Samuẹle Avọ Ivẹ 23:1-39
23 Enana họ eme urere Devidi:+
“Ẹme Devidi ọmọzae Jẹsi,+Ẹme ọzae nọ a kpare kpehru,+Ọnọ Ọghẹnẹ Jekọp o wholo na,+Ọso-ile owoma* ọrọ ile+ Izrẹl.
2 Ẹzi Jihova ọ rọ ẹkwoma mẹ ta ẹme;+Ẹme riẹ ọ jọ ẹrọo mẹ.+
3 Ọghẹnẹ Izrẹl ọ ta ẹme;Utho Izrẹl+ ọ ta kẹ omẹ nọ:
‘Nọ ohwo nọ o bi su ahwo-akpọ o te kiẹrẹe,+Nọ ọ tẹ be rọ ozodhẹ Ọghẹnẹ su,+
4 O rẹ wọhọ elo ohiohiẹ nọ ọre ọ tẹ va ze,+Elo ohiohiẹ nọ ẹgho o ruru hu.
O rẹ wọhọ elo nọ ọ rẹ romavia nọ oso ọ tẹ rrọ ka no,Nọ u re ru ẹbe dhẹ no otọ ze.’+
5 Kọ ogbẹrọnọ ere uwou mẹ o rrọ evaọ aro Ọghẹnẹ?
Keme ọ re ọvọ ebẹdẹ bẹdẹ kugbe omẹ no,+Onọ a ruẹrẹhọ evaọ kabọ kabọ, u te je muẹro.
Keme oye o rẹ wha esiwo se omẹ riẹriẹriẹ jẹ kẹ omẹ evawere,Kọ ogbẹrọnọ fiki oyena o bi ro ru ei wo ẹnyaharo na?+
6 Rekọ a gbolo ezae nọ i fioka ha kpobi kufiẹ+ wọhọ ire inwe,Keme a rẹ sae rehọ obọ kwa ae he.
7 Nọ ohwo ọ tẹ be rọ obọ te ai,Ọ rẹ rehọ ayọno gbe ọkpọ ozuẹ thoma,Yọ oria nọ e rrọ a rẹ jọ rehọ erae mahe ai muotọ.”
8 Edẹ egbaẹmo egaga Devidi ena:+ Josheb-bashibẹt ohwo uyẹ Takimonae, ọnọ o wuzou egbaẹmo egaga esa na.+ Evaọ ẹdẹ jọ ọ rehọ ozuẹ riẹ kpe ahwo egba eree (800).
9 Ọnọ ọ rọ kẹle iẹe kọ Ẹlieza+ ọmọzae Dodo,+ ọmọzae Ahohae, ọ jọ usu egbaẹmo egaga esa nọ e jọ kugbe Devidi okenọ a jẹ poviẹ ahwo Filistia na. Nọ ahwo Filistia na a kokohọ re a lele ezae Izrẹl fi ẹmo, ezae Izrẹl e tẹ be dhẹ,
10 rekọ ọ tẹ dadamu, o te mu ahwo Filistia na họ ekpe fihọ otọ bẹsenọ obọ o rọ rrọe, obọ riẹ o tẹ ghọ fihọ ọgbọdọ nọ o kru na.+ Ere Jihova o ro ru ai wo obokparọ ulogbo* evaọ ẹdẹ yena;+ egbaẹmo ahwo Izrẹl na i te zihe bru ei ze re a kwa eware ahwo nọ o kpe na.
11 Ọnọ ọ rọ kẹle iẹe kọ Shamah ọmọzae Egi ohwo Hara na. Nọ ahwo Filistia a kokohọ Lihae, evaọ ẹkẹ otọ jọ nọ a kọ ezaa buobu fihọ, ahwo Izrẹl a tẹ dhẹ fiki ahwo Filistia na.
12 Rekọ ọ tẹ dadamu udevie udhu na, ọ tẹ whaha ae re a siọ udhu na ba ẹruọ, o te je kpe ahwo Filistia na. Ere Jihova o ro ru ai wo obokparọ ulogbo.*+
13 Ezae esa evaọ usu ezae ọgba nọ i wuzou na e tẹ nyabru Devidi kpobọ eghogho-utho Adọlam+ evaọ etoke ivuẹvu na, yọ evuẹ* ogbaẹmo Filistia o jọ Ukiekpotọ* Rẹfeyẹm.+
14 Oke yena yọ Devidi ọ rrọ oria nọ u siomano na,+ yọ utu isoja ahwo Filistia o rrọ Bẹtlẹhẹm.
15 Kẹsena Devidi o te weroma gaga nọ: “Dodokọ mẹ rẹ sae ruẹ ame ọgọdọ-ame* nọ ọ kẹle unuẹthẹ Bẹtlẹhẹm na da!”
16 Fikiere egbaẹmo egaga esa na e tẹ rọ ogaga ruọ evuẹ egbaẹmo Filistia na, a tẹ jọ ọgọdọ-ame* nọ ọ kẹle unuẹthẹ Bẹtlẹhẹm na vo ame, a tẹ rehọ iẹe se Devidi; rekọ ọ rọwo dae he, o te ku ei fihọ otọ kẹ Jihova.+
17 Ọ ta nọ: “Nọ oware nọ mẹ rẹ sai ru vievie he, O Jihova. Kọ mẹ rẹ da azẹ+ ezae nọ i fi uzuazọ* rai họ ọza nyai vo ame ze?” Fikiere ọ gbẹ rọwo da ame na ha. Enana họ eware nọ egbaẹmo egaga esa riẹ i ru.
