Ibruoziẹ 21:1-25
-
A ru epanọ orua Bẹnjamin o gbe ro voro no otọ họ (1-25)
21 Whaọ ezae Izrẹl a jọ Mizpa+ duwu iyei nọ: “Mai ọvuọvo ọ rẹ rehọ ọmọtẹ riẹ kẹ ọzae nọ o no orua Bẹnjamin ze re ọ jọ aye riẹ hẹ.”+
2 Fikiere, ahwo na a te kpobọ Bẹtẹl+ a tẹ keria etẹe evaọ aro Ọghẹnẹ uzẹme na rite owọwọ, yọ a bi bo je bi kuenu oviẹ.
3 Yọ a be ta nọ: “O Jihova, Ọghẹnẹ Izrẹl, fikieme oware utiona o rọ via evaọ Izrẹl? Fikieme orua ovo jọ u re ro vru no Izrẹl nẹnẹ?”
4 Okiokiọ riẹ ahwo na a tẹ kpama evaọ irioke, a tẹ bọ agbada-idhe fihọ etẹe re a dhe idhe emahọ avọ idhe ọriẹyeri.+
5 Kẹsena ahwo Izrẹl a tẹ ta nọ: “Orua vẹ evaọ usu erua Izrẹl kpobi ọ nyaze ti kokohọ aro Jihova ha?” keme a duwu iyei egaga inọ ohwo kpobi nọ ọ nyaze aro Jihova evaọ Mizpa ha, a te se iẹe ba ekpe no ho.
6 Ahwo Izrẹl a te je weri fiki oware nọ o via kẹ Bẹnjamin, oniọvo rai na. A ta nọ: “A bru orua jọ kufiẹ no Izrẹl no nẹnẹ na.
7 Eme ma re ru re ma wo eyae kẹ ezae nọ i kiọkọ na, nọ orọnọ ma jọ aro Jihova duwu iyei+ nọ ma rẹ jọ usu emetẹ mai kẹ ae ọmọtẹ ọvo re ọ jọ aye rai hi na?”+
8 A tẹ nọ nọ: “Orua vẹ evaọ usu erua Izrẹl o nyaze aro Jihova evaọ Mizpa ha?”+ A tẹ ruẹ nọ ohwo ọvo o no Jebẹsh-giliad ziọ evuẹ nọ ogbotu na o kokohọ na ha.
9 Nọ a kele ahwo na, a tẹ ruẹ nọ uvumọ ohwo evaọ ahwo nọ a be rria Jebẹsh-giliad ọ rrọ etẹe he.
10 Fikiere ahwo Izrẹl a te vi ezae idu ikpegbivẹ (12,000) nọ e mae goma kpohọ obei. A jie uzi kẹ ae nọ: “Wha nya, re wha rọ ọgbọdọ kpe ahwo nọ a be rria Jebẹsh-giliad, makọ te eyae te emọ dede.+
11 Enẹ wha re ru: Wha re kpe ọzae kpobi gbe aye kpobi nọ o lele ọzae wezẹ no.”
12 A tẹ jọ udevie ahwo nọ a be rria Jebẹsh-giliad ruẹ emetẹ-kọkọ egba ene (400), enọ i ri lele ọzae wezẹ ẹdẹvo ho. A tẹ rehọ ae ziọ evuẹ nọ ọ jọ Shailo na,+ onọ o rrọ ẹkwotọ Kenan.
13 Kẹsena ogbotu na soso o te vi uwou se ahwo orua Bẹnjamin nọ a jọ ugbehru-utho Rimọn na,+ a tẹ vuẹ ae nọ a gwọlọ ru udhedhẹ kugbe ae.
14 Fikiere ahwo orua Bẹnjamin a te zihe ze oke yena. A tẹ rehọ emetẹ nọ a kpe he evaọ usu eyae Jebẹsh-giliad+ na kẹ ae, rekọ emetẹ na i te rai kpobi hi.
15 Ahwo na a te je weri fiki oware nọ o via kẹ Bẹnjamin na,+ keme Jihova ọ hẹriẹ e riẹ no erua Izrẹl edekọ no.
16 Ekpako ogbotu ahwo Izrẹl na a tẹ ta nọ: “Eme ma re ru re ma wo eyae kẹ ezae nọ i kiọkọ na, nọ orọnọ a kpe eyae nọ e jọ Bẹnjamin kpobi no na?”
17 Ahwo na a tẹ kẹ uyo nọ: “U fo re ahwo orua Bẹnjamin nọ a zọ na a gbe wo ukuoriọ, re orua jọ u gbe voro no Izrẹl he.
18 Rekọ a kẹ omai uvẹ re ma rehọ emetẹ mai kẹ ae re e jọ eyae rai hi, keme ahwo Izrẹl a duwu iyei nọ: ‘Uye u re te ohwo nọ ọ kẹ ahwo orua Bẹnjamin aye.’”+
19 Kẹsena a tẹ ta nọ: “Whaọ, a be hai ru ehaa kẹ Jihova kukpe kukpe evaọ Shailo,+ onọ o rrọ ẹkpẹlobọ ovatha-ọre Bẹtẹl gbe ofẹ ovatha-ọre edhere ologbo nọ o no Bẹtẹl kpohọ Shẹkẹm, jẹ rrọ obọze ovatha-ọre Lẹbona.”
20 Fikiere a tẹ ta kẹ ezae Bẹnjamin na nọ: “Wha nya re wha dhere egbọ evaene na.
21 Nọ wha tẹ ruẹ emetẹ Shailo nọ e nya lahwe re a gbile rai nọ a re dikihẹ wariẹ họ gbe na, wha ve no egbọ evaene na ze re wha jọ usu emetẹ Shailo na mu aye rehọ, wha ve zihe kpohọ ẹkwotọ Bẹnjamin.
22 Yọ otẹrọnọ esẹ rai hayo inievo-emezae rai a wọ ẹwhọ bru omai ze, ma te ta kẹ ae nọ, ‘Wha rri omai aro fiki rai, keme ma sae jọ ẹmo mu eyae kẹ aikpobi hi,+ yọ whai ọvo wha tẹ rehọ emetẹ rai kẹ ae, yọ wha reabe no.’”+
23 Fikiere ezae Bẹnjamin na i te ru ere, a tẹ jọ usu emetẹ nọ i je gbile na mu ọvuọ aye riẹ kpo. Kẹsena a te zihe kpobọ ẹkwotọ ukuoriọ rai, a tẹ wariẹ bọ ikpewho rai+ je mu ae họ ẹria.
24 Ahwo Izrẹl a te no etẹe evaọ oke yena, omomọvo o te kpohọ ọvuọ orua riẹ gbe unuwou riẹ, a te no etẹe, a te kpohọ ọvuọ ukuoriọ riẹ.
25 Evaọ edẹ yena, ovie ọ jọ Izrẹl he.+ Ohwo kpobi o je ru oware nọ u kiehọ evaọ aro obọriẹ.*
Eme-Obotọ
^ Hayo “oware nọ o roro nọ u kiehọ.”
