Orọ Ọsosuọ Ro Se Ahwo Kọrint 4:1-21
4 Jọ ahwo a riẹ nọ mai yọ idibo* Kristi gbe irieyero erọ eware ididi ọrẹri Ọghẹnẹ.+
2 Evaọ onana, oware nọ a gwọlọ mi irieyero họ, a rẹ jọ ahwo nọ a re fievahọ.*
3 Whaọ rọkẹ omẹ, u wuzou tere he re whai hayo ogbẹgwae ẹdhoguo* ahwo-akpọ jọ a rehọ omẹ gu ẹdhọ. Evaọ uzẹme, me re tube gu omobọ mẹ ẹdhọ họ.
4 Keme mẹ be jọ omamẹ ruẹ oware ovo nọ me ru thọ họ. Rekọ orọnikọ onana u dhesẹ nọ me kiẹrẹe he; ọnọ o re gu omẹ ẹdhọ họ Jihova.*+
5 Fikiere, wha bruoziẹ+ oware ovo ho taure ẹruoke na o te ti te, bẹsenọ Olori na ọ rẹ nyaze. Ọ te rehọ eware nọ a lẹlẹ ru evaọ ebi ziọ elo jẹ fere iroro nọ e rrọ udu ahwo via, kẹsena omomọvo o ve ti wo ujiro riẹ no obọ Ọghẹnẹ ze.+
6 Whaọ inievo, mẹ ta eme nana be rehọ omamẹ avọ Apọlọs+ kẹ oriruo rọkẹ ewoma rai, re wha jọ omamai wuhrẹ uzi nana: “Wha ru vrẹ eware nọ a kere na ha,” re wha siọ uke ba efu avọ omorro,+ bi rri ohwo jọ nọ o woma vi ọfa.
7 Keme ono o ru owhẹ wo ohẹriẹ no ọdekọ? Evaọ uzẹme, eme who wo nọ a kẹ owhẹ hẹ?+ Kọ otẹrọnọ ẹkẹ a kẹ owhẹ, fikieme who bi ro seha wọhọ nọ ẹkẹ a kẹ owhẹ hẹ?
8 Kọ wha wo eware kpobi nọ wha gwọlọ te obọ no? Kọ wha fe no? Kọ wha muhọ esu no wọhọ ivie+ ababọ mai? O hae were omẹ otẹrọnọ wha muhọ esu no wọhọ ivie, re ma sai kuomagbe owhai su re.+
9 Keme o rrọ omẹ oma wọhọ ẹsenọ Ọghẹnẹ ọ rehọ omai ikọ na lahwe whremu ziọ afe wọhọ ahwo nọ a bruoziẹ uwhu kpe no,+ keme ma zihe ruọ ahwo nọ a rrọ afe-ughe kẹ akpọ na+ gbe ikọ-odhiwu gbe ahwo no.
10 Mai yọ igheghẹ+ fiki Kristi, whai kọ iwareghẹ evaọ Kristi; mai eyẹlẹ, whai kọ egba; a be kẹ owhai ọghọ, mai kọ enọ a bi rri vo.
11 Rite auwa nana, ohọo+ gbe uruame+ u gbe bi kpe omai, ma tẹ jẹ rrọ enwenọ ẹbẹba,* a bi kpe omai,*+ yọ ma wo iwou nọ ma rẹ rria ha,
12 ma tẹ jẹ be rọ abọ mai ru iruo egaga.+ Nọ ahwo a tẹ la omai eka, ma rẹ lẹ ẹro eghale kẹ ae;+ nọ a te bi kpokpo omai, ma re thihakọ avọ odiri;+
13 nọ a tẹ ta omai raha, ma rẹ kpahe ẹme wolẹ;*+ ma zihe ruọ ezuzu* akpọ na no, eware nọ a leri, rite enẹna.
14 Me bi kere eware nana, orọnikọ re me ru oma vuọ owhai hi, rekọ re mẹ kẹ owhai ohrẹ wọhọ emọ iyoyou mẹ.
15 Keme wha tẹ maki wo iwuhrẹ* idu ikpe (10,000) evaọ Kristi, wha wo esẹ buobu hu; keme me zihe ruọ ọsẹ rai no evaọ Kristi Jesu fiki usi uwoma na.+
16 Fikiere mẹ be tuduhọ owhai awọ nọ wha rọ aro kele omẹ.+
17 Oyejabọ nọ me bi ro vi Timoti bru owhai ze na, keme ọ rrọ ọmọ oyoyou mẹ nọ o wo ẹrọwọ* evaọ iruo Olori na. Ọ te kareghẹhọ owhai oghẹrẹ nọ me bi ro ru eware* evaọ iruo Kristi Jesu,+ wọhọ epanọ mẹ be jọ oria kpobi wuhrẹ evaọ ukoko kpobi.
18 Ahwo jọ a bi fu uke avọ omorro wọhọ ẹsenọ mẹ te nyabru owhai ze he.
19 Rekọ mẹ te nyabru owhai ze kẹle o tẹ ruọ Jihova,* mẹ vẹ te riẹ ogaga enọ i bi fu uke avọ omorro na, orọnikọ ẹmeunu rai hi.
20 Keme orọnikọ ẹmeunu oye Uvie Ọghẹnẹ u re ro dhesẹ oma via ha rekọ ogaga.
21 Ovẹ o were owhai? Kọ mẹ nyabru owhai ze avọ ọkpọ+ manikọ avọ uyoyou gbe ẹzi owowolẹ?
Eme-Obotọ
^ Hayo “enọ e rrọ otọ.”
^ Hayo “ahwo ọtẹruo; ahwo ẹrọwọ.”
^ Hayo “okọto.”
^ Rri Ẹme-Ofiba A5.
^ Hayo “be bọwo omai.”
^ Evaọ Griki, “ma rrọ ẹbẹba.”
^ Evaọ Griki, “ma rẹ lẹ.”
^ Hayo “uzuahọ; erara.”
^ Hayo “iriwi-emọ; enọ e rẹ rẹrote hayo sẹro emọ.”
^ Hayo “nọ a rẹ sai fievahọ.”
^ Evaọ Griki, “kareghẹhọ owhai idhere mẹ.”
^ Rri Ẹme-Ofiba A5.
