Iruẹru-Ivie Ọsosuọ 16:1-43
16 Ere a rọ rehọ etehe ọvọ Ọghẹnẹ uzẹme na ze, a tẹ wọe fihọ obeva uwou-udhu nọ Devidi ọ bọ kẹe;+ a te dhe idhe emahọ gbe idhe ọriẹyeri evaọ aro Ọghẹnẹ uzẹme na.+
2 Nọ Devidi o dhe idhe emahọ+ gbe idhe ọriẹyeri+ na no, ọ tẹ rehọ odẹ Jihova lẹ ẹro eghale kẹ ahwo na.
3 U no ere no, ọ ghale ebrẹdi ogheghelie, ikeki ideti,* gbe ikeki resin kẹ ahwo Izrẹl kpobi, te ọzae te aye.
4 Kẹsena ọ tẹ rehọ ahwo Livae na jọ mu re a gbodibo evaọ aro etehe ọvọ Jihova na,+ re a rọ orro kẹ,* yere, je jiri Jihova Ọghẹnẹ Izrẹl.
5 Esaf+ ọ jọ ọnọ o wuzou, Zẹkaraya ọ tẹ rọ kẹle iẹe; yọ Jeayẹl, Shemiramọt, Jehayẹl, Matataya, Ẹlayab, Benaya, Obẹd-idọm, gbe Jeayẹl+ a je kporo ekpata-ifi gbe ekpata+ na; yọ Esaf họ ọnọ o je kporo igogo+ na,
6 Benaya avọ Jehazaẹl izerẹ na a te je kporo egba na kẹse kẹse evaọ aro etehe ọvọ Ọghẹnẹ uzẹme na.
7 Ẹdẹ yena họ ẹdẹ ọsosuọ nọ Devidi o ro kere ole ujiro kẹ Jihova, ọ tẹ ta kẹ Esaf+ avọ imoni riẹ re a so ẹe, inọ:
8 “Wha yere Jihova,+ wha bo se odẹ riẹ,Wha dhesẹ iruẹru riẹ via evaọ udevie ahwo na!+
