Izikiẹl 27:1-36
-
Ole uweri kpahe okọ Taya nọ o bi zue (1-36)
27 Ẹme Jihova ọ tẹ wariẹ bru omẹ ze, inọ:
2 “Rọkẹ owhẹ, ọmọ ohwo, so ole uweri jọ kpahe Taya,+
3 re whọ ta kẹ Taya nọ,‘Whẹ ọnọ ọ be rria inu nọ a rẹ rọ ruọ abade na,Ọnọ ọ rrọ ọgba-ọhreki kẹ ahwo ikoliko buobu,Enẹ Jihova Olori nọ Ọ Mai Kpehru na ọ ta:
“O Taya, whẹ omara whọ ta nọ, ‘Me wo erru gaga.’+
4 Ekwotọ ra e rrọ udevie abade na,Yọ enọ i ku owhẹ i ru owhẹ wo erru gaga.
5 Ire junipa obọ Sina+ a ro ru ewẹ ekpala ra kpobi,A tẹ rehọ ure sida no obọ Lebanọn ze ro ru ọkpọ okọ fihọ owhẹ.
6 Ire ok obọ Beshan a rọ kare ivi ra,A tẹ rọ ure siprẹs nọ a rọ akọ-eni obọ ukoliko Kitim+ ruru oma riẹ ro ku ẹruokọ ra.
7 Ohọ-olọlọhọ ekọlọ sa-sa nọ a rehọ no obọ Ijipti ze a ro ru ẹwẹ-ohọ okẹkẹe nọ a thuru fihọ owhẹ,Yọ ehọ iburu avọ iwhulu ogorurẹ obọ ikoliko Elaeshah+ e jọ ehọ nọ a rọ hwa ehru ra.
8 Ahwo nọ a jẹ rria Saedọn avọ ahwo nọ a jẹ rria Avad+ họ enọ i je bi owhẹ.
Ahwo obọra nọ a wo onaa họ ekpokọ nọ e jẹ kpọ owhẹ, O Taya.+
9 Ezae Gibal nọ e riẹ iruo ziezi*+ je wo onaa họ enọ i je di ighogho ra.+
Ekọ ilogbo abade na kpobi avọ enọ i je bi ai a nyabru owhẹ ze te zẹ eware eki.
10 Ezae Pasia, Lọd, gbe Put+ e jọ ogbaẹmo ra, ezae nọ i re kpohọ ẹmo.
A jẹ ejese gbe itu-egaga rai fihọ owhẹ, a tẹ whẹ erru họ owhẹ oma.
11 Ezae Avad nọ e jọ ogbaẹmo ra i dikihẹ wariẹ igbẹhẹ ra họ,Ezae udu i dikihẹ iwou ikpehru ra.
A jẹ ejese igheghelie họ igbẹhẹ ra wariẹ họA te ru owhẹ wo erru gaga.
12 “‘“Tashish+ o je lele owhẹ thueki fiki efe obuobu ra.+ A jẹ kẹ owhẹ isiliva, ayọno, itini, gbe elẹdi ro nwene eware ra rehọ.+
13 Jevan, Tubal,+ gbe Mishẹk+ a je lele owhẹ thueki, a jẹ kẹ owhẹ erigbo+ gbe ekwakwa ekọpa ro nwene eware eki ra rehọ.
14 Ahwo uwou Togama+ a jẹ kẹ owhẹ enyenya gbe enyenya ẹmo gbe isi ro nwene eware ra rehọ.
15 Ahwo Didan+ a je lele owhẹ thueki; whọ jọ ikoliko buobu fi egba-ihreki họ nọ e jẹ thueki kẹ owhẹ; akọ-eni+ gbe ẹlọ-obiebi a jẹ rọ hwa azọhọ kẹ owhẹ.
16 Edọm o lele owhẹ thueki fiki eware buobu nọ who wo. A jẹ kẹ owhẹ itho tọkwọes, iwhulu ogorurẹ, eware onaa nọ i wo ekọlọ sa-sa nọ a re zuo fihọ ehọ, ehọ iwowoma, ikoral, gbe itho rubi ro nwene eware ra rehọ.
17 “‘“Juda avọ ẹkwotọ Izrẹl a je lele owhẹ thueki, a jẹ kẹ owhẹ iwhiti obọ Minit,+ emamọ emuore, ọnyọ,+ ewhri, gbe balsam+ ro nwene eware ra rehọ.+
18 “‘“Damaskọs+ o lele owhẹ thueki fiki eware buobu nọ who wo gbe ekwakwa efe ra kpobi, ọ jẹ rehọ enwaene obọ Hẹlbọn gbe iwhulu obọ Zeha* nwene kẹ owhẹ.
