Izikiẹl 26:1-21
26 Evaọ ukpe avọ ikpegbọvo, evaọ ẹdẹ ọsosuọ amara na, ẹme Jihova o te bru omẹ ze, inọ:
2 “Ọmọ ohwo, fikinọ Taya ọ ta kpahe Jerusalẹm nọ,+ ‘Oye u woma! A raha unuẹthẹ nọ ahwo na a rẹ rọ ruọ eva na no!+ Oware kpobi u ti bru omẹ ze, me ve ti fe enẹna nọ a raha iẹe no na’;
3 fikiere enẹ Jihova Olori nọ Ọ Mai Kpehru na ọ ta: ‘Rri, mẹ te rọsuọ owhẹ, O Taya, yọ mẹ te rehọ erẹwho buobu ze te rọsuọ owhẹ, nwane wọhọ epanọ ẹkporo abade ọ rẹ wọ ze na.
4 A te raha igbẹhẹ Taya je kporo iwou ikpehru riẹ fihọ otọ,+ yọ mẹ te fọrọ ẹkpẹ noi je ru ei fihọ utho uriorio nọ u bi lo.
5 O ti zihe ruọ oria nọ a rẹ rriẹ esakrosa fihọ re e ya evaọ udevie abade na.’+
“‘Keme mẹ omamẹ mẹ ta riẹ no,’ ere Jihova Olori nọ Ọ Mai Kpehru na ọ ta, ‘o ti zihe ruọ oware nọ erẹwho na e te kwa rehọ.
6 Yọ a te rọ ọgbọdọ kpe ahwo nọ a rrọ iwhre* riẹ nọ e wariẹ e riẹ họ, ahwo a vẹ te riẹ nọ mẹ họ Jihova.’
7 “Enẹ Jihova Olori nọ Ọ Mai Kpehru na ọ ta: ‘Rri, mẹ be rehọ Nebukadneza* ovie Babilọn no obọ ẹkpẹlobọ ovatha-ọre ze te rọsuọ Taya;+ ovie ivie ọ rrọ,+ o wo enyenya,+ ekẹkẹ ẹmo,+ egbaẹmo nọ e be dhẹ enyenya, gbe ogbaẹmo nọ u wo isoja* buobu.
8 Ọ te rọ ọgbọdọ raha iwhre ra nọ e wariẹ owhẹ họ, yọ ọ te ma ugbẹhẹ jẹ ma ugbuhru ro ko owhẹ họ jẹ kpare ojese ulogbo rọsuọ owhẹ.
9 Ọ te rehọ ite-ire riẹ nọ a re ro zurie ugbẹhẹ fihọ otọ* duwu igbẹhẹ ra, ọ vẹ rehọ iwhe* riẹ kporo iwou ikpehru ra fihọ otọ.
10 Enyenya riẹ i ti bu te epanọ ovu rai o ti ro ruru owhẹ, yọ edo egbaẹmo riẹ nọ e be dhẹ enyenya, etẹ na, gbe ekẹkẹ na i ti ru igbẹhẹ ra nuhu okenọ ọ te ruọ eva inuethẹ ra, wọhọ ezae nọ i bi thihi ruọ okpẹwho nọ igbẹhẹ riẹ i kporo no.
11 Ekothawọ enyenya riẹ i ti thihi iyẹrẹ ra kpobi nyaotọ;+ ọ te rọ ọgbọdọ kpe ahwo ra, yọ ipila ilogbo ra i ti kporo fihọ otọ.
12 A ti tho ekwakwa efe ra, kwa eware eki ra rehọ,+ kporo igbẹhẹ ra fihọ otọ, je zurie iwou iwowoma ra fihọ otọ; kẹsena a ve ti gbolo itho ra gbe eware ra nọ whọ rọ ire ru gbe ẹkpẹ ra fihọ ame na.’
13 “‘Me ti ru edo ile ra serihọ, yọ a gbe ti yo edo ekpata ra ofa ha.+
14 Me ti ru owhẹ fihọ utho uvevẹ nọ u bi lo, who ve ti zihe ruọ oria nọ a rẹ rriẹ esakrosa fihọ re e ya.+ A te wariẹ owhẹ bọ vievie he, keme mẹ omamẹ, Jihova, mẹ ta riẹ no,’ ere Jihova Olori nọ Ọ Mai Kpehru na ọ ta.
15 “Enẹ Jihova Olori nọ Ọ Mai Kpehru na ọ ta kẹ Taya: ‘Kọ ikoliko na i gbe ti nuhu avọ ozọ nọ a ti yo edo ekie ra, okenọ enọ i bi whu* na i ti dimẹ, gbe okenọ a ti kpe ahwo evaọ eva ra?+
16 Ikpahwo-esuo* abade na kpobi i ti nwrotọ no egbara-uvie rai ze, a vẹ ba iwu ithethei rai* no jẹ ba iwu rai nọ a zuo eware onaa họ no, yọ iguegue i ti kpe ai no.* A te keria otọ je nuhu ọvo, yọ a bi rri owhẹ avọ igbunu.+
17 A te so ole uweri+ kpahe owhẹ jẹ ta kẹ owhẹ nọ:
“Rri epanọ a raha owhẹ no,+ whẹ ọnọ ahwo obọ ebade na a jẹ rria eva riẹ, okpẹwho nọ a je jiri na;Whẹ avọ ahwo ra* nọ a jẹ rria eva ra wha jọ gaga evaọ abade na,+Wha jẹ whẹ idudu họ ahwo kpobi nọ a be rria otọakpọ na oma!
18 Ikoliko na i ti nuhu evaọ ẹdẹ ekie ra,Ikoliko abade na e te rova nọ whọ tẹ vrẹ no.”’+
19 “Keme enẹ Jihova Olori nọ Ọ Mai Kpehru na ọ ta: ‘Okenọ mẹ te raha owhẹ muotọ wọhọ ikpewho nọ ahwo a be rria ha, okenọ me ti ru ame nọ o bi fi ẹkporo wọ ruru owhẹ, nọ ame obuobu na o je le owhẹ no,+
20 mẹ te rehọ owhẹ avọ ahwo nọ a bi lele owhẹ kpobọ ọgọdọ* na bru ahwo nọ a whu no oke krẹkri nọ u kpemu; me ti ru owhẹ jọ oria nọ o mai kpotọ, wọhọ eria oke anwae nọ a raha no, kugbe ahwo nọ a bi kpobọ ọgọdọ na,+ re a gbẹ rria eva ra ha. Kẹsena me ve ti ru ẹkwotọ enọ e rrọ uzuazọ na wo oruaro.*
21 “‘Mẹ te whẹ idudu họ owhẹ oma idudhe, yọ whọ gbẹ te jọ họ.+ A te gwọlọ owhẹ, rekọ a gbẹ te ruẹ owhẹ ofa ha,’ ere Jihova Olori nọ Ọ Mai Kpehru na ọ ta.”
Eme-Obotọ
^ Evaọ Hibru, “emetẹ.”
^ Evaọ Hibru, “Nebukadreza,” oghẹrẹ ofa nọ a kere i rie.
^ Evaọ Hibru, “ahwo.”
^ Hayo “okwakwa riẹ nọ ọ rẹ rọ họre.”
^ Hayo “egbọdọ.”
^ Evaọ Hibru, “enọ a kpe.”
^ Hayo “Isu.”
^ Hayo “ikotu rai nọ i wo abọ họ.”
^ Evaọ Hibru, “a ti ku iguegue họ oma.”
^ Evaọ Hibru, “Ọyomariẹ avọ ahwo riẹ.”
^ Hayo “uki.”
^ Hayo “erru.”