18 Abishae+ oniọvo-ọmọzae Joab ọmọzae Zeruya+ ọ jọ ọnọ o wuzou egbaẹmo esa efa; evaọ ẹdẹ jọ ọ rehọ ozuẹ riẹ kpe ahwo egba esa (300), a tẹ riẹe odẹ wọhọ epanọ a riẹ egbaẹmo egaga esa ọsosuọ na.+
19 Dede nọ ọye ọ mae viodẹ evaọ usu egbaẹmo esa edekọ na je wuzou rai, ọkwa riẹ o te ọrọ egbaẹmo esa ọsosuọ na ha.
20 Benaya+ ọmọzae Jehoyada ọ jọ ọzae nọ ọ gudu* nọ o ru ikpeware buobu evaọ Kabziẹl.+ O kpe emezae ivẹ Eriẹl ọrọ Moab, ọ tẹ jẹ ruọ eva ọgọdọ ame ọyaya evaọ ẹdẹ nọ ekpalekpa-ame i ro kie gaga, o te kpe okpohrokpo.+
21 O te je kpe ohwo Ijipti jọ nọ ọ rro thesiwa. Dede nọ ohwo Ijipti na o kru ozuẹ họ obọ, ọkpọ Benaya o kru họ obọ bru ei, o te fru ozuẹ na mi ei, ọ tẹ rehọ ozuẹ obọriẹ kpei.
22 Eware nana Benaya ọmọzae Jehoyada o ru, yọ a riẹ riẹ odẹ wọhọ egbaẹmo egaga esa na.
23 Dede nọ ọ viodẹ vi ezae ọgba na, ọkwa riẹ o te ọrọ egbaẹmo esa na ha. Rekọ Devidi o fi rie họ ọnọ o wuzou egbaẹmo nọ i re rou rie.*
24 Asahẹl+ oniọvo-ọmọzae Joab ọ jọ usu ezae ọgba na, ezae efa nọ e jọ usu rai họ: Ẹlhenan ọmọzae Dodo ọrọ Bẹtlẹhẹm,+
25 Shamah ohwo Herọd na, Elaeka ohwo Herọd na,
26 Hilẹz+ ohwo Palti na, Aera+ ọmọzae Ikẹsh ohwo Tekoa na,
27 Abi-iza+ ohwo Anatọt+ na, Mebonae ohwo Husha na,
28 Zalmọn ohwo uyẹ Ahohae na, Meharae+ ohwo Nẹtofa na,
29 Hilẹb ọmọzae Beanah ohwo Nẹtofa na, Itai ọmọzae Raebae ohwo Gibiah ọrọ ahwo orua Bẹnjamin,
30 Benaya+ ohwo Piratọn, Hidae ọrọ ito* Geash+ na,
31 Ebae-abọn ohwo Abat na, Azmevẹt ohwo Bahurim na,
32 Elayaba ohwo Shealbọn na, gbe emezae Jeshẹn, Jonatan,
33 Shamah ohwo Hara na, Ahayam ọmọzae Shera ohwo Hara na,
34 Ẹlifelẹt ọmọzae Ahasbae, ọmọzae ohwo Meakat na, Elayam ọmọzae Ahitofẹl+ ohwo Gaelọ na,
35 Hẹzrọ ohwo Kamẹl na, Pearae ohwo Arab na,
36 Aigal ọmọzae Netan ọrọ Zoba, Benae ohwo orua Gad na,
37 Zilẹk ohwo Ammọn na, Neharae ohwo Biẹrọt na, ọnọ ọ rẹ wha ekwakwa ẹmo Joab ọmọzae Zeruya,
38 Aera ohwo Itri na, Gerẹb ohwo Itri+ na,
39 gbe Uraya+ ohwo Hit na—aikpobi ezae ọgbagbihrẹ.
Eme-Obotọ
^ Hayo “Owoma.”
^ Hayo “esiwo ologbo.”
^ Hayo “esiwo ologbo.”
^ Hayo “Ukiekpotọ Opraprara.”
^ Hayo “iwhre uwou-udhu.”
^ Koyehọ, ọgọdọ nọ a rẹ jọ sẹro ame.
^ Koyehọ, ọgọdọ nọ a rẹ jọ sẹro ame.
^ Evaọ Hibru, “ọmọzae ọzae nọ ọ gudu gaga.”
^ Hayo “rroro iei.”
