Iziewariẹ 32:1-52
32 “Wha gaviezọ, O idhiwu, re mẹ ta ẹme,Jọ otọakpọ na u yo eme nọ i bi no unu mẹ ze.
2 Ehrẹ* mẹ i ti kie ze wọhọ oso;Eme mẹ i ti kie wọhọ igrigri,Wọhọ oso nọ o bi yoyo ku ẹbeJẹ wọhọ oso nọ o bi hwẹ ku ẹbe.
3 Keme me ti whowho odẹ Jihova.+
Wha ta kpahe oruaro Ọghẹnẹ mai!+
4 Utho na, iruo riẹ e rrọ gbagba,+Keme o re bru uvioziẹ evaọ oware kpobi.+
Ọghẹnẹ ọtẹruo,+ nọ o re kienyẹ ohwo vievie he;+O kiẹrẹe jẹ gbakiete.+
5 Ae họ ahwo nọ a ru umuomu.+
A rrọ emọ riẹ hẹ, ẹthọthọ na obọ rai u no ze.+
Oge omuomu nọ ọ vọ avọ uzioraha a rrọ!+
6 Kọ enẹ wha re ru Jihova,+O ahwo ogheghẹ nọ a wo areghẹ hẹ?+
Kọ ogbẹrọnọ ọye họ Ọsẹ rai nọ o ru nọ wha rọ rrọ uzuazọ,+Ọnọ ọ ma owhai, nọ o ru owhai dikihẹ ga?
7 Wha kareghẹhọ oke nọ u kpemu;*Wha roro kpahe ikpe erọ ige nọ e vrẹ.
Nọ ọsẹ ra, ọ te vuẹ owhẹ;+Nọ ekpako ra, a ti gbe kẹ owhẹ.
8 Nọ Ọnọ Ọ Mai Kpehru na ọ kẹ erẹwho na ukuoriọ rai,+Nọ ọ hẹriẹ emezae Adamu* no ohwohwo,+O fi uwhru họ kẹ ahwo sa-sa+Wọhọ epanọ emezae Izrẹl a bu te.+
9 Keme ahwo Jihova họ ẹkẹ riẹ;+Jekọp họ ukuoriọ riẹ.+
10 Ọ ruẹ e riẹ evaọ ẹkwotọ udhude+Gbe eva udhude ufofe, nọ edo ozọ u bi jo do,+
Ọ jẹ nya wariẹe họ re ọ thọe, ọ rẹrotei,+Yọ ọ sẹro riẹ wọhọ ọmọ-ẹro riẹ.+
11 Nwane wọhọ epanọ ugo o re nuhu uwou riẹ,Ọ rẹ rra evaọ ehru emọ eboba na,Jẹ bẹre ibekpe riẹ, ọ vẹ wọ ae,Ọ vẹ rọ ibekpe riẹ wọ ae na,+
12 Jihova ọvo o je su ei;*+ọghẹnẹ orẹwho ọfa ọ jọ kugbei hi.+
13 O fiobọhọ kẹe dhẹ eria ikpehru otọakpọ na,+Nọ o soriẹ nọ ọ rọ re ekakọ otọ na.+
Ọ rehọ ọnyọ nọ o no ugbehru-utho ze rọ ko ẹe,Gbe ewhri nọ o no utho ọgaga ze,
14 Ebọta owa erao gbe ame-ivie uthuru erao,Kugbe igodẹ nọ e mai woma,*Gbe igbo Beshan, avọ ikri,Avọ iwhiti nọ e mai woma;*+Whọ tẹ da enwaene nọ a rehọ ame* ibi-ire ru.
15 Nọ Jẹshurọn* ọ rro fihọ fuẹfu no, o te thihi omẹ.
Whọ rro fihọ fuẹfu no, whọ rro fihọ gbẹkẹ gbẹkẹ no, who fu fihọ no.+
Fikiere ọ tẹ nyasiọ Ọghẹnẹ ba, ọnọ ọ ma riẹ,+O te rri Utho esiwo riẹ vo.
16 A rehọ eghẹnẹ erẹwho efa ru ei mu ofu ọgaga;+Yọ a jẹ rehọ eware etọtọ ru ei eva dha.+
17 A je dhe idhe kẹ idhivẹri viukpọ Ọghẹnẹ,+Rọkẹ eghẹnẹ nọ a riẹ hẹ,Ekpokpọ nọ e romavia obọ,Eghẹnẹ nọ esẹ-esẹ rai a riẹ hẹ.
