Ibruoziẹ 20:1-48
-
A fi ahwo orua Bẹnjamin ẹmo (1-48)
20 Fikiere, ahwo Izrẹl kpobi nọ a rrọ Dan+ rite Biẹ-shiba a tẹ wọ ze, a te je no ẹkwotọ Giliad+ ze, ogbotu na soso a tẹ rọ eva evo kokohọ* aro Jihova evaọ Mizpa.+
2 Iletu ahwo na gbe erua Izrẹl kpobi a te dikihẹ ọvuọ oria riẹ evaọ udevie ukoko ahwo Ọghẹnẹ. Isoja owotọ nọ e wha egbọdọ i bu te idu egba ene (400,000).+
3 Ahwo orua Bẹnjamin a te yo nọ ezae Izrẹl a nya kpobọ Mizpa.
Kẹsena ezae Izrẹl a tẹ ta nọ: “Ta kẹ omai, ẹvẹ oware uyoma nana o rọ via?”+
4 Ohwo Livae na,+ koyehọ ọzae aye nọ a kpe na ọ tẹ kẹ ae uyo nọ: “Mẹ avọ ọse mẹ ma wẹriẹ Gibiah+ ọrọ Bẹnjamin re ma wezẹ etẹe asohẹrioke.
5 Ahwo nọ a be rria* Gibiah a tẹ wọ bru omẹ ze, a tẹ wariẹ uwou nọ mẹ jọ na họ evaọ aso. A jẹ gwọlọ nọ a re kpe omẹ no, rekọ a tẹ gba ọse mẹ du, o te whu.+
6 Mẹ tẹ rehọ ori ọse mẹ, mẹ tẹ vae ekekẹ, me te vi ekẹ na kpohọ abọ kpobi ọrọ ukuoriọ Izrẹl,+ keme a jọ Izrẹl ru oware omovuọ nọ o rẹ vuoma gaga.
7 Fikiere whai ahwo Izrẹl kpobi, wha jọ etenẹ ta oware nọ a re ru kpahe onana.”+
8 Kẹsena ahwo na kpobi a tẹ kpama ẹsiẹvo* a tẹ ta nọ: “Mai ọvuọvo o ti kpobọ uwou-udhu riẹ hayo zihe kpobọ uwou riẹ hẹ.
9 Enẹ ma ti ru Gibiah: Ma te ma ẹta re ma salọ ahwo nọ a te nyae họre iẹe.+
10 Ma te jọ erua Izrẹl kpobi rehọ ezae ikpe evaọ udevie ezae udhusoi (100), gbe ezae udhusoi (100) evaọ udevie ezae odu ọvo (1,000), gbe ezae odu ọvo (1,000) evaọ udevie ezae idu ikpe (10,000) re a koko emu họ kẹ ogbaẹmo na, re ogbaẹmo na o wọ ohọre bru Gibiah ọrọ Bẹnjamin, fiki oware omovuọ nọ a ru evaọ Izrẹl na.”
11 Ere ezae Izrẹl kpobi a ro kuomagbe* re a wọ ohọre bru okpẹwho na.
12 Kẹsena erua Izrẹl i te vi ezae bru ahwo orua Bẹnjamin soso, inọ: “Nọ ekpehre oware vẹ o jọ udevie rai via na?
13 Wha rehọ ezae Gibiah nọ i fioka ha na ze,+ re ma kpe ai no je voro oware uyoma no Izrẹl.”+ Rekọ ahwo orua Bẹnjamin a rọwo kezọ kẹ ahwo Izrẹl, imoni rai hi.
14 Kẹsena ahwo orua Bẹnjamin a te kokohọ no ikpewho na ze kpohọ Gibiah re a lele ezae Izrẹl fi ẹmo.
15 Evaọ ẹdẹ yena, ahwo orua Bẹnjamin a tẹ jọ ikpewho rai koko ezae idu udhegbezeza (26,000) họ, enọ e wha egbọdọ, u te no ezae Gibiah egba ihrẹ (700) nọ e riẹ ẹmo efi ziezi no.
16 Ezae egba ihrẹ (700) nọ e riẹ ẹmo efi ziezi nọ e kpẹlobọ e jọ usu ogbaẹmo na. Ezae nana kpobi e rẹ sai fi ubiutho họ udeme veghe ro fi ubioto, yọ a re fi thọ họ.
17 Ahwo Izrẹl a te koko ezae idu egba ene (400,000) họ, enọ e wha egbọdọ,+ aikpobi yọ egbaẹmo nọ e riẹ ẹmo efi ziezi, rekọ ahwo orua Bẹnjamin a jọ usu ahwo na ha.