19 Vidan gbe Jevan nọ e rrọ Uzal a jẹ kẹ owhẹ ayọno ọlọlọhọ, kasia,* gbe uti ro nwene eware ra rehọ.
20 Didan+ ọ jẹ rehọ ehọ nọ a re fihọ ehru erao keria dhẹ* nwene kẹ owhẹ.
21 Whọ rehọ ahwo Arab gbe isu Kida+ kpobi iruo, enọ e jọ egba-ihreki nọ e jẹ zẹ imigodẹ, igbo gbe ewe.+
22 Egba-ihreki Shiba avọ Reama+ a je lele owhẹ thueki; a jẹ kẹ owhẹ oghoghẹrẹ eware nọ i re gbo ore isialẹ nọ e mai woma, itho eghaghae, gbe igoru ro nwene eware ra rehọ.+
23 Heran,+ Kanẹ, Idẹn,+ egba-ihreki Shiba,+ Asshọ,+ gbe Kilmad a je lele owhẹ thueki.
24 A jọ eki ra jẹ zẹ iwu iwowoma, itogbo nọ a rọ ehọ iburu ko gbe eware onaa nọ i wo ekọlọ sa-sa nọ a re zuo fihọ ehọ, gbe ekapẹte ekọlọ sa-sa, yọ a rehọ ifi gba aikpobi kugbe ziezi.
25 Ekọ ilogbo Tashish+ a jẹ rọ wọ eware eki ra,Ere ekwakwa efe e rọ vọ eva ra, whọ tẹ rrẹ totọ* evaọ udevie abade ọraragha na.
26 Enọ i bi bi owhẹ i bi owhẹ ziọ abade nọ ẹkporo o je bi fi no;Ofou ovatha-ọre o zue owhẹ fihọ udevie abade ọraragha na no.
27 Ekwakwa efe ra, eware ra, eware eki ra, enọ i bi bi owhẹ, gbe ekpokọ nọ e be kpọ owhẹ,Enọ i bi di ighogho ra, enọ e be rehọ eware nwene eware eki ra rehọ,+ gbe ezae nọ i re kpohọ ẹmo,+Koyehọ ogbotu* ahwo kpobi nọ a rrọ eva ra,Aikpobi a ti kiediwi evaọ udevie abade ọraragha na evaọ ẹdẹ ekie ra.+
28 Okenọ ekpokọ nọ e be kpọ owhẹ i ti bo via, ekwotọ nọ e rrọ akotọ abade na i ti nuhu avọ ozọ.
29 Ahwo kpobi nọ a rẹ rọ ivi bi ekọ, enọ e rẹ kpọ ekọ, gbe enọ i re ruiruo evaọ ekọA ti nwrotọ no ekọ ilogbo rai ze, a ve dikihẹ okpa.
30 A ti bo jẹ viẹ gaga fiki ra+Nọ a be whẹ ovu fihọ uzou rai jẹ be rọ oma wholo enwo na.
31 A te fọrọ uzou rai fihọ rioriorio, a ve ku ehọ-ekpa* họ;A te viẹ gaga fiki ra avọ enu oviẹ ọgaga.
32 Evaọ oke enuobro rai, a te so ole uweri jẹ ta kpahe owhẹ nọ:
‘Ono ọ wọhọ Taya, ọnọ ọ fọ rirẹ no enẹna evaọ udevie abade na?+
33 Okenọ eware ra i je no obọ abade ọraragha na ze, who je ru ahwo buobu eva were.+
Efe obuobu ra avọ eware eki ra i ru ivie otọakpọ na fe.+
34 Enẹna who zue fihọ abade ọraragha na no, evaọ ame odidi na,+Yọ eware eki ra kpobi avọ ahwo ra a lele owhẹ kiediwi no.+
35 Ahwo kpobi nọ a be rria ikoliko na a te tẹrovi owhẹ avọ igbunu,+Enọ e rrọ ivie rai i ti nuhu avọ idudu+—ovao rai u ti sihọ.
36 Egba-ihreki nọ e rrọ erẹwho na e te fiunu fiki oware nọ o via kẹ owhẹ.
Urere ra o te ze idudhe jẹ jọ yoyoma,Yọ whọ gbẹ te jọ bẹdẹ bẹdẹ hẹ.’”’”+
Eme-Obotọ
^ Evaọ Hibru, “e kpako no.”
^ Hayo “iwhulu ogorurẹ.”
^ Nọ ure nọ o wọhọ ure sinamọn.
^ Hayo “iwu nọ a zuo.”
^ Hayo o sae jọ nọ, “who te je wo oruaro.”
^ Evaọ Hibru, “ukoko.”
^ Hayo “ehọ-ẹkporo.”