ uyere nọ whọ be kẹ, nọ orọnọ o wo otoriẹ eme ra ha na?
17 Uzẹme, who bi yere Ọghẹnẹ evaọ emamọ edhere, rekọ o be bọ ohwo ọdekọ na ga ha.
18 Me yere Ọghẹnẹ inọ mẹ rẹ jẹ erọunu bu vi owhai kpobi.
19 Ghele na, nọ ma te kokohọ o rẹ mae were omẹ re mẹ ta eme isoi nọ mẹ rẹ jọ iroro mẹ wo otoriẹ rai, re mẹ ruẹsi wuhrẹ* amọfa re, viukpenọ mẹ rẹ ta eme idu ikpe (10,000) evaọ oghẹrẹ ẹrọunu jọ.+
20 Inievo, wha jọ emaha evaọ otoriẹ rai hi,+ rekọ wha jọ emaha evaọ oware uyoma;+ jẹ jọ enọ e rro te ahwo ziezi no evaọ otoriẹ rai.+
21 A kere evaọ Uzi na nọ: “‘Mẹ te rehọ erọunu ahwo erẹwho efa gbe igbenu erara rọ ta ẹme kẹ ahwo nana, ghele na a te rọwo gaviezọ kẹ omẹ hẹ,’ ere Jihova* ọ ta.”+
22 Fikiere, orọnikọ enọ e rọwo eye erọunu e rrọ oka kẹ hẹ rekọ enọ e rọwo ho,+ yọ orọnikọ enọ e rọwo ho eruẹaruẹ e rrọ oka kẹ hẹ rekọ enọ e rọwo.
23 Fikiere, otẹrọnọ ukoko na soso u kokohọ oria ovo aikpobi a tẹ be jẹ erọunu sa-sa, yọ ahwo gheghe hayo enọ e rọwo ho a nyaze, kọ a gbẹ te ta nọ iroro rai e gbẹ gba ha?
24 Rekọ otẹrọnọ whai kpobi wha be ruẹaro yọ ọnọ ọ rọwo ho hayo ohwo gheghe ọ nyaze, eme rai kpobi i ti duobọtei udu je ru ei kiẹ omariẹ riwi ziezi.
25 Eware ididi udu riẹ i ve ti dhesẹ oma via, o ve ti kigwẹ vovao tuotọ gọ Ọghẹnẹ be ta nọ: “Ọghẹnẹ ọ ginẹ rrọ udevie rai.”+
26 Inievo, kọ eme u fo nọ wha re ru? Nọ wha te kokohọ, ọjọ o wo olezi, ọfa o wo okẹ uwuhrẹ, ọfa o wo eme nọ Ọghẹnẹ ọ fere via kẹe, ọfa o wo okẹ ẹrọunu, yọ ọfa o wo okẹ nọ ọ rẹ rọ fa otọ erọunu.+ Wha ru eware kpobi re e bọ ahwo ga.
27 Yọ otẹrọnọ ahwo jọ a rẹ jẹ erọunu jọ, jọ o jọ imava hayo imasa a te bu gaga, yọ o rẹ jọ unọjọ utọjọ; yọ ohwo jọ ọ rẹ fa otọ eme na* hrọ.+
28 Rekọ otẹrọnọ ohwo nọ ọ rẹ fa otọ eme na* ọ riẹ hẹ, jọ a fibo evaọ ukoko na re a ta ẹme kẹ omobọ rai gbe Ọghẹnẹ.
29 Jọ eruẹaro ivẹ hayo esa+ a ruẹaro, ahwo nọ a kiọkọ a vẹ daoma riẹ otofa rai.
30 Rekọ otẹrọnọ Ọghẹnẹ ọ fere oware jọ via kẹ ohwo jọ epanọ ọ rọ keria etẹe na, jọ ọrọ ọsosuọ nọ ọ ta ẹme na o fibo.
31 Keme whai kpobi wha rẹ sae ruẹaro unọjọ utọjọ, re ahwo kpobi a sai wuhrẹ oware jọ rehọ je wo uduotahawọ.+
32 Yọ eruẹaro na a rẹ kpọ oghẹrẹ nọ a be rehọ ekẹ ẹzi nọ a wo na ruiruo.
33 Keme Ọghẹnẹ yọ Ọghẹnẹ nọ ọ rrọ zighi zighi hi rekọ ọrọ udhedhẹ.+
Wọhọ epanọ o rrọ evaọ ikoko erẹri na kpobi,
34 jọ eyae na a fibo evaọ ikoko na, keme a kẹ rai uvẹ re a ta ẹme he.+ Ukpoye, jọ a romakpotọ,+ wọhọ epanọ Uzi na o ta re.
35 A tẹ gwọlọ riẹ oware jọ, jọ a nọ ezae rai evaọ obọ uwou, keme o rrọ oware omovuọ re aye ọ ta ẹme evaọ ukoko na.
36 Kọ obọ rai ẹme Ọghẹnẹ o no ze, hayo kọ whai ọvo o te obọ?
37 Ohwo jọ o te roro nọ ọye yọ ọruẹaro hayo o wo okẹ ẹzi na, ọ rẹ rọwo nọ eware nọ me bi kere se owhai na yọ ijaje Olori na.
38 Rekọ ohwo jọ o te bi rri onana vo, a ti rri rie vo re.*
39 Fikiere, inievo mẹ, wha hae daoma re wha ruẹaro,+ ghele na wha whaha ẹjẹ erọunu hu.+
40 Rekọ jọ eware kpobi e nya kpatiẹ je lele ọruẹrẹfihotọ.*+
Eme-Obotọ
^ Hayo “rọ ajọwha gwọlọ.”
^ Hayo “ọ be fa ẹvẹrẹ na.”
^ Hayo “inọ ọ sae fa ẹvẹrẹ na.”
^ Hayo “ruẹse rọ unu wuhrẹ.”
^ Rri Ẹme-Ofiba A5.
^ Hayo “fa ẹvẹrẹ na.”
^ Hayo “ọfefafa.”
^ Hayo o sae jọ nọ, “ohwo jọ ọ tẹ rrọ ogbori, ọ te gbẹ jọ ogbori.”
^ Hayo “jẹ jọ malẹ.”