18 Whọ kpairoro vrẹ Utho na,+ ọnọ ọ rrọ ọsẹ ra,Whọ kareghẹhọ Ọghẹnẹ nọ o yẹ owhẹ hẹ.+
19 Nọ Jihova ọ ruẹ onana, ọ tẹ siọ ae+Keme emezae riẹ gbe emetẹ riẹ a ru eva dhae.
20 Fikiere ọ tẹ ta nọ, ‘Mẹ te kuọ ovao mẹ dhere ae;+Mẹ te ruẹ epanọ uzuazọ rai u ti ro woma.
Keme oge omuomu a rrọ,+Emọ nọ a re fievahọ vievie he.*+
21 A rehọ oware nọ o rrọ ọghẹnẹ hẹ ru omẹ mu ofu ọgaga;*+A rehọ emedhọ rai nọ i fioka ha ru eva dha omẹ.+
Fikiere mẹ te rehọ ahwo nọ a fioka ha ru ae re ihri;+Mẹ te rehọ orẹwho ogheghẹ ru ai eva dha.+
22 Keme ofu mẹ o mi erae no+Onọ o te to te obọ otọ Uki,*+Yọ o te mahe otọakpọ na gbe eware nọ e riẹe eva noO te mahe otọhotọ igbehru na.
23 Me ti ru iye rai bu;Mẹ te sa ese mẹ kpobi fihọ ae oma.
24 Ohọo u ti kpe ai oma lọhọ+Ifiva egaga gbe ọraha ọgaga i ti kpe ai no.+
Me ti vi ibiakọ erao ijihẹ bru rai+Gbe obi erao nọ i re si hayo katiẹ evaọ ẹkpẹ.*
25 Evaọ obọ otafe, ọgbọdọ o ti kpe ai;+Evaọ uwou, idudu e te jarai oma+Te ọmọzae te ọmọtẹ-kọkọ,Te ọmọboba te ọkpọkuọzae.*+
26 Mẹ hae te ta nọ: “Mẹ te vaha ae;Me ti ru nọ ohwo ọvo ọ gbẹ te kareghẹhọ ae he,”
27 O gbẹ rrọ fiki ozọ oghẹrẹ nọ ewegrẹ na a te rehọ iẹe he,+Keme ewegrẹ na a ti wo otoriẹ riẹ thọ.+
A vẹ te ta nọ: “Ogaga mai ma ro fi kparobọ;+Orọnikọ Jihova o ru onana kpobi hi.”
28 Keme ae yọ orẹwho nọ o kare areghẹ,*A bi wo otoriẹ vievie he.+
29 Dodokọ a wo areghẹ!+ A hae ti roro didi kpahe onana.+
A hai ti roro kpahe oware nọ u ti no oware nọ a bi ru na ze.+
30 Ẹvẹ omọvo o re le ahwo odu ọvo (1,000),Ẹvẹ imava i re le ahwo idu ikpe (10,000)?+
O rẹ via ha ajokpanọ Utho rai ọ zẹ rai kẹ ae+Ajokpanọ Jihova ọ rehọ e rai kẹ ae.
31 Keme utho rai ọ wọhọ Utho mai hi,+Makọ ewegrẹ mai dede a vuhu onana mu.+
32 Keme evaene rai u no evaene Sọdọm zeJe no otọ Gomora ze.+
Ibi evaene rai yọ ibi nọ enua e rrọ,Ekru ibi rai e rrọ yayare.+
33 Obi eraomuomu họ enwaene rai,Obi oyoma orọ obi.
34 Kọ ogbẹrọnọ mẹ họ ọnọ ọ be sẹro* onana,Onọ mẹ kare* fihọ uwou nọ mẹ rẹ jọ sẹro eware?+
35 Orukele ọmẹ, mẹ te hwa zihe,+Evaọ ẹruoke* nọ awọ rai ọ te whra,+Keme ẹdẹ nọ okpẹtu o ti ro te ae ọ kẹle no,Yọ oware nọ o be hẹrẹ ai o te tha vẹrẹ vẹrẹ.’
36 Keme Jihova o ti bruoziẹ ahwo riẹ,+Ọ te re ohrọ* idibo riẹ+Nọ ọ tẹ ruẹ nọ ẹgba rai kpobi o re no,Gbe nọ iruori avọ enọ e ga ha ọvo i kiọkọ.
37 Kẹsena ọ vẹ te nọ ae nọ, ‘Eghẹnẹ rai a rrọ,+utho nọ a rẹroso inọ o te jọ oria adhẹzọ kẹ ae na,
38 Enọ e jẹ re iwhri idhe rai na,*Nọ e jẹ da enwaene idhe udi rai?+
Jọ a kpama re a fiobọhọ kẹ owhai.
Jọ a jọ oria adhẹzọ kẹ owhai.
39 Whaọ enẹna, rri, mẹ họ Ọghẹnẹ,*+Yọ ọghẹnẹ ọfa ọ rrọ họ u te no omẹ no.+
Me re kpe, je siwi ziọ uzuazọ.+
Mẹ rẹ nwa ahwo oma,+ je siwi kpo,+Yọ ohwo ọvo ọ sae thọ* ohwo no obọ mẹ hẹ.+
40 Keme mẹ kpare obọ mẹ kpobọ odhiwu,Me te duwu iyei nọ: “Nọ mẹ rrọ uzuazọ bẹdẹ bẹdẹ na,”+
41 Mẹ tẹ thọ ọgbọdọ mẹ nọ o bi lo nwranwranwra naJẹ ruẹrẹ oma* họ kẹ ẹdhoguo,+Me ti ru ewegrẹ mẹ kele+Jẹ hwosa kẹ enọ i mukpahe omẹ.
