Izikiẹl 14:1-23
14 Ekpako Izrẹl jọ e tẹ nyaze, a tẹ keria aro mẹ.+
2 Kẹsena ẹme Jihova o te bru omẹ ze, inọ:
3 “Ọmọ ohwo, ezae nana e gba riẹ mu nọ a re lele emedhọ etọtọ* rai, a tẹ jẹ rehọ utho ezoruẹ nọ u re ru ahwo raha uzi vi no. Kọ mẹ rẹ kẹ ai uvẹ nekpẹ mi omẹ?+
4 Enẹna lele ae ta ẹme re whọ vuẹ ae nọ, ‘Enẹ Jihova Olori nọ Ọ Mai Kpehru na ọ ta: “Otẹrọnọ ohwo Izrẹl jọ ọ gba riẹ mu nọ o re lele emedhọ etọtọ riẹ jẹ rehọ utho ezoruẹ nọ u re ru ahwo raha uzi vi, kẹsena ọ jẹ nyaze te nekpẹ mi ọruẹaro jọ, mẹ Jihova, mẹ te kẹe uyo nọ u fo wọhọ epanọ emedhọ riẹ i bu te.
5 Keme me ti fi idudu họ udu ahwo uwou Izrẹl* fikinọ aikpobi a siomano omẹ no, a te bi lele emedhọ etọtọ rai.”’+
6 “Fikiere ta kẹ uwou Izrẹl nọ, ‘Enẹ Jihova Olori nọ Ọ Mai Kpehru na ọ ta: “Wha zihe ze, re wha nyasiọ emedhọ etọtọ rai ba je si ovao rai no iruẹru etọtọ rai kpobi.+
7 Keme otẹrọnọ ohwo Izrẹl jọ hayo ọrara nọ ọ be rria Izrẹl o te siomano omẹ jẹ gbaemu nọ o re lele emedhọ etọtọ riẹ, ọ jẹ rehọ utho ezoruẹ nọ u re ru ahwo raha uzi vi, kẹsena ọ jẹ nyaze te nekpẹ mi ọruẹaro mẹ,+ mẹ Jihova ọvo mẹ te kẹe uyo.
8 Mẹ te rẹriẹ ovao mẹ ku ohwo yena, me ve ti ru ei re ọ jọ oka unuovẹvẹ gbe odẹme nọ a re ro bru ohare. Yọ me ti voro ei no udevie ahwo mẹ;+ wha vẹ te riẹ nọ mẹ họ Jihova.”’
9 “‘Rekọ otẹrọnọ a viẹ ọruẹaro na họ, ọ jẹ kẹ uyo, mẹ Jihova họ ọnọ ọ viẹ ọruẹaro yena họ na.+ Mẹ vẹ te rriẹ obọ mẹ rọsuọ ẹe, me ve kpei no udevie ahwo mẹ, Izrẹl.
10 Abe-ọriọ rai ọ vẹ te jọ uzou rai; abe-ọriọ ọnọ ọ nyaze te nekpẹ na avọ abe-ọriọ ọruẹaro na ọ te jọ epọvo na,
11 re uwou Izrẹl o siọ omẹ ba eghoro seba jẹ siọ oma rai ba ezue fiki izieraha rai kpobi. A vẹ te jọ ahwo mẹ, mẹ vẹ te jọ Ọghẹnẹ rai,’+ ere Jihova Olori nọ Ọ Mai Kpehru na ọ ta.”
12 Ẹme Jihova ọ tẹ wariẹ bru omẹ ze, inọ:
13 “Ọmọ ohwo, otẹrọnọ orẹwho jọ o nyasiọ omẹ ba jẹ rọ ere raha uzi mẹ, mẹ te rriẹ obọ mẹ rọsuọ ẹe, mẹ vẹ raha oria nọ emu riẹ o bi no ze,*+ me ve ti ru re ohọo o jariẹ mu,+ me ve je kpe te ohwo te arao noi no.”+
14 “‘O tẹ make rọnọ ezae esa nana—Noa,+ Daniẹl,+ gbe Job+—e rrọ eva riẹ dede, omobọ rai ọvo a te sai siwi fiki ẹrẹreokie rai,’+ ere Jihova Olori nọ Ọ Mai Kpehru na ọ ta.”