9 Wha so ile kẹe, wha so ile ujiro* kẹe,+Wha roro kpahe* iruo igbunu riẹ kpobi.+
10 Wha rehọ odẹ ọrẹri riẹ seha.+
Jọ udu ahwo nọ a be gwọlọ Jihova o ghọghọ.+
11 Wha gwọlọ Jihova+ avọ ẹgba riẹ.
Wha gwọlọ ovao riẹ* kẹse kẹse.+
12 Wha kareghẹhọ iruo igbunu nọ o ru no,+Iruo igbunu riẹ gbe iziẹibro nọ o whowho via no,
13 Whai emọ* Izrẹl odibo riẹ,+Whai emezae Jekọp, enọ ọ salọ.+
14 Ọye họ Jihova Ọghẹnẹ mai.+
Iziẹibro riẹ i re kpomahọ otọakpọ na soso.+
15 Wha kareghẹhọ ọvọ riẹ bẹdẹ bẹdẹ,Eyaa nọ ọ ya* kẹ ige odu,+
16 Ọvọ nọ ọ re kugbe Abraham,+Gbe iyei nọ o duwu kẹ Aiziki,+
17 Onọ ọ kẹ imuẹro riẹ ẹkwoma uzi nọ o fihọ kẹ Jekọp+Gbe ọvọ ebẹdẹ bẹdẹ kẹ Izrẹl,
18 Inọ, ‘Mẹ te kẹ owhẹ ẹkwotọ Kenan+Re o jọ ukuoriọ nọ a ghale kẹ owhẹ.’+
19 Onana o via evaọ okenọ wha jọ kakao,Ẹhẹ, okenọ wha jọ kakao gaga, yọ wha jọ erara evaọ ẹkwotọ na.+
20 A jẹ nya no orẹwho ruọ orẹwho,No uvie jọ bru amọfa.+
21 Ọ kẹ ohwo ọvo uvẹ re o kienyẹ ae he,+Rekọ ọ whọku ivie fiki rai,+
22 Inọ, ‘Wha rọ obọ te enọ me wholo ho,Yọ wha ru eruẹaro mẹ oware uyoma ovo ho.’+
23 Wha so ile kẹ Jihova, whai ahwo otọakpọ na kpobi!
Wha whowho esiwo riẹ kẹdẹ kẹdẹ!+
24 Wha whowho oruaro riẹ evaọ udevie erẹwho na,Iruo igbunu riẹ evaọ udevie ahwo na kpobi.
25 Keme Jihova ọ rrọ ruaro, yọ ọye ọ mai fo ejiro.
O re mu ọwhewhe vi eghẹnẹ efa kpobi.+
26 Eghẹnẹ ahwo na kpobi yọ eghẹnẹ nọ i fioka ha,+Rekọ Jihova họ ọnọ ọ ma idhiwu na.+
27 Oruaro* avọ erru e rrọ aro riẹ;+Ẹgba avọ oghọghọ e rrọ oria nọ ọ be rria.+
28 Wha kẹ Jihova oware nọ u fo rie, whai iviuwou ahwo na,Wha kẹ Jihova oware nọ u fo rie fiki oruaro gbe ẹgba riẹ.+
29 Wha kẹ Jihova oruaro nọ u fo odẹ riẹ;+Wha rehọ okẹ re wha ziọ aro riẹ.+
Wha guzou kpotọ kẹ* Jihova avọ ẹgọ ọrẹri nọ wha whẹhọ.*+
30 Wha nuhu evaọ aro riẹ, whai ahwo otọakpọ na kpobi!
Ọ rehọ otọakpọ* na vi kothi; a rẹ sai goi no ẹta ha.*+
31 Jọ idhiwu na e ghọghọ, jọ otọakpọ na o ghọghọ re;+Wha jọ udevie erẹwho na whowho nọ: ‘Jihova o zihe ruọ Ovie no!’+
32 Jọ abade na avọ eware kpobi nọ e rrọ eva riẹ i ru edo egbrara;Jọ idhu na avọ eware kpobi nọ e rrọ eva rai e ghọghọ.
33 Evaọ oke ovona, jọ ire nọ e rrọ owhawho na i bo ubo oghọghọ evaọ aro Jihova,Keme ọ be nyaze ti* bruoziẹ otọakpọ na.
34 Wha yere Jihova, keme ọ rrọ wowoma;+Uyoyou riẹ nọ o rẹ hiẹ hẹ o rẹ jọ bẹdẹ bẹdẹ.+
35 Wha vẹ ta nọ, ‘Siwi omai, O Ọghẹnẹ esiwo mai,+Koko omai họ je siwi omai no obọ erẹwho na,Re ma ruẹsi jiri odẹ ọrẹri ra+Jẹ rọ oghọghọ jiri owhẹ.+
36 Jọ a jiri Jihova, Ọghẹnẹ IzrẹlBẹdẹ bẹdẹ.’”*
Ahwo na kpobi a te kuenu nọ, “Ami!”* a te jiri Jihova.
37 Kẹsena Devidi ọ tẹ nyasiọ Esaf+ avọ imoni riẹ ba etẹe evaọ aro etehe ọvọ Jihova na re a gbodibo kẹse kẹse evaọ aro etehe ọvọ+ na, wọhọ epanọ a ruẹrẹ fihọ nọ a re ru kẹdẹ kẹdẹ.+
38 Obẹd-idọm avọ imoni riẹ, enọ i bu te udhosa-gberee, gbe Obẹd-idọm ọmọzae Jedutọn, avọ Hosa a jọ irou-unuẹthẹ;*
39 yọ Zedọk+ ozerẹ na avọ ibe izerẹ riẹ a jọ aro uwou-udhu Jihova nọ o rrọ oria ukpehru na evaọ Gibiọn+
40 re a dhe idhe emahọ kẹ Jihova kẹse kẹse evaọ agbada-idhe idhe emahọ na, te ohiohiẹ te owọwọ, re a je ru oware kpobi nọ a kere fihọ Uzi Jihova nọ o jie kẹ ahwo Izrẹl.+
41 Ahwo nọ a jọ kugbe ae họ, Himan avọ Jedutọn+ gbe ahwo nọ a kiọkọ nọ a salọ, enọ a fodẹ edẹ rai re a yere Jihova,+ keme “uyoyou riẹ nọ o rẹ hiẹ hẹ o rẹ jọ bẹdẹ bẹdẹ”;+
42 yọ Himan+ avọ Jedutọn a jọ kugbe ai re a kporo egba na, igogo na, gbe ekwakwa nọ a re ro jiri* Ọghẹnẹ uzẹme na; yọ emezae Jedutọn+ e jọ obọ unuighẹ na.
43 Kẹsena ahwo na kpobi a te kpobọ uwou rai, Devidi ọ tẹ nyae lẹ ẹro eghale kẹ ahwo uwou riẹ.
Eme-Obotọ
^ Nọ oghẹrẹ ibi oriẹ jọ nọ e rẹ mere. Obọ Palẹstain a rẹ mae jọ ruẹ oghẹrẹ oriẹ nana.
^ Evaọ Hibru, “re a kareghẹhọ.”
^ Hayo “kporo ile.”
^ Hayo o sae jọ nọ, “ta kpahe.”
^ Hayo “Daoma jọ aro riẹ.”
^ Hayo “uyẹ.” Evaọ Hibru, “ubi.”
^ Evaọ Hibru, “Ẹme nọ o jie uzi riẹ.”
^ Hayo “Adhẹẹ.”
^ Hayo o sae jọ nọ, “fiki epanọ ọ fo te.”
^ Hayo “rọ gọ.”
^ Hayo “otọ.”
^ Hayo “nuhu iei hi; ru ei jọ deghe deghe he.”
^ Hayo “ọ nyaze no re o.”
^ Hayo “No ebẹdẹ rite ebẹdẹ.”
^ Hayo “Ere o rẹ jọ!”
^ Hayo “irroro-unuẹthẹ.”
^ Hayo “ekwakwa ole”
