Daniẹl 1:1-21
1 Evaọ ukpe avọ esa esuo Jehoyakim ovie+ Juda, Nebukadneza ovie Babilọn ọ tẹ wọ ze Jerusalẹm, o te koi họ.+
2 Nọ u te oke jọ, Jihova ọ tẹ rehọ Jehoyakim ovie Juda họ obọ riẹ,+ te ekwakwa uwou* Ọghẹnẹ uzẹme na jọ, ọ tẹ rehọ ae ziọ obọ ẹkwotọ Shaena,*+ ziọ uwou* ọghẹnẹ riẹ. O te fi ekwakwa na họ oria nọ a re fi ekwakwa-aghae ọghẹnẹ riẹ họ.+
3 Kẹsena ovie na ọ tẹ ta kẹ Ashpenaz, ọnọ o wuzou iruiruo ighẹ riẹ re ọ rehọ ahwo Izrẹl* na jọ ze, te enọ i no uyẹ ovie ze gbe enọ e rrọ emọ ikpahwo.+
4 A rẹ jọ izoge* nọ oware ovo o thọ evaọ oma rai hi, nọ i wo erru, nọ i wo areghẹ, eriariẹ, gbe orimuo,+ yọ a rẹ jọ enọ e rẹ sai ruiruo evaọ ighẹ ovie na. O re wuhrẹ ai oghẹrẹ nọ a re kere jẹ ta ẹvẹrẹ ahwo Kaldia.
5 U te no ere no, ovie na ọ fodẹ emu nọ a rẹ kẹ ae kẹdẹ kẹdẹ evaọ obọdẹ emu ovie na gbe enwaene nọ ọ rẹ da. A re wuhrẹ ai* evaọ ikpe esa, nọ ikpe esa na e tẹ gba no, a ve mu iruo họ eru kẹ ovie na.
6 Whaọ ahwo orua* Juda jọ a jọ usu rai: Daniẹl,*+ Hananaya,* Mishẹl,* gbe Azaraya.*+
7 Ọnọ o wuzou iruiruo ighẹ ovie na o te mu edẹ* kẹ ae; o se Daniẹl Bẹltẹshaza,+ o se Hananaya Shedrak, o se Mishẹl Mishak, o te se Azaraya Abẹdnigo.+
8 Rekọ Daniẹl ọ jọ udu riẹ gbaemu nọ ọ rẹ rehọ obọdẹ emu ovie na hayo enwaene nọ ọ rẹ da zue omariẹ hẹ. Fikiere ọ tẹ yare ọnọ o wuzou iruiruo ighẹ ovie na nọ ọ kẹe uvẹ re ọ gbẹ rehọ eware nana zue omariẹ hẹ.
9 Ọghẹnẹ uzẹme na o te ru re ọnọ o wuzou iruiruo ighẹ ovie na o dhesẹ aruoriwo* gbe ohrọ kẹ Daniẹl.+
10 Rekọ ọnọ o wuzou iruiruo ighẹ ovie na ọ tẹ ta kẹ Daniẹl nọ: “Ozọ olori mẹ ovie na u bi mu omẹ, ọnọ ọ fodẹ emu gbe udi nọ a rẹ kẹ owhai. Kọ ẹvẹ o te jọ otẹrọnọ ọ ruẹ nọ oma rai u yoma vi izoge* edekọ nọ wha gbẹ rrọ otu? Wha ti ru omẹ* reabe evaọ aro ovie na.”
11 Rekọ Daniẹl ọ tẹ ta kẹ ohwo nọ ọ be rẹrote ai na, ọnọ ohwo nọ o wuzou iruiruo ighẹ ovie na o ro mu nọ ọ rẹrote Daniẹl, Hananaya, Mishẹl, gbe Azaraya na, inọ:
12 “Ivie, dawo idibo ra evaọ edẹ ikpe, jọ a kẹ omai ẹbe* nọ ma rẹ re gbe ame nọ ma rẹ da;
13 kẹsena whọ vẹ rọ oma mai wawo oma izoge* nọ e be re obọdẹ emu ovie na, whọ vẹ rọ oghẹrẹ nọ oma mai o rrọ rọ jiroro oware nọ who re ru idibo ra.”
14 Fikiere ọ tẹ rọwo fihọ oware nọ a yare na, ọ tẹ dawo ae edẹ ikpe.
15 Nọ edẹ ikpe na e gba no, oma rai u woma jẹ poriẹ* vi izoge* kpobi nọ e jẹ re obọdẹ emu ovie na.
16 Fikiere ọnọ ọ jẹ rẹrote ae na ọ rẹ wọ obọdẹ emu gbe enwaene nọ a jẹ kẹ ae na vrẹ, ọ vẹ kẹ ae ẹbe.
17 Ọghẹnẹ uzẹme na ọ kẹ izoge* ene nana eriariẹ gbe otoriẹ udidi evaọ oware kpobi nọ a kere, jegbe areghẹ; yọ ọ kẹ Daniẹl ẹgba nọ o re ro wo otoriẹ oghẹrẹ eruẹaruẹ gbe ewezẹ kpobi.+
18 Nọ oke nọ ovie na o fihọ nọ a rẹ rọ rehọ ae ze u te no,+ ọnọ o wuzou ighẹ ovie na ọ tẹ rehọ ae ziọ aro Nebukadneza.
19 Okenọ ovie na o je lele ae ta ẹme, a ruẹ ohwo ọvo evaọ usu rai na nọ ọ jọ wọhọ Daniẹl, Hananaya, Mishẹl, gbe Azaraya+ ha; a tẹ gbẹ jọ etẹe re a ruiruo evaọ aro ovie na.
20 Evaọ ẹme kpobi nọ o gwọlọ areghẹ gbe otoriẹ nọ ovie na ọ rẹ nọ ae, ọ ruẹ nọ a rehọ isia ikpe woma vi izerẹ nọ i re ru emajiki gbe ebo-erayẹ+ kpobi nọ e rrọ ubrotọ esuo riẹ soso.
21 Daniẹl ọ tẹ jọ etẹe bọo ukpe ọsosuọ Sairọs ovie+ na.
Eme-Obotọ
^ Hayo “etẹmpol.”
^ Koyehọ, Babilonia.
^ Hayo “etẹmpol.”
^ Evaọ Hibru, “emezae Izrẹl.”
^ Evaọ Hibru, “emọ.”
^ Hayo o sae jọ nọ, “A rẹ kuọ ae.”
^ O sae jọ nọ otofa riẹ họ “Ono Ọ Wọhọ Ọghẹnẹ?”
^ Otofa riẹ họ “Jihova O Fiobọhọ No.”
^ Otofa riẹ họ “Jihova O Dhesẹ Aruoriwo No.”
^ Evaọ Hibru, “emezae.”
^ Otofa riẹ họ “Ọghẹnẹ Họ Obruoziẹ Mẹ.”
^ Koyehọ, edẹ ahwo Babilọn.
^ Hayo “uwowou.”
^ Evaọ Hibru, “uzou mẹ.”
^ Evaọ Hibru, “emọ.”
^ O sae jọ nọ ẹme Hibru na o be ta kpahe ibi-ire gbe ekakọ nọ i re wo ibi.
^ Evaọ Hibru, “emọ.”
^ Evaọ Hibru, “je wo iwhri uwo-oma.”
^ Evaọ Hibru, “emọ.”
^ Evaọ Hibru, “emọ.”