18 A tẹ wọ, a tẹ nya kpobọ Bẹtẹl re a nekpẹ mi Ọghẹnẹ.+ Ahwo Izrẹl a tẹ nọ nọ: “Ono evaọ usu mai ọ rẹ kobaro nyai lele ahwo orua Bẹnjamin fi ẹmo?” Jihova o te yo kẹ ai nọ: “Juda ọ rẹ kobaro.”
19 Nọ oyena o vrẹ no, ahwo Izrẹl a tẹ kpama evaọ ohiohiẹ, a tẹ fa evuẹ kẹle Gibiah re a họre iẹe.
20 Ezae Izrẹl e tẹ wọ lahwe re a lele ahwo orua Bẹnjamin fi ẹmo; a te dhe uhie ẹmo họ evaọ Gibiah re a họre ai.
21 Fikiere ahwo orua Bẹnjamin a tẹ wọ no Gibiah ze, a te kpe ezae Izrẹl idu udhegbivẹ (22,000) evaọ ẹdẹ yena.
22 Rekọ ogbaẹmo ahwo Izrẹl a te kru udu ga, a tẹ wariẹ dhe uhie ẹmo họ evaọ oria ovona wọhọ epanọ a ru ẹdẹ ọsosuọ na.
23 Kẹsena ahwo Izrẹl a tẹ nya kpobọ Bẹtẹl, a te muhọ ẹviẹ evaọ aro Jihova rite owọwọ, a tẹ nekpẹ mi Jihova nọ: “Kọ ma wariẹ nyai lele imoni mai, ahwo orua Bẹnjamin fi ẹmo?”+ Jihova ọ tẹ ta nọ: “Wha nyai lele ai fi ẹmo.”
24 Fikiere ahwo Izrẹl a tẹ wọ ẹmo bru ahwo orua Bẹnjamin evaọ ẹdẹ avọ ivẹ.
25 Ahwo orua Bẹnjamin omarai a tẹ wọ no Gibiah ze bru ai evaọ ẹdẹ avọ ivẹ na, a tẹ wariẹ kpe ahwo Izrẹl nọ a bu te idu ikpegberee (18,000),+ aikpobi yọ ahwo nọ a wha egbọdọ.
26 Fikiere ezae Izrẹl kpobi a te kpobọ Bẹtẹl. A tẹ keria aro Jihova be viẹ,+ yọ a siọ emuọriọ ba+ evaọ ẹdẹ yena rite owọwọ, a te je dhe idhe emahọ+ gbe idhe ọriẹyeri+ kẹ Jihova.
27 Nọ a ru ere no, ezae Izrẹl e tẹ nekpẹ mi Jihova,+ keme etẹe etehe ọvọ Ọghẹnẹ uzẹme na ọ jọ evaọ oke yena.
28 Whaọ, Finihas+ ọmọzae Ẹlieza, ọmọzae Erọn ọ jẹ gbodibo* evaọ aro etehe ọvọ na evaọ oke yena. A tẹ nọ nọ: “Kọ ma wariẹ nyai lele imoni mai, ahwo orua Bẹnjamin fi ẹmo, manikọ ma seba?”+ Jihova ọ tẹ kẹ uyo nọ: “Wha nya, keme mẹ te rehọ ai họ obọ rai odẹnotha.”
29 Kẹsena ahwo Izrẹl a te vi ahwo nyai dhere+ wariẹ Gibiah họ.
30 Ahwo Izrẹl na a tẹ wọ ẹmo bru ahwo orua Bẹnjamin evaọ ẹdẹ avọ esa, a te dhe uhie ẹmo họ re a họre Gibiah wọhọ epanọ a be hai ru vẹre.+
31 Nọ ahwo orua Bẹnjamin a wọ bru ogbaẹmo na, egbaẹmo na e tẹ bẹbẹ ai no okpẹwho na.+ Kẹsena ahwo orua Bẹnjamin a te mu ai họ ẹhọre wọhọ epanọ a be hai ru vẹre, a te kpe ezae rai jọ evaọ idhere ilogbo na, edhere jọ o kpobọ Bẹtẹl, ọdekọ o te kpobọ Gibiah, enwenọ ezae Izrẹl ọgba a kpe fihọ otọ evaọ eria yena.+
32 Fikiere ahwo orua Bẹnjamin na a tẹ ta nọ: “Ma bi fi ae kparobọ wọhọ epaọ anwẹdẹ.”+ Rekọ ahwo Izrẹl a ta nọ: “Ma te dhẹ kẹ ae, ma vẹ bẹbẹ ai no okpẹwho na ruọ idhere ilogbo na.”
33 Fikiere ezae Izrẹl kpobi a tẹ kpama no eria nọ a rrọ ze, a te dhe uhie ẹmo họ evaọ Bale-tama, ahwo Izrẹl nọ a dhere kẹle Gibiah na a tẹ họrọ no eria nọ a dhere ze.
