Iruẹru-Ivie Avọ Ivẹ 27:1-9
-
Jotam, ovie Juda (1-9)
27 Ikpe udhegbisoi Jotam+ ọ jọ okenọ o zihe ruọ ovie, yọ ikpe ikpegbezeza o su evaọ Jerusalẹm. Odẹ oni riẹ Jerusha, ọmọtẹ Zedọk.+
2 Ọ ruabọhọ je ru oware nọ u kiehọ evaọ aro Jihova, nwane wọhọ epanọ Uzaya ọsẹ riẹ o ru,+ rekọ o duwu ruọ eva etẹmpol Jihova ha.+ Rekọ ahwo na a gbe je ru eware nọ e rẹ wha ọraha se ai.
3 Ọ bọ unuẹthẹ obehru uwou Jihova,+ yọ ọ jọ ugbẹhẹ Ofẹl+ ru iruo gaga.
4 Ọ tẹ jẹ bọ ikpewho+ fihọ ubrotọ igbehru Juda,+ yọ ọ bọ eria nọ a di ogba wariẹ họ*+ gbe iwou ikpehru+ fihọ eria nọ ire e vọ na.
5 O lele ovie ahwo Ammọn fi ẹmo,+ ukuhọ riẹ o te fi ai kparobọ, u te ru nọ ahwo Ammọn a rọ kẹe etalẹnte* isiliva udhusoi (100), owawọ kọr* idu ikpe (10,000) orọ iwhiti, gbe owawọ kọr idu ikpe (10,000) orọ ebali evaọ ukpe yena. Ahwo Ammọn a hwa eware nana kẹe re evaọ ukpe avọ ivẹ gbe ukpe avọ esa.+
6 Fikiere Jotam o te je dhe ẹgẹga, keme ọ gba riẹ mu* nọ ọ rẹ nya evaọ idhere Jihova Ọghẹnẹ riẹ.
7 Rọ kpahe iku uzuazọ Jotam nọ i kiọkọ, emo kpobi nọ o fi gbe idhere riẹ, a kere i rai fihọ Obe Ivie Izrẹl gbe erọ Juda.+
8 Ikpe udhegbisoi ọ jọ okenọ o zihe ruọ ovie, yọ ikpe ikpegbezeza o su evaọ Jerusalẹm.+
9 Kẹsena Jotam o te whu wọhọ* esẹ-esẹ riẹ, a te ki ei fihọ Okpẹwho Devidi.+ Ehaz ọmọzae riẹ o te zihe ruọ ovie evaọ ẹta riẹ.+
Eme-Obotọ
^ Hayo “e rẹ bẹ ẹvẹruọ.”
^ Etalẹnte ọvo ọ gbẹdẹ te ikilogramo 34.2 (1,101 oz t). Rri Ẹme-Ofiba B14.
^ Ilita 220 (200 dry qt) e rẹ vọ kọr. Rri Ẹme-Ofiba B14.
^ Hayo “ruẹrẹ oma kpahe.”
^ Evaọ Hibru, “kiẹzẹ kugbe.”
