Izikiẹl 24:1-27
24 Ẹme Jihova ọ tẹ wariẹ bru omẹ ze evaọ ukpe avọ izii, evaọ amara avọ ikpe, evaọ ẹdẹ avọ ikpe amara na, inọ:
2 “Ọmọ ohwo, kere ẹdẹ nana* fihọ otọ, uzedhe ẹdẹ inẹnẹ na. Ovie Babilọn o mu Jerusalẹm họ ẹhọre no evaọ uzedhe ẹdẹ inẹnẹ na.+
3 Bru ohare jọ kpahe uwou ọwọsuọ na, whọ rẹ ta kpahe ae nọ:
“‘Enẹ Jihova Olori nọ Ọ Mai Kpehru na ọ ta:
“Rehọ uwho* na there; wọe fihọ erae na re who ku ame họ eva riẹ.+
4 Fi ekẹ erao họ eva riẹ,+ emamọ ẹkẹ kpobi,Ekpokpowọ na avọ obọ* na; kwa igbenwa nọ e mai woma vọe.
5 Rehọ ogodẹ nọ ọ mai woma evaọ uthuru na+ re who koko ite-ire họ otọ uwho na wariẹ họ.
There ekẹ erao na re whọ jọ eva riẹ there igbenwa na.”’
6 “Fikiere enẹ Jihova Olori nọ Ọ Mai Kpehru na ọ ta:
‘Uye u te okpẹwho azẹ-okpe na,+ uwho nọ u mu ekagba na, onọ a ri si ekagba riẹ no ho na!
Tọlọ ekẹ erao na kpobi noi ọvuọvo;+ whọ rẹ ma ẹta fiki rai hi.
7 Keme azẹ riẹ ọ rrọ udevie riẹ;+ o ku rie fihọ ehru utho uriorio na.
O ku rie fihọ otọ họ, re o nwo ẹkpẹ ruru iei.+
8 Re ofu orukele mẹ ọ wọ ze,Me fi azẹ riẹ họ ehru utho uriorio nọ u bi lo naRe a se iẹe ba eruru.’+
9 “Fikiere enẹ Jihova Olori nọ Ọ Mai Kpehru na ọ ta:
‘Uye u te okpẹwho azẹ-okpe na!+
Mẹ te kwa ire na fihọ ehru ohwohwo kpekpehru.
10 Kwa ite-ire na kuku re who koko erae na họ,There uwo arao na ziezi, ku izuwo na no re whọ kẹ igbenwa na uvẹ to no zẹghẹ zẹghẹ.
11 Wọ uwho ufofe na fihọ ehru iwowo-erae re o rrorroRe ekọpa nọ a ro ru ei na e ware nwenwenwe.
Egbegbe riẹ ọ te ghra no oma riẹ,+ ekagba riẹ e vẹ te ghra no.
12 U re dhe ohwo ofu, o tẹ jẹ rrọ bẹbẹ,Keme ekagba egaga na e te kpare no ho.+
Gbolo iei fihọ erae avọ ekagba riẹ na!’
13 “‘Uruemu otọtọ ra o wha egbegbe ra ze.+ Mẹ daoma re me ru owhẹ fo, rekọ whọ be sae fo no egbegbe ra ha. Whọ te fo ho bẹsenọ ofu nọ me bi mu kẹ owhẹ o re hrẹ no.+
14 Mẹ omamẹ, Jihova, mẹ ta riẹ no. U ti rugba. Me ti ru oware jọ ababọ oma nọ me ti si kpemu, ababọ uweri, ababọ ẹda nọ o te da omẹ.+ A ti gu owhẹ ẹdhọ wọhọ epaọ idhere ra gbe iruẹru ra,’ ere Jihova Olori nọ Ọ Mai Kpehru na ọ ta.”
15 Ẹme Jihova ọ tẹ wariẹ bru omẹ ze, inọ:
16 “Ọmọ ohwo, mẹ be te rehọ ọghaghae ra vrẹ siọ owhẹ ba idudhe.+ Who re weri hi;* yọ whọ rẹ viẹ hẹ hayo kọ irui-oviẹ i re su no owhẹ aro ze he.
17 Who re dimẹ fihọ eva, yọ who re ru iruẹru uweri rọkẹ ọnọ o whu na ha.+ Gba etu-udhọfọ ra fihọ uzou,+ re who fi eviẹ ra họ.+ Who re ruru eto-enu* ra ha,+ yọ whọ rẹ re ebrẹdi nọ amọfa a rehọ se owhẹ hẹ.”*+
18 Mẹ ta ẹme kẹ ahwo na evaọ ohiohiẹ, aye mẹ o te whu evaọ owọwọ. Fikiere evaọ ohiohiẹ okiokiọ riẹ me te ru epanọ a jie uzi riẹ kẹ omẹ na dẹẹ.
19 Ahwo na a jẹ ta kẹ omẹ nọ: “Kọ whọ gbẹ vuẹ omai epanọ eware nana nọ who bi ru na i ro kiekpahe omai?”
20 Mẹ tẹ kẹ ae uyo nọ: “Ẹme Jihova o bru omẹ ze, inọ,
21 ‘Ta kẹ uwou Izrẹl nọ: “Enẹ Jihova Olori nọ Ọ Mai Kpehru na ọ ta, ‘Me bi ti zue aruẹri mẹ,+ onọ o be kẹ owhai orro gaga na, oware nọ o rrọ ghaghae kẹ owhai jẹ rrọ isiuru udu rai na. A te rọ ọgbọdọ kpe emezae gbe emetẹ obọrai nọ wha nyaseba na no.+
22 Kẹsena wha ve ti ru epanọ me ru na dẹẹ. Wha ti ruru eto-enu rai hi, yọ wha te re ebrẹdi nọ amọfa a rehọ se owhai hi.+
23 Itu-udhọfọ rai e te jọ uzou rai, yọ eviẹ rai e te jọ awọ rai. Wha ti weri hayo viẹ hẹ. Ukpoye, wha ti gbo kufiẹ fiki oruthọ rai,+ wha ve ti dimẹ kẹ ohwohwo.
24 Izikiẹl o zihe ruọ oka kẹ owhai no.+ Nwane epanọ o ru na, ere wha ti ru re. Okenọ o tẹ via no, wha vẹ te riẹ nọ mẹ họ Jihova Olori nọ Ọ Mai Kpehru na.’”’”
25 “Rọkẹ owhẹ, ọmọ ohwo, evaọ ẹdẹ nọ mẹ te rehọ oria adhẹzọ rai mi ai—oware erru nọ o be kẹ ae oghọghọ na, oware nọ o rrọ ghaghae kẹ ae jẹ rrọ isiuru udu rai na—jegbe emezae avọ emetẹ rai na,+
26 ọnọ ọ dhẹ vabọ ọ rẹ te niyẹrẹ kẹ owhẹ.+
27 Evaọ ẹdẹ yena who ti rovie unu ra whọ vẹ ta ẹme kẹ ọnọ ọ dhẹ vabọ na, who gbe ti fibo ho.+ Who ti zihe ruọ oka rọkẹ ae, a vẹ te riẹ nọ mẹ họ Jihova.”
Eme-Obotọ
^ Evaọ Hibru, “odẹ ẹdẹ na.”
^ Hayo “uwho nọ enu riẹ o rrọ kẹkẹe.”
^ Hayo “ẹkoko.”
^ Hayo “Whọ rẹ tehe igbama ra ha.”
^ Evaọ Hibru, “ebrẹdi ahwo-akpọ họ.”
^ Hayo “ugbunu obehru.”