34 Ezae idu ikpe (10,000) ahwo Izrẹl nọ e riẹ ẹmo efi ziezi e tẹ ziọ aro Gibiah, ẹmo na ọ tẹ jọ gaga. Rekọ ahwo orua Bẹnjamin a riẹ nọ okpẹtu o te rai oma no ho.
35 Jihova o te fi Bẹnjamin kparobọ+ kẹ Izrẹl, evaọ ẹdẹ yena ahwo Izrẹl a te kpe ezae Bẹnjamin nọ i bu te idu udhegbisoi gbe ẹgba ọvo (25,100), aikpobi yọ ahwo nọ a wha egbọdọ.+
36 Rekọ, ahwo orua Bẹnjamin a je roro nọ a ti fi ezae Izrẹl kparobọ okenọ a jẹ dhẹ kẹ ai na,+ rekọ a jẹ dhẹ keme a rẹroso ahwo nọ a dhere wariẹ Gibiah họ na.+
37 Ahwo nọ a dhere na a tẹ kpama vẹrẹ vẹrẹ, a tẹ họrọ ruọ Gibiah. A tẹ vaha ruọ okpẹwho na, a tẹ rehọ ọgbọdọ kpe ahwo na kpobi no.
38 Whaọ ezae Izrẹl e ta fihọ no inọ ezae nọ i dhere wariẹ okpẹwho na họ na a re ru iwiri kuye kpehru evaọ etẹe rọ kẹ ae oka.
39 Nọ ahwo Izrẹl a kuomarẹriẹ jẹ dhẹ evaọ ẹmo na, ezae Bẹnjamin a te mu ai họ ẹhọre, a te kpe enwenọ ezae Izrẹl ọgba,+ a tẹ ta nọ: “Ma je mu ai họ efikparobọ no nwane wọhọ epanọ o jọ evaọ ẹmo nọ ọ vrẹ na.”+
40 Rekọ iwiri nọ a ta nọ a te rọ kẹ ae oka na i te muhọ ekuye kpehru dududu evaọ okpẹwho na. Nọ ezae Bẹnjamin a kuomarẹriẹ re a rri oware nọ o be via, a tẹ ruẹ iwiri nọ i bi kuye kpehru evaọ okpẹwho na soso.
41 Kẹsena ezae Izrẹl i te kuomarẹriẹ ẹsiẹvo, ozọ u te mu ezae Bẹnjamin keme a ruẹ nọ okpẹtu o te rai oma no.
42 Fikiere a tẹ dhẹ fiki ezae Izrẹl na rọ ovao rri ofẹ udhude na, rekọ egbaẹmo na e tẹ rọ tua ae, enọ i bi no ikpewho na ze a te kuomagbe ai bi kpe ai.
43 A te ko ahwo orua Bẹnjamin na họ je le ai ababọ eriosehọ. A te le ai mu evaọ aro Gibiah evaọ ofẹ ovatha-ọre.
44 Ukuhọ riẹ, a te kpe ezae Bẹnjamin nọ i bu te idu ikpegberee (18,000), aikpobi yọ egbaẹmo egaga.+
45 Ezae Bẹnjamin a te kuomarẹriẹ, a tẹ dhẹ kpobọ udhude na kpohọ ugbehru-utho Rimọn,+ ahwo Izrẹl a tẹ jọ idhere ilogbo na kpe* ahwo idu isoi (5,000) evaọ usu rai, a te gbe je le ai rite ugbo obọ Gaedọm; a te kpe ezae idu ivẹ (2,000) efa.
46 Ahwo orua Bẹnjamin kpobi nọ a whu evaọ ẹdẹ yena a bu te idu udhegbisoi (25,000), ezae nọ e wha egbọdọ,+ aikpobi yọ egbaẹmo egaga.
47 Rekọ ezae egba ezeza (600) e tẹ dhẹ kpobọ udhude na kpohọ ugbehru-utho Rimọn, a tẹ jọ ugbehru-utho Rimọn na emerae ene.
48 Ezae Izrẹl i te kuomarẹriẹ bru ahwo orua Bẹnjamin, a tẹ rọ ọgbọdọ kpe enọ e be rria okpẹwho na, te ahwo te erao nọ i kiọkọ kpobi. A te je tu erae họ ikpewho kpobi nọ a nyate.
Eme-Obotọ
^ Evaọ Hibru, “a te kokohọ wọhọ omọvo evaọ.”
^ Hayo o sae jọ nọ, “Enọ i wo otọ.”
^ Evaọ Hibru, “wọhọ omọvo.”
^ Evaọ Hibru, “kokohọ wọhọ omọvo.”
^ Evaọ Hibru, “o je dikihẹ.”
^ Evaọ Hibru, “si isogẹ.”
