Samuẹle Ọsosuọ 9:1-27
-
Samuẹle avọ Sọl a ruẹ oma (1-27)
9 Ọzae jọ ọ jariẹ nọ ọ rrọ ohwo orua Bẹnjamin, odẹ riẹ Kish,+ ọmọzae Abayẹl, ọmọzae Zirọ, ọmọzae Bikorat, ọmọzae Afaya, ohwo orua Bẹnjamin,+ yọ ọzae na o fe gaga.
2 O wo ọmọzae jọ nọ a re se Sọl,+ ọ jọ ọmoha, yọ o wo erru gaga—ọzae ọvuọvo nọ o wo erru tei evaọ Izrẹl ọ jọ họ—nọ o te dikihẹ, o re theri vi ahwo na kpobi, ohwo ọvo ọ rẹ vrẹ ẹkoko riẹ hẹ.
3 Okenọ eketekete* Kish ọsẹ Sọl i vru, Kish ọ tẹ ta kẹ Sọl ọmọzae riẹ nọ: “Ivie, rehọ omọvo idibo na jọ kugbe oma re wha nyae gwọlọ eketekete na.”
4 A nya ubrotọ igbehru Ifremu gbe ẹkwotọ Shalisha duwu, rekọ a ruẹ e rai hi. A jọ ẹkwotọ Shealim soso gwọlọ eketekete na, rekọ a ruẹ e rai hi. A tẹ nya ẹkwotọ ahwo orua Bẹnjamin soso duwu, rekọ a ruẹ e rai ghele he.
5 A tẹ nyate ẹkwotọ Zọf, Sọl ọ tẹ ta kẹ odibo riẹ nọ a gbẹ jọ usu na nọ: “Nyaze re ma zihe kpo, o gbẹ rrọ ere he, ọsẹ mẹ o ve ti mu awa mai họ ẹruọ viukpọ eketekete na.”+
6 Rekọ odibo na ọ tẹ ta kẹe nọ: “Rri, ohwo Ọghẹnẹ jọ ọ rrọ okpẹwho yena, ọzae nọ ahwo a rẹ kẹ ọghọ gaga. Ẹme kpobi nọ ọ ta ọ rẹ seba erugba ha.+ Joma nya obọnana. Ẹsejọhọ ọ te vuẹ omai obonọ ma rẹ nya rri.”
7 Fikiere Sọl ọ tẹ ta kẹ odibo riẹ na nọ: “Nọ ma tẹ nya, eme ma te wha se ọzae na? Uvumọ ebrẹdi ọ rrọ ẹkpa mai hi; yọ oware ovo o riẹ nọ ma sae rọ kẹ ohwo Ọghẹnẹ uzẹme na okẹ hẹ. Eme ma wo nọ ma sae rọ kẹe?”
8 Fikiere odibo na ọ tẹ wariẹ ta kẹ Sọl nọ: “Abọvo abane shẹkẹl isiliva* jọ ọ rrọ omẹ obọ. Mẹ te rehọ iẹe kẹ ohwo Ọghẹnẹ uzẹme na, o ve ti dhesẹ obonọ ma rẹ nya rri kẹ omai.”
9 (Evaọ oke anwae, nọ ohwo ọ tẹ gwọlọ nyae nekpẹ mi Ọghẹnẹ evaọ Izrẹl, enẹ ọ jẹ hae ta: “Nyaze re ma nyabru ọruẹ-ude na.”+ Keme ọruẹ-ude a jẹ hai se ọruẹaro evaọ oke anwae.)
10 Sọl ọ tẹ ta kẹ odibo riẹ nọ: “Emamọ ẹme whọ ta na. Joma nya.” Fikiere a tẹ nya kpohọ okpẹwho nọ ohwo Ọghẹnẹ uzẹme na ọ jọ na.
11 Nọ a jẹ nya evaọ edhere nọ a rẹ rọ gadiẹ kpohọ okpẹwho na, a te zere emetẹ nọ e be nyai vo ame. A tẹ nọ ae nọ: “Kọ ọruẹ-ude+ na ọ rrọ ẹwho nana?”
12 A te yo nọ: “Ọ riẹ. Rri, ọ rrọ aro rai na. Wha siawọ, keme ọ nyaze okpẹwho na nẹnẹ na, fikinọ ahwo na a bi dhe idhe+ nẹnẹ evaọ oria ukpehru na.+
13 Nọ wha tẹ nwane ruọ okpẹwho na, wha te ruẹ e riẹ taure o te ti kpohọ oria ukpehru na nyae re emu. Ahwo na a rẹ re emu hu bẹsenọ ọ rẹ nyaze, keme ọye ọ rẹ lẹ fihọ emu idhe na. Nọ ọ tẹ nwane lẹ no, ahwo nọ a zizie a vẹ tẹ te re. Wha nya obọnana, wha te ruẹ e riẹ.”
14 Fikiere a tẹ nya kpohọ okpẹwho na. Nọ a be nya kẹle udevie okpẹwho na no, a tẹ ruẹ Samuẹle nọ ọ be nyabru ai ze re a kpohọ oria ukpehru na.
