Ro Se Filimọn 1:1-25
1 Mẹ Pọl, ọnọ ọ rrọ uwou-odi+ fiki Kristi Jesu, gbe Timoti+ oniọvo mai, ro se Filimọn ibe oruiruo oyoyou mai,
2 gbe Afia oniọvo-ọmọtẹ mai, gbe Akipọs+ ibe osoja mai, gbe ukoko nọ o rrọ uwou ra:+
3 Jọ Ọghẹnẹ Ọsẹ mai gbe Olori na Jesu Kristi a dhesẹ uwowou ulogbo kẹ owhai jẹ kẹ owhai udhedhẹ.
4 Me re yere Ọghẹnẹ mẹ ẹsikpobi nọ mẹ tẹ be fodẹ owhẹ evaọ elẹ mẹ,+
5 nọ mẹ be hae yo kpahe ẹrọwọ ra gbe uyoyou nọ who wo kẹ* Olori na Jesu gbe erẹri na kpobi.
6 Mẹ be lẹ nọ ẹrọwọ nọ who bi dhesẹ na u ru owhẹ jẹ eware iwoma kpobi nọ ma rọ ẹkwoma Kristi wo rehọ.
7 Keme me wo oghọghọ gbe omosasọ gaga nọ me yo kpahe uyoyou ra, yọ udu erẹri na u bi wo omosasọ* fiki ra, oniọvo.
8 Fiki ugogo ẹjiroro nana, dede nọ me wo udu wọhọ ukọ Kristi nọ mẹ sae rọ ta oware nọ u fo nọ who re ru kẹ owhẹ,
9 mẹ be lẹ owhẹ fiki uyoyou, keme whọ riẹ nọ mẹ Pọl mẹ kpako no, ẹhẹ, mẹ tẹ jẹ rrọ uwou-odi enẹna fiki Kristi Jesu.
10 Mẹ be lẹ owhẹ kẹ ọmọ mẹ, Onẹsimọs,+ ọnọ me zihe ruọ ọsẹ kẹ+ evaọ uwou-odi.*
11 Evaọ oke ọsosuọ, o wo iruo kẹ owhẹ hẹ, rekọ enẹna o wo iruo kẹ owhẹ gbe omẹ.
12 Me bi vi ei zihe bru owhẹ ze, ẹhẹ, ọnọ me you gaga* na.
13 Mẹ hae gwọlọ nọ ọ gbẹ jọ obonẹ kugbe omẹ re ọ gbodibo nọ whọ hae gba kẹ omẹ evaọ uwou-odi nọ mẹ rrọ fiki usi uwoma na.+
14 Rekọ mẹ gwọlọ ru oware ovo ababọ ra nọ ọ rẹ rọwo fihọ iẹe he, re oware uwoma nọ who bi ru o gbẹ jọ orọ ọgbahọ họ, rekọ onọ u no owhẹ eva ze.+
15 Ẹsejọhọ fiki onana ọ rọ dhẹ evaọ ubroke na,* re whọ ruẹsi woi zihe bẹdẹ bẹdẹ,
16 orọnikọ wọhọ ọrigbo ho,+ rekọ ọnọ o vi ọrigbo, wọhọ oniọvo oyoyou,+ maero rọkẹ omẹ, rekọ o tubẹ mae rrọ ere kẹ owhẹ keme ọ rrọ ohwo uwou ra* gbe oniọvo evaọ Olori na.
17 Fikiere, otẹrọnọ whọ rehọ omẹ nọ mẹ ogbẹnyusu ra,* dede iei rehọ sasasa epanọ whọ hai dede omẹ rehọ.
18 U te no ere no, otẹrọnọ o ru owhẹ oware jọ thọ hayo ọ reosa ra jọ, fi ei họ omẹ uzou.
19 Mẹ Pọl mẹ be rọ obọ mẹ kere onana: Mẹ te hwae zihe kẹ owhẹ—me bi du ta ha inọ whẹ omara dede whọ mae reosa mẹ.
20 Ẹhẹ, oniọvo, fi obọ nana họ kẹ omẹ fiki Olori na; ru udu mẹ sasa* nọ orọnọ whẹ yọ odibo Kristi na.
21 U mu omẹ ẹro nọ who ti ru epanọ mẹ ta na, fikiere me bi kere se owhẹ keme mẹ riẹ nọ who ti ru vi onọ mẹ ta na dede.
22 U te no ere no, ruẹrẹ oria fihọ nọ me ti wohọ, keme me bi rẹro nọ fiki elẹ rai, a ti siobọno omẹ zihe bru owhai ze.*+
23 Ẹpafras+ nọ ma gbẹ rrọ uwou-odi evaọ usu kugbe Kristi Jesu o bi yere owhẹ,
24 yọ Mak, Aristakọs,+ Dimas,+ gbe Luk,+ ibe iruiruo mẹ a bi yere owhẹ re.
25 Jọ Olori na Jesu Kristi o dhesẹ uwowou ulogbo riẹ kẹ owhai nọ wha bi dhesẹ emamọ ẹzi na.
Eme-Obotọ
^ Hayo “kpahe.”
^ Hayo “uyoyou erẹri na o be ga.”
^ Evaọ Griki, “ekarọ.”
^ Hayo “ọnọ me you no udu mẹ kpobi ze.”
^ Evaọ Griki, “evaọ auwa ọvo.”
^ Evaọ Griki, “kẹ owhẹ evaọ uwo.”
^ Evaọ Griki, “wọhọ ọnọ wha gbẹ be ghale.”
^ Hayo “ru uyoyou mẹ ga.”
^ Hayo “siobọno omẹ kẹ owhai.”
