Samuẹle Avọ Ivẹ 1:1-27
1 Nọ Sọl o whu no, nọ Devidi o zihe no obonọ ọ jọ fi ahwo Amalẹk kparobọ* ze no, ọ tẹ jọ Ziklag+ edẹ ivẹ.
2 Evaọ ẹdẹ avọ esa, ọzae jọ o te no obọ evuẹ Sọl ze avọ iwu riẹ nọ e bẹre, yọ ẹkpẹ ọ riẹe uzou. Nọ o te Devidi oma, o te kigwẹ je kiẹzẹ vovao tuotọ.
3 Devidi ọ tẹ nọe nọ: “Bovẹ who bi no ze?” O te yo nọ: “Obọ evuẹ ahwo Izrẹl mẹ vabọ no ze na.”
4 Devidi ọ tẹ nọe nọ: “Ẹvẹ eware e rrọ evaọ obei? Ivie vuẹ omẹ.” Ọzae na ọ tẹ ta nọ: “Ahwo na a dhẹ no ẹmo na no, yọ a kpe ibuobu rai no. Makọ Sọl avọ Jonatan ọmọzae riẹ a whu no.”+
5 Devidi ọ tẹ nọ ọmoha nọ ọ wha usi na ze na nọ: “Ẹvẹ whọ rọ riẹ nọ Sọl avọ Jonatan ọmọzae riẹ a whu no?”
6 Ọmoha na ọ tẹ kẹe uyo nọ: “Nọ mẹ jọ Ugbehru Gilboa,+ mẹ tẹ ruẹ Sọl nọ ọ roma rẹrẹ ozuẹ riẹ, yọ ekẹkẹ avọ edhẹ-enyenya na e be kẹle iẹe oma no.+
7 Nọ o kuomarẹriẹ ruẹ omẹ, o te se omẹ, me te yo nọ, ‘Mẹ na!’
8 Ọ tẹ nọ omẹ nọ, ‘Whẹ yọ ono?’ Me te yo nọ, ‘Mẹ yọ ohwo Amalẹk.’+
9 Ọ tẹ ta nọ, ‘Ivie, nya kẹle omẹ re who kpe omẹ no, keme edada egaga e rrọ omẹ oma, rekọ mẹ gbẹ rrọ uzuazọ ghele.’*
10 Fikiere mẹ tẹ nya kẹle iẹe, me te kpei no,+ keme mẹ riẹ nọ ọ te sae zọ họ nọ orọnọ ọ rrọ otọ yọ ọ nwoma gaga na. Kẹsena mẹ tẹ tọlọ etu-uvie* nọ ọ jọ uzou riẹ gbe ufiare nọ o jọ ugbobọ riẹ, mẹ tẹ wha ae ze se olori mẹ.”
11 Devidi ọ tẹ zaza abọ họ iwu riẹ ọ tẹ bẹre ai, ezae nọ e jọ kugbei na kpobi e tẹ bẹre iwu rai re.
12 A te je weri, be viẹ, jẹ siọ emuọriọ ba+ rite owọwọ fiki Sọl, fiki Jonatan ọmọzae riẹ, fiki ahwo Jihova, gbe fiki uwou Izrẹl,+ keme a rehọ ọgbọdọ kpe ai no.
13 Devidi ọ tẹ nọ ọmoha nọ ọ wha usi na sei na nọ: “Whẹ yọ ohwo ẹwho vẹ?” O te yo nọ: “Mẹ yọ ọmọzae ohwo Amalẹk, nọ ọ be rria Izrẹl.”
14 Devidi ọ tẹ ta kẹe nọ: “Emejabọ ozọ u gbe mu owhẹ hẹ nọ whọ rọ kpare obọ ra ro kpe ọnọ Jihova o wholo?”+
15 Fikiere Devidi o te se ọmoha jọ, ọ tẹ ta kẹe nọ: “Nyaze re who duwu iei kpe.” O te duwu iei fihọ otọ, o te whu.+
16 Devidi ọ tẹ ta kẹe nọ: “Azẹ ra ọ rrọ uzou obọra, keme unu obọra u se isẹri kpe owhẹ nọ, ‘Mẹ họ ọnọ o kpe ọnọ Jihova o wholo na.’”+
17 Kẹsena Devidi ọ tẹ so ole uweri nana fiki Sọl avọ Jonatan ọmọzae riẹ,+
18 ọ tẹ ta nọ a wuhrẹ ahwo Juda ole uweri na nọ a se “Uze Na,” onọ a kere fihọ obe Jesha:+
19 “O Izrẹl, a kpe enọ i wo erru fihọ otọ evaọ eria ikpehru ra.+
Rri epanọ egba na i ro whu!
20 Wha ta kpahe iẹe evaọ Gat he;+Wha whowho iei evaọ iyẹrẹ Ashkelọn ho,O gbẹ rrọ ere he, emetẹ Filistia e vẹ te ghọghọ,Hayo eva e vẹ te were emetẹ ezae nọ a yawo ho na.
21 O whai igbehru Gilboa,+Jọ igrigri hayo oso ọ rrọ fihọ ehru rai hi,Jọ idhu rai i wou eware he, re a siọ eware nọ a rẹ rọ kẹ Ọghẹnẹ ba ewo,+Keme etẹe a jọ zue ojese egba na,Ojese Sọl o gbẹ rrọ onọ a rehọ ewhri wholo ho.
22 Uze Jonatan avọ ọgbọdọ SọlE siọ azẹ ahwo ba ekpe he,+ yọ i duwu ruọ iwhri egba na,A re zihe kpozi ababọ obokparọ họ.+
23 Sọl avọ Jonatan,+ enọ ahwo a you, a tẹ jẹ jọ ghaghae* evaọ okenọ a jọ uzuazọ,Makọ evaọ oke uwhu rai a hẹriẹ oma ha.+
A jẹ hai siawọ vi igo,+A goma vi ikpohrokpo.+
24 O whai emetẹ Izrẹl, wha viẹ fiki Sọl,Ọnọ ọ rehọ ehọ ewawae gbe eware eghaghae gọ owhai ẹgọ,Ọnọ o ku ifiare igoru họ ehru iwu nọ wha fihọ.
25 Rri epanọ egba na i ro whu evaọ ẹmo!
A kpe Jonatan fihọ ehru eria ikpehru ra!+
26 O Jonatan oniọvo mẹ, whọ be da omẹ gaga;Whọ jọ ghaghae kẹ omẹ gaga.+
Uyoyou nọ who wo kẹ omẹ u vi uyoyou eyae.+
27 Rri epanọ egba na i ro whu,Gbe epanọ ekwakwa ẹmo e rọ raha no!”