15 Evaọ ẹdẹ nọ ọ vrẹ taure Sọl ọ tẹ te nyaze, Jihova ọ ta kẹ* Samuẹle vẹre no nọ:
16 “Evaọ oke utiona odẹnotha, me ti vi ọzae jọ no ẹkwotọ Bẹnjamin bru owhẹ ze.+ Who re wholo iei re ọ jọ osu kẹ ahwo mẹ Izrẹl,+ yọ o re ti siwi ahwo mẹ no obọ ahwo Filistia. Keme mẹ ruẹ oja nọ ahwo mẹ a be re no, yọ edo oviẹ rai u do te omẹ oma no.”+
17 Nọ Samuẹle ọ ruẹ Sọl, Jihova ọ tẹ ta kẹe nọ: “Ọzae na ọna, ọnọ mẹ ta kẹ owhẹ nọ, ‘Ọna họ ọnọ o ti su ahwo mẹ na.’”*+
18 Kẹsena Sọl ọ tẹ nyabru Samuẹle evaọ unuẹthẹ na, ọ tẹ ta kẹe nọ: “Ivie, vuẹ omẹ, diẹse uwou ọruẹ-ude na o rrọ?”
19 Samuẹle o te yo kẹ Sọl nọ: “Mẹ họ ọruẹ-ude na. Nyaruọ aro mẹ re ma kpobọ oria ukpehru na, who ti lele omẹ re emu nẹnẹ na.+ Me ti siobọno owhẹ kpo evaọ ohiohiẹ, yọ mẹ te vuẹ owhẹ oware kpobi nọ whọ gwọlọ riẹ.*
20 Who du ruawa kpahe eketekete nọ i vru edẹ esa nọ e vrẹ na ha,+ keme a ruẹ e rai no. Kọ ono o wo eware eghaghae Izrẹl kpobi? Kọ ogbẹrọnọ owhẹ avọ uwou ọsẹ ra soso?”+
21 Fiki onana, Sọl ọ tẹ kẹ uyo nọ: “Kọ ogbẹrọnọ orua Bẹnjamin nọ o mae kawo evaọ Izrẹl me no ze,+ yọ unuwou mẹ họ onọ a mai rri nọ u fioka ha evaọ inuwou orua Bẹnjamin kpobi? Kọ fikieme whọ be rọ ta ẹme otiọna kẹ omẹ?”
22 Samuẹle ọ tẹ rehọ Sọl avọ odibo riẹ ziọ ubruwou emuọriọ na, ọ tẹ kẹ ae oria nọ o mae viodẹ evaọ udevie ahwo nọ a zizie na; enwenọ ezae ọgba e jariẹ.
23 Samuẹle ọ tẹ ta kẹ othere-emu na nọ: “Rehọ ẹkẹ arao nọ mẹ rọ kẹ owhẹ na ze, onọ mẹ ta kẹ owhẹ nọ who fihọ akotọ na.”
24 Othere-emu na ọ tẹ wọ owọ na ze, ọ tẹ wọe fihọ aro Sọl. Samuẹle ọ tẹ ta nọ: “Arao nọ ma fihọ obei fiki ra a wọ fihọ aro ra na. Re, keme whẹ a se riẹ ba kẹ fiki ẹkeria nana. Keme mẹ ta kẹ ae nọ, ‘Me zizie erara jọ.’” Fikiere Sọl o te lele Samuẹle re emu evaọ ẹdẹ yena.
25 Kẹsena a te no oria ukpehru na+ kpobọ okpẹwho na, o te gbe je lele Sọl ta ẹme evaọ obọ ehru uwou riẹ.
26 A tẹ kpama evaọ irioke, nọ oke o ke no, Samuẹle ọ tẹ kpaunu se Sọl evaọ ehru uwou na nọ: “Ruẹrẹ oma kpahe re me ti siobọno owhẹ kpo.” Fikiere Sọl ọ tẹ ruẹrẹ oma kpahe, tei te Samuẹle a tẹ ruọ otafe.
27 Nọ a jẹ nya rri obotọ kpohọ ughe okpẹwho na, Samuẹle ọ tẹ ta kẹ Sọl nọ: “Ta kẹ odibo na+ re ọ nya kpobọ aro siọ omai ba,” ọ tẹ nya kpobọ aro. “Rekọ whẹ omara, dikihẹ omojọ, re mẹ ruẹsi ru owhẹ yo ẹme Ọghẹnẹ.”
Eme-Obotọ
^ Evaọ Hibru, “eketekete eyae.”
^ Shẹkẹl ọvo ọ gbẹdẹ te egramo 11.4 (0.367 oz t). Rri Ẹme-Ofiba B14.
^ Evaọ Hibru, “o rovie ezọ.”
^ Hayo “koko ahwo mẹ uzou họ.”
^ Evaọ Hibru, “oware kpobi nọ o rrọ owhẹ udu.”