42 Me ti ru ese mẹ da azẹ bẹ,Yọ ọgbọdọ mẹ ọ te re uwoTe azẹ enọ a kpe gbe enọ a mu kpohọ igbo,Avọ izou isu ewegrẹ na.’
43 Whai erẹwho, wha ghọghọ kugbe ahwo riẹ,+Keme ọ te kioja azẹ idibo riẹ,+Yọ o ti ru ewegrẹ riẹ kele+O ve ti voro otọ ahwo riẹ.”*
44 Mosis ọ tẹ nyaze ọ tẹ wariẹ eme ole nana kpobi nọ ahwo na a yo,+ tei te Hoshia*+ ọmọzae Nọn.
45 Nọ Mosis o ku eme nana kpobi nọ ọ jẹ ta kẹ ahwo Izrẹl kpobi họ no,
46 ọ tẹ ta kẹ ae nọ: “Wha fi eme nana kpobi nọ mẹ rọ vẹvẹ owhai unu nẹnẹ na họ udu rai,+ re wha ruẹse ta* kẹ emezae rai re a romatotọ ru lele eme kpobi nọ e rrọ evaọ Uzi nana.+
47 Keme enana yọ eme evere kẹ owhai hi, eye uzuazọ rai o roma hwa,+ yọ eme nana nọ wha re ru lele wha sae rọ rria tọ evaọ ẹkwotọ nọ wha be fa Jọdan vrẹ nyae rehọ na.”
48 Jihova ọ tẹ ta kẹ Mosis evaọ ẹdẹdẹ yena nọ:
49 “Gadiẹ ugbehru orọ Abarim nana,+ Ugbehru Nibo,+ onọ o rrọ ẹkwotọ Moab, nọ o rẹriẹ ovao ku Jẹriko, re who rri ẹkwotọ Kenan na, onọ mẹ be rọ kẹ ahwo Izrẹl re a rọ reuku na.+
50 Kẹsena who ve ti whu evaọ ehru ugbehru nọ whọ be te gadiẹ na, a ve koko owhẹ họ bru ahwo ra,* nwane wọhọ epanọ Erọn oniọvo ra o whu evaọ Ugbehru Họr,+ nọ a je koko iei họ bru ahwo riẹ na,
51 keme whai imava wha ru oware nọ mẹ ta ha evaọ udevie ahwo Izrẹl, kpahe ame Mẹriba+ nọ ọ rrọ Kedẹsh evaọ udhude Zin, yọ wha kẹ omẹ orro* evaọ aro ahwo Izrẹl he.+
52 Ugbo whọ te jọ ruẹ ẹkwotọ na, rekọ whọ te ruọ eva ẹkwotọ nọ mẹ be rọ kẹ ahwo Izrẹl na ha.”+
Eme-Obotọ
^ Hayo “Iwuhrẹ.”
^ Hayo “edẹ nọ i kpemu.”
^ Hayo o sae jọ nọ, “uyẹ ohwo-akpọ.”
^ Koyehọ, Jekọp.
^ Evaọ Hibru, “iwhri igodẹ.”
^ Evaọ Hibru, “iwhri ibieku iwhiti.”
^ Evaọ Hibru, “azẹ.”
^ Otofa riẹ họ “Ọnọ O Kiete,” odẹ-ova ọghọ nọ a kẹ Izrẹl.
^ Hayo “i re dhesẹ ọtẹruo vievie he.”
^ Hayo “re ihri.”
^ Hayo “ovu.”
^ Hayo “ọzae nọ ọ dhẹ eza no.”
^ Hayo o sae jọ nọ, “a bi yo ohrẹ hẹ.”
^ Hayo “rawo.”
^ Hayo “za.”
^ Hayo “oke nọ a fihọ.”
^ Hayo “O te dae kẹ.”
^ Hayo “Enọ e jẹ re eware idhe rai nọ e mai woma.”
^ Hayo “mẹ họ ọye.”
^ Hayo “sai siwi.”
^ Hayo “obọ mẹ.”
^ Hayo “ru ẹkwotọ ahwo riẹ fo.”
^ Onana họ odẹ Joshua dẹẹ. Hoshia yọ ubro odẹ na Hoshaya, onọ otofa riẹ o rrọ “Ọnọ Jah O Siwi; Jah O Siwi No.”
^ Hayo “ruẹsi jie uzi.”
^ Onana nọ odẹme nọ a jẹ hae rọ ta kpahe uwhu.
^ Hayo “ru omẹ ọrẹri.”