15 “‘Hayo otẹrọnọ me ru erao ijihẹ nyaruọ eva ẹkwotọ na, i je ru nọ ahwo a gbẹ rrọ eva riẹ hẹ,* i je ru ei zihe ruọ otọ nọ o raha no nọ ohwo ọvo ọ be nyavrẹ hẹ fiki erao ijihẹ na.+
16 Nọ mẹ rrọ uzuazọ na,’ ere Jihova Olori nọ Ọ Mai Kpehru na ọ ta, ‘o tẹ make rọnọ ezae esa nana e rrọ eva riẹ dede, a te sai siwi emezae rai hayo emetẹ rai hi; omobọ rai ọvo a te sai siwi, yọ ẹkwotọ na o ti zihe ruọ ofofe.’”
17 “‘Hayo otẹrọnọ mẹ rọ ọgbọdọ ze rọsuọ ẹkwotọ yena,+ mẹ tẹ ta nọ: “Jọ ọgbọdọ ọ nyaruọ ẹkwotọ na,” re o kpe te ohwo te arao nọ ọ rrọ eva riẹ no,+
18 o tẹ make rọnọ ezae esa nana e rrọ eva riẹ dede, nọ mẹ rrọ uzuazọ na,’ ere Jihova Olori nọ Ọ Mai Kpehru na ọ ta, ‘a te sai siwi emezae rai hayo emetẹ rai hi; omobọ rai ọvo a te sai siwi.’”
19 “‘Hayo otẹrọnọ me vi okpẹyao nọ o re vo fihọ ẹkwotọ yena+ je ku ofu mẹ ku ei ẹkwoma azẹ-okpe re me kpe te ohwo te arao noi,
20 o tẹ make rọnọ Noa,+ Daniẹl,+ gbe Job+ a rrọ eva riẹ dede, nọ mẹ rrọ uzuazọ na,’ ere Jihova Olori nọ Ọ Mai Kpehru na ọ ta, ‘a te sai siwi emezae rai hayo emetẹ rai hi; omobọ rai ọvo a te sai siwi fiki ẹrẹreokie rai.’”+
21 “Fikiere enẹ Jihova Olori nọ Ọ Mai Kpehru na ọ ta: ‘Ere o te via okenọ me ti vi iye ene mẹ ze*+—ọgbọdọ, ohọo nọ u ti mu, erao ijihẹ, gbe okpẹyao nọ o re vo+—rọsuọ Jerusalẹm re me kpe te ohwo te arao noi no.+
22 Rekọ, ahwo jọ nọ a kiọkọ eva riẹ a te vabọ, a vẹ te rehọ ae lahwe,+ te emezae te emetẹ. A be nyabru owhai ze, yọ okenọ wha te ruẹ idhere rai avọ iruẹru rai, oma o te ginẹ sasa owhai inọ okpẹtu nọ me ro te Jerusalẹm, koyehọ oware kpobi nọ me ru rie u fo.’”
23 “‘A te sasa owhai oma nọ wha te ruẹ idhere rai avọ iruẹru rai, yọ wha te riẹ nọ gheghe me ro ru ai oware nọ me ru rai na ha,’+ ere Jihova Olori nọ Ọ Mai Kpehru na ọ ta.”
Eme-Obotọ
^ Ẹme Hibru nọ a fa “emedhọ etọtọ” na avọ ẹme nọ a fa “isọ arao” e rẹ sai wo otofa ovona, yọ a rẹ rehọ iẹe ta kpahe oware nọ u fioka ha.
^ Evaọ Hibru, “mẹ te zaza abọ mu uwou Izrẹl evaọ udu rai.”
^ Evaọ Hibru, “me ve wiri ekpọ ebrẹdi riẹ no.” O sae jọ nọ o be ta kpahe ekpọ nọ a rẹ rọ sẹro ebrẹdi.
^ Hayo “kpe emọ nọ e rrọ eva riẹ no.”
^ Hayo “eware iyoma ene nọ me ro bruoziẹ kpei ze.”